Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 335.
В Синоксаре, в неделю мясопустную, повествует сице: "преди же его пришествия (си есть Христова) приидет противник Христу". Подобне и Ипполит Римский: "воистину от колена Данова хощет родитися противник". Соборник, лист 126 на обор. Вы сие свидетельство святых отец приемлете ли?
Ответ, 335.
Приемлем мы сие святых отец свидетельство, но яко не существенне писано быти разумеваем, но иносказательне. Сего ради сия их словеса не тако прииматися летьствуют, но требуют с прочими священнаго писания сношения, и разумнейшаго толкования, якоже и в вышшем ответе от святаго Афанасия указахом. Аще же кто по писмени разумеет, сей имать умертвитися духовне и в ересь впасти. Указахом же и толковников апокалипсических таин, яко они тамо, сказанное ангелом о дванадесяти колен Израилевых, не чювственное быти протолкуют, но прообразовательное. Засвидетельствовахом же кратко и о Дане, и от него происходящем колене, еже от него антихристу произыти, сказуется не чювственное же быти. Но якоже той же святый Ипполит не чювственное рождение антихристу быти описует, но по приведению, того ради и прочии церковнии учители разная описания антихристову рождению дают: не от единаго Данова колена, но от многих.
1: Иеремия пророк глаголет родитися антихристу от Дана, по оному: "спех от Дана услышим, борзостию коня его потрясется вся земля".
2: Моисей глаголет родитися антихристу от Васана, по оному: "скимен львов Дан, искочи от Васана".
3: Даниилу пророку показано, родитися антихристу от четвертаго зверя, по оному: "и видех рог мал восходящь, имея уста хульна".
4: Пророк Иосия глаголет родитися антихристу от пустыни, по оному: "во дни оны наведет Господь ветр жгущь от пустыни на ня (сиречь на церковь)".
5: Во Окровении явлено Иоанну, родитися антихристу от моря, по оному: "и видех зверя, восходяща от моря".
6: Ипполит же святый родитися антихристу аки бы от девицы, а во ином глаголет от жены.
7: Афанасий Великий родитися антихристу сказует от жены, седящей на звери конканном седмоглавом.
Убо по сицевому различному описанию святых пророк и святых отец, како именно сказати возможно лице или колено, от него же имать антихрист родитися. А понеже оно рождение, якоже выше от Ипполита рехом, не чювственно имать быти, убо не чувственно же от Данова колена может произыти. Понеже разумный Дан (якоже и в вышнем ответе указахом) змий диявол, сказуется (по толкованию Андрея Кесарийскаго) на кончину ожити, действуя знаменьми и дивесы прелестными, чрез антихриста, отвержение и запрение креста. Яве от сих, яко не чювственный Дан, или чювственный змий: но разумный Дан и змий диявол, в проуготованных себе сосудах, си есть злых человеках, ожити имать, еже есть волю свою ими творити удобь возможет. Якоже бо и Христос ко июдеом рече: "змиеве, порождение ехидново, како убежите суда огня геенскаго". Обаче не чювственных змиев, порожденных от ехидны по естеству, нарицает Христос июдеов, но явственно яко ехидна не может родити по естеству человека, иже по образу и по подобию Божию одушевленнаго. Но суть разумнии змиеве, льстящия люди июдеи, порожденныя от разумныя ехидны диявола, не естеством, но действием произволения. По реченному апостолом: "творяй правду, от Бога раждается. творяй же грех, от диявола есть". И другий апостол глаголет: "породи нас банею паки быти". И паки: "благовествованием Аз вы родих". Сице убо и о антихристове рождении духовне разумети научаемся, еже от разумнаго Дана, или грехотворения ради, или ложнаго ради учения, или сквернаго ради некоего действия, духовне тому родитися, возрастати же втайне учением. Но о рождении иносказательном антихристове от разумнаго Дана или от жены жидовки, в 337-м ответе, по истязанию твоему, паки да ответословствуются. Зде же предложити имамы, яко чювственне от племене Данова родитися антихристу воспрепятствуется, сих ради:
1: Понеже Даново колено не точию от христиан, но и от самех тех жидов, к прозябению мессии не благоприятствоватися, но омышленно может быти. Тии бо назирают патриарха Иякова реченому [Михея, глава 5]: "не оскудеет князь от Июды, ни вождь от стегну его, дондеже приидет, емуже щадено есть". И паки, реченное пророком: "и ты Вифлееме, земле Июдова, ничим же меньши еси во владыках июдовех. из тебе бо изыдет вождь, иже упасет люди Моя Израиля". И сице святии пророчествоваху быти Мессии от колена Июдова, а не от Данова и от Вифлеемска села, от дому же и отечества Давыдова. Которое пророчество, и ныне жидом известно есть. Того ради они жидове, посему пророчеству, и ныне от колена Июдова, и Вифлеемска села, от дому и отечества Давыдова, мессии прозябнути, и явитися им ожидают, и прияти его надеются. От Данова же колена прозябнути и явитися мессии не уповают, паче же и назирают, того же патриарха Иякова реченному: "да будет Дан змий, при пути седя, и хапля пяту коню". И сих убо ради прорицательств, жидом не неведомых, они от Данова колена, хотящаго быти антихриста, за истиннаго мессию прияти отнюд не хощут: убо и чювственному рождению от Данова колена антихристу, и приятому быти от жидов чювственне, за невозможное показуется.
2: Яко сие Даново колено, во многих языцех в расточении сущо ныне, како удобно познаваемо быти может. Ибо во июдеох, прежде пленения их, сие колено с прочими колены сынов Израилевых, общекупно и безраздельно обретаемо бяше. По пленении же сего и прочих вавилоняны, паче же по разорении конечном Иеросалима от римлян, с прочими колен Израилевых и Даново колено в разсеянии по лицу всея земли ныне имеющееся. В праздник бо их пасхи, собраном бывшим жидом от всех колен Израилевых по премногу во Иеросалиме, приношения ради законныя их жертвы, внезапу Тит Еусписианов, царь римский, прииде, и абие град обступи, и плени всех ту сущих, и расточи я во многия языки по вселенней [История о разорении Иеросалима]. И ту прилучшееся Даново колено пленися, и по многим странам расточено бысть. Которое ныне в разсеянии обретающееся, между клевреты своими жиды како познатися может? недоуметельно. К сему же мнозем уже летом претекшим и памятьствующих обрести неудобно. Якоже и в нашей России ныне, 12 колен сынов Владимировых, аще и кроме пленения, но за многолетное продолжение познать неудобно: кольми паче, в разсеянии сущим жидом по всему кругу земному, Даново колено обрести неудобнейше. И ныне бо аще вопросим плененныя жиды, от коего кто их влечется поколения, подлинно сказать о себе не возмогут. Но аще бы в них и подлинно обретается Даново колено, но яко неизвестно и указатися не могущо: убо и явственнаго указания (по вашему мнению) еже от жидов, и от колена Данова чювственному рождению антихриста, обрести невозможно есть. Нам же едино о сем истиннейшее знание довлеет имети, яко идеже есть жидовское колено, ту и Даново колено вознепщеватися имать, за онаго ради в коленах мешательства и неизвестия.
Прочее же о сем от церковнаго научаемся гласа, якоже Богослов Иоанн в послании своем написав: "всяк (рече) дух, иже не исповедует Исуса Христа в плоть пришедша, антихрист есть". А жидове вси не исповедуют Исуса Христа в плоть пришедша, убо всяк жидовин антихрист есть. Иосиф же Волоколамский сказует: "яко Богослов антихриста нарек еретика, и убо всяк жидовин и еретик антихрист есть".
А понеже о антихристе слово зде привниде, что есть антихрист? От святых бо учителей церковных разная о нем толкования предаются разумети: Павел апостол нарицает антихриста противником. А Златоуст нарицает антихриста отступление. Кирил же святый антихриста тожде наричет с прилогом сим: отступление правыя веры. Памва же Берында в писмени: "антихрист что есть? противник Христу, а бы противник Богу".
Или аще желаеши из логических доводов антихриста уведети, то и от сих тако доводствуется: всяк неправо умствуяй, есть противник Христу. Но еретики суть противоумствуют, убо еретики антихристи суть.
Или сице.
Всяк человек лжу вместо истины во учении проповедаяй, противную имать Христу проповедь, яко многих от дверей царствия Божия отводит. Но еретики лжу проповедают, ибо диявол лжи отец. Убо лжи учители диявольстии суть ученики, яко не законом истины, но законом противным Христу ходят.
И паки.
Всяк ложный учитель есть антихрист. Но вси ложныя пророки и учители и предотечи не по правде закона учат, убо вси сии антихристи суть.
Ведати же и сие должно суть, яко сие речение "антихрист", есть греческое сложно от "анти" и "христос", еже есть противник Христу. По коему имени мощно всякаго противника Христова, противящася Ему ложным учением, или гонящаго правоверных, антихристом нарицати уподобительне: по словеси святаго Иоанна Богослова, яко "антихрист грядет, и ныне антихристи мнози". Яко бы бяху гонители: Нерон, Максимиан, Диоклитиан, Иулий, и прочии. Или ложнии учители еретицы: Арий, Македоний, Несторий, Савелий, Аполинарий, и прочии, противящеися Христу ложным учением, суть и глаголются антихристи. О них же той же Богослов глаголет: "от нас изыдоша, но не беша от нас". Зде знаменает оных еретиков и отступников, кои изыдоша от праваго учения ложным учением, оставиша правую веру и догматы святыя церкве, их же кроме спастися не можно. Се явихом ти, в чем сие имя состоит "антихрист".
Вопрос, 336.
И оное свидетельство о каком противнике быти сказуете: убо ли о том самом антихристе последнем? или и о всяком противящимся учению Христову?
Ответ, 336.
В вышшем ответе явихом, яко рождение антихристово от святых не от единаго Данова колена, но и от других стран и языков. И яко рождение не чювственное онаго извествуется, и яко во всех противящихся учению Христову, имя антихриста заключается. Но и в грядущем ответе о рождении того же антихриста доводствовати имамы, убо зде таяжде возвторяти оставляем.
Вопрос, 337.
В книзе О вере напечатано в главе 30, о рождении антихриста, сице: "А той антихрист человек будет. и родится, якоже глаголет Ипполит Римский, от девицы жидовки сущия, от колена Данова". Тако преподобный Ефрем, сице преподобный Иоанн Дамаскин, засвидетельствуют. Вы убо сии свидетельства како приемлете? и рождение антихриста како быти сказуете? было ли, или ни?
Ответ, 337.
Известихом убо от доводов святых отец в 335-м ответе, яко антихристово рождение не от единаго Данова колена показуется быти: убо и матерь онаго не едину быти и от единыя девицы жидовки родитися священное писание извествует, но от многих.
Родится от жены прелюбодейной;
Родится от жены прескверныя;
Родится от девицы жидовки;
Родится от Римской державы;
Родится от дщере Вавилонской;
Родится от гордыни;
Родится от Вавилона;
Родится от Египта;
Родится от Галилеи;
Родится от греховнаго каляния;
Родится от самаго греха;
Родится от силы сатанины.
[Толков. Апокалипс., глава 54; Ефрем, Ипполит, Иоанн Дамаскин; Зерцало душезрит.; Толков. Апокалип., глава 8, Зерцало богозрит., 78; глава 15, 16; Афанасий Велик. в псалтыри толк.; Апокалипс., глава 37; Зерцало жит.; Житие Симеона Дивног.; Житие Пахомия Велик.].
Якоже бо различно нарицается матерь антихристова, сице различное и от различных нарицаний и рождение онаго быти извествуется. Якоже и рождение его не во едином лице, но во многих извествуется, о чем ниже сего ответа покажется: сице и место антихристово святии учители не едино указуют быти, но многия, яже в 338-м ответе засвидетельствовати имамы. Зде же ключимое к разрешению твоего вопроса имамы, от тайновидца Богослова извещенное, на среду предложити. Якоже он во Откровении своем виде змия червленаго, 7 глав имущаго, иже есть змий диявол, на нем же любодеица седит. О ней же Афанасий Великий сице протолкова [В предисловии Апокалис.]: "яко виде Богослов жену, седящую на звери конканном, имущем глав седмь, и назнамена от нея быти антихристу". До зде Афанасий.
Зри убо чюдное святаго Богослова видение и откровение, како о двою народу, о верных глаголет и о неверных, женами родящими показа, их же и церквами священное писание нарицает. Жена бо оная чюдная и целомудренная, солнцем праведным Христом одеянная, два крила орла великаго Христа имущая, има же и возносима быти сказуется. Жена же блудная, яже на звери седмиглавом дияволе седящая, возносима быти дияволом извествуется. А якоже оная чюдная жена, святая Божия церковь именуема суть: убо и блудная жена, церковь лукавнующих, по пророку, нарицается. Сице убо о двою народу, о верном речем и неверном, виде Богослов и написа. А якоже собрания верных нарицается церковь, о чем в 305-м ответе явихом, убо и соборища еретическая обыкоша нарицатися церковию же. Понеже Христова церковь Христа главу себе имеет: неверных же и еретик лукавнующих, врагов Божиих ненавидящих Бога, противная церковь, (еже есть жена) антихриста главу имеет. Юже возшумев, на люди Божия воздвизает. По реченному: "всем безумным едина есть глава антихрист, еюже лукавнуют на люди Божия", и прочая. Понеже, по Апокалипсису, всегда церкви Христова крещением Христа раждает, убо и антихристова церкви всегда антихриста раждает. И якоже причащающиися антихристу, антихрист будет. И якоже в коемждо верном раждается Христос умне, так и коемждо зловерном раждается антихрист умне.
А якоже Христос Бог прииде к церкви [Беседы, лист 2176], и из нея бысть, и совниде ей совокуплением духовным: убо и антихрист прииде к лукавнующей церкви, и из нея бысть, и совниде ей совокуплением духовным. По глаголанному святым Ефремом: "образ приимет истиннаго пастыря, да прельстит овец стада". И по святому Ипполиту: "во всем хощет уподобитися льстец Сыну Божию". И по блаженному Андрею, архиепископу Кесарийскому [Апокалипс. толк., глава 3]: "любопрится ложь на прелести человеков, еже подражати истине: ибо, рече, ложь истине последовати тщится".
И сицеваго ради духовнаго устроения, еже по подражанию божественному содеваемаго, духовне может быти и разуметися антихристово порождение, и всякое его действие: еже есть от разумнаго Дана диявола, женою оною блудною, сиречь нечистою верою, блудящею отступлением веры, и презрением Божиих заповедей, чрез лжепророк, или учением, или злотворением, и прочая.
Темже, аще изъявися, яко антихрист от различных матерей по писанию родится, и яко умное (си есть евтропологическое или иносказательное), а не чювственно рождение его показуется, убо зде и о самом его летьствует изъявити. Яко и его рождение не во единой ипостаси или лице, но во многих от священнаго писания быти извествуется. О чем святый Кирил Иеросалимский, в десятом знамении сице пишет [Кирилова, лист 49 на обор.]: "не от царей, ни царьска рода воздержит царство, но прелестию восхитит власть. кто же есть сей; или от какова чина; повеждь нам о Павле, коего глаголеши пришествие по действу сатанину, во всякой силе и знамениих и чюдесех ложных. сие последи повести указует, яко сатана себе ученики себе учинит, иже по онаго воли сами собою начнут действовать". До зде святый.
Зри разум глаголющаго о антихристе, яко первее видом вопроса от Павла апостола просит вразумления, о едином токмо последнем антихристе, его же апостол по действу сатанину, во всякой силе и знамениих и чюдесех ложных быти предрече. О том Кирил святый, аки бы не весть сам, но того самого апостола вопрошая, глаголет: кто же есть сей? или от какова чина? повеждь нам о Павле? Таже, аки извещение от него прием, глаголет: Сие последи повести указует, яко сатана ученики себе учинит, иже по онаго воли сами собою начнут действовать. Сим являет, яко апостол Павел о антихристе глаголя, не едино лице, но многия в том заключи, их же и учениками сатаниными быти нарече, и всех сих в едино лице антихристово быти определи. Якоже и в толковании стиха того, о чине антихристове объявляется, сицевым образом: а якоже ныне видим, на царьство Римское не цари царя избирают, или поставляют, но духовныя духовных на монархию Римскую, на царьску власть света сего прекладают. И от сего убо толкования явствуется, яко апостол Павел, (иже весь образ антихристов описавый, по Вере глаголем книзе, гл. 30) той сам глаголя к селуняном о антихристе, не мирскаго, но духовнаго чина быти антихристова сказует. И не едино лице токмо, но многия духовныя лица в том заключи, и в едино лице определно антихриста положи. Согласно же сему и Ипполит святый, написавый рождение антихристово (иносказательне) быти от девицы жидовки, еже и ты в вопросе своем предложил еси. Сей убо святый, в том же слове, в неделю мясопустную, о антихристе пиша, рождение антихриста, не во едином же, но во многих лицех показа. Якоже глаголет сице [Соборник, слово о антих. в неделю мясопуст.]: "в первых бо его родится, тих, и кроток, миролюбив", и прочая. И к сим являет рождение антихриста не в единем лице, но во многих первых. И аще тако родитися во многих первых, убо во вторых, и в третиих, и в прочих тому же родитися. И се о едином человеке отнюд разуметися не может, но о многих лицех. Темже и Ипполит святый о антихристе пиша, не едино лице, но многия в том заключи. О чесом и в надписании того слова явственно тако предвозгласися: "Слово о антихристех", а не о едином антихристе. А еже писаше в том же слове: "антихристу единственне родитися от девицы жидовки", сие бо писа разумом синекдохическим. Якоже например рещи: россиянин радуется о получении победы. Сие глаголется вместо множественнаго, россияна. Сице и антихрист единственным именем нарицается, подобне и от девицы жидовки родитися глаголется, вместо от всего жидовскаго языка. Или менимически: вместо от оныя всемирныя блудницы, от нея же Великий Афанасий антихристу родитися извести, пременовася от девицы жидовки. Но аще от сего риторическаго разума не уверишися, гряди явим ти и от священнаго писания подобная.
Яко человек, по псалмопевцу [псалом 102, 48], многажды нарицается весь род человеческий: Человек яко трава; Человек в чести сыи не разуме; Что есть человек, яко помниши его; Что есть человек, яко возвеличил еси его; и прочая. Подобне и ангел нарицается весь собор ангельский. Якоже глаголет Дамаскин [книга 1, глава 18]: Анегл в месте не обдержится; Ангел действует в разньственных местех; Ангел и временем описуется и местом; Ангел есть существо умное [книга 2, глава 3]. Нарицается же ся ангел и человек единственне, еже единому естеству во многих ипостасех. Сице и антихрист глаголется от Ипполита и Ефрема, такоже и от сего Дамаскина, все множество антихристов, за еже единому злочестию быти во многих ипостасех. Дух благочестия счисляется между седмию духи [Исаия 1]. И дух злочестия есть противный тому, иже живет и действует не во единой ипостаси, но во многих: темже и антихристи по апостолу мнози. Якоже Христос царствует во всех веках, во всех душах праведных. По реченному от Него словеси: "внутрь бо вас есть царство небесное". Сице и антихрист царствует во мнозех лицех изначала, во всех его злочестию покаряющихся и доселе. О чем сие наше слово подтверждает и Андрей Кесарийский в толковании своем на Апокалипсис, в зач. 55-м, сице глаголя: "за еже видены быша десять рози в четвертом звере, сиречь в Римстем царстве, и из него един возрастающии и искореняющии три, и прочая покаряющии. и тако приидет яко царь римский приображением и притворением убо, еже паки устрояти и обновляти, согревати же и воспитовати начальство их истинною же, еже соделати конечное разорение. Темже, якоже речеся, не погрешил бы кто подобающаго, истолковав аки в едином теле изначала даже до ныне державствующее царство сие, яко воистинну излиявшее крови апостолов, и пророков, и мучеников. ибо якоже един лик, и едино воиньство, и един град глаголется, аще изменяются исполняющии сих коегождо: сице и царство едино, аще и во многая лета и места разделяются и разсецаются". Апокалипсис печатный, глава 18, слово 19, лист 89: прочее же о различии имен о антихристе.
Темже от вышепредложенных явствуется, заключаемых в 339 ответе во втором показании еще изъявится, яко антихрист не от единаго колена родится, но от всех зловерствующих языков. Яко не [от] единыя девки жидовки, но от различных матерей. Яко не един во едином лице, но во многих. Яко не во едином времени, но в различных. Известити же имамы и во грядущем, яко не во едином месте родится, но во множайших, паче же безчисленных.
Убо по сим показуется, яко антихристово рождение было и есть и будет.
Верно есть слово сие, и всякому приятию достойно. Павел к Тимофею в зачале 280.
Вопрос, 338.
И аще рождение антихриста быти сказуете, то от коего колена и языка? и где родися? Аще добре испытаете, и сия не сумняся извольте объявить.
Ответ, 338.
Объявихом в варивших ответех, яко колено и язык и лице, от него же родитися антихристу, определьно и существенно указатися за невозможное явствуется. Но аще (по толкованию учителей церковных) от всех противствующих закону Христову антихрист родится, то свойственнейше ему родитися, или произыти от всех языков, ложное учение имеющих, якоже и суть. Ибо от святых извествуется не от единаго языка жидовска, или во Иеросалиме ему родитися, но от многих, якоже от нижеследующих является.
1: Сказуется антихристу родитися в Риме, по оному: "антихрист от Рима изыдет" [Апокалипс., зач. 51, лист 76, на поли].
2: Сказуется антихристу родитися в восточных странах, в земли персидстей, идеже колено Даново, от корене еврейска [Тамо же в Апокалипс.].
3: Сказуется родитися антихристу в Хоразине, возрасти в Вифсаиде, царьствовати же в Капернауме [Мефодий Патрьский].
4: Сказуется родитися антихристу во Египте [Афанасий Велик. ко Антиоху].
5: Сказуется антихристу родитися в Галилеи, отнюду же и Христос изыде, якоже пишется: "скимен львов Дан, изскочит от Вассана. сей же есть Скифополь, рекше скифский град" [Псалтырь толков.].
6: Родитися имать антихрист в Вавилоне граде велицем, по разумению Иеронима. В толковании на 11 главу Даниила пророка [книга о антихристе Рязанскаго, лист 62 на обор.].
7: Великий пророк Иезекииль, Гогу (си есть антихристу) родитися сказует от Мосохова племене, еже есть от северных стран. Такоже и Петр Дамаскин от тех же стран изыти оному извествует.
Темже по сим предложениям, яко бы не согласующимся с собою: но аще в духовной разум превратим, а не в писменный, то яве согласующих обрящем: яко родитися ему тамо (по Златоусту [Беседы апостольск., лист 2333]), идеже суть отступление от веры, или нечестия умножение, или грехолюбия введение. По реченному: "идеже бывает света лишение, ту бывает тме пришествие". Катихисис Великий, глава 23.