Щит веры или Ответы древняго благочестия любителей на вопросы, придержащихся новодогматствующаго иерейства

Вид материала

Документы

Содержание Ответ на сии вопросы [370 и 371]. Ответ на сии вопросы [375 и 376].

Подобный материал:

• На камени веры. Вопросы и ответы, 2457.25kb.
• Крайон. Действовать или ждать? Вопросы и ответы, 13038.17kb.
• Психология потери веры, 346.79kb.
• Ответы на вопросы, 90.99kb.
• Дополнение к Приложению к Сказке. Ответы на вопросы, 274.58kb.
• Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
• Мартин Бубер. Два образа веры, 2036.01kb.
• Масюченко Светлана Дмитриевна Ответы на вопросы Интернет конкурс, 43.06kb.
• Щит управления паровым котлом щу-пк назначение, 126.96kb.
• 3. Вы можете добавить свои вопросы и свои ответы, конечно, 2736.16kb.

Вопрос, 369.

И аще святии пророцы пришедше, и пророчество свое скончавше, то известите, в кая лета они приидоша? и колико лет пророчествующе, на земли пребыша?


Ответ, 369.

Прочти варившия 361 и 362-й ответы о пришествии сих пророков внятельно, убо и не имаши по писмени разумети, но духовне. Якоже и преблаженный Андрей Кесарийский, толковавый символ Апокалипсии, тако рече [Апокалипсис, лист 82]: "духовным сущым сказуемым, духовныя премудрости, а не мирския потребы (глаголет Богослов), ко еже разумети глаголемая".

Но воньми и сему, како в Павле Христос изрече, Златоуст же и святый Кирил изъясниша [Бесед., в толк. на зач. 275]: "еже тогда антихристу приходу быти, глаголюще, егда римская власть престанет, и римстии цари не будут Римом владети". Но по толкованию Стефана Зизания и списателя книги О вере [Кирилова, знамение 9; О вере, глава 30], уже Римом цари не владеют от лет Великаго Карла: яве, яко антихрист в Рим прииде. Но и пришествие Илии и Еноха в Рим же на обличение папы Римскаго быти сказуется, о чем в книзе Кирилове, в знамении осмом, на листу 47-м сице пишет: "Такоже и нынешним лжехристом един есть наивышшии папа, иже оному последнему антихристу предотеча": иже на престоле в древнем Вавилоне, яко ниже Кирил святый пишет, в старом Риме. Его же Христос истинный обличити, своих угодников Еноха и Илию пошлет не приимати лживаго, он же окаянный пред всеми повелит их убити. Но никто слыша, и кто виде, чювственно сих пророков в Рим пришедших? яве, яко никто. Но антихрист уже от всех учителей глаголется. яко в Рим прииде. Аще прииде, Илии же и Еноху прежде божественное писание показует прийти. Обаче и сих пришествия чювственно не слышится, убо и приимати сие писменным разумом на едино место, и на едино время, како не безместно будет. Глаголет бо апостол: "писмена умерщвляют, Дух же живит".


Вопрос, 370.

Во Апокалипсисе, в главе 11 пишет сице: "И тогда, по прорицании дней 1260. егда скончают свидетельство свое, тогда зверь сей, иже есть антихрист, ем их умучити, таже и главы их отсечет". Синоксарь, в неделю мясопустную. Вы о сем, святых пророков убиении, како разумеете, убо ли убиены? изъявите от святаго писания.


Вопрос, 371.

И аще суть убиени, то когда и где? и от кого убиени? явите и сия без закрытия.


Ответ на сии вопросы [370 и 371].

"Пишет во Откровении Иоанн Богослов тако [Апокалипсис, глава 11]: "егда (рече Енох и Илия) скончаета свидетельство свое, зверь восходяи от бездны, сотворит с нима брань, и победит, и убиет я. и труп ею оставит на стогнах града великаго, иже нарицается духовне Содом и Египет, идеже и Господь наш распят бысть".

Но аще в первом толковании оный град великий и мнит быти Иеросалим, обаче во втором толку того стиха иначе о том граде умствует, глаголет бо: "работати богом чюждим, и прилагатися учению ложну, сия есть Содома духовная. а идеже Господа нашего Исуса Христа не приемлют, тамо Его распинают".

Зри сему подобне и иныя приклади святых церковных учителей. Глаголет Златоуст [слово 13, о лжеучител.]: "врази бо неприязни церковныя еретицы, ничим же разни от прочих поган, не знающих Бога". И по Зиновию мниху [Соборник малый]: "яко еретицы служат чюждему богу, сиречь дияволу". И по преподобному Иосифу Волоколамскому: "еретицы Господа нашего Исуса Христа не приемлют, но распинают духовне". А по Симеону Фесалонитскому: "аще и православнии священницы, но приемлюще еретиков, восприемниками крещают, таковии причащаются чюжде Божия". И паки по вышеименованному Златоусту: "благочестия отступити, сказует Бога отступити". Такожде паки и по Иосифу Волоколамскому: "отступницы же злешии суть не точию еретик, но и еллин и жидов". Той же: "аще кто предания святых отмещет и не приемлет, таковыи ниже верен, ниже християнин".

Се убо есть воистинну Содома духовная, се есть и распятие Христу Богу духовное. Сей есть град великий Вавилон, иже по вселенней расширивыйся, и стогны его зело строптивы суть. В сицевом граде велицем, сиречь в духовном Содоме и Египте, како возможно кому назнаменати определьное время и место оно: идеже суть таковыя стогны, на них же лежати имут телеса пророк Божиих, от антихриста избиенных. Аще от времене, то возможно ли по всей вселенней оное назначити. Аще ли от места, сие и паче неудобно суть, зане повсюду тое обдержится. Яко повсюду еретичество, повсюду богоотступление и Христу распятие, повсюду чюжде Божие и дияволу работа и угождение. И аще сего ради невозможно есть познати на котором месте оныя стогны великаго града, убо невозможно есть рещи, где подлинно лежати будут и телеса избиенных пророк Божиих. Аще ли во Иеросалиме помыслим, то несогласно писанному: яко во Иеросалиме бяше распятие Христу чювственное, зде же пишет о распятии духовном. Но и пророком во Иеросалиме проповедати июдеом, писанию несогласно. Пишет бо [Соборник, лист 275 на обор.]: "яко духовнии облацы пророцы, кропят свыше благоразумия росу на новыи виноград Христов, на плодящыя души християнския. заповедь же приемше, еже отнюд не одождите на жиды. и несть отнюд в них пророка, ни князя, ни старейшины: но пуст от всех, и изсохнути оставлен за неплодие, многим бездождием одержим".

Темже убо разумеем, яко пророцы не в чювственном Иеросалиме, но в духовном оном Содоме и Египте убиени от антихриста будут: антихрист же есть в древнем Вавилоне. Якоже Кирил святый о антихристе пишет [Кирилова, лист 47 и 49], что быти ему в старом Риме. Его же Христос истинный обличити, своих угодников Еноха и Илию послет не приимати льстиваго, он же окаянный повелит их убити, якоже о сем и в вышшем ответе писахом.

Обаче не сие токмо определьно есть антихристу место, но всю вселенную единым градом, и единым местом объемлет. И всех гонителей и мучителей в едином лице заключающи, единаго антихриста нарицает быти. О чем во Апокалипсисе, каталог литера А, значит сице: "антихрист Римское царство воздвигнути лицемеритися будет". лист 89, строка 40. А в самом Апокалипсисе, на оном 89-м листе, строка 430, то есть во главе 18, зач. 55, в толковании Андрея архиепископа Кесарийскаго, пишет сице [Апокалипсис печатн., лист 89]: "в Римстем начальстве, и из него един возрастающии и искореняющии, и прочая покаряющии. и тако приидет, яко царь Римскии. преображением и притворение убо, еже паки устрояти и отновляти, согревати же и воспитавати начальство их: истинною же, еже соделати конечное его разорение. Темже, якоже речеся, не погрешил бы кто подобающаго истолковав, аки в едином телеси, изначала даже и доныне державствующее царство сие: яко воистинну излиявшее крови апостолов, и пророков, и мучеников. Ибо яко един лик, и едино воинство, и един град глаголется, аще и изменяются исполняющии сих коеждо: сице и царство едино, аще и во многая лета и места разделяются и разсецаются".

Еще в каталоге, литера Л значит: "лик един, аще и лица многажды пременяются". лист 90, строка 7. А во Апокалипсисе же, на ином 90-м листу, строка 7, пишет: "лиц пременением вещи самыя не пременяет". До зде Апокалипсис.

И от сих свидетельств явствуется, яко не возможно есть определьно знати духовнаго онаго Содома и Египта, в нем же убиеным быти пророком. Ниже отнюд возможно обрести оныя стогны великаго того града, на них же лежати будут телеса их. Убо и мудрствовати телесне, а не духовне, всячески есть безместно.

Вопросиши ли о убиении пророков от антихриста в новой благодати, кия суть сии? и како избиени будут? на сие отвещаем тако: Глаголет бо апостол Павел о церкви новой благодати: положи Бог в церкви первее апостолы, второе пророки, третие учители. Сам же Владыка Христос Бог ко июдеом рече: змиеве, порождение ехиднина, како убежите от суда огня геенскаго. Сего ради Аз послю к вам пророки, и премудры книжники, и от них убиете, и распнете на сонмищах ваших, и ижденете от града во град. И во Апокалипсисе, о убиении пророков от антихриста, Андрей Кесарийский толкует: "яко мнозем во времени оным, твердым в вере стоянии, сподобитися пророческаго дарования, и убиенным быти от диявольских защитников". И в трех толковом Апокалипсисе: "пророки же глаголет, за твердое стояние в вере в то время, и пророчествия достойных, ихже убиют приятели антихристовы".

И в малороссийской печати Апокалипсис, како о убиении пророк живущих на земли возрадуется, толкует [печати Кутеинскаго монастыря]: "яко о убиении верных тогда возрадоватися им". Святый же Златоуст в Беседах сице пишет: "аще ли же пророки глаголет, то не подобает чюдитися. не просто бо пророки глаголет, но иже пророчеством учащих, и во общую пользу глаголющих вся".

И от сих убо свидетельств, аще имееши разум, имаши о убиении пророков познати. Якоже и Христос глаголет о Иоанне: "той есть Илия, хотяи прийти. имеят уши слышати да слышит". Евангелие от Матфея, зач. 40.


Вопрос, 372.

Сии же святии пророцы обратят, рече, сердца отец на чада, си есть соньмище еврейское, на Господа нашего Исуса Христа, и апостольскую проповедь. Убо ли отвратишася проповедию сих пророк от жидов, понеже на кончину от еврейскаго роду обратившеся спасени будут по Апокалипсину изъявлению, слово 7, глава 4?


Ответ, 372.

На сей вопрос зри ответ 334-й в нем же от тебе вопросихомся о спасении дванадесяти колен израилевых. То же значит и зде о обращении жидов на кончину. Но и пророк Малахия о Иоанне Предтечи, от лица Божия пророчествуя, глаголет тако: "Се Аз послю Илию Фезвитянина прежде приити дню Господню великому и просвещенному, иже обратит сердца отец на чада, и сердце человека ко искреннему, ангел пред Христом Иоанн Предтеча, прииде во образе Илиине". Книга Кирилова, лист 111 на обороте. И паки пишут учители церковнии о пророцех, кия кропят учением на церковная чада, сице: "духовнии (глаголюще) облацы пророцы, кропят свыше благоразумия росу на новыи виноград Христов, на плодящыя души христианския. заповедь же приемше, еже отнюд не одождите на жиды. и несть отнюд в них пророка, ни князя, ни старейшины: но пуст от всех, и изсохнути оставлен за неплодие, многим бездождием одержим". Соборник, лист 273 на обор.

И сия убо предложивше малая от многих, и указавше на точнообразный ответ: яко тамо яве показуется, что уже обращение жидов было. И посем обращаем слово наше на отемнение сердец ваши, яко чювственнаго везде прихода пророческаго ожидаете, такожде и антихристова: а не видите, яко уже он не точию при вратех, но и в самом вашем доме (глаголет душевном) поздравляет вас своим приходом, о нем же в предних ответех многая изрекохом. Яве бо вас обличает всея вселенныя светильник Златоустый, о вашем нерадении и невникновении во внутренний разум божественнаго писания, тако глаголя [Маргарит]: "якоже (рече) пределы и столпцы в селех нивы не оставляют смешатися, тако времена и лета не оставляют не ведати Бога. аще бы ветхий Израиль, сиречь июдеи, времена и лета назирали, не бы Христа распяли. тако и новыи Израиль, сиречь языцы, назирали со опаством пришествие времена, не бы Христа отпадше, антихристу впали".

Како убо не отемнесте вы, о вопросителю. Яко уже прошедшее, впредь паки ожидаете. И на кончину всея жизни зеваете и хощете видеть обращение жидов: в котором времени не точию в жидах, но и в благочестивых вере оскудение быти глаголется, и едва малии нецыи обрящутся спасаемии, якоже и в вышепоказанном ответе засвидетельствовахом. Смотрите, да некогда ожидающе чювственнаго сего исполнения, узрите самого Спаса на облацех приходяща. Пришед бо (рече Спас) Сын человеческий на облацех, обрящет ли веры на земли? и ответствуют учители: разве точию не во мнозех. А вы ожидаете и жидов еще обращения. Престаните, престаните бредить во мраце вашего неразумия, и последуйте готовому святых отец разсуждению. И не плотьская мудрствуйте, но духовная. По писанному бо: "плотьское мудрование вражда есть на Бога".


Вопрос, 373.

Во Апокалипсисе изъявляет, яко во антихристове пришествии верных церкви из мест своих побегнут, место из места изменяюще. Вы о церкви верных, во дни антихристовы бегствующей, како разумеете ю быти, убо ли без священства имать пребывати? изъявите от святаго писания.


Ответ, 373.

О скудстве или не имении священства во временах антихристовых, во ответех 12 и 301-м от божественнаго писания засвидетельствовахом, убо таяжде паки и паки да не повторим.


Вопрос, 374.

И аще пророчество Еноха и Илии, и Иоанна Богослова совершися, и они убиени быша, то где телеса их оставлены, убо ли в земли погребена? известите и сия.


Ответ, 374.

Во ответе 370 и 371 изъявихом, како о убиении святых пророк Илии и Еноха разумети быти: и како труп ею оставлен будет на стогнах града великаго: и како в новой благодати, и кия от антихриста избиени будут: и довлело бы тем ответом на сей вопрос отсловствовати. Но яко уже к границам ваших вопросов приближихомся, того ради паки на должное словоотдание возвращаемся. И еже тамо глаголахом от святых толковников, и от прочих прикладов священнаго писания, где будут повержены телеса сих пророков на стогнах града великаго. Понеже ваше мнение на чювственное разумение везде в писании востекает, того ради и зде мало от разсуждения и от просвещающих разум человеческих наук побеседуем. Понеже и в самом Апокалипсисе не глаголет града Иеросалима, но Великаго, во знак положено Иеросалима града. Но сие преименоватися может от инаго во иное, и не есть свойственнаго умствования: ибо знаменающия речи кладутся, да из нея познаем знаменанную вещь тако: яко глаголю предатель, значю сим Июду, понеже несть инаго кроме сего предателя. Глаголю ключаря небеснаго, значю Петра апостола. Или глаголю Богослова, значю Иоанна апостола, и прочая.

А сим, еже рещи града Великаго, не мощно от него разумети Иеросалима, ибо великих градов много бяше и есть. Бяху бо из великих велиции гради: Иеросалим, Рим, Карфаген и Вавилон. Из настоящих же времен гради велиции суть: Царь град, Москва, Каир, Лондон, и прочии великими нарицаются.

Но зде инаго некоего великаго града мнится нам знаменати, ему же равна не быти, якоже и в вышеуказанном 370 ответе извествовахом. Который разумеваем быти мир сей, иже многажды и Вавилоном великим наричется великаго ради собрания в нем нечестивых сынов гнева Божия. В нем же и змий он страшный, древний прелесник, седмь глав у себе имеяй, сиречь седмь смертных грехов, глаголем же: зависть, сребролюбие, блуд, чревоугодие, гордость, гнев, небрежение. И сими главами своевольныя народы пожирает, не телеса, но души. В сем граде великом (по толкованию, яже положихом в том ответе) Илия и Енох убиени будут.

Зри убо, яко и зде тайна запечатленная есть, а не по вашему мнению простая и просте разуметися ключимая. Еже бо и ты не ищеши духовнаго, но все на чювство вратиши. Но грядем, и прочии останки словес о Енохе и Илии сказати, о них же во Апокалипсии прочтохом. Глаголет бо тамо [Апок., глава 11]: "(по убиении пророк Еноха и Илии) и узрят от людей, и от язык, и от колен, и племен, телеса ею не оставят положити во гроба. и живущии на земли возрадуются и возвеселятся о нею, дары пошлют друг ко другу, яко оба сия пророка мучиста живущыя на земли". А в толковании того стиха протолкует, что живущии на земли погребати святую телеса не дадут за озлобление и казни, южа наношаста. Сим являет, что живущии на земли не дадут погребсти святых Божиих: но непогребена оставят за озлобление и казни, их же они наношаста.

Но мнится нам о таковых и пророку Давыду глаголати [псалом 78]: "положиша трупия раб Твоих, брашно птицам небесным, плоти преподобных Твоих зверем земным. пролияша кровь их яко воду окрест Иеросалима, и не бе погребаяи".

Подобне же и апостолу о таковех глаголати [ко евреом, зач. 330]: "инии же избиени беша, не приемше избавления, да лучшее воскресение улучат".

И в малороссийской печати Апокалипсисе, како о убиении пророк живущии на земли возрадуются, толкует [Апокалипсис Кутеинскаго монастыря печатн.]: "яко о убиении верных тогда возрадоватися им".

И аще убо от сих свидетельств явствуется яко верных Божиих рабов о убиении радоватися невернии имут, и телеса сих не предадутся обычному погребению: яве ничто иное сие знаменающее суть, точию яко во антихристово время, убиеннии за Христово исповедание, подобающия почести, якоже и прежнии святыя, получити не имут. И страха ради антихристова, не погребены останутся. Како бо явленно останутся? никакоже по видимому: ибо, и ради всем обычнаго по естеству погребения, не можно есть земли не предатися. Но яко обычным погребением святым не почтутся, но останутся: яко бо зле, а не о правде пострадавшии. Ибо по достоинству (за ради велики злобы антихристовы) кто погребальныя песни воспоет над ними? кто страдания их описав, типографским художеством изобразит, и ко уверению подлинное известие о том церкви сотворити возможет? кто верных соньм к почтению святых онех возбуждати властелински будет? кто полномощную благодать и власть имея, во имя их церкви соорудит? и освятив, священнослужением по обычаю церковному исправлять доволен будет? еже неверствию повсюду обдержащу, и мучительству везде бывающу премногу. Котораго ради мучительства и страха, яко обычному погребению, так и подлинному известию о блаженной кончине пророков не возможно быти. Сице и почтению святых, убиенных во время оно, неудобно есть быти. Убо разумети чювственнаго убиения, или не погребения Еноху и Илие, в невозможных суть. Ключимейше быти свойствует по толкованию, и по иному примеру святых писаний, збытися сим на верных Божиих, и избиенных от антихристовых приятелей. Не погребены же обрящутся, яко не почтены будут честию святым потребнейшею. Понеже колико пострада святых по 1000 лет от рожества Христова, еже во время падения веры в Риме от папежев, еже в Царе граде от мамефян, еже в Малороссии от юнитов, еже в Велицей России от никонопоследующих. Но колико их суть, кроме обычнаго погребения. Колико о сих не имут от церкве подобающаго почтения за богоугодное их страдание. Но и еще нам отнюд о неких неведомо суть, кто и коего сана и возраста тии страдальцы беша: коей страны обретахуся: и како имена их нарицахуся: и колицеми томлениями и муками лютыми, и казньми беша изнуряеми: вся суть сия нам неизвестна суть. Убо в толиком многонародном множестве, и в толь дальном разстоянии, и нам подлинно не известном, негли тогда и о святых онех пророцех со Иоанном таковое по писанию явственное исполнение бяше, еже убиеным быти им от диявольских защитников. Но яко за неудобство времене, и разстояние мест, и за множество пострадавших лиц, церкви о том не известно суть, убо и мы умолчеваем. Но от толковников святаго Апокалипсиса познаваем, яко сообразительно сим пророком, вернии от антихристовых приятелей избиени будут, и яко о сих неверствующии возрадуются, якоже в 370-м ответе засвидетельствовахом. О святем же Иоанне Богослове святая церковь своими учители засвидетельствует: яко умре, и гроб его свидетельствует. Зри о сем Пролог, сентября 26. Благовестник, от Иоанна, зач. 67. Слово похвальное маия 8-го святому Иоанну Богослову от святаго Метафраста. И представление его все месяцесловы, якоже древле западнии, тако и грекороссийстии засвидетельствуют быти, в 26 день месяца сентября. Такожде и святым пророком святая церковь память праздновати уставила есть до скончания века. Святому Илии пророку месяца июля в 20 день, такоже и обще Еноху и Илии в неделю праотец. А еже сим не творится празднества их преставлению, якоже и Богослову Иоанну: обаче и всем ветхаго завета праотцам, аще и умроша, но не творится преставлению их празднества. Сице прияла святая церковь, тако и содержится. И мы, по содержанию святыя апостольския церкве, пророком Божиим Еноху и Илии, и громову сыну, сиречь возлюбленному ученику Христову Иоанну Богослову, подобающее почтение воздаваем. И что нам открыся от святых толковников, сия глаголем, о умолчанных же церковию не испытуем, по реченному: "вышших себе не ищи, и глубочайших тебе не испытуй".


Вопрос, 375.

Во Апокалипсисе изъявляет сице [Апокалипсис древлеписмен.]: "и по трех днех и пол, оныя пророки, рече, воскреснут и изыдут на небо на облацех по Господню образу". Вы сему писанию веруете ли?


Вопрос, 376.

И аще веруете, то воскресение сих триех пророков когда бывшо сказуете? известите и сия, ничтоже утаевающе.


Ответ на сии вопросы [375 и 376].

Многажды рекохом ти прешедшими ответы, яко не просте во Апокалипсическом символе долженствует разумети. И яко по чернилу глаголанная тамо, аще кто приемлет, не кроме бедства обрестися имать. Но якоже преблаженный Андрей Кесарийский, символы, во апокалипсическом сокровищи положенныя, толкуя, сице глаголет: "духовным сущым сказуемым, духовныя премудрости, а не мирския потреба (глаголет), ко еже разумети глаголемая".

Темже и о воскресении пророков символ некий суть сокровенный, а не чювственный, по мнению вашему. А понеже у того же Андрея Кесарийскаго в толковании не едино воскресение, но сугубое быти извествуется, якоже во главе 20 видети есть, убо мы и о сем символе кроме надлежащаго толковати не простираемся. Понеже, по Златоусту, излишнее есть всячески сих искати. Или сие глаголется того ради, еже воскреснути им (и толикое число пребыти дней, елико в равночислие в три лета и пол), яко во Енохово время о воскресении не ведяху. Якоже той же Златоуст в Беседах на листу 2988 пишет: "в новой же благодати, о воскресении бывших, сие таинство вящьше ветхаго уведено бяше. или по убиении паки во плоти явитися могут и по смерти. зане душам мученическим особна та от Бога благодать даровася, да по отшествии от земных приходят к нимже изволят, и беседуют с ними и утешают я". Якоже о сем сказа святая мученица Феодотия святей Анастасии. Минея четия, декабря в 22 день.

И в Триоди постной, в Синоксаре в суботу мясопустную пишет: "мучеников же, и яже от нас творимая, назирати дано бысть и посещати". Но и святый Андрей благоуродивый о сих пророках сказует: яко невидимо ходят, укрепляюще верныя. Негли убо сицевая пророком, или святым мучеником особная благодать дарованная, может почестися духовне за знак воскресения. И в сицевое же определьное число дней заключитися, елико их и проповедати быти в три лета и пол. О которых летах довольно в вышших ответех речено бысть, яко таинственны, а не числомеримы суть. Убо и нам не должно есть и сие числомерие, еже есть три дни и пол, существенне познавати, но символическое некое таинство в том разумети. Прочее же да молчатся вся излишная во церкви Божии, да славятся веруемая, да не испытуются умолчанная. И не высокомудрствуем прочее, но смиренными водитися долженствуем, по апостолу: "о умолчанных же не истязовающе". Таковое бо наше о умолчанных неведение, подвизает нас в вящьшее благоразумие и благочестие. Яко не ведуще определьнаго числа лет пророческих, якоже до убиения их, тако и по воскресении, не вемы же определьных лет и царствия антихристова. От сих убо не ведети нам дадеся, и о пришествии Христове на суд страшный. И сим согласитися имамы от Христа реченному: "о дни же том и часе никтоже весть, ни ангели небеснии, ни сын, токмо Отец". Евангелие от Марка, зач. 62.