Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
СодержаниеОтвет на сии вопросы [344 и 345]. |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 344.
И оная печать, заключающая число 666, убо ли ныне всюду распространися в куплях и продаяниях, понеже он (си есть антихрист) всюду распространити потщися?
Вопрос, 345.
И аще уже оная распространися, и на челе и на десней руце (заключающая число 666) дадеся, то кая сия? и от кого оная произыде? и кому дадеся? и в чем распространися? о всем сем тонкочастне Господа ради известите.
Ответ на сии вопросы [344 и 345].
В сих убо твоих сугубых вопросех пятогубное предлагается вопрошение.
1-е: Кая сия печать антихристова?
2-е: О кого оная произыде?
3-е: Кому дадеся?
4-е: В чем распространися?
5-е: Всюду ли распространися?
И тако по чину твоих истязаний, аще последнее и из перваго взято, в кратчайших беседах сице ответствуем.
Первое: Понеже мы везде должны поминати блаженнаго Ипполита. Ибо той, с ним же и преподобный Ефрем, антихристово действотворение на подобие Христово быти извествуют, якоже в варивших ответех многажды о сем упомянухом. Убо в вышшем ответе довольно от свидетельств священнаго писания подтвердихом, яко Христова печать многоразлична и в многоразличных действиях и вещех заключаема. Яко се глаголется печать крест Христов: глаголется крещение и прочия церковныя таины: глаголется же и вера православнокафолическая печатию. И якоже в деятельных, тако и в видительных печать Христова суть заключаема. Сице убо и печать антихристова в подобообразных вещех и действиях имать заключатися и рапространятися во всех его действиях и вещех, якоже о сем ниже в 4-м показании известится.
Второе: От кого же сия произыде тобою истязуемся. На сия 1-е отвещаем.
Блаженный Иоанн Богослов, во Откровении своем, во главе 16, о излиянии фияла от 1-го агела сице пишет: "яко 1 ангел излия фиял свой на землю, и бысть гной зол на человецех, имущих начертание зверино, и кланяющихся образу его". А в толковании того стиха протолкуется: "яко сие бысть во время первыя печати, егда июдеи твердовыи ослепоша, на них же бысть начертание зверя, сиречь дух антихристов". И в белорусском малом Апокалипсисе: "гной зол, затверденье сердца жидовския. альбо першее оскорбление церкве, за Христа и за апостол". Божественный же Златоуст в 3-м слове о июдеех глаголет, что есть запечатлетися? яко ничесому же остати прочее. До зде Златоуст.
Зри убо от кого первее начертание, или печать произыде уже, яко от июдеов, последовательне яко и от прочих еретиков, и от отступников (иже сии могут за антихриста рещися) уже произыде. Еже мы за долготу о излиянии всех фиалов, мимо грядем, точию о третием и пятом помянути к ключимому зде имамы. "И третий ангел (глаголет Иоанн Богослов) излия фиал свой на реки и на источники водныя, и быша кровь", и проч. Инаго толкования: "реки и источники водныя многажды писание наричет учение Господне, текущее от источника животнаго Господа нашего Исуса Христа. яко же сам рече: аще кто жаждет, да приидет ко Мне и пиет воду живу. апостол же учителей ложных наричет облаки безводныя сии же реки и источницы суть еретическая учения, плотская мудрствующе, и писание неправо сказующе: еже многажды сих и кровию наричет". Еще иное толкование: "еще же сим третием ангелом и излиянием фиалы его, являет смущение церкви Божией от ариан и прочих еретиков". "И пятыи ангел излия фиал свой на престол зверин, и бысть царство его омрачено. и жваху языки своя от болезни, и хулиша имя Бога небеснаго от болезни и язв своих, и не покаяшася от дел своих". Инаго толкования: "Являет же сим пятым ангелом, и излиянием фиалы его на престол зверин, сиречь на престол царства на востоце солнца Констянтинопольскаго, прежде наричемо Византии, воньже царь Констянтин от Рима престол свой пренес. егда же измаильтяне царство на востоце удержаша, в то время исполнися сие пророчество сего святаго евангелиста, иже глаголет: и пятыи ангел излия фиал свой, и бысть царство его омрачено, сиречь сквернаго Махмета и нечестивым неверием его". Вышше же вкупе о всех 7-ми ангел, и о разверзении печатей, и излиянии фиал, толкуется во втором толку, яко сие значит всех гонителей церкви Божией. До зде о фиалех.
Зри убо о сих, яко не на единех июдеех сие збудется, еже им начертание зверево прияти, но и на всех гонителей церкве Божия, еретиков и иных противников и отступников Божиих. И яко от всех сих печать антихристова широко распространися, и распространитися имать.
А еже како оная (печать антихристова) на число 666-е, по проречению блаженнаго Ипполита папы Римскаго [Соборник, лист 132], в здешних северных странах, в части Афетовой, распространися, о том яве познавается от сих великороссийския нынешния церкве действ и умствований. Ибо она, всеблагодатное двоперстное сложение, в нем же святии все добре веры таинство, самыя глаголем святыя и покланяемыя Троицы, и страшное Бога Слова вочеловечение, всеусердно исповедаху. Сие многобогатное обою таинств всесвятейшее исповедание, бывший Никон патриарх, злодерзестне с клятвословным поречением, и неисчетно презельным ругательством отвереже [Скрижаль, Соборн. свиток, Жезл, Предисловие в Служебнике, Предисловие Псалтырей]. И вместо того предаде знаменатися треми персты, в них же исповедание нововзаконенное изнесе, Троицу и воплощение в трех перстах истолкова, противно древлеправославной церкви, ратоборно со святыми богословцы предавшими вышеписанное перстов сложение, и в нем дву превеликих таинств исповедание. К сему же и на сем всеблагодатнем таинстве, дву естеств Бога Слова изображающем, оле дерзости, имя демонское написаша, и от черта сицевому великотаинственному изображению сказаша. Сие же ариевою пропастию, и волшебным знамением порекоша: и знаменающихся сицевым знамением, со дияволом осудиша [Розыск, глава 26. Обличение, лист 26. Увет, Обличение, Соборн. свиток, печати Иоакима патриарха. Соборн. деян. Предисловие Псалтырей].
А еже своим треперстным знамением на себе не крест Христа Спасителя, на нем же Его всеспасительная смерть содеяся, по святым богословцем воображати и таинства совершати, залогом веры умствуют: но некое четверторожие (сиречь четыре конца) изображающе, на себе печатлеют. Еже сице глаголюще [Предисловие Псалтырей. книга Жезл, лист 65. Камень, часть 2, глава 3, лист 253. Розыск]: "егда, рече, полагаем на главу, еже касается вышшии рог креста. егда же на чрево, нижний рог креста. тако же и на правое плече и на левое, еже знаменует оба конца". Сие же четвероконечие и в прочих своих тайнах: в крещении, миропомазании, в евхаристии и священстве, и иных, во освящении и в совершении, быти вероумствуют. Убо и сие их новопредание, елико святым богословцем, самый крест Христа Владыки на себе воображати научающих, противно [Ефрем, слово 102. Златоуст, в неделю 3 поста. Кирилова. Иосиф Фессал. Феодор]: еже исповедающим пречистаго Владыку страдавша не на виде некоем четвероконечия. толико и богогласнаго Исаии проречению на тредревесном, и по святых в четвертых имущем дщицу положенную, весьма несогласно: его же святая церковь воспевающи четверочастна, трисоставна, трисложна, и Троицы трисоставныя образ в себе носяща, исповедаше. Того святии учители, победоносное оружие на диявола, и на вся онаго противныя силы, похвалу же похвалам, и вышше всех похвал именоваху. Тем убо, яко образ живоначальныя Троицы носящим, всем тайнам: крещению, миропомазанию, и хиротонии, и иным всем вещем и действиям, освящатися и совершатися исповедаху. Сие убо видотворение на просфирах, уготованных к совершению пречистаго тела и животворящия крове, полагаху, и под сим пречестнейшим видотворением агньца закалаху. Ныне же оное всестрашное видотворение, от приносимыя просфиры на заклание агньца, вседерзостне отвергше, и с поречением впредь сему на просфирах полагатися отрекоша, глаголюще сице: "под сицевым воображением креста, не может быти истинное тело, и истинная кровь" [Соборный свиток, Присяга, Служебник новопечатный]. Вместо же того предаша просфоры печатати видом креста двочастнаго, с печатию четвероугольною, и надписанием Иисус. Исповедающих же согласно со святыми, тайнам совершатися трисоставным крестом Христовым, неисчетным клятвам и тяжчайшим анафемам предаша [Соборный свиток, Присяга, Соборн. деян. на Мартина еретика]. И прочая множайшая, паче же бесчисленная, нынешних никонопоследствующих учителей, на двоперстное сложение, и на трисоставный Христов крест, и на прочее церквосодержание, хуление и проклятие, за множество писати оставляем: изволяяй, да чтет 21 и 44 ответы. Иная же клятвохуления на древлепреданная содержания и таинства, в 353 ответе (о отрицании печати Творца неба и земли) изъявятся.
Темже явственно зде, збывшееся проречение Ипполита папы Римскаго, показуется на сих ратников Христовой печати и таинств церковных, сице глаголющее: "и даст тем льстец мало снеди, печати ради своея скверныя. и число печати его 666" [Соборник, лист 136].
Третие: А еже истязуеши, кому печать антихристова ныне дадеся? Отвещаем. Всем тем дадеся печать антихристова, кия имя отступническое на себе носят, и законом еретическим усердне последуют. Древлепреданное же самем Спасителем Исус Христом, и святыми апостолы, и учители церковными, со отвержением и клятве предают, яковии суть латыняне, люторцы и никонияне. Но и сии не не приемлют же печать сквернаго богоборца, иже от тех полученная тайнодействия, за святыя и правильныя почитают: якоже поповщина, в ней же и ты пребываеши: диаконовщина, старцовщина, нетовщина, ладожане: и прочии таковии, иже глаголются бегати от оных новопредания, а от тех тайны со усердием приемлюще, и с неприемлющими ратоборствуют. О сих бо явственне святый Ипполит глаголет [Срборник, лист 134]: "вси бо (рече) воеже бежати и скрытися тщатся, и нигде же возмогут убежати с пути сопротивнаго. но знамение его обносяще, удобь ведоми и знаеми тому явятся". И во Апокалипсисе о сих же глаголется [Апокалипс., глава 11, зач. 30 и 37]: "имя же пагубнаго на сердцах своих, яко честно начертавающе". Но о онех же в последующем ответе подобная возглаголется, ныне же грядем к показанию явленнейше рещи, в чем печать антихристова распространися.
Четвертое: Возлюбленный ученик Христов, во Апокалипсисе, во главе 37, пишет сице: "Даст начертание на десней руце их и на челех их, да никто же возможет купити ни продати, разве кто иматть начертание, или имя зверя, или число имене его". Толкование, ниже: "Начертание пагубнаго имене отступник на вся наложити потщится. на десницах, да добрых дел отсечен детели. на челех же, да научит в лести и тме прельщенныя дерзати. но не приимут его знаменании на лицах божественным светом. и число зверя распространити везде начнет, в куплях же и продаяниях", и прочая. Зде убо куплю и продаяние Богослов не внешнюю и чювственную назнаменовал, но духовную. Якоже и в толковании, что есть начертание на десных руках и на челех, явствуется. Не бо протолковася, по вашему мнению, чювственное некое пятно имети, покаряющимся антихристовым уставом, но отсечение добрых дел, и дерзостное во антихристовой прелести утверждение. И не чрез едино сие сказуется антихристовой печати восприятие, но чрез многия действа и вещи. И не едина сия глаголется быти, но многообразна. Якоже о различии печати антихристовой в 333 ответе глаголахом. Сице и о купле и о продаянии не о внешней и чювственной разумей, но духовное и мысленное. Еже бы купити, о сем Исаия глаголет: "и елицы не имате сребра, шедше без цены купите". О продаянии же: "сребро Мое даждь торжником, глаголет Господь. и купити, си есть научитися. давати же или продавати: учити". Темже и святый Богослов назнаменует, еже не о чювственной и внешней, но о духовной. Кая есть внешняя зде купля или продаяние? Аще от внешних глагол сей надлежит, то слыши вещающа апостола. "Писмо убивает, а Дух живит". Ибо купля деяти предана от Христа пастырем, получившим власть от хиротонии. Якоже вещает богогласный Лука [зач. 95]: "и призва десять раб, даде им десять мнас, глаголя: куплю дейте, дондеже прииду". На которое толкование творит святый Феофилакт [Благовестник, зач. 95, лист 206]: "рабом же своим десять мнас вда, раби же имже церкви поручи". И нижше: "Тем убо рабом раздавает десять мнас, дары реку, и комуждо даются на пользу". Посему тем куплю деяти, сиречь учити, и наставляти, или таинства раздавати дается. Прочее убо, якоже божественнейший вещает Ипполит, по всему убо хощет уподобитися льстец Сыну Божию: "и яко посла Христос апостолы, и той подобне послет ложныя апостолы. и яко Христос предаде строити пречистыя тайны наследником своим, и той подобне соберет". И паки: "И дарует тем (прельстившимся) льстец малы снеди, печати ради своея скверныя". Посему яве есть, яко купля и продаяние, еже учити и учитися, и восприятие тайнодействии. Темже и глаголет Андрей Кесарийский: "да не приимшым сие, от оскудения нужных насильная смерть приидет".
Пятое: Всюду ли печать антихристова распространися вопрошаеши? На что и отвещаем вкратце. Но где ныне царство антихристово не распространися: на западе ли? оное есть. На востоце ли? оное суть. На севере ли? И тамо по числу, еже о нем на 666-е, уже власть свою восприя. Что же рещи имам о юге, идеже Махометово царствие, идеже Персия и иныя государьства, не тому же ли ярму антихристову подклонишася. Убо и антихристову печать не чювственную, но мысленную, покаряющияся ему приемлют. Якоже премудрый Максим Грек, в толковании притчи о антихристе, глаголет: "О антихристове рожестве и явлении (весь) мир радуется: сиречь ожидающии его жидове, измаильтяне, и татарове, и вси имже подобни безвернии людие, мир нарицаемии". Глава 86. Прочее же о отступлении западных и северных стран, и о покорении антихристу, в 368-м ответе и в прочих рещи имамы.
Вопрос, 346.
Блаженный Ипполит, о приемших печать антихристову, прорицает сице: "яко таковому покаяния несть. всяко убо яве есть, яко погибе от Бога и от человек". Подобне преподобный Ефрем Сирин прорицает: "яко вси, приемшии печать антихристову, не имут части во второе Христово пришествие, но со змием вложени будут в геену". Вы убо о приемших печать антихристову како разумеете: будет ли таковым покаяние, или ни?
Ответ, 346.
В варившем 343-м, в первом показании явихом, яко во святей церкви печать глаголется крест Христов и крещение, и прочия тайны: убо и у антихриста тыя же тайны обретаются, якоже и ныне в великороссийской церкви. Приемшии же печать, яве яко по новопреданию его крестившиися, и тое крещение яко истинное приемлющии, якоже нетовщина, поповщина, ладожане, и прочии, якоже и в вышшем ответе показахом. Из них же овии мняще оное покаяние навершити, инии же единым точию разделение, а вы чрез миропомазание, неправильно действуемое, и паки иначе оное совершити мечтаете. О сем бо явственне приснопомнимый святый Ипполит глаголет [Соборник, лист 134]: "Вси бе (рече) воеже бежати и скрытися тщатся, и нигде же возмогут убежати с пути сопротивнаго. на знамение его обносяще, удобь ведоми и знаеми тому явятся".
И во Апоскалипсисе о оных сице пишется: "имя же пагубнаго на сердецах своих яко честно начертавающе".
Темже о таковых глаголют Ипполит и Ефрем, яко покаяния сим несть, понеже они обретаются под знамением прелестника антихриста, си есть его крещением. Ибо не точию антихристово крещение суть мерзско и неприятно, и не крещение есть: но и еретическое крещение несть крещение, но паче осквернение, якоже о сем довольно в 44-м ответе и в прочих писахом. Убо таковому и несть покаяния, понеже он не имеет истиннаго Христова знамения святаго крещения, ибо покаяние по крещении бывает. Якоже о сем в Катихисисе, во главе 64, о тайне покаяния, сице вопросоответствует: "Вопрос. Что есть покаяния тайна? Ответ. Покаяние есть вторая дщица по разбиении крестильнаго корабля, и нуждно потребная тайна согрешившым", и проч. Зри убо, яко покаяние есть по крещении. Обретшийся же под богопротивным знамение (си есть крещением) антихристовым, како могут иметь покаяние, аще бы они и усердствовали покаятися: паче же тии, кия по сему знамению еще и спастися надеются. Сии бо всячески, по Ипполиту, от Бога и от человек погибоша.
В толковании же Апокалипсиса, некрещеннии за умерших умне вменяются быти [Апокалипсис, зач. 62]. Отреченнии убо (рече) и не оплаканнии мертвецы сии суть, не спогребшиися и не совоскресшии Христови крещением, но пребывшии во умерщвлении. Антихристовым же знамением (си есть крещением) знамененнии, не воскреснуша со Христом, но со антихристом умершии суть, убо яве погибоша от Бога и от человек. Златый же языком о некрещенных сице глаголет: "яко некрещенныи (рече) аще и безчисленное имея исправление умрет, в гееену отходит". И паки: "мертвыи не крещен, и прежде суда осудится". И паки той же: "плачися, иже ничто же онех отстоящих, иже без просвещения отходящих, иже без печати. сии воистинну плачев достойни суть, сии вопля, сии вне царских суть, со осужденниками с повинными казни" [Беседы евангельския, на Иоанна в беседе 25. Маргарит, слово 1 о оглашенных, и слово о умерших].
Повествует же и святый Афанасий о верных, от крещения печатлеемых, сице [В Лимонаре]: "слышахом от древних, яко при блаженнем священномученице Петре, бывшу мору, и мнози прихождаху ко крещению страха ради смертнаго. и явися блаженному некии во образе ангельстем, глаголя: доколе посылаете семо влагалища печатлена тща, и ничесо же имуща". Аще убо вернии печатлеются от святаго крещения, и печать царскую, си есть Христову, имеющии показуются: и сея ради аще и прегрешат в чем, покаяние чрез Него получают, и разрешаются от грехов. Имеющии же печать антихристову (си есть запечатлевшиися в крещении его) не тако суть: но таковым и несть, по Ипполиту покаяния: по Ефрему же, со змием вложени будут в геену огненную [Ефрем, слово 105]. К сим же некрещенный и не может Бога Отцем нарицати, якоже о сем во учительном евангелии пишет [Евангелие учительное, в неделю 6-ю]: "тако убо и мы братие, не прежде убо можем Отца нарицати Бога, дондеже в купели крещения и покаяния отмыем. егда же оттуда взыдем, лукавое оное время отложше, тогда глаголем Отче наш, иже еси на небесех". Еще же 343-го ответа во втором показании изъявихом, яко от крещения и крестное знамение православному християнину препоручается.
От антихристова же знамения, или крещения произшедшым, ниже Бога Отцем нарещи возможно: ниже крест Христов двоперстным сложением, с проображением в нем таинств, на себе вообразити удобно: ниже и покаяние учинити возмогательно суть. Но таковому, якоже связана рука его сею печатию (антихристовою) есть, тако и покаяние, аще ли от оныя не потщится избежати, (чрез получение истинной Христовой печати) несть, о чем в приходящем ответе изъявити потщимся.
Вопрос, 347.
И аще оную продаему быти ныне сказуете, то како оных, [по вашему мнению] уже приимших печать антихристову, приемлете? и чим оную заглаждаете, понеже таковому покаяния несть, якоже предсказася? явите и о сем от святаго писания.
Ответ, 347.
Что есть печать Христова, и колико образна есть, о сем в 344-м ответе явихом. Такоже, что есть и антихристова печать, показахом. А понеже и крещение в церкви Христовой нарицается печать, убо и антихристова печать, от него даемое крещение, печатию может нарещися. Темже и загладити оную ничим же возможно есть, точию печатию Христовою, еже есть святым крещением, от правоверных действуемым. А понеже Богослов во Апокалипсисе глаголет о не имущих печати Христовой (яве яко о имущих печать антихристову) сице: "иже не имут печати Божия на челех. речено бысть им да не убиют их, но да муку приимут 5 месяц. и мучение их яко мучение скорпиево, егда усекнет человека". Толкование инаго: "Иже глаголет не имут печати Божия, сиречь невернии не крестишася во имя Отца и Сына и Святаго Духа, и не знаменани знамением честнаго креста, над сими власть имеет диявол" [Трехтолков. Апокалипс., глава 26]. Како же от сия язвы, си есть от печати антихристовы, избавляются, или оную заглаждают, о том в вышепредложенном Апокалипсисе святый Богослов тако пишет: "по сих видех, и се народ мног, егоже исчести никто же не может, от всякаго языка и колена и людей и племен. стояще пред престолом и пред Агньцем, облечены в ризы белы. [Ниже:] Сии суть, иже приидоша от скорби великия, и испраша ризы своя, и убелиша ризы своя в крови Агньчи". На сие же в трехтолковом сице толкуется: "и убелишася (рече) ризы их в крови Агньчи, сиречь крестишася во имя Отца и Сына и Святаго Духа, и очищени суть кровию Агньчею". Последственне сему, еже како антихриста попрати, и чим силу онаго разрушити, сирский глас возглашает сице [Ефрем, слово 105, лист 299]: "щит веры восприимем вси, и почерпнем с любовию от Божия источника, упование глаголю возлюбленнии, Троицу единосущну сущу источник, источающу жизни. аще бо оградится тацем оружием наша душа, то попран будет змий посреде".
Что же суть щит веры? О сем блаженный Никита Ираклийский, в толковании словес Григория Богослова, изъясняет сице [Григорий Богослов, слово 2 на святое Просвещение, стих 16]: "предложи щит веры, еже есть крещение, егоже обнажает тя враг. не попусти его прияти, да тя яко безоружна победит".
А еже антихристовы поклонницы, прельстившиися от онаго, како от него действа за сущия и святыя почитати имуть, о том Кирил Иеросалимский аллегорическии сице назнаменует [Кирилова, знамение 10, лист 50]: "иже (рече) многия начнут видяще мертвых воставших, а они не восташа. и слепых прозирающих, а здравия не будет".
Подобне и во Апокалипсисе пишет [Апоскалипсис, лист 59]: "чюдо еже во антихриста являемое в прелести, действующаго в нем диявола привнесение имети будет. чрез онаго бо змий покланяем будет. имже и мертвыя воскрешая, и знамения творя, ослепленным мысленныма очима явится".
В Великом же Катихисисе, что есть духовное воскресение, вопросоответственне протолкует сице [глава 15]: "Вопрос. Что есть духовное воскресение? Ответ. Духовное воскресение есть, еже ожити от мертвых дел крещением, и востание от грехов".
Зде убо в предложенных ясно показася, яко печать есть Христова крещение, убо и антихристова печать крещение же его есть. Яко над не имущими печати Христовой власть имеет диявол. Яко иже от скорби антихристовой пришедший, и убеливший своя ризы, быти святым крещением глаголются. Яко святое крещение щитом веры и оружием на антихриста извествуется. И яко сим оружием попирается сей змий, прельщающий народы. Яко и антихристововы поклонницы от его крещения мнят свое востание, или оживление от грехов: но не суть оживление, но умерщвление быти сказуется. И яко оживление сущее от грехов, или воскресение, от истиннаго крещения бывает.
Темже Божиею помощию и разрешихом твое вопросозадание (мнящееся по тебе быти не решимое) правыми перстами святаго писания.