Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Часть четвертая.
Ответ на сии вопросы [303 и 304].
Подобный материал:
1   ...   29   30   31   32   33   34   35   36   ...   46
ЧАСТЬ ЧЕТВЕРТАЯ.

РАЗДЕЛ, 9.


Вопрос, 300.

В книге О вере, на листу 186 напечатано сице: "Понеже начаток Христовы церкве с концем согласуется. ибо триста лет в неволе, тако и останок в том же скончается". Вы о начале Христовы церкви како разумеете, убо ли без священства (аще и в неволе) пребываше?


Ответ, 300.

Священный списатель книги О вере не рече, в показанном тобою месте, яко в начале Христовы церкве (аще и под неволею нечестивых царей бывших) не бяше везде и всюду священства. Аще бы тако было, то и священству бы погибнути надлежало. Но аще тогда и зельнейше шумяше гонение на христианы, и везде и всюду ищемы были пастыри Христовы на избиение: обаче Христос Спаситель наш, яко истинный Жених церковный, свою невесту якоже во освященных, тако и не во освященных (понеже церковь глаголется быти во всем народе верном, якоже в 10-м ответе засвидетельствовахом) соблюдаше чюдесне. О чем зри Пролога, в Минеи четии, такоже и Барония.

Быша же таковыя места, идеже не случашеся и священьства. Егда святый апостол Филипп, не священник сый, крести Самарию: и донележе не приидоша апостоли верховнейшии, дотоле без священства оная страна бяше. Еже о сем в толковании церковный учитель Аммоний на 18 зачало Деяний пишет: "Яко Филипп того ради крести, понеже оскудение бе презвитер в Самарии". Егда апостол Анания в Дамасце, не священник сый, крести апостола Павла. Якоже о сем в 21-м зачале, в толковании засвидетельствует златый языком: "Понеже (рече того ради Анания крести) яко оскудение бе презвитер в Дамасце, гонения ради бывшаго". Егда не точию мужие, но и жены вначале страны крещаху. Якоже Мариамия страну Ликаоньскую, о ней же в Прологе 17 числе повествуется: или Фекла равноапостольная, или Фотиния самаряныня в самем граде пресловущем Риме множество народа крестиша. О сих чти Мин. чет. сентября 25, и Пролог март. 20. Но и послежде апостольских времен, коликия страны во время гонения без священства бяху. Якоже крестившу святому Галактиону свою невесту Епистимию, глаголати к ней: "О жено (рече) погибе священничество от рода христианска: того ради нужда да аз сам тя крещу". Минея чет. Макария, нояб. 5. Или паки, егда святый мученик Потит крести дщерь цареву: о чем в Минеи четьи, месяца июля в 1 день, пишет тако: "Понеже не возможно бяше в то время обрести иерея, всем священником крыющымся гонения ради". И инии бесчисленнии нерукоположеннии крестиша, и сами крестишася, якоже жития святых и Прологи объявляют. И новопечатная книга Жезл, на листу 49-м, и прочих, довольно о сем извествует.

От сих достоверных свидетельств показуется, яко святая церковь в начале по многим местам и без священства бяше, обаче та же православная вера тамо бяше (якоже и при священницех), та же святая церковь стояше. О чем довольно глаголахом в 10-м ответе, и 305-м отчасти засвидетельствуем.


Вопрос, 301.

Аще начаток Христовы церкве и в неволе чрез триста лет бяше, но обаче не без священства. Конец же тоя како быти разумеете, убо ли без священства имать окончатися?


Ответ, 301.

Понеже начаток Христовы церкве аще и в неволе бяше, но не без священства бяше: но быша временем некия страны и кроме священства, якоже в вышшем ответе отчасти извествовахом. А еже творец книги О вере написал, яко начаток Христовы церкве с концем согласует. Сие не о скудости священства рече, но о зелнейшем гонении на церковь Христову изглагола: якоже и от последующих глагол удобь познати возможно есть. Ибо триста лет (си есть от вознесения Христова до царя Константина Великаго) в неволе (бяше), тако и останок в том же скончается. Зде убо не о священстве речено бысть, но о церковной неволе от идолослужителей: тогда бо зельнейше православнии христиане от гонителей утесняеми бяху.

Обаче же и сия рещи следовательно есть: идеже тогда гонение зелнейше належаше, тамо тыя места и о священстве скудствоваху. Но не бяше тогдашнее время до зела священством оскудное, инде же и священство процветаше.

Что же рещи имамы о настоящем сем времени, которое в том отнюд несообразное обретается: где ныне древлеблагочестивое православное священство обретается? в которых частях света? в киих государствах? в каковых провинциях? котораго отнюд нигде не точию не видится, но ниже слухом где слышится. Аще в римских странах? но весь запад тмою нечестия покровен. Аще в восточных? но в тех же мрачных и мутных водах плавает. Аще в северных? но тому же нечестию работает. Но аще бы где священство благочестивое блистало, не бы и вы сими беглыми, еретическое поставление имущими, попами довольствие свое исполняли, но всяко бы возжелали от благочестивых руководствоватися. Но яко нигде не обретосте, яве яко оное в наши слухи никакоже достиже. Темже и время сие настоящее в скудости священства начальному времени Христовы церкве отнюд не сослагательно: убо и согласить в том с преждебывшим неудобно и невозможно есть.

К сим же и Дух Святый чрез святыя пророки и богоносныя отцы на последнее время провозгласи, конечне скончатися руки людей освященных, якоже и прежде ответа 12 в разделе 8 извествовахом: обаче вкратце и зде протещи оных провозвещаюшия гласы не не судихом.

Богодухновенный муж желаний Даниил пророк, во главе 12 книги своея о последних провещавая временех, тако прорече и о священстве: "Яко во время и во времена и в пол времене, егда скончается разсыпание руки людей освященных, и уведят сия вся".

Священный списатель книги О вере, приводя во свидетельство словеса сего богопремудраго пророка, о осквернении священства в последнее время тако глаголет: "Зане пророчество (рече Даниилово) исполняется реченное. Изменят времена и закон, и беззаконнующии завет наведут с прелестию, и осквернят священия". Глава 28, лист 248 на обор.

Что же нам плачевно возопиет священный Римский папа и мученик Ипполит последняго времени оскудстве святыя церкви в священстве, и от него истекающих священнодействах; услышим: "Восплачутжеся церкви Божия плачем велиим, зане ни приношение ниже кадило совершается, ниже служба богоугодная. священныя бо церкви яко овощное хранилище будут, и честное тело и кровь Христова во днех онех не имать явитися. служба угаснет, чтение писания не услышится" и прочая. [Соборник слово 2 в нед. мясопустн. о антихристе].

Но и Сирский глас сице же всеплачевне возгласити имать: "Восплачутся тогда церкви Христовы вся, плачем великим, зане не будет службы святыя во олтарех, ни приношения". Ефрем Сирин слово 105.

Подобне сим и творец Зерцала душезрительнаго взывает, глаголя: "Восплачетжеся плачем великим и церкви всяка, зане ни приношение ни служба отнюд, ни кадило освящения в тех не будет, псалмы и пения престанут, и всяка бо служба".

Но и Стефан Яворский в книзе своей о антихристе, во главе 6-й, Ипполитово приводя во свидетельство, глаголет: "Святый мученик Ипполит в слове о кончине мира глаголет: яко во время антихристово, жертва безкровная, рекше литугия святая, и всяко приношение, Бога умилостивляющее, престати имать. разорятся же и церкви Божия, изменьшеся в вертепы разбойничи и хлевины, чести не имущия. престанет же псалмопение, и всякий чин, всякое церковное благолепие угаснет. вся бо Христова противник Христов разорити восхощет, и мерзость запустения вся пуста сотворит". До зде Стефан Яворский.

Слыши убо, аще службы богоугодной во олтарех не будет, аще тело и кровь Христова не имать приноситися, яве убо яко священства православнаго тогда не обрящется: темже конец с начатком в священстве не имать согласовати. Ибо тамо, аще и в гонении, обаче священство обреташеся. Напоследок же совершенно того нигде не обрящется.

Подтверждает же сие восточнаго православия учитель Стефан Зизания, толкуя словеса святаго Кирила Иеросалимскаго, и доводствуя от словес Златоустовых о потреблении везде и всюду православных жертвенников в последнее время, тако глаголет: "О том бо (рече) Хрисостом святый глаголет: яко антихрист прежде пришествия своего учинит, яже везде жертвенники и истинную жертву истребит, и кумир свой на святом месте поставит. (Ниже): такоже будет в запустении нынешняя святая жертва, иже не во храме Соломони, но яже по всему миру уставлена есть". До зде Стефан Зизаний [книга Кирилова знам. 6].

Аще убо святии пророцы о последних днех прорицают, яко скончается рука людей освященных; аще святии богоноснии отцы провозвещают святей службе во олтарех угаснути, и честному телу и крови Христовой не явитися, и жертвенником по всему миру от антихриста и его посланников потребленным быти; аще самое время, и самое неимение священства христопреданнаго, явственное сих святых прорицателей збытие показует: убо последнее время с первым точию в тесноте и гонении согласует, а не в скудости священства.

Не речеши ли, яко ныне церкви стоят еще не истребленны, и в них священницы, чтение и пение и службы совершаются: убо и не суть антихристово последнее время, в неже сие не услышится.

На что сице отвещает святая церковь, о противниках глаголющи: "Возопиют к тебе, и не услышиши". Минея служеб., июля 20, стихера на стиховне. И пророк от лица Божия глаголет: "Аще принесете кадило, мерзость Ми есть, жертв ваших ненавидит душа Моя". И паки: "Премудрость Божия глаголет: Жертва нечестивых мерзость Господеви". И по Великому Василию [Книга Пчела]: "Аще и мал порок имать кто в вере, несть приятно во псалмех моление его к Богу". И в Катихисисе Велицем пишет: "Поистинне ничтоже (у еретиков) несть истинно. но вся убо, еже еретицы творят, от смышления своего. како могут совершати действа Божия на игралищах своих; аще и Христа проповедают, и веру свою похваляют, но вся сия льстиво и лживо творят. аще и церкви своя, и клирики церковныя, и писания божественныя почитают, и мнятся тем же крещением крещатися, такожде и тайны божественныя, еже есть пречистое тело и честную кровь Христову имети. но вся сия не тако имеют, но инако и нечестиво. (Ниже): о нихже святый Иоанн Златоуст глаголет. праздники убо и святыя дни празднуют, и святых апостол и мученик. но вся во отвержение веры истинныя, от своего умышления творят. и лживыя пророки имеют, и вся творят ко прельщению верных. якоже рече божественный евангелист Матфей. востанут бо рече лжехристи, и лжепророцы. и елика бо аще не трезвятся, и избрании прельщатися имут". Катихисис, глава 4.


Вопрос, 302.

В прежде бывшия времена бяше ли где любо церковь христианская православная без епископа православнаго или не бяше?


Ответ, 302.

Христианская святая церковь, по самей крайней нужде, не точию без епископа, но и без презвитера может быти. Понеже церковь глаголется по Златословесному [Маргарит, слово о предста царица, и Житие Златоуст.], вера и житие: или церковь от него же известуется быти в народе правоверном. Обаче о сем довольнейше во ответех 9-м и 10-м и 300-м кратко извествовахом, яко святая церковь и во времена первенствующая без священства временем бяше, и в 305-м отчасти засвидетельствовати о том потщимся.


Вопрос, 303.

И аще не бяше, речете: то убо ли, во времена арианскаго на благочестие гонения, с епископы христианскими православнии на поле собирахуся, службы совершающе?


Вопрос, 304.

Аще же и без епископа православнаго, но с едиными презвитеры и диаконы, якоже свидетельствуют о сем древнии историописатели (Повеле бо прочее царь не творити зла народу, но точию иереи и диаконы и прочия клирики, не общающияся епископу арианскому, яти на истязание. Минея четия августа 25), обаче церковь соборная христианская нарицашеся и бяше, по свидетельству жены оноя, юже вопроси епарх арианский: "убогая жено! рцы ми, камо рано тщишися? Она же рече: на поле к народам соборныя церкви, вопияюще, течаше" (Октай Иосифа патриарха, л. 3, в предисловии). Убо известите, бяше ли где церковь православная кроме священников, отлучившихся от своих архипастырей, вин ради благословных?


Ответ на сии вопросы [303 и 304].

Оле твоего развратительнаго нрава, суесловный вопросителю! Ни которое правило, ни кое нравоучительное писание, ни кая история утече твоего неправдословнаго нанесения. Везде усилуешися вместити своих иереев за главноправителей церковных, и без них не сказуеши нигде православной церкви быти и утверждатися. О, противниче святыя церкве! Повеждь нам, како и где обрел еси церковь в еретических иереех? еда по тебе вси еретицы церковию нарещися могут? Престани убо, престани от твоего блядословия и сумазброднаго указания, еже церкви быти и утвержатися на еретическом священстве. Почто убо несообразное о едесских исповедниках и сущих православных христиан всекрепкое стояние привлекаеши на своих иереев? Тамо бо аще и обретахуся иереи при народе правоверном, на поле собранном, но сущия благочестия ревнители и рукоположенныя от православных сущих епископов. Но аще в то время едесская церковь и отторжена бяше своего архипастыря Варсиса, но архипастыря своего ревности отнюд не отторжена бяше, — по вам, не слагахуся неправоверным пастырем, паче же сущим волком, якоже не точию делом, но и именем, тогда епископ арианский волком нарицашеся. Но не бяху ли инде где правовернии епископи — якоже Евсевий Самосатский весьма соседствуя Едесу бяше, или Мелетий Антиохийский, паче же столп церковный Василий Великий, и инии безчисленнии еще бяху на своих престолех седяще, и прочим бедствующим пособствующе в нуждах, якоже от повествования оных историй, и от Барония, лета Господня 371, 372 и 373, явствуется.

Церковь же Божия не точию, якоже выше писахом, без епископа может быти, но и кроме презвитера. Ибо тобою же в показанной истории явствуется, яко не точию злочестивый царь правовернаго епископа от народа отлучи, но и на иереи и диаконы, и прочия клирики возбудися, и яти оных нп истязание повеле. Обаче и без оных правовернии собирающеся, соборныя церкве чада быша: и не не нарицашеся в них церковь святокафолическая, якоже паки тобою в преведенном во свидетельство Октае явствуется, кия в полцех Уалериана нечестиваго царя бывшии христиане, иже теплейшую молитву по прошению цареву в победе на враги сотворше, их же Бог вскоре послушав, и совершенную дарова победу. И сии не точию не быша презвитеры, но воини, служаше земному царю. Речеши ли сим не именоватися чадом святыя церкве, или не быти в них оныя? Но самый Октай засвидетельствовати имать, яко быша чада церковная, и от совокупления их церковь в них именовася.

Виждь убо и от самех тобою приведенных свидетельств ясное доказание, яко по прилучаю и кроме освященных лиц церковь в собрании вернаго народа суть и именуется. Понеже бо церковь, по преведении на российский диалект, собрание быти глаголется людей правоверных. О нихже сосуд избранный, от пророка взем свидетельство, глаголет: "Якоже рече Бог, вселюся в них и похожду, и буду им Бог, и тии будут Мне людие. И буду вам во отец, и вы будете мне в сыны и дщери, глаголет Господь Вседержитель". 2 послание к Коринф., глава 6.


Вопрос, 305.

И аще бяше без священства церковь, речете: то всеговейно просим вашу любовь, известите, где таковую церковь в писании усмотристе. Ибо мы нигде в писании сего не обретаем, еже бы церковь без священства бяше. А якоже церкви без священства невозможно быти, сице и кроме церкви нет спасения и разрешения. Катихисис малой в пятой тайне.


Ответ, 305.

Обычай есть повсюдной твоему нраву, многажды о едином вопрошати. Якоже о сем 1-го раздела 9 и 10-м и в прочих вопросех доволно истязовал еси нас, и зде в настоящем разделе, паче же в сем вопросе, усильствуеши нас твоим аргументом утеснити. И подобало бы всячески на прешедшия ответы послати тя, в них же толико множайшия доводы ти предложихом, яко святая церковь, во обстоянии еретик и в неимении православнаго священства, может быти и утверждатися, и яко церковь есть собранием вернаго народа. Но твое неудовольствие всюду предлежит, паче же сия вопросы твориши с неблагим намерением, еже познати свет истиннаго благочестия: но на едино стремишася, еже тму заблуждения в ваших иереях, сокрываемую светом, показати, еже есть отнюд невозможно. Понеже свет везде светом именуется и блистает: тма же от всех познавается тмою. Но яко ваша очеса сею страстию еже к новолюбным иереем ослепленна, того ради истинную светлость благочестия зело тяжко есть вам созерцати. Но мы, держащеся христианскаго простодушия, и апостольская повеления храняще, еже быти всякому ответу готовым, сего убо ради и зде паки к повторителному ответствию исходим.

Святый апостол Павел, сосуд избранный, описуя во святей церкви положенныя чины, тако глаголет: "Положи Бог в церкви, первие апостолы. второе пророки, третие учители", и проч. 1 к коринф., зач. 153. Во всех убо сих трех чинех якоже священницы быша, тако и не священницы обретающеся по нужде совершаху. Не священницы быша во апостолех, якоже Номоканон засвидетельствует: "Ибо Господь наш Исус Христос, многим апостолом священьства не имущим, повеле крестити". Потребник, лист 724.

Подобне и Иоанн Зонарь в книзе своей, сие повеление Христово подтверждая, глаголет: "И Бог наш Исус Христос, многим от апостол, не имущим иерейства, повеле крещати". Правило 168.

Сие же повеление Христово и в толковании 49-го правила святых апостол засвидетельствует: "Господь наш Исус Христос, посылая ученики своя на проповедь, рече: научите вся страны, крестяще их во имя Отца и Сына и Святаго Духа. всякому убо правоверному по сему повелению достоит крестити в три составы единаго безначальнаго Бога". Кормчая, лист 13. Сицевое убо Христово повеление делом святии апостоли исполняюще бяху, и несвященнии крещаху. [Деяния, зач. 17 и 20].

Святый апостол Филипп не священник крести Самарию, еще же и каженика на пути.

Святый апостол Анания, еще в дияконех сый, крести Павла апостола, оскудения ради презвитер. [Златоуст, на Деян. свв. апост. зач. 51].

Не точию же мужие, но и жены, во оно время сие повеление Христово исполняху, народы, к вере учаще, крещением просвещаху.

Святая равноапостольная Фекла, ученица святаго апостола Павла, по нужде сама крестися, потом же послана святым апостолом Павлом учити люди, иныя крести. [Минея чет. старописм., сент. 24].

Святая Мариамия, сестра благовестника Филиппа, ходящи со апостолом Филиппом и Варфоломеем, посем в Ликаонию шедше, проповеда слово и многия крести. [Пролог, фев. 17].

Святая мученица Фотиния, беседовавшая со Христом на студенце, ходящи по граду Римскому, многия учаше и крещаше, и в самей темнице сего действия не престаяше. [Пролог, март 20].

И иныя безчисленныя тогда исполняюще Христово повеление, учаху неверныя народы и крещаху.

Не священницы быша во учителех, якоже святый апостол Павел глаголет: "Учитель аще и мирский человек будет, искусен же слову учения, и нравом чист, таковый да учит. будут бо рече вси научени Богом". Кормчая, лист 26 на обор. 2 чин.: правило 15 ап. Павла.

Павлов же ревнитель, святый Златоуст глаголет: "Всегда (рече) неотступне о божественных писаниях поучатися подобает, не иереом токмо, и простым всяко повелено бысть божественная писания ведети и умети о своем уповании отвещавати". Книга О священстве, лист 140.

Не священницы быша и во пророцех, якоже Деянии святых апостол в зачале 45 засвидетельствует, четыре дщери святаго Филиппа, единаго от седми диакон, прорицающе бяху.

Аще убо во апостолех не священницы бывше крещаху; аще во учителех не священницы бяху, учаще; аще и во пророцех такожде не священницы прорицаху: убо святая церковь может по нужде быти и содержатися и без священства. Понеже святая церковь в собрании народа вернаго заключается, якоже в нижеследуемых множайших изъявится доводах.

Святый златословесный вселенский учитель в слове О предста царица, о церкви тако глаголет: "Церковь бо (рече) не стены и покров есть, но вера и житие". И паки: "Не стены церковныя, но законы церковныя". Маргарит, слово 10, лист 18.

Преподобный же Никон Черногорский глаголет: "Соборныя бо церкви не стены суть, но правая учения, и предания божественных правил и святых апостол, якоже рече Господь к верховному апостолом: Ты еси Петр, и на сем камени созижду церковь мою, и врата адова не одолеют ей. Веде ли кая есть соборная церкви; сам бо великий Петр первее, но антиохийския многажды разрушени быша от язык; закони же и предания божественных отец, и божественая правила пребывают не разрушена во веки от держащих та". Тактикон, послание 22.

Блаженный Феофилакт, архиепископ Болгарский, на реченная словеса Христова к Петру апостолу, еже на нем церковь создати обеща, тако толкуя глаголет: "Воздает Господь Петрови мзду велию, еже на нем создати церковь свою. понеже исповеда Его Сына Божия Петр: глаголет, яко сие исповедание еже исповеда, основание хощет быти верующым. темже всякому человеку подобает хотящему знати дом веры, сие исповедание полагати основание. аще бо и добродетели зиждем, не имамы же основание право исповедания, раслабленно зиждем. рекше, уже церквь Мою, являет себе Владыку всяческим, Богу бо вся порабощена суть, и врата адова не удолеют ей, сиречь, по временех бывающии гонители, иже прелщением во ад отпущаху христианы. еретицы же суть врата, во ад низводяща: многим бо гонителем, и многим еретиком одоле церковь; есть же и кождо нас церковь, храм Божий бывая. и аще же на исповедании Божии утвердимся, врата адова, сиречь греси не одолеют нам". Благовестник, от Матфея зач. 67, лист 138 на обор.

Творец же книги О вере, то же обещание Христово к Петру протолкуя, тако глаголет: "Ты еси Петр; и на сем камени созижду церковь Мою; сиречь на вере исповедания. еже исповеда, ты еси Христос Сын Бога живаго. и на том исповедании созда Христос церковь свою, еже есть вернии людие во имя Его крестившиися". Глава 7, лист 64 на обор.

Святый Максим Исповедник к хвалящимся единовольным еретиком имети у себе престолы апостольския и чины высокия тако рече: "Христос Господь кафолическою церковию нарече быти правое и спасенное исповедание веры. идеже бо нарицается Христос, ту и соборная церковь сходится". Минея чет., генваря 21.

Другий же Максим Грек, премудрый богослов, явственно показует, како и от чего апостольское величество и область состоится и познавается, яко же глаголет сице: "Не бо (рече) от град и престолов апостольское величество и область состоится, но от догмат правых веры и сожития божественнаго, апостольскими и отеческими учительствы управляемо и есть и познавается". Кирилова, лист 371, слово Максима Грека О святем Дусе.

Вышеименованный же Златоуст к лицу развращающаго народы диявола, что есть церковь, взывая глаголет: "Нечистый (рече) ты и скверный дияволе, стенам не можеше одолети, или церкви надеешися соодолети. еда мниши стенами церковь сущу, но паче народом верных есть церкве. видиши колицеми столпы утвержена, не железы связани, но верою утвержена". Житие Златоустово, лист 116.

И паки вышепомяненный Феофилакт, что есть церковь, глаголет: "Церковь именуете (рече), идеже множество верных, яко пищу заповеди приемлюще спасаются". Благовестник, от Луки зач. 45, лист 87.

В Великом же Катихисисе вопросоответствует сице: "Что есть церковь Божия. Церковь Божия есть (глаголет) собрание верных Божиих, иже непоколебимую держат едину православную веру, и в любви пребывают, облобызают же учение евангельское непоколебимо". Глава 7.

Сице и во Псалтыри толковой пишет: "Церковь глаголется, и еже по домох собрание благочестивых. сего ради и Павел глаголет: целуйте Прискилу и Акилу, и яже в дому их собрание церковь". Токование Исихиево на псалом 67.

Речеши ли везде и в домех присутьствовати освященным? Но зело безчисленнии домы, в нихже собирахуся вернии, быша и кроме священных: но от апостола тая собрания церковию нарицахуся. Или возглаголеши, точию где священнии обретаются, тамо и церковь суть? якоже ты в вопросе своем изглаголал еси.

Противу сих отвещаем:

1-е: Божественный Златоуст, истолкователь священных апостольских посланий, в 34 беседе ко евреом, разсуждая словеса сия: еже повинуйтеся наставником вашим и покаряйтеся, тако глаголет: "Злое убо есть везде безначалие, и многих бед вина, и начало бесчиния и слияния: наипаче же в церкви толико не твердое есть, елико и начала вящшее и высочайшее. Якоже бо аще лика верховнаго отъимеши, не будет лик по песни и по чину, и аще от полка воинству воеводу отставиши, не ктому правление и чином яже ополчения будут, и от корабля кормчию аще отъимеши, погрузиши корабль: тако и от стада пастыря аще отставиши, вся развратил еси и погубил". Сия убо Златоуст изрекл о начальницех, благочестивых сущих и освященных. Что же по сих речет о злочестивых и вредящих, аще они и высокия имеют чины; услышим: "Егда (рече) началник будет зол. вем и аз, яко не мало сие злое, но и безначалия мноо злейшее: лучше бо есть ни от единаго же водиму быти, нежели от злаго водиму быти. той бо многажды убо спасеся, многажды же и беду подъят: сей же всячески беду приимет, в яму ведом сый. Како убо Павел глаголет: Повинуйтеся наставником вашым, и покаряйтеся; Что убо, рече, егда зол будет, не повинемся ли; зол, как глаголеши; аще убо веры ради, бегай его и отрицайся, не точию аще человек бы был, но аще и ангел с небеси сшедый: аще же ли жития ради, не испытуй". До зде Златоуст [Беседы, киевопечат. лист 3113].

Сие божественнаго Златоустаго разсуждение подтверждается и другими церковными учители. О чем святый Афанасий Великий, архиепископ Александрийский, еже пиша о собрании церковнем, сице глаголет: "Шествующей непрелестный живоносный путь. Око убо да извержем, не чувственное, но умное. Сиречь, аще епископ, или презвитер сущей очи церковныя неподобне живут, и съблазняют люди, подобает изврещи их, уне есть им без их сбиратися в храм молитвенный. Неже с ними вврещися якоже со Анною и Каиафою в геенну огненну. Подобне и рука еже есть диякон, аще недостойне что творит, да отлучится жертвенника. Нога же есть слуга, зле течет в лжу к приятию, имений по Гиезеи. Подобает и сего от служения тужда творити, яко люта и несмысленна человека, да церковь собираема без соблазна хранится". До зде Афанасий [книга Никона Черног., слово 7].

Подобне же согласуяся сим учителем церковным, некто приснопоминаемый муж и духовный инок Святыя горы, именем Иоанн, в послании ко князю Василию Острожскому пиша, сице глаголет: "Ибо вам о очищении церкви нашей православной речь зачалася. и далее то чинити будем, на священническии степень по правилом святых отец да восходят, а не по своих волях похоти плотьской, ради имения и богатьства сан восхищают. и всякаго таковаго, иже сам наскакует, не приимуйте, и от короля даннаго без вашего избрания изжените и проклените: то не в папежа бо вы крестилися и в королеву власть, да вам дает волки, злодеи, разбойники и антихристовы таинники. лучше бо вам без владык и без попов, от диявола поставленных, до церкви ходити, и православие хранити, нежели со владыками и попами, не от Бога званными, у церкви быти, и тою ругатися, и православие попирати. не попы нас спасают, или владыки, или митрополиты: но веры таинство нашей православной, и сохранение заповедей Божиих, то нас спасти хощет". До зде ис послания.

Прочее же, в дополнение сего отвещания, чти в 10-м ответе предложенная свидетельства. Мы же за краткость многая и паки таяжде писати оставляем.

Отвещаем, 2-е: Аще убо, якоже выше предложихом, церковь есть в народе верном, и не стены и покров, но вера и житие, и кроме (аще не обрящутся правовернии) освященных может и в неосвященных и правоверных паче пребывати, нежели во вредящими благочестие, аще и с высокими чинами. Убо правовернии и древле безчисленнии обретающеся бяху в нужду по случаю, кроме священников, кроме видимых церквей, кроме пространных тайнодейств, обаче в них святая церковь всячески не не бяше: тако с Феклою равноапостольною в страдании и в пустыни; cице с Галактионом и Епистимиею, в мире и в пустыни и в страдании; сице со инеми многими святыми, в писании поведаемыми; тако с Павлом Фивейским, от гонения скрывшимся в пустыни, его же душу виде Антоний Великий, на небо со многою славою возносиму. [в Мин. мучен. чет., генв. 15].

Тако в прообразовательном новому в ветхом законе выну вера и церковь со святыми и в нужных случаех бе [Быт., 39. Ион., гл. 2. Паралип., гл. 34. Дан., гл. 3 и гл. 14]. Сице со Ионою во чреве китове, с Манасиею в воле медяне, с пленеными израильтяны в Вавилоне, кроме жертв, кроме видимых церквей. Тако с Даниилом в рове, и с треми отроки в пещи, иже тако с верою (по гласу Спасителеву: идеже два или трие собраннии во имя Его, в таковой церкви Он пребывает) к Богу вопиющими: "Яко Владыко умалихомся паче всех язык, и есмы смирени по всей земли днесь, грех ради наших. и несть во время се, князя ни пророка и вожда, ни всесожжения, ни жертвы, ни приношения, ни кадила, ни места, еже пожрети пред собою, и обрести милость. но душею сокрушенною, и духом смиренном да прияти будем". И ниже: "яко несть студа уповающитм на Тя".

Что же и Антоний, римское воспитание, не бяше ли церковию, егда един к единому, на едином камени правоверною верою службу молитвенную приношаше; его же нрава препростием, его же благочестия содержанием, обличи Бог хитросплетенныя языки: его же простолюдинством взусти архиерейския чины, покровенныя тмою нечестия, и повеле самому слабейшему водному естеству подстлатися под жестокое каменное тяжелое существо, и предаде яко пребезценное сокровище благочестием блистающему граду.

Еда бо и во иных пребезчисленных Христовых страдальцех и христианех, без священства многажды пребывающих в миру и пустынных жителях, не бяше Христовы церкви; кия быша не священнии суще, и без священников от вселенныя удальшеся, в пустом месте живуще, якоже о них преподобный Ефрем Сирин возглашая глаголет: "Не закон разоряют, не приемлюще священство держати". И паки: "церкви имут языки своя, имиже совершают молитвы своя прилежныя". Паки: "сами суть священницы себе". В книзе Ефремове, слово 111.

Темже ясно от предложенных показася, яко церковь и вера святая, не к чинам высоким, ни к местам, стенам пречюдным огражденным, но к произволению благому привязана, и к правым законом церковным припряжена, и в души словесной нетрудно вмещаема, по речению сосуда избраннаго: "Вы есте церкви Бога жива, якоже рече Бог, яко вселюся в них и похожу". 2 кор., глава 6, зач. 182.