Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 356.
И оное несогласное святей церкви перстосложение от кого бяше ли порицаемо печатию антихристовою?
Ответ, 356.
Якоже печать Христова не в единех точию перстах заключается, но с воображением крестнаго знамения на себе, яже о сей в 343-м ответе изъявихом. Тако убо и антихристова печать не в даных точию перстах, еже не по преданию святыя церкве в прообразование таиньств, но и в начертание на себе не во образ креста Христова. Якоже и великороссийская церковь ныне, не Христов крест в четырех частех воображати на себе повелевает, но четвероконечный, паче же двочастный начертавати умствует, о чем в 345 ответе засвидетельствовахом. Обаче сие знаменование, еже с праваго плеча на левое не преносити, якоже яковитяне и единовольницы творяху, в Катихисисе Велицем явственне печатию антихристовою порицается. Идеже сице пишет [Катихисис велик., глава 28]: "уже бо и многих ныне видим, иже не приемлют на себе Христова крестнаго знамения. сиречь десницею своею узаконеннаго воображения не возносят на чело главы своея и на живот, таже на правое плече и на левое. аще убо реченнаго сего крестнаго знамения не приемлют, то уже яве есть, еже имать прияти на чело свое и на десную руку антихристову печать. по реченному: идеже бывает света лишение, ту бывает и тме пришествие".
В старописменых Минеях четиях Макарьевских, августа в 31 написано: "несть бо ино что печать антихристова, разве не полагати десницы на челе, не знаменати честнаго и животворящаго креста Христова, то есть печать антихристова".
Темже яковитяне и единовольнии и инии таковии еретицы, не полагающии по всем членам креста Христова, по преданию церковному, двема перстома во образ символа Божества и человечества, но единем перстом перекрещивающии с леваго на правое, сего ради убо и суть антихристовы предотечи и его печать приемлющии (по Катихисису великому) показуются.
Вопрос, 357.
В Апокалипсисе написано: "сотворит бо вся малыя и великия, богатыя и убогия, свободныя и рабы. да даст им начертание на руце десней и на челе, да никтоже возможет купити или продати, токмо иже имут начертание на челех своих". Вы сие начертание убо ли ныне быти сказуете?
Ответ, 357.
Чти о сем ответ 344 и 345, еще и предъидущия и последующия оному ответствования, и тако о искомом удовлишися.
Вопрос, 358.
В той же главе повествуется сице: "глаголяи живущым на земли, сотворити образ зверю. [Ниже:] И дано бысть ему дати дух образу зверину, да проглаголет икона зверина. (В толковании:) Сице убо ничтоже не подоболепно, да и заступник, или предотеча антихристов, действуяй бесами, сотворит образ зверю, и покажет и глаголюща". Вы о сем зверине образе како разумеете, убо ли ныне его обретаете? изъявите и сия, ничтоже сумнящеся.
Ответ, 358.
Многоразличне убо нарицается образ зверин, (или антихристов). Нарицается убо образ, нарицается икона или подобие, нарицается начертание перваго зверя, то есть отступление диаволе, нарицается и кумир, якоже о сем в 351-м ответе показахом.
О сотворении же образа зверева святый Иоанн Богослов пишет во Откровении [Апокалипсис, глава 13]: "глаголет лжепророк живущым на земли сотворити образ зверев, иже имать язву оружную и живе". И паки: "И творяще землю и живущая на ней, да поклонятся зверю первому, егоже язва смертная исцеле".
Образ зверев, то есть отступление диаволе. Да якоже диавол отступи от Бога, и живущии на земли, си есть человецы, то же да сотворят, глаголет лжепророк, образующе диявольская деяния, и на Христа хулы, их же той действует. И всякое злочестивое жительство пройдут, оного образующее, сиречь живописующе образ отступника зверя и делы и словесы.
А яко такова есть образ зверя, показуется от того же Откровения Иоанна Богослова, и толкования Андрея Кесарийскаго. Апокалипсис, глава 20, стих 4: "Сущее. И видех душа растесанных за свидетельство Исусово, и за слово Божие, и иже не поклонишася зверю, ниже образу его, и не прияша начертание его на челе, или на руце своей. Толкование: Святым мучеником, за Христа пострадавшым, и не приемлющым умнаго зверя начертание, сиречь отступления его, дан бысть суд, сиречь власть судити. имже бесом даже до ныне (яко зрим) судят спрославляеми Христу, даже до скончания настоящаго века. Сущее [глава 14]: И третии ангел глаголяи гласом велиим: аще кто поклонится зверю и образу его, и приимет начертание на челе своем, или на руце своей, той будет пити от вина ярости Божия. Толкование: Аще кто (глаголет) озвершемуся антихристу повинется, и злочестивое жительство пройдет, оного образующее, или словом, или делом сего проповесть Бога, сие бо являти может на челе и на руце даемое начертание, и той приобщится с ним мучительныя чаши пития. Сущее: И не имут покоя во дни и нощи, кланяющиися зверю и образу его, и аще кто приемлет начертание имене его. Толкование: Не имут покоя день и нощь. день убо жизнь святых разумеваем, нощь же мучение сквернавых, еже получать образующии диявольская деяния, и на Христа хулы, ихже деют, сиречь живопишуще образ отступника зверя. и имя его в своих сердецах безчестное, яко честное начертавающе".
Како же язвы зверевы исцеление, и от чего извествуется быти, о том вышеименованный Андрей Кесарийский тако глаголет [Апокалипсис, глава 17]: "Сии зверь сатана есть, иже убиен бысть крестом Христовым. паки при кончине ожити глаголется, действуяи знаменьми и дивесами прелестными чрез антихриста отвержение и запрение креста. сего ради бе убо и крепляшеся прежде креста, несть же по спасительней страсти. изжилен быв и от области своея изриновен, юже на языки стяжаше. прибудет же в кончине по образу, егоже рехом". На стране: "Креста или Христа отвержение чрез антихриста соделати тщится сатана". До зде Андрей Кесарийский.
Святыи же Ириней протолкова исцеление язвы оружныя быти чрез некое царство: "исправитися (рече) разделившемуся царству на малое время. или единому от пророк антихристовых умершу, прелестно воскреснути в чин свой". До зде Ириней.
Какоже заклася едина глава от седмиглаваго оного (си есть Римскаго) зверя? яве, яко еще восток, еще север, быша в правоверии, и тогда заклася обличением ножем. Оживе же тогда, егда сии страны и сами обременишася теми же ересьми, и уста связаны быша от новолюбия.
Аще, по Андрею Кесарийскому, якоже выше предложихом, антихрист убиенный ожити глаголется чрез отвержение креста или Христа: ныне же на востоце и севере крест Христов и имя Спасителево отревают и ругают, убо яве исцеление язвы оружныя онаго зверя, или оживление антихриста, по Андрею и по Иринею, чрез отвержение креста и Христа показуется.
Какоже проглаголет икона зверева от тебе вопрошаемся, на сие ответословствуем. Якоже бо первый зверь, иже есть диявол и сатана, нечювственен и невидим. Не вапами написаннный, но самое действо, еже есть отступление. (но и кумир антихристов, якоже в 351 ответе изъявихом, не есть же чювствен: но глаголется быти папа Римский, восхитивый начальство Христово). Да якоже диявол сотворит таковый образец противный: и от человек, аще кто сотворит той же противный образец, си есть такое же действо соделает, сие глаголется творение образа зверева и поклонение. И тогда таковая икона и проглаголет в нем, яже суть сия: отрицание, проклинание, порицание, хуление, наветы, клеветание, осуждение, всякое подозрение, посмеяние, обругание, укорение, досаждение, уничижение, предательство, лжепророчество, ложное учение, лжеклятвие, многоглаголание, суесловие, сквернословие, лжесловие, оглаголание.
Сицевыя глаголы от тоя иконы могут произыти. О сицевом образе и Григорий Ниский глаголет: "хощеши ли, рече, лукаваго образа разумети свойства: зависть, ненависть, клевета, величание, лихоимство, страстная похоть, славолюбие, недуг. Се есть и сице, имже образ сопротивнаго образуется". Книга Анастасия Синайскаго, глава 1, вопрос и ответ 1.
Вопрос, 359.
И аще образ зверев ныне быти сказуете, то Господа ради известите, кий есть той?
Ответ, 359.
В вышепредложенном ответе уже известихом каков есть образ, или икона зверева, и како оная возглаголет. Такоже и о кумире антихристовом, в 351 ответе написахом, убо таяжде да не повторим.
Вопрос, 360.
В том же Апокалипсии повествует сице: "той же антихрист дивами вселенную устрашит. понеже бо во всех знамениих и чюдесех ложных, от всех чаровных отравник и обаятелей, лжехрист будет знаменитейшии, аки всякое дияволе действо приемляи". Вы ныне кого паче знаменитейша, Менандра и Симона волхва, и прочих чародеев, в знамениих и чюдесех обретаете? сие кроме своемненнаго мудрования, но от святаго писания извольте объявить без всякаго сомнения.
Ответ, 360.
Всюду бо, о несмысленне и косне сердцем, обратился еси яко антихриста в чювственнем образе видети и разумети, такоже и от него о происходимых знамениих и чюдесех явленными качествы зрети желаеши. Сице бо и жидове, иногда в писаниих препрекующе, ослепоша очесы: зряще Господа славы, и не познаша Его, но доселе еще Его ожидают. Такожде и вы, слышаще толикая Божия откровения таин, толикая от Духа Святаго предречения о антихристе, елика отчасти в прешедших ответех глаголана быша, нечювственни обретаетеся. Простительно бы вам было, если бы вы не ведали и не прочитали древняго и новаго писания. Но сия вся вам ведущим, во мраце упорственнаго духа пребывающе, и доселе заблуждаете в развращении ваших мыслей: но блюдитеся, да не во исходе вашем покажется той. Что тако одебелесте сердцы вашими, яко не мощи падшему семени словес, в нем ожити духом. Веси бо, о вопросителю, яко не вся являемая нам от Бога тако подобает и знати: отверзу бо (рече) в притчах уста Моя, сего ради и не всем удобоприятна. Вам бо (си есть усердно внемлющим) дано есть разумети тайны царствия Божия, протчим же в притчах, да слышаще не слышат, и видяще не разумеют. А понеже, якоже о антихристе и о его печати, вся чювственно разумети в своих вопросех предлагати подвизался еси: но и зде зело вящьшаго любопытства потребная, о антихристовых знамениих и чюдесех от апокалипсических сокровенных показаниих. В литеральный разум, о чюдне, влещи уклоняешися. Который не на чювственном сеися основан есть, но зело на любопытственном тропологическим, или аллегорическом разумении суть утвержен. Довлело бы и нам от него удалятися, яко некоей малейшей ладиице в морския не попущатися пучины. Но приснопомнимый верховнейший апостол Петр нас убеждает приити к вышемерным нам пределом: "будете (рече) готови ко всякому ответу, вопрошающему вы о вашем уповании". Да и ваше убеждение праздно положити не восхотехом. Надчаяние бо случается, и от плевел раждатися чистой пшенице, или земли благой, приемлющей семена со изращением по Христову словеси. Гряди, по силе нашего скудоумия, и о том вам возответствуем двояко. Первое о знамениих и о чюдотворениих антихристовых, а потом и о злополучении времен оных.
О знамениих антихристовых.
На сие убо в беседах Павел апостол и Златоуст да ответствуют: "И во всякой силе (рече) и знамениих и чюдесех ложных, (сын погибельныи приидет) имже да не прельщаются сущыя тогда. и чюдесех ложных, или притворных, и во всякой прелести неправды в погибающих может, иже аще и не пришел не быша веровали".
На сие и святый Кирил: "Кто есть сей? или от какова чина? повеждь нам о Павле, кого глаголеши пришествие по действу сатанину во всякой силе, в знамениих, и чюдесех ложных". И сие последи повести указует, яко сатана ученики себе сотворит, иже по онаго воли сам собою начнет действовати. Ведая бо, яко по суде не имать быти ему покоя, того ради не слугами своими, якоже извыкл, но сам собою имать привлачати и прельщати всякими знамении и чюдесы лживыми.
И сам Христос глаголет: "Востанут лжехристи и лжепророцы, и дадят знамения велия и чюдеса, яко прельстити аще возможно и избранныя".
Книга О вере, глава 30, лист 268: "Недоумеватися имамы истинным Христовым словесем, яко не точию легкомысленнии, но и избраннии боятися имут многокозненней прелести последней".
Святый Кирил, в знамении 8: "Нынешним многим лжехристом, един есть наивышшии папа, иже оному последнему антихристу предотеча". И повыше такоже: "ведая о том сатана, яко Христос истинныи во второе приити имать. [Ниже:] Паки Христа предваряет, и посылает уже не бездушныя кумиры, но человеки живыя лжехристы, Христу подобящыяся. и теми лживыми антихристы приводить всяким подобием тщится. даже бы всем оному последнему лжехристу яко истинному Христу поклонитися, иже вместо Христа быти прозвася и учинися князем мира сего, и обогатися на земли областию, восприя на ся Божию и святительскую власть". До зде из Кириловы.
Идеже явственно указася, кто такой, о нем же глаголется приити во многих знамениих и чюдесех на прелесть погибающих: глаголет, или самого сатану, или папу Римскаго. И той самый лжехрист, о нем же и в прешедших ответех многая рехом ти, яко Христом зде на земли назвася, превознесеся. Яже и сам антихрист, и антихристу (сиречь отступлению) предотеча.
Аще же и чювственно чюдес из оных лжехристов желаеши ведати, читай о них в Баронии от лета девятьсотаго к концу, 300 лет премногая множества тамо чюдес услышиши. Или аще хощеши и последственнаго оному зверя, его же число 666-е выражается, (иже самый последний антихрист глаголется быти, и всю власть прежняго зверя, сиречь Римскаго) творяй в деяниих и чюдесех созерцати, то в предъидущем 368-м указати имамы. Сия же убо зде общекупне о всех антихристовых чюдесех нечто возглашася: иди, и о прочих его чюдесех по единому вкратце ти возрещи имамы.
От гласа его колебатися месту.
Зде двизание места примати подобает вместо стоящих или пребывающих на месте людей, и сему приклади мнози. Давыд во многих местех тако глаголет: "Подвижеся земля". И паки: "Да убоится Господа вся земля, от неюже да подвижутся вси живущеи на вселенней. смутишася языцы. сего ради не убоимся внегда смущается земля, и прелагаются горы в сердца морская". (горы же и холми по толкованию требища бесовская). И евангелист глаголет: "силы небесныя подвигнутся, сиречь удивятся и устрашатся, зряще тварь изменяему". Благовестник, Матф., зач. 100, лист 191. И паки: "Входящу Исусу во Иеросалим, потрясеся весь град", и прочая.
И сия вся метафорических, или преносных словес суть разум, а не свойственных. Ибо земля не смущается по себе, ниже подвизается, аще негде и трясется. Ниже горы колеблются, и ниже стены трясошася тогда, егда Господь вниде во Иеросалим: но живущии на земли, и горы высоких чинов люди. И град трясется, вместо живущих во граде. Пишется во Апокалипсии, яко по излиянии седмыя фиалы бысть трус велик. А в толковании втором сей трус глаголет, пред пришествием Христовым велие будет смущение многих в вере.
И от сих убо всех иносказательных словес, аще и глаголется тако от гласа антихристова двизатися месту, но коему? на нем же он пребудет. Его же пребытие глаголется вся земля. Идеже обрящет себе место, и тому двизатися. И се знаменует смущение, или преложение вере, от нея же смутятся и подвигнутся живущии на земли.
Преставит горы пред очима зрящих.
Горы наричются многажды святое писание, и в них положенный Божий закон, и предания святых отец, по оному [книга О вере, лист 210]: "тогда сущии во июдеех, да бежат на горы. на сие Златоуст толкуя, глаголет: иже суть в христианстве, да прибегают к писанию". И паки пророк глаголет: "и дом Божий на версе гор", сиречь церковь Божия имать основание свое на писании, се есть на законе и предании Божии, или святых. На сем камени созижду церковь Мою. И на камени , сиречь на заповедех Господних. Якоже и стих церковный воспевает: "на камени заповедей Твоих утвердивыи церковь свою". И паки, иногда горою нарицается и церковь, по оному: "Аз же поставлен есмь царь от Него, над Сионом горою святою Его". И паки, Исаия во главе 25 глаголет: "и сотвори Господь Саваоф у горы сей (церковь Христову нарича) испиют радость, испиют вино, помажутся мастию благовонною в сей горе" [книга Камень, догмат о евхаристии]. И у псалмопевца глаголется: "и горы Сионския разстоящыяся местами", церкви Сионския предания.
Горами паки нарицаются и предначальнейшия церкви. Якоже во Апокалипсии, в слов. 18, во главе 16, в зач. 52-м. "Всяк остров побеже, и горы не обретошася". Толкования Андрея Кесарийскаго: "островы суть святыя церкви. горы же в них, премущыя разумевати от божественнаго писания научаемся". До зде Апокалипсис.
Из сих трех предложений о горах, их же антихрист похощет преложити, к еликому предлогу из тех мысль свою преложити, на вся предложения сия годствует прияти: аще антихристу преложити законы уставленныя, аще церкви Христовы во ино, аще начальнейшим в церкви на ин разум из благочестия на нечестие, вся сия до того слова принадлежна, еже речеся: "представит горы пред очима зрящих". И о сем святый Кирил пишет: "приидут бо, ихже ожидаем, и чюднее и паче древних еретиков, изменят дела и словеса, и время зрящии". И приводится тамо, яко папа Римский пременение сотворил в летах. Но сия нам от церкве святыя запретися прелагати: "не прелагай бо, рече, предел вечных, ихже положиша отцы твои". И от сего прелога познавается антихристово время.
Шествует по морю немокрыми стопами.
Воды глаголются языческия народы по многим толковником, кои правыя веры не имут. В них же диявол ходя, возмущает разумы их, да не явится познание Бога.
Зри же о том и в Апокалипсисе, идеже пишется о сем тако: "И видех (рече святый Иоанн) жену седящую на звери червленне, исполнь имен хульных, иже имяше глав 7 и рогов десять". (и сию виде Богослов на водах многих). И на сие толковник: "Женою нарицает Римский град, седящая на водах многих, сиречь обладая множеством людей. обдержаше бо Рим вселенною. Сущее: И зверь иже бе и несть. и той осмыи есть, и от седмих есть. и в пагубу будет". Толкование: "Зверь антихрист есть. осмыи же, яко по седми царствах востанет на земли, на прельщение и пагубу земли. яко и от единаго их воздвижется, аки Римский царь творяся, на запустение и разрушение послушающих его приидет, и посем в пагубу идет. Сущее: И глагола ми ангел: воды, ихже видел еси, идеже любодеица седит, людие и народи суть, и племена языцы. А роги, ихже видел еси на звери, сии любодеицу возненавидят, и запустевшу сотворяют ю, и нагу плоть ея снедят". До зде толкование.
А на поле, против его, написано тако: "Нецыи приемлют сие о папе Римском, яко от престола своего изгнан будет, и власть и богатьство его отъимут". Иезекииль 16, стих 37. До зде Апокалипсис.
Откуду мощно есть научитися что воды, и кто зверь, на нихже он пребывает. И от сего разумети антихриста, что есть ему по водам ходити. Еще и сице сие разумети по морю немокрыми стопами. Море убо мир сей, смуток многих исполненный. От чего велие затмение ума бывает, во еже не имети света истины разума, отнюдуже и дияволу в затменных мощно шествовати неблазненными стопами.
Или сице воды суть сего моря. Дондеже имут теплоту любве Божия, не может сей враг по них ходити. Отщетившия же воды сия теплоты хлада ради, и замерзания тех в злодействе, удобен путь немокрыми ногами дияволу по них ходити явится.
Сведет огнь в небес.
Четверогубно зде на сие разумети подобает:
или отгнание от церкве любве Господни;
или огнание от церкве благодати Божия;
или сведение огня гнева Божия;
или нечто таково чюдесно сотворит.
И три убо оныя за антихристово тогдашнее беззаконие. Четвертое же попущением Божиим, якоже и при Иове случися быти. О них же мало речем сице.
О гневе Божии во псалме 78-м Давыд глаголет: "разжется яко огнь рвение Твое". И иным пророком [Моисей 5, глава 32]: "возгорится яко огнь ярость Моя до ада, рече Господь". И сицевый огнь глаголется сходити с небесе за грехи в наказание наше, якоже многажды случишеся. О коем огни и в Апокалипсии глаголется: "и первому (рече) ангелу вострубившу, и бысть град, и огнь смешен с кровию. и паде на земли, и третия часть древа погоре. Толкование: Гряди, глаголет, смешенныя со огнем прежде кончины сходящии, по праведному суду Божию от варварских рук попаления и человекоубийства. от нихже не мнее третия части сущих на земной твари по видимей сей погибнут, не токмо от человек, но и от земных плодов".
Пишет же и Бароний в лете Господнем о страшных огнях, приходящих на землю, и многия народом беды содевающих, о них же изволяй да чтет тамо.
Есть же и ино огня знаменование, о чем той же Апокалипсис, во главе 23: "и вторыи ангел воструби, и яко гора велика огнем жегома, ввержена бысть в море. и бысть третия часть моря кровь, и умре третия часть создания в мори имущым души, и третия часть кораблей погибе. Толкование: Просяху бо иногда знамение у Христа фарисеи от небесе показати, того ради, яко мняху бо Его чюдеса на земли от дияволи силы быти". Виждь, от небесе знамения Богу единому и фарисеи мняхуся: какоже бы антихрист от небесе знамения мог творити, еже сводити огнь.
Толкование второе: "Морем знаменает житие се, горою же еретиков: Монтана, Манихея, Валентиниана и прочих. они бо учением своим сожгоша третию часть земли, сиречь ринуша в муки последующыя им человеки". До зде Апокалипсис.
Неглиже и антихрист пришед, сведет на землю таковыя огни, попаляющи здания, и души человеческия погубляющия ересеучением. Ибо виною отступления законныя правды, гнев от Господа низпосылатися обыче. Иначе же кая потреба сводити огни, и что ими содевати, зане все елико глаголется о нем, иносказательне глаголется, а не свойственне, яко же и услышим в последующих.
Глаголется бо о нем: сотворит день тму, а нощь день.
Зде явственнаго указания есть знак иносказательства, ибо есть и глаголется день разума Божия знания. Якоже и апостол глаголет: "отложше ношь, или тму страстей, яко во дни благообразно ходите, ибо прейде нощь всякаго невежества и страстей". Повелевает так ходить не запятым, как и днем. Но антихрист сей ересиарх, толикий свет, или рещи, толикое полуденное сияние благоверия, аки темный облак нашед, помрачит оно, и сотворит нощию древняго невежества взысканием. А нощь еретическаго учения тму, аки день почтит. И тако сотворит день тму, сиречь благочестие поречет еретичеством. А тму еретичества, сущий свет почтет и проповесть, якоже еретиком обыкновенно есть истину во лжу изменяти. Их же порицает Исаия, глаголя [Исаия, глава 10]: "горе глаголющым сладкое горько, и горькое сладко. и полагающым свет во тму, а тму в свет". А не иначе, якоже и последующее подтвердит.
Солнце (рече) обратит, аможе хощет, и луну такожде.
Но сия от возможных ли есть такия планиты обращати, имаже Господь Бог временам и летам измерятися положи. А наипаче, какоже обратит, от запада ли на восток, или по северной стране ходити? или от полудни на север, и от севера на юг? и кая есть сия камедия? или кое насилие во определении Божии? ни помыслити сему мощно. Бог бо аще и попущает что таково диаволу, или волхвом содевати, но не во утвержденных стихиях, или планетах, ими же толь великая содевается в мире. А наипаче сия планеты, на них же Бог основа веки, и тыми ли бы попустил сему врагу тако играти, яже от века не слышашася. Коликия бо быша волхвы во Египте при Моисеи, жезлы в змии претворяющии, обаче не слышашася о них, чтобы поне едину звезду инако устроили ходити, неже солнце и луну. Яко да познаеши оно, яко предел положи твари всесильный Зиждитель, и не может како прейти. Хотеша бо иногда Сотер Египетский, и Дарий Перский царь, две пучины Египетскую и Индийскую во едино Чермное море совокупити, но не возмогоша. И сие чесо ради? да убоится Господа вся земля. Яко и слабый песок, предел положившаго, не возмогоша тако сильнии человецы прейти, коль же паче в толиких светилах.
Мнози бо мечтателие прелестнии волсви быша, и титулы себе велики полагаху: ин глаголася бог быти солнца, ин молнии, ин грома, и проч. Многа же и чародействоваху, обаче не касающеся до твари положения, а наипаче сих светил. Быша же нецыи и в нынешния времена, хотящии некими машинами отводити молние сверкающия громы во облацех, но живота точию гоньзнуша.
Но оставим сия маловажная, должная и свойственная возглаголем.
Солнце обратит, аможе хощет, и луну такожде. Смотрим убо зде коеяждо планеты по силе действо: солнце убо есть не заименованнаго света сияние, а луна по себе скудствующаго есть света: и аще не озарится от солнца, темна пребудет. Сице и церковь Христова, аки некая луна на земли [Апокалипс., глава 12], (по святому Мефодию) солнца светом Христа просвещаема учением, просветится от восточныя страны. Или паки, по толкованию списателя книги О вере [глава 2, лист 18], "жена оболчена в солнце церковь есть, солнцем правды Христом одеяна, луною же знаменует крещение": антихрист же сия испревратит. И сим прикладом удобь есть разсудити, что есть солнца и луны преложение, такожде и дни и нощи претворение.
Аще бы рещи зде и сие, яко сия преложения во дни антихристовы имут быти, преложения лет значити. Яко он своими летния обходы вычисляет, и многия убавляет. Яко в Риме, тако и у иных языков, многия в том поблуды явишася, о чем Кирил святый описа. Ими же бы явити солнца и луны повращение, сиречь дней солнечных лет. Но зде потреба паче изобретати духовная, а не внешняя. Посем прейдем на сие: "Прострет (антихрист) руку свою, и соберет множество гад и птиц". В деяниих апостольских, плащаницею оною, исполненною гад, языки знаменова поганыя. И таковых себе антихрист соберет по свойству своего нрава.
О чем и во Апокалипсии, виде Иоанн из уст змиевых, из уст звериных, и из уст лживаго пророка, духи три нечистыя, аки жабы исходящия. Иже в толковании втором, еретиков бывших и будущих, блядословия их ради, наричет. И таковых себе антихрист соберет, кои бы уст своих не затворяли, и непрестанныя бы, аки жабы, на истину Христову хулы отрыгали, а лжу умели бы защищать. Таковых гад антихрист востребует, кои бы аки еже бы имели колющияся остны. Коих значит немилостивых, иже гласы убогих и нищих слышаще, уши свои немилосердием аки аспиды затыкают. В том его собрании потреба змиев, ядом своим погубляющих человеки. Кои суть, истее рещи, еретики, фалшивыми своими и учении, и прикрытыми словесы, аки листвием прикрывающихся. Или, аки под злаком, яд своего учения уставляющих, вечною смертию могут уядати. Сему потреба имать и звери оныя льстивыя, терзающии плоти человеческия, не покаряющихся антихристу. Ту соберутся многия и оныя, по горам и дубравам гордостне пасущияся, по различных паствинах греха. И пышнии раскошницы, несытыя сластолюбцы, и во своем своевольстве, а не в законе Божии пребывающии. Таковых себе антихрист птиц изберет, совы и филины нощныя, кои во дни света благообразно ходити не могут, но в нощи и в пустынях летают. Яковии суть злодеи, и правды Божия не знающии, и во тме греха заблуждают, и посреде смертоносных многих сетей волочатся, и во всякой пустоте безстрашия Божия и дел Божиих отдалении пребывают. Таковых себе соберет вранов, пищу себе от плотей притяжущих, яковии судии немилосердии, и мучители безсовестнии, кровь неповинне проливающии. И прочих, подобных злых и отчюжденных славы Божия, соберет, о коих яве есть во Апокалипсии писано [слово 19, глава 35, стих 222]: "паде, паде Вавилон град великий, и бысть жилище бесом, и хранило всякому духу нечисту, и хранилище всех птиц нечистых". Во втором толку: "и хранилище всякия птицы". Сим знаменает ложныя учители и еретики, летающих семо и овамо. И таковое антихрист соборище соберет себе, и сими своя действа и дивеса творити начнет.
Прочее же, како антихрист богом прозовется: како проповедники во всяко место пошлет, еже привести на поклонение себе: како вси тесноты ради пищныя приидут и поклонятся ему: како сим даст знамение на челе и на десней руце: и како сей богопротивник род жидовский возлюбит: вся сия в прошедших ответех довольно уже глаголахом. Зде же, якоже обещахомся, о злополучии антихристовых времен мало нечто возглаголем. И сия такожде не литерально разумети ключимствует, но такожде духовным разумом. Глаголет бо Ипполит святый: "во время антихристово, за умножение беззакония, реки изсохнут, блата изсякнут, студенцы оскудеют. и море, не приемля речныя струи, смраду подобне возсмердится, и зловонии безчисленнаго и гнуса исполнится. и темни ветри, землю и море безмерно смущают. морский шум, и зноеве нестерпими, запаления нечаемая. и все земное рыдание и плачь, утехи не имеяй". Но како сия вся чювственно быти могут? понеже аще реки изсохнут, и блата изсякнут, и студенцы оскудеют всюду, то нужда есть и морю, не приемшу речныя струи, оскудети: ибо, по великому Василию, море не оскудевает ни умаляется изливанием рек. Внегда же реки, наполняющия море, изсохнут, нужда есть и морю оскудети умелением воды, таже и изсохнути. Ветру же темну, землю и море безмерно смущающу, и шумящу морю, смеситися воде творит с песком и со землею, таже и огустети. Зною же нестерпиму палящу, мокроте изсохнути бывает, и сице нужда есть и морю вконец изсохнути, а не смердети. Аще ли же сице морю и рекам изсохнути, то несогласно будет святых отец писанию. Ефрем бо святый и Паладий мних, о страшном суде Христове пишуще сказуют, что пред судищем Христовым огенная река море и реки изсушити имать [Ефрем, слово 105, лист 264. Паладий мних, в неделю мясопустную, Соборник]. И сим являют, яко море и реки, даже до пришествия Христова не изсохнут. От сего нужду имамы духовне разумети, яко во время антихристова царства реки изсохнут, и море возсмердится не чювственное, но мысленное. Реки бо мысленныя, о них же рече Христос: "веруяи в Мя, реки потекут от чрева его". Море же, не приемшее мысленныя реки, житие неправедных в мире сем. Якоже многажды писание нарицает реки истинное учение: море же, мир сей сказует быти. И сицевому морю, сиречь неправедному и лукавому миру, не приемшу оныя реки, сиречь истинное учение Христово и святых Его, того ради и смердети нечестия ради и беззакония. Что же от сего последовати имать? тогда (рече) глад крепок по всей земли, тогда рыдание неутешно, тогда плачь безмерен, тогда зверие на человеки востанут, скоти и четвероногая помрут, человеки от глада и жажди скончаются. И просящим ясти и пити у антихриста, он же отречется со многим недоумением, извествуя: яко небо не даст дождя, а земля плода, откуду аз вам дам снеди? он же бо окаянный ни себе не может помощи, како прочих помилует в тыя дни от скорби тоя великия. Како и сия имут чювственно збытися: аще бо глад крепок по всей земли будет, яко человеком от глада и жажди скончатися: и всей земли, от телес повергнутых умерших, возсмердети, кто тогда покарятися будет антихристу, человеком умершим? и аще скоти и четвероногая помрут, убо и зверие суть четвероноги, от глада умрети имут, а на человеков востати не могут. И аще антихрист себе помощи не может от тоя неизреченныя скорби, убо и антихрист, человек сый естеством, нужду имать гладом изнемогши умрети, и тако все царство его гладом и жаждею скончается. Аще ли сице, то не согласно будет Христову евангелию, и святых отец писанию. Сам Христос о последних днех глаголет: "якоже бо (рече) во дни Ноевы, тако будет и во дни Сына человеческаго, ядуще и пиюще, женящеся и посягающе". Феофилакт же святый протолкует: "яко антихристу пришедшу, сласти безместныя умножатся в человецех. и на питания, и на блуды безсрамно уклонятся, якоже при Нои исполини. тогда козлогласования, тогда пиянства". И аще, по евангелию и по толкованию, при антихристе не плачь и рыдание, но козлогласование: и не глад чювственный, но ядение и питие, и на блуды безсрамное уклонение: и не скончание от глада, но женитися и посягати: и не смердети земли от телес, повергнутых умерших непогребеных, но блуду повсюду видетися безсрамну извествуется: како же о гладе и о смерти, и о зверех разумети истее возможем? нужность самая повелевает духовне о сих разумети. Пишет бо святый Златоуст в слове о лжеучителех и о скончании века, сице глаголющи: "сего ради смирени есмы по всей земли грех ради наших. и приидоша на ны в скончание век, яко же пишется, пастырие волцы, и овца сокрушены. и глад близ дверей: не глад хлеба, ни жажда водная, но глад не слышание слова Божия. уповающии же на Господа, никтоже отчаяйся. но пецыися присно, предведущее глаголющаго: с вами есмь, рече, дерзайте убо, яко не уморит Господь гладом душя праведных". Откуду бо вниде глад, губяй душя? не от книжнаго ли неиспытания. А еже антихристу, просящим у него пищи, не подати, в том же слове о лжеучителех Златоуст пишет: "аще ли кто вопросит их о книгах, то отвещают, глаголюще: убози есмы, не имамы чим книг стяжати. ходят же не яко убози, но ризы носяще светлы, блещащаяся, разширяюще воскрилия. шии же яко у телцов, иже на заколение упитанных". Маргарит, слово 13.
Какоже помрут от сего глада человецы, святый Ефрем пишет: "Тогда умрут младенцы на лонех матерних, и матери верху отрочат". И паки: "отец с сыном объемшеся умрут". Но и о сем такожде чювственно разумети не предлежит. Понеже сии не телесною смертию умирати начнут, но духовною: или чрез приятие действ антихристовых, по тайновидцу глаголющему [Апокалипсис, глава 62]: "сии суть мертвецы, не воскресшии со Христом в крещении, но пребывшии во умерщвлении". И по Златоусту [Маргарит, слово о оглашенных]: "мертвыи некрещен, и прежде суда осудися". Или чрез приятие неверия умершии быти глаголются, яко же Мелетий глаголет [Кирилова, послание 10 патр. Мелетия]: "умерших верных неверием, и миролюбием, и покорением князю тме века сего". К таковым бо и Господь глаголет: "аще не веруете (рече) Мне, во гресех ваших умрете". И паки, апокалипсических таин изъяснитеь глаголет: "диявол бо чрез сласть развращенных, питием горьким напаяет человеки, и тем умроша в пиянстве душевном, и соблажнении от Бога, диявольское убийство его глаголет". Анастасий же Синайский евтропологическии сице протолкует: "отец убо, еже ум сказуется в человецех. мати же нарицается душа или жена. чада же дела, яже делаем суть зде душею и телом". А еже како не будет кто погребати, погребение бо толкуется исповедание и покаяние. Сия убо вся антихрист пленити имать в свое послушание, и умертвити неверием.
Темже, по Ипполиту, и имать нечювственне вся тварь плакатися о уклонении рода человеческаго к прелестнику, и о уморенном от него духовне: "Восплачется (рече) тогда вся земля. восплачется море и воздух. восплачются дивия животная со птицами. восплачются горы и холми, и древа польская, человеческаго ради рода, яко вси уклонишася от Бога, и лестьцу веру яша. приемше начертание сквернаго богоборца, вместо животворящаго креста Спасова. восплачют же ся тогда и церкви Божия плачем велиим, зане ни приношения, ниже кадило совершается, ниже служба богоугодная. священныя бо церкви, яко овощное хранилище будут. и честное тело и кровь Христова, во днех онех не имать явитися. служба угаснет, чтение писании не услышится: но тма будет на человекох, и плачь на плачь, и горе на горе".
Какоже и о сих чювственно имамы разумети, аще не духовным разумом я приимем. Понеже чювственно, но чювственней твари плакати отнюд естуству не сослагательно. От прочих же писаний, и от пророка Давыда, и от инех знамений, в видимей твари бывших, не неудобно есть в подобие сих привести. Аще бо Давыд пророк, небу и земли, солнцу и луне и звездам, и прочей твари, хвалити Бога повелевает. Аще и церковь Христова воспевает: яко всяко дыхание и вся тварь славит Господа, убо разумеваем, яко хвалит не чювственными гласы. Аще ли же вся тварь Господа хвалит, убо несть безместно, еже и плакати твари невещанными гласы. Аще ли же бы хотящу Богу, могла бы тварь и вещанными вопити гласы, идеже бо хощет Бог, побеждается естества чин. Входящу Христу во Иеросалим, аще бы еврейския дети умолчали пети, камение тако пети могло бы. Во время же Христовой страсти, яве тварь Богови сострадала: показа бо изменение твари. Солнце лучи скры, и свет померче. От шестаго бо часа до девятаго, тма бысть по всей земли. камение распадеся, завеса церковная раздрася, и земля потрясеся. Ибо тогда не терпяше тварь зрети Бога досаждаема, сице соболезнуя страдаше, извествуя всем дерзнутие беззаконных. Убо и при антихристе, нужно есть твари, соболезнуя о нас страдати, и плакати невещанными гласы: и засвидетельствовати всем таковое падение, являя свое естество изменением неким. Нужно бо ей и всегда, по апостолу, соболезновати и воздыхати [к римляном, зач. 97], яко суете тварь повинуся не волею, но за повинувшаго ю на уповании. Яко и сама тварь свободится от работы истления, в свободу чад Божиих. Вемы бо яко вся тварь совоздыхает и соболезнует даже до ныне. К римляном, глава 8.
Паче же на кончину века непщуем нужнейше быти, еже соболезновати твари за скорбь неизреченную, якова не бяше (по Спасову гласу) от начала мира, яже приключися быти человеческому роду. Яко вси уклонишася от Бога, и лестьцу веру яша. Приемше начертание сквернаго богоборца, вместо животворящаго креста Спасова. А еже рече восплачются церкви Божия, яве яко и сии плакатися имут не чювственно, за еже быша прежде освященнии, а потом антихристом осквернени. О них же невидимая нерукотворенная духовная, и одушевленная Христова церковь соболезнуя плачет: яко дом бе Божий, ныне же вертеп разбойничь: яко место бе ангельское, место архангельское, самое небо, ныне бесом жилище: яко бе освящена, ныне же осквернена, и всякой святыни пуста: яко ни приношение, ниже кадило совершается, ниже служба богоугодная. Священныя бо, рече, сия церкви, яко овощное хранилище будут: и честное тело и кровь Христова, во днех онех не имать явитися, якоже ныне во оных церквах того истинно совершаемаго и не видим. Служба угасе, чтение писаний (древлепреданных книг) не слышится: но (истинно рещи) тма есть на человеках, и плачь на плачь, и горе на горе. Повергнуто есть злато и сребро на путех, (еже есть словеса божественных писаний) и никтоже возмет, ни соберет кто: но вся мерзска устрояются (новолюбцем), сего ради и плакати ум имущим должно. Аще бо от Соломони церкви к плачю преклоняяся, болезнено вещание Божия церковь творит сице: яко и персть раскопаема любима ми есть, кольми паче о храмех Христовых, в них же служба богоугодная совершашеся, и жертва совершенно истинная Ему приношашеся, плакати довлеет. Доселе убо умедлихом в показании антихристовых дивес, и того злополучнаго времене. И множае бы возможно предложити, но краткость лобызая ответа, да не отягчены покажем слушатели, и того ради прочая того чюдотворения оставихом, внимающему бо и сия довлеют.