Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Предложение первое
Предложение второе
Предложение третие
Предложение четвертое
Предложение пятое
Подобный материал:
1   ...   38   39   40   41   42   43   44   45   46

Вопрос, 361.

И аще антихрист последний уже прииде, то убо ли Енох и Илия, и Иоанн Богослов прииде, о них же пишется: яко послани будут от Бога к людем проповедати, яко да не приемлют прелестника антихриста? изъявити от святаго писания.


Ответ, 361.

Сей убо символический разум, еже о пришествии Илии и Енохе, и Иоанне Богослове, не нашим бы скудоумным разумом разсуждати подлежало: понеже оный суть в деснице, содержащаго всю тварь, запечатлен седмию печатьми.

Якоже сам Богослов во своей Апокалипсии сказует [глава 11, стих 70]: "и видех, рече, в деснице седящаго на престоле книгу написану, внутрь уду и вне уду, запечатленну седмию печатьми". Толкование: "Книгою премудрою Божию память разумеваем, в нейже вся, по святому Давыду, глубина судеб Божиих написана суть. еже убо внутрь, прикровенныя духовныя разумы глаголет. а еже вне уду, удобныя разумы сказует. седмь печатей, сокровенное утвержение книжное, и всем неразумно". До зде Апокалипсис.

Темже мы, созирающе свое худоумие, боимся к толикой высоте приникнути, и к толикому преестественному сокровищу приступити, и гадательная в нем решити. Яковая суть, и от тебе представленная, яже не внешними и начертанными яве словесы разуметися ключаемая, но самеми сокровенными запечатленная. Но понеже связание твоих словес понуждает нас в вышемерная вступати, и о сем от свыше низпосылаемаго просим вразумитися, и полезная разрешения (еже есть, по толкованию апокалипсических словес вне уду, сиречь удобными, паче же готовыми словесы святых) учинити.

Но прежде неже иными [книга О вере, глава 30] о пришествии Илии и Еноха (к ним же присовокупляя и Иоаннове) показати помедлим нечто в предисловии, некое сомнение о тех, вопреки вашему мнению, непщующему чювственно сим прийти, и обличати антихриста, и убиену от него быти изглаголя. Пишет бо Павел, с ним же и Златоуст, о времени антихристова в Риме настатия, сице [Беседы апостольския]: "Власть римская егда возмется от среды, тогда антихрист придет". Но власть римская от времене Леона папы отъята, егда он на царство Римское Карула короля францужскаго помаза, вскоре по седмом вселенском соборе, по Христове рожестве лета 796-го. И оттоле мир между восточною и западною церковию разоряти начася, и ереси помалу ввождахуся. Того ради по учителех церковных разумеся, яко в Риме антихристу (по предречению Духа Святаго) от тогда появление быти нача. Но внемли, кой Дух Святый о времени антихриста (Павлом и Златоустом) предрече, Той же и Иоанну Богослову о Еносе и Илии предъяви, яко тии от антихриста убиени будут. И зри убо, аще не не вериши учителем, то уже антихрист в западных церквах наста. Яко бы рещи, по се настоящее лето Христово, по гражданскому леточислению 1789, прейде до нас едва не тысяща лет, а чювственнаго прихода и убиения Илии и Еноха не слышится. Но Апокалипсис сказует, Еноху и Илии точию полчетверта лета о неприятии антихриста проповедати, а потом антихрист наставший убиет их, и будет царствовати такожде полчетверта лета. Но от Римскаго отпадения до нас в толиких летах, всего того появления пророков и убиения не слышится.

И сих ради вин, сомненно чювственнаго прихода пророков смотрити. Ибо и Апокалипсии фигуры и образы не на чювственном, но на умном сеисе полагаются.

И тако о сем изрекше, в самая показания словес апокалипсических, и инех святых поступаем, яже зде на различная предложения разделяем.


Предложение первое.

О Иоаннове прорицании, свидетельство от Апокалипсиса. Тако бо ему во Апокалипсии от ангела речено бысть [Апокалипс., глава 29, стих 129]: "Подобает ти (рече) пророчествовати в людех и во племенех и во языцех многих". Толкование: " Сими сказует, яко не абие по видении, и Божиих откровении ведомых быти. и яко подобает блаженному евангелием своим и Апокалипсиею сею до кончины прорицати будущая, и почитающым я, или понеже не у смерти вкусил есть, на кончину прийти ему подобает, возбраняюще антихристовы льсти приимати". До зде Апокалипсис.

Ты же внимай словеса толковника сего, како единым разумом о Иоаннове проповеди не дерзне протолковати, но трегубое о том разумение подаде.

1: Яко не абие по видении сия прорицати.

2: Яко и не самому собою, но евангелием и Апокалипсиею сею, почитающим сия книги, примати Иоанново пророчество. И зде иносказательне словеса вместо самого Иоанна приемлются, якоже и Моисеовы книги вместо Моисея.

3: Еще полагает о Иоанне, глаголя: "или самому прийти". И сице убо почто? яко тайна Божия запечатленна есть.


Предложение второе.

О прорицании Еноха и Илии, свидетельство от того же Апокалипсиса [Апокалипсис, глава 45, стих 191]: "И слышах глас велии, глаголющь седмим ангелом: идите и излийте 7 фиал ярости Божия на землю". Толкование: "Человеколюбец бо сыи Бог, дабы умалил будущыя муки, на сем житии на достойныя их наведет Енохом и Илиею [Тогож стиха во втором толков., сих 7 ангел значит гонит. церкви Божией]". До зде Апокалипсис.

Ты же воньми сих седми ангелов, кои суть они тыя, яже имут силу навести седмь язв последних на землю, и в них скончати ярость Божию. Чиею же областию сия язвы наведутся? глаголет, Енохом и Илиею. А понеже о сих седми фиалех мы зде пространства ради подробну не описуем, что о сих в печатных и старописменных Апокалипсисах. Тамо бо яве есть, яко сии фиалы начало имут от лет Господних, и даже до кончины мира в действе излияний своих пребудут. Но преди показано, яко оных излиянии наведутся Енохом и Илиею. Убо время их, показанное (во Апокалипсии) днями 1260 дней прорицания, дни наведения казней, от дней Христовых до скончания мира имут быти. Аще толковником апокалипсическим верити хощеши, яве и от сего предложения ведати возможно есть, яко не есть чювственно Илии и Еноха пришествие, но некое разумное. И яко сия апокалипсическая таинства, аще и мнится яве глаголатися, но некая есть глубина непостижная мудрости: темже и не то умствовати подобает, еже тамо литерально глаголется, но ино и ино.


Предложение третие.

О церкви Христовой воюющей, яко и сия от начала своего дней 1260 гонима имать быти.

Свидетельство от того же Апокалипсиса. Святый Иоанн, о жене бежащей в пустыню (си есть церкви), глаголет [Апокалипсис глава 33, стих 148 (глава 12, зач. 33)]: "И жена бежа в пустыню, идеже име место уготовано ей от Бога, да тамо питается дней 1260". Толкование 1-е: "Пустыня есть отпущение злобы и истления, в нюже вложишася святии и избраннии жития сего, и избегнут небрегуще ни о чем же. или в пустыню горскую бежат, укрытися от антихристова лица и пол лета, якоже и первии мученицы делаху". Втораго толка: "И жена бежа в пустыню, церковь святая, по вознесении Господа нашего Исуса Христа на небеса, с воздыханием и слезами прибегаше к Богу, оставлши вся вещи мира сего плотския, идеже место уготовано, сиречь опочивание под силою крепости, и хранения его. и тысящею же двести шестидесятию днями, объемлется все время от вознесения Христова на небеса". До зде Апокалипсис.

Виждь убо и внимай, каково и се сокровище, положенное на селе святаго Апокалипсиса. Ибо писмены видимыми сказано, церкви укрыватися от антихриста дней 1260: толковницы же дней сих число определиша на все время от лет Христовых даже до скончания мира.

Сия ей 1260 дней, вся дни непрестанно бегати от лица змиева, сиречь от соборища еретическаго. Ибо диявол, умный змий и жрец душ человеческих, непрестанно приемля своя сосуды, и сими гонит рабы Божия: вначале Иродом, потом Нероном и прочими, и соборищем июдейским. Егда же мало отдохну церковь Христова при царе Константине, и погна паки ю диявол Арием, Македонием, Несторием, и прочими своими сосуды испущаше скверныя на церковь Христову воды, лживых ересей, хотя ю потопити. О сем бо нападении еретическом на церковь Христову, во описании Соборника пишет сице [Соборник, лист 877]: "Сию же брань мню Иоанну Богослову во Откровении являющу, еже змий гоняше жену, хотящую родити законная чада, еже есть церковь новаго завета, на нюже пусти змий воду, сиречь еретики". Сия убо в Соборнице о прежних речеся еретицех, кия быша до соборов, и во время соборов, и по соборех, воюющих на церковныя чада: но и ныне не спит, таяжде изблевает, и гонит, и покоя выну не дает. Тем истинно есть слово, и всякаго приятия достойно, яко сия дни церкви святыя бегания 1260, все время от лет Христовых объемлются образительне, бывших сицевых дней при Антиохе: тогда бо лютая зело 1260 дней июдеи пострадаху. Кия и зде дни, вместо скорби дней, на церковь гонения приемлются. Убо и пророком Илии и Еноху толико дней проповедати написуется писменно, во образ оных же антихристовых дней, духовне же разумети должно во все время гонения церкви Христовой.


Предложение четвертое.

О седмице духовной, и яко сия в себе заключает всего новаго завета Христова состояние, в нюже прийти пророком Илии и Еноху, и проповедати такожде дней 1260 сказуется. Свидетельство от божественных писаний.

Славнейший и светлейший во пророцех Даниил (якоже ему Гавриил архангел сказа) о седмицах, состоящих от Иеросалимскаго создания до пришествия Христа старейшины, предвозгласил тако: "седмь десять седмиц сократишася на людех Моих и на граде святем. седмь седмиц шестьдесять и две, до Христа старейшины". И сии седмицы, святии: Златоуст, Кирил, и Иосиф Волоколамский, протолкуют от Иеросалимскаго создания до Христа старейшины, си есть до перваго Христова в мир пришествия, еже родися от Девы Марии. И кийждо седмицу не днями, но летами, по седми лет быти сказуют. И повелевают исчисляти, егда Израиль из плена Вавилонскаго изыде и созда Иеросалим, тако глаголют: "от Иеросалимскаго создания до воплощения Божия Слова седмиц седмь и шестьдесят и девять". Сия убо вышеименованнии святии исчисливше от создания Иеросалима до Христова в мир пришествия, и аще желаеши, сообщи оных писанная словеса, мы же пространства ради оставляем. И паки, той же пророк, седмидесятую седмицу в единую седмицу, еже есть в состояние всего новыя благодати Христа Бога завета, заключающи, сице прорицает [Даниил, глава 9, стих 27]: "и утверди завет мнозем седмина едина: в пол же седмины отъимется жертва и возлияние, и во святилищи мерзость запустения будет, и даже до скончания времене скончание дастся на опустение". До зде Даниил.

На сию седмицу Ипполит святый, папа Римский, от пророчества Даниилова восприим, протолкует на весь завет Христов: "и в пол тоя приити пророком, и проповедати дней 1260". А в другую же половину антихристу царствовати сказующи тако глаголет: "яко о сем Даниил провещав, глаголет бо: завет завещаю седмицы единыя, и в пол седмицы возмется Моя жертва и жрения. едину убо седмицу, седмих лет назнаменует, тако бо напоследок будет. и убо пол седмицы возмут оба пророка со Иоанном, и будут проповедати во всем мире, и о антихристове пришествии, сиречь дней тысящу и две сте и шестьдесять. [Ниже:] Даниилу убо рекшу: седмицы едины поставляю завет Мой, седмь лет показа. в пол седмицы пророком, и в пол седмицы, сиречь в трех и пол, царствует антихрист. [И паки:] Сим убо, якоже предрекохом, бывшем возлюбленне, единой седмице на двое раздельшися, и предтечам Господним свое течение скончавшым, и всему миру прочее в скончание пришедшу". До зде Ипполит.

Зри убо блаженнаго Ипполита с пророком Даниилом протолкующа сию седмицу от лица Божия: яко (рече) единыя седмицы, или истее рещи, на едину седмицу, завет Мой, сиречь Христов, завещаю: и протолкова о числе явственно, едину убо седмицу седмих лет назнаменует. И яве от сего, сия седмица не во уставных летех заключается, но в духовном разуме приемлется. Понеже завет Христов завещася от перваго Христова пришествия в мир, даже и до втораго пришествия Его. И аще Ипполит и седмию леты завет Христов состоятися определяет, но сия не чювственным, или рещи, литеральным разумом определяет, но премудростно духовным. Понеже сей завет, или закон Христов, духовен есть, а не якоже Моисеов на писменнем разуме основан, сего ради и лета сия седмь не имут во уставлении прииматися. А еже, чесо ради седмицы единыя сей завет Христов завещатися, или утвердитися речеся? Но сия убо святым премудрым пророком и учителем церковным обычно есть, егда о велицей вещи хотящим рещи в предбудущая, в премудрости глаголют, неким тайным знаменованием прорицающе. В седмочислии же прорекоша состоятися закону Христову, и ради почтения ко оному числу. Понеже седмое число и в древнем и новом завете почтено есть, или седморичнаго ради сего века, зане седмицами числим. Якоже преподобный Иосиф глаголет: "ибо яко от четырех стихий мир совершися, Троицы же сих Содетель, и сего ради седморичное число есть честно". Якоже Григорий Богослов сказует: "зане тремя Святую Троицу, четырми же четверочастныи мир образует". И по премудрому Соломону настоящий век седмицею наречеся, глаголет бо: "даждь часть седмим, таже осмим. седмим рече, настоящему веку, осмим же будущему". По Иосифу онаго сказанию, или по толкованию Андрея Кесарийскаго на Откровение Иоанна Богослова, седмое число достизается суботство, суботство же знаменает покой будущаго века. Суть же седмочислие и инде почтено есть, или за ради, по премудрому, утвержения от Премудрости седмь столпов [Притчи Соломон., Исус Навин, глава 6, стих 4]: или ради седми труб, яже обвалиша стены Ерихонския: или ради седми светильник, яже виде Захария пророк: или, яже в новом завете, виде Иоанн Богослов в десней руце Сына человеческаго седмь звезд [Апокалипс., 1]: или седми ради таин церковных: или седми ради вселенских соборов. Тако убо сие седмочислие в ветхом и новом законе суть почтено, того ради Даниилу и Ипполиту, все состояние завета Христова, в седмь лет заключити таинственне предрекшим. Убо всякое зде мнение отрезывает, и не дает чювственнаго толкования о пришествии пророков Илии и Еносе, и Иоанне Богослове, еже бы им во уставных летех прийти, и полчетверта года пророчествовати. Аще сия седмица есть таинственна, и не летами числима, и на все закона Христова состояние заключаема. А пол же тоя седмицы взяти пророком извещается, еже проповедати им о не приятии антихриста. Последняя же половина на антихристово пришествие определяется. Убо ясно от сего извествуется, якоже пророческое пришествие не есть плотско, но и таинственно: тако и антихристово царствование не суть чювственно, но духовно, якоже в вышших ответех известихом.

Но речеши ли вопреки сему неоспоримому предложению: яко седмицы едины завет завещает Бог на последок всего настоящаго века. Пред пришествием Христовым, во уставных по обычаю седми летех, иже содержатися будет токмо полчетверта лета, внегда пророцы Енох и Илия со Иоанном утверждати будут правоверных, еже не приимати антихриста и стояти в христианском законе, тогда завет завещатися и поставлятися будет во уставных седми летех. И в пол сея седмицы, по пророку, отъимется жертва: в пол же седмицы, станет мерзость на месте святе. И антихрист тогда царствовати будет полчетверта лета пред пришествием Христовым. На сие тако ответствуем: понеже аще пророцы в христианском законе утверждати будут, его же Христос Бог предаде и завеща хранити до скончания века, его же апостоли проповедаша и научиша, его же святии отцы утвердиша: то убо пророцы, завещанный и утверженный закон Христов, поновляти или подтверждати будут: а не новое предание вводити, но древнее укрепляюще поновляти. Обаче Ипполит святый не о сицевом глаголет, еже обновится завет, или подтвердится седмицы единой, но завещается и поставится сказует. Сим являет самое начало завещания Христова и поставления новаго завета. Которое завещание, церковь Христова, приемшая завет новый, воспевая глаголет сице [в неделю цветную на утрене канон, песнь 6 ирмос]: "Ныне завет миру новыи завещается, и кроплением да обновятся людие божественною кровию". Аще же по вашему мнению разумети, яко еще завет не завещася, то убо от Христа Бога и до ныне никаковаго благочестия и завета Его, по пророку Даниилу и по толкованию Ипполитову, отнюд не засвидетельствуется. Обаче самыя вещи свидетельствуют, и писание яве сказует, утверженный завет Христов новый, и настоящаго века нечестие, и мерзость запустения на месте святе уже стоящую. Аще ли же, по вашему мнению, еже на кончину века завету Христову завещатися и поставитися вознепщуем, то понужди долженствует разумети, яко от перваго пришествия Христова и до ныне завета Христова и жертвы не бывало: но последи всего века хощет быти на полчетверта лета. И что сего нечестивейши будет. Аще тако будем разумети о времени седмицы на кончину, не яве ли будем нечествовати, и с богоборными жиды. Избави Боже сего разумения. Вопросиши ли, кая жертва и жрение возмется в полседмицы оныя? отвещаем: Яве яко не иная кая жертва и жрение возмется, но яже на тайней вечери, под видом хлеба и вина от Христа Бога учеником Его и апостолом преданная. Сей бо завет от Христа Бога святыми апостолы во вселенную благовестися и проповедася, и седмию святыми соборы утвердися, сей и до скончания века хранити повелеся.


Предложение пятое.

Яко оба пророка со Иоанном, день втораго пришествия Христова знаменати не могут. Свидетельство от божественных писаний. Понеже Господь наш Исус Христос, учеником своим и апостолом о втором пришествии вопрошающим, сице рече [Деяния святых апостол, зач. 1]: "несть ваше разумети времена и лета, яже Отец положи во своей области". И паки [евангелие от Марка, зач. 62, от Матфея, зач. 102]: "о дни же том и часе, никтоже весть, ни ангели небеснии, ни сын, токмо Отец Мой един". Апостол же Павел о дни том глаголет [к селун., зач. 271]: "егда рекут мир и утвержение, тогда нападет на них всегубительство". До зде апостол.

И аще сице от Христа Бога и от апостола Его речеся, что утаено есть от человек о пришествии Христове, и ведати не возможно не точию нам, но и горним силам: сего ради ниже пришествием и явлением обоих пророк со Иоанном, не может известитися день Господень великий.

Якоже о том Златоуст святый, в беседах на послание к солуняном пиша, сице глаголет [Беседы апост. к селун., зач. 271, лист 2277]: "Достоит и оно поискати, аще антихрист придет, и Илия приидет, како егда рекут мир и утверждение, тогда на них внезапное губительство нападет? сия бо не оставляют не ведати дня, знамения сущая самаго пришествия. но не сие время знаменает, антихристово глаголю, ниже день оныи глаголет, яко знамение будет пришествия Христова, но яко Христос не будет имети знамения, но напрасно и ненадежне приидет". На стране: "Христово пришествие не будет имети знамения". Той же на послание к евреом глаголет [Беседы, зач. 326, лист 2989]: "мнози же ищут, где преложися Енох, и почто преложися? и почто не умре ниже той, ниже Илия? и аще еще живут, како живут, и в каковом образе суть? но излишнее есть всячески, еже сих искати. яко бо преложися сей, и яко взят бысть он, рекоша писания: где же суть, и како суть, не приложиша к тому. ничто же бо паче нужных глаголют". До зде Златоуст.

Тако изъявляет святый, яко пришествие пророков со Иоанном не знаменает день пришествия Христова, еже есть не извествует, но точию антихриста. Антихрист же аще придет, обаче не может быти и от сего явлен день пришествия Господня, за далное времен продолжение. Понеже антихристово пришествие, по великому Китихисису [глава 28], нарицается знамение пред пришествием Христовым далное. О Енохе же и о Илии тамо не пишет, что быти им на землю. И не показует таковаго знамения ниже в ближних, пред пришествием Христовым: ниже в дальних знамениях, предваряющих антихриста, но умолчася. Отсюду приразумеваемо суть, что не быти явственному и всем известному пришествию пророков. И не быти подлинному от них познанию таковому в человецех, яже им глаголати сице: яко сии придоша пророцы Божии, Енох сын Иаредов, Илия сын Саваков, Иоанн сын Заведеов, той же и сын громов.

Но и святии, описующии сих пророков (историально) пребывание, в различных местех описуют. Евсевий Самосадский пишет: яко благоразумный разбойник виде их в раи и во плоти сущих. О чем в Соборнике, в слове о сошествии Иоанна Предтечи во ад явствуется. Святый же Андрей, Христа ради уродивый, во ответех к Епифанию сказует: "яко Илия (рече) жив есть на земли во плоти своей, никтоже его знает. жив же и Енох, но едини видят их достойни, прилепляющиися Господу поправу. Жив же есть и Иоанн Богослов, и проч.". Прочии же святии, учители церковнии: Златоуст, Феофилакт, Кесарий, брат Григория Богослова, и Метафраст, сего Иоанна, наперстника Христова, быти умерша поведают. О чем чти Благовестник, от Иоанна зач. 67. Пролог, сентября 26. И слово похвальное от Метафраста Иоанну Богослову. Темже, аще святии, различно описующе сих пребывание, овии глаголют яко в раи, овии же уже на земли и живи суще, а друзии уже умерших извествуют. Убо како чювственно тогда простии человецы, якоже выше рехом, сих познающе и именно о них рекут? никакоже. Сих ради: Понеже, аще бы чювственно видящии пророков познали, и от писания научаеми, яко быти пророчеству их аще и не во уставных летех, якоже предъявися, но в равночисленных летех антихристова царства, то аще и тысяща лет пророчества их, обаче исчислити возможно есть. Такоже и антихристово царство, за равночислие лет пророчих, исчислити не невозможно, посему и самый той день пришествия Господня уразумети удобно будет. И аще тако, то сему знанию виновно было бы пришествие и явление пророче, яко знаменающее день Господень. Аще бы сами пророцы и не рекли о пришествии Христове ни едино слово, но познавше их, сами уразумети по писанию за равночислие ради лет онех возмогли бы, якоже предъявися. Аще ли же сему быти и разуметися чювственно право, еже о познании пророк и о пришествии Христове, то во лжи останется евангельское слово: "о дни же том и часе никтоже весть, ни ангели Божии, ни сын, токмо Отец Мой един". Також и Златоустово толкование, еже пророком не знаменати дня Господня. Аще ли же слово и святых Его верно и неложно, якоже и есть, что верен Господь во всех словесех своих [псалом 144], убо крепко разумети достоит, что пришествие Христово неизвестно есть. Верно есть слово, и всякаго приятия достойно. Аще ли же сие неизвестно, то понужди разумети приходит, что пришествие пророк несть известно, но сокровено за неверствие человек. Паче же яко да не дастся вина дерзновению, еже страшное пришествие Господне истязовати смертным человеком.

Аще и не во уставных летех седмица оная, ельма же есть сице: яко аще и не во уставных летех седмица. Такожде и пророцы, аще бы и не знаменали дня Господня словом учения, но явственным и известным своим приходом и пророчеством могут знаем и известен сотворити человеком день пришествия Христова, за равночислие времен онех, якоже предъявися. Кольми убо паче, аще во уставных седми летех была бы седмица, всяко убо познан был бы день он. Ибо и мали отрочата, исчисливше лет седмицу, могли бы назнаменать день Господень великий: паче же, ведущии писания, добре бы уразумели, зане царство антихристово достизает до пришествия Христова. Понеже от смоковницы притчею научи нас Господь о сем разумевати [Марк., зач. 61; Лука, зач. 107]: "якоже бо, рече, смокви, листвие уже имущи, близ есть жатва". Сице и по скорби антихристове, абие ни единому посреде приимающу Христово пришествие. По скорби бо, рече, дний тех, абие солнце померкнет, якоже Матфей глаголет. Или в ты дни, по скорби оной, якоже Марко глаголет. И по толкованию Феофилактову, яко по пришествии антихристове глаголет, яко вскоре разоритися имать. Сего ради рече: абие солнце померкнет. Почернеет рече, а не погибнет: но побеждаемо светом Христова пришествия. И сим Христос являет, яко между антихристовым царством и пришествием его, ни едино есть посредство, но абие приидет. Приидет бо, рече, и не замедлит, а праведный от веры жив будет. Якоже апостол Павел о антихристе яве сказует, яко его убиет Господь Духом уст своих, и упразднит явлением пришествия своего. И по Златоусту: якоже бо разорися царство Римское от антихриста, антихрист же от нашего Владыки. Сим яве показуют, яко не медленное на антихриста Христово пришествие будет.

Зри убо, яко ни едино есть посредство между антихристовым царством и пришествием Христовым: но абие, сиречь скоро, без закоснения на лжехриста истинный Христос Бог приидет, и убиет его Духом уст своих, и родству огненному предати его имать.

Темже окончавше ответ, повращаем наше слово ко всему вашему соньму, защищающему приход антихристов, и еще оный не сказующему. Зде от сих предложений умолкните, вси вы защитники змиевы и приятели антихристовы, иже о умолчанных излишная молвящии, и о несказанном и от ангел утаенном, мнящиися ведати, и о невозможном испытающии, и пустошная глаголющии. Яко еще пророков не пришедших, и реченая от них чювственно не збывшаяся исповедающии, и тем пришедша антихриста защищающии. Престните от таковаго суемудрия, еже о пришествии пророк неправо мудрствовати, еже во уставных летех символическую седмицу новаго Христова завета завещавати, и пророком яве быти. Аще бо и не хотящим вам, но нужда есть (по вашему умствованию) тако и о страшном пришествии Христове дерзословити, еже известну Ему от человек быти: которое не точию нам, но и самем небесным силам ведати никакоже дадеся. Блюдитеся, да некогда ожидающе чювственнаго прихода пророков Еноха и Илии, и Иоанна Богослова, внезапно на вы найдет день он страшный. И вместо пророков узрите Сына человеческаго, на облацех со славою на землю судити живым и мертвым приходяща.