Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
СодержаниеПервое: Кто жительствует во стране северной? Второе О севере, или о полунощи О наречии Москвы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 377.
И аще ( по мнению вашему) антихрист последний царствует, то в кая лета по отступлении воцарися? Ибо Павел избранный сосуд возвещает сице: "да никтоже вас ни по единому прельстит образу. яко аще не приидет отступление прежде, и открыется человек беззакония, сын погибельныи". К солун., зач. 275.
Ответ, 377.
Сей убо сосуд избранный Павел апостол, далее в том же зачале, о времени пришествия антихристова тако глаголет: "и ныне одержащее весте, явитися ему во свое ему время".
На сие Златый языком сице толкует [Апостол толков., и Беседы апостол., зач. 275]: "одержащее рече, еже возбраняя и запиная. что же се? мнози Дух Святыи рекоша, инии же римская власть, иже известно глаголют. аще бо тая не разрушится, он не приидет. точию одержаи ныне, дондеже от среды будет, и тогда явится беззаконныи".
Златоуст [Апостол, толков., и Беседы апостольск.]: "точию одержаи ныне, се есть видимыи престол и царство, еже ныне запинает, егда престанет, рече, и конец приимет, тогда явится беззаконник, рекше антихрист. егда бо разрушится римская власть, тогда и антихристово зачнется безвластво. и держати начнет не точию человеческую, но и Божию власть. Римское же то доконца разрушит антихрист, якоже и Мидско от вавилонян разорися, и Вавилоньско от перс, и Перско от македонян, и Македоньско от римлян, тако и Римско от антихриста".
А яко уже царство Римское разорися, то есть престала власть Римских царей за многая лета, свидетельствуется от писания. Андрей Кесарийский глаголет: "ветхии бо Рим от многаго времене державу царскую отложил есть".
От того времене антихристово царство в Риме зачнется, якоже глаголет (Кирил святый), егда исполнятся лета Римскаго царства [Кирилова, знамение 9]. И не глаголет егда возмущено будет, но егда исполнятся лета, еже есть когда уже Римом цари не имут владети, якоже и ныне видим, иже не владеют. [Ниже:] Якоже Златоустыи пишет, глаголя: егда изгубится римская власть, тогда антихристово начнется властельство. И то явно в Риме от того времене настала власть антихристовых предотечь, егда власть царей римских в Риме престала. Тогда человек духовный, папа Римский, Божию и святительскую власть нача держати.
Творец же книги О вере, приводя в свидетельство преподобнаго Ефрема словеса о антихристе, сице глаголет: "и преподобнаго отца нашего Ефрема Сирина речения ниже в забвение полагати, якоже рече в слове пятьдесятом своея книги. убоимся и мы, любимицы мои, да не и мы в сия впадем. писанная бо вся совершишася, и несть ино ничтоже прочее, токмо соперника нашего, еже есть антихриста слава. на конец бо Римскаго царства подобает всему совершитися". Что же, несть ли убо совершилося о римских царех, яко престати сим царствовати. Но ниже убо слышится имя римских царей за многая лета в последнее ныне время, якобы рещи от Великаго Карла. Всю же власть от тех времен царскую и святительскую папа на себе привлече, вкупе и царь и святитель наречеся: не явный ли сей антихристов предотеча. А понеже власть римская от среды взята бысть, по апостолу, понеже цари Римом не владеют. Понеже обоя власти духовная и мирская во едино смесися. Якоже Златоуст глаголет: "егда же (рече мирская власть) разорится, нападет на безначалие, и человеческую и Божию поищет похитити власть, царскую и святительскую".
А понеже сия (якоже зрятся) исполнишася, убо антихрист прииде, иже царство Римское разорил вконец. Такожде и по числу, еже о нем 1666, в северных странах от Рима пришед появися, о чем в 368 ответе показахом.
Но антихрист, якоже в предних ответех изъявихом, многоразличне нарицается и человек, в него же вселится диявол: а иногда нарицается и самая та вещь, самое то действо, еже есть отступление. Якоже вышеименованный Златоуст, на тое же послание апостола Павла, в толковании на зачало 275 глаголет: нарицается же антихрист един во многих лицах, или предотечах, и предотечи во едино лице антихристово заключаются. Вся убо сия довольне напреди глаголахом, но и в последующем 380 ответе некая о сем возглаголются.
Вопрос, 378.
И аще воцарися, то где и колико лет царствует, Господа ради известите?
Ответ, 378.
Прочти вышеписанныя ответы 366, 368 и 377, и можеши уведети, с которых лет антихристово монаршество начася, и колико того времене пройде, и тако известишися.
Вопрос, 379.
По попущению святаго Бога, дастся ему (си есть антихристу) область на всяком языце и колене, и людех и племенех, и поклонятся ему вси живущии на земли. Апокалипсис, глава 12. Ныне вси ли ему поклоняются, якоже махометане, жидове, люторе, и калвины, папежницы и армяне, и прочии еретицы, известите от святаго писания?
Ответ, 379.
В 340 ответе о жидех и махометанех отчасти рехом, како сии антихристу присвоишася. Такожде и о папежницех и прочих западных странах довольно в прешедших ответех засвидетельствовахом, яко и к сим уже антихристово пришествие показуется, А еже, яко вси антихристу поклонятся, кия и како? о сем нижеследующими свидетельствами указати имамы.
Тайнозрительный Богослов во Апокалипсии пишет сице [Апокалипсис старопечатн., глава 36]: "И чюдися вся земля во след зверя, и поклонишася зверю, глаголюще: кто подобен зверю? и кто может ратоватися с ним?". Толкование: "На приведение антихристово дияволу поклонятся омраченнии. Сущее: И дана бысть ему область на всяком колене людей, и на языцех и племенех. и поклонятся вси живущии на земли, ихже не написана суть имена в книгах животных Агньца заколеннаго, от сложения мира". Толкование: "Над всеми языки и людьми насилие область имать, над теми же паче, ихже не написана суть имена в книги животныя, и в книги Агньцевы". Втораго толку: "И живущии на земли, сиречь ничтоже радяще от небесных, токмо земным прилежаще, поклонятся антихристу. [Ниже:] А иже дана бысть ему область на всяком колене и людех, и на языцех и племенех, сим знаменает отступление веры, яко же Павел к солуняном вещает".
Златоуст, на послание 2-е к солуняном: "не бойся (рече) возлюбленне, но слыши того глаголюща, в погибающих может. аще бы и не пришел Он, не быша веровали". И в книзе О вере о антихристе пишет: "яко многих прельстит и отлучит от правды, наипаче же тех, иже растленное житие любят. и ныне преболе тии от святыя церкве, и от православныя веры отпадают, иже не хотят узким путем ходити". Зри главу 30, лист 270 на обороте. Святый Ефрем в слове о антихристе [слово, 105]: "воцарившуся на земли, с радостию сии людие поборницы ему будут, Едом паки и Моав, и сынове Аммоновы, аки своему царю поклонятся ему с радостию".
Но кто есть Едом? толкуется разжение плоти на похоть. Зри Алфавит толковый, буква Е, писан 7104. Кто Моав и Аммон? по сказанию Иеронимову на псалом 82, Моав сказуется от отца, сиречь диявола: Аммон народ смущенный, яже суть еретицы. Зри о сем и в Триоди в каноне Великом, в четверток 5-я недели поста.
Премудрый Максим Грек в толковании притчи о антихристе глаголет: "о антихристове рожестве и явлении (весь) мир радуется, сиречь ожидающии его жидове, измаильтяне, и татарове, и вси, имже подобни безвернии людии, мир нарицаемии". До зде Максим.
Темже, вся сия истолкования во едино собравше, речем: яко не едини суть, от тебе в вопросе твоем показаннии, противницы Христу, поклонницы же антихристу: но и вси, плоти страстем работающии, и законов Божиих не хранящии, и тии поклонницы антихристовы явятся. Ибо таковых и ныне видим, иже ходят широкими враты, и ходити хотят. Сего ради негде пишется [книга О вере, лист 26. глава 15, лист 127]: "аще ли славы ищеши от человек, и хощеши хвалим и поклоняем быти, и жития сладостей наслаждаешися, заблудил еси от путеи правды". И паки: "удивитися и устрашитися в сия последния слезам достойныя времена, до какова своевольства и презорства ослепльше чревобожницы, вдавшася широким путем, в погибель ведущим. един другаго предваряюще, и от часу далее и глубочайше бежат". Пишет Бароний в лете Господнем 283: "Яко мнози от христиан страха ради и мучения Христа отвергошася. и в первых сии падоша, иже житие пространное во гресех и благая мира сего возлюбиша. якоже глаголет Киприян, любовь слепая имении многих от них прельсти, не можаху быти на оставление мира готови. ихже любовь благих мирских связа, покоришася тому, иже землею питаемся. и на снедение тому приидоша". До зде Бароний.
Зри, что к ересем от Бога отступити приводит: ни гонение, не ино что тако, якоже к мирским вещем пригвождение. Сие бо сотесняет и приводит ко всякому злу. Что убо не быша ли и прежде сего на християны гонения? ей быша, и зело быша. Пишет той же Бароний в лете Господнем 302-м: "яко во оная времена на всяк месяц по 17000 християн убиваху. и на горшая прихождаху мучительство". Темже и не сие вящьше о последних сих временех слово: но сие, яко тако любовию вещей и страстей обвязании, и не хотяще, кроме мучительства, кроме великих стеснений, вещьми житейскими утеснявшеся, к ересем, или рещи ко антихристу приступят, и поклонятся ему.
О чем доводствуем из книзи Катихисиса, от главы четвертыя: "Вопрос. Чесо ради людие в последняя времена от веры отступят, и абие к ереси приступати имут? Ответ. Трех ради вин. Первая убо сия есть, еже Даниил пророк рече: мерзость запустения станет на месте святе, сиречь, еже обладает нечестивая ересь церкви святыя. сия убо ересь толкуется по писанию Иоанна Златоустаго, воинство антихристово, разоряющее церковь Божию. тогда людие, не имуще где укрытися от таковых скорбей и великих мучений, и их ради гонений, приступати имут к ересем. Вторая вина есть сия, еяже ради отступят от православныя веры християнския: понеже возлюбят мира сего славу и красоту, и всякаго наслаждения его, и боящеся лишени быти тленнаго своего богатства, еже преобретоша. и желающе себе большее избыточество получити телеснаго ради питания, и прочих миролюбных вин, бегающе нищеты и утеснения. Третия есть сия вина, еяже ради отступят, и приступят к ереси хотением: еже имать в себе жидовство и всякое нечестие в ней обрящется, понеже не суть утвержени в вере и во всяком благочестии христианскаго закона. Ты же пребывай во страсе Божии и в заповедех Господних, храни себе, да не впадеши в мерзость запустения". До зде Катихисис.
Но речеши ли, яко чювственнаго поклонения от всех сих языцех, тобою назнаменованных, антихристу не видится. На сие отвещаем сице: глаголахом ти в 340-м ответе о июдеох, яко поклонение от них антихристу, и приятие духа его и печати, не чювственное, но духовное есть, яко еже не исповедати Исуса Христа в плоть пришедша. И запечатление (на них суть) яко ничесомуже остати прочее [Маргарит, слово 3, о июдеох]. Сице и прочих отступник веры Христовы, не чювственное же поклонение антихристу, но духовне разумеется, еже учению их повиновение. Якоже Халепа рече ко армяном [книга Кирилова, лист 266]: "пришли есте поклонитися великому Махмету, возмите осмь дел его". Они же осмь дел прияша, а чювственно ему не поклонишася. Яве, яко приятие дел тех поклонение быти вменися.
Сице и римляне, не чювственно же яко Богу папежу своему повелевают покланятися, но на римския новыя, полныя еретичества уставы приводят. И тем оному последнему лжехристу, яко истинному Христу, приводят на поклонение. Есть бо поклонение чювственное, есть же и мысленное. Внегда аще колени преклоняем сердца нашего, смиренным покорением. Якоже Манасия, царь июдейский, моляся глаголаше: "И ныне поклоняю колени сердца моего, и молю яже от Тебе благость". Якоже сице и святая церковь воспевающи, глаголет: "во дворех Твоих Господи, вернии колени душ и телес преклоньше, воспеваем Тя пречистаго Отца, и собезначальна Сына, и соприсносущна и Пресвятаго Духа, просвещающаго и освящающаго душя нашя". Триодь цветная, в понед. 50-цы Святаго Духа. на хвалитех стихера.
Тако убо, вси отступльшии благочестия, вси еретицы, и вси погании языцы, преклоняют колени сердец своих к приятию новых догмат, и к нечестивым своим законам, или к новотворным тайнам. И чрез сия веруют прияти себе бога, еже есть антихриста, и ему поклоняются, и приемлют его начертание. По толкованию Апокалипсиса [глава 13]: "Аще кто озвершемуся тому антихристу повинется, и нечестиваго житие содержит, того образующее, или словом, или делом того исповесть бога, сие бо сказует на руце и на челе даемое начертание". И малороссийских печатей Апокалипсисе: "знак на руке и на челе, словом и учением повиновенье".
Вопрос, 380.
Святый апостол Иоанн Богослов глаголет: "дети последняя година есть. якоже слышасте, яко антихрист грядет, и ныне в мире есть уже". Убо известите, кий есть той, о нем же рече Богослов? и мнози ли антихристи во дни апостольския бяху?
Ответ, 380.
В 336-м ответе довольно изъявихом, яко антихрист не во едином лице приидет, но во многих. Аще и глаголется ему во едином быти, но сие иносказательне глаголется, а не существителне.
Сице убо и святый Иоанн Богослов глаголет не о едином антихристе, но о многих. Аки во едино сих собирая тело, глаголет: "дети, последнее время есть. и якоже слышасте, яко антихрист грядет, и ныне антихристи мнози быша". Таже назнаменуя, чего ради антихрист бывает: "всяк (рече) дух, иже не исповедует Исуса Христа в плоть пришедша, Божии несть, и сей антихристов, еже слышасте яко грядет, и ныне в мире есть уже". И посем, единаго во многия прелагая, глаголет: "мнози (рече) лестьцы внидоша в мир. иже не исповедуще Исус Христа пришедша в плоть, сей есть льстец и антихрист". И на сие в толковании: "мнози лжеапостоли от диавола введени быша, творящеся евангельское учение имети. [Ниже:] Си назнаменуя евангелист, глаголет: и се есть антихрист, еже слышасте яко грядет, и уже в мире сем есть". До зде от толкования.
Зри убо многих льстецов во едино лице антихристово преложение, и единаго во многия, и глаголющагося грядущаго, и уже сказующагося в мире сем. Яве от сих показуется, яко антихристу ниже определьнаго лица, ниже времене указатися возможно.
Но и святый Афанасий Великий в Синопсии пишет: "ят бысть (рече) зверь и с ним лжепророк, иже и антихрист". Лжепророк же разумевается по толкованию учителей церковных, вси еретицы, и еще попущением Божиим быти хотящии. Святый же Златоуст в толковании на слова Павла апостола о антихристе пишет: яко сести ему в церкви Божии: не иже во Иеросалиме, но и в церквах, (си есть яже суть по всему миру церкви). Но человеку, единому сущу, по всем церквам сести есть невозможно: и не точию человеку, но ниже дияволу. Аще же дияволу сие неудобно, то кольми паче человеку. А яко сести антихристу в церквах по всему миру, сим знаменует не единаго человека, но многих лжеучителей, противящихся истине, якоже в вышеуказанном ответе засвидетельствовахом.
А еже вопрошаеши, кий есть той, о нем же рече Богослов? на сие отвещает ти творец книги О вере, глаголя: "Святыи Иоанн евангелист назнаменовал, и в послании своем не замолчал: но и утвержает, глаголя: дети последняя година есть. и якоже слышасте, яко антихрист грядет, и ныне антихристи мнози. О правде, яко много предотечев, но и сам уже близ есть, по числу еже о нем 666. число бо человеческо есть антихристово. кто весть, аще в сих летех 1666-х явственных предотечев его, или того самого не укажет". И зри прочая на сие свидетельства, положенная в 368-м ответе: кий сей есть той, о нем же святый Иоанн Богослов духопрозрителне прорече, еже на число 666-е быти самому антихристу, и во всем мире сему монаршеский престол утвердити.
Вопрос, 381.
Во Апокалипсисе, о 6-м ангеле, излиявшем фиал свой на реку великую Ефрат, святый Андрей протолкует сице: "или Гога и Магога менит от западных стран, преехавших ефратскую реку, оскудевши воде от ведра повелением Божиим: или антихриста от восточных стран перския земли, идеже есть колено Даново от корене еврейскаго, со инеми царьми и вельможами к западу Ефрат преехати". Апокалипсис древлеписменный. О чем премудрый во пророцех Ездра сказует сице: "ибо вышнии паки поставит жилы речныя, да возмогут пройти". 3 книги Ездры, глава 13. Вы кого от еврейскаго рода, из перския земли чрез ефратскую реку прешедших, обретаете? известите и сия, аще и не хотяще.
Ответ, 381.
Преблаженный Андрей Кесарийский (о чем и в вышших ответех помянухом) в предисловии на Апокалипсис, не простыя глаголы, лежимыя на селе сокровища апокалипсическаго, разумевает быти, но символическия. Яко древних пророков, рече, еще глубину, сущих в них таин, имут невидимую до дне оного, воньже частному разоршуся разумению, совершенное укажется. Убо и о сем символе (си есть о изшествии Гога и Магога, яко еще и не открытым до дне онаго, воньже частному разоршуся разумению, совершенное может указатися) не долженствует разуметися чювственно, еже от предел перских, от Данова колена, но сокровеннаго некоего разумения требовательно есть. Какоже убо глаголется до дне онаго, в котором укажется? яве, яко по самому исполнению вещей, или рещи по явлению сына погибельнаго. Того ради и святии толковницы, еще совершеннаго исполнения не видяще, многоразличне и недоуметелне о изшествии Гога откуду быти толковаху: или, глаголюще, сему от западных стран, или от восточных изыти и преехати Ефрат реку, и прочая. Сия убо в старописменном трехтолковом Апокалипсисе толкуется. В печатном же, и от скифских, еже есть северных стран, Гогу и Магогу изыти глаголется. Якоже в 16 главе сице пишет: "яко Ефрат река, по божественному попущению умалена царем языческим, даст преход на друг дружное и прочих человек избиение и истребление. Им же двигнутися мним от скифских предел, от воспоминания Гога и Магога. [Ниже:] Ефрат прешед, или телесную, или душевную человеком наведет смерть: овым убо веры ради и терпения, овым за леность и слабость".
Но о сих убо скифских странах, от них же изыти Гогу и Магогу от Андрея Кесарийскаго сказуется, готовое разсуждение от божественных писаний премудрых наших старец предлагаем, некая же и от нас рекутся, иже о сем они тако глаголют: "Но услышим (глаголюще) что о сем превеликом таинстве божественныи Иезекииль пророк, во главе 38 предрече. И бысть слово Господне ко мне, глаголя: сыне человечь, утверди лице свое на Гога, и на Магога, и на князя росска, Мосох и Фовель. и совращу тя окрест, и вложу узду в челюсти твоя. [Ниже:] Уготовися, уготовися сам ты, и весь собор твой, собранныи к тебе, и будеши ми в преднюю стражбу. [Ниже:] Того ради прорцы сыне человечь, и рцы Гогу: востанеши и приидеши от места своего от конца северска ты и страны многи с тобою. конницы на конех вси, собор велик и сила многа, и взыдеши на люди Моя Израиля, яко облаком покрыти землю. в последняя дни будет, и изведу тя на землю Мою, да мя уведят вся страны, егда освящуся пред ними о Гог". Глава 39, лист 144: "Гог князя роска, Мосох и Фовель. и соберу и наставлю тя, и возведу тя от конца северска, и возведу тя на горы Израилевы. [Ниже:] И поражу тя на горах Израилевых, и падеши ты и вси, иже у тебе, и многи страны с тобою". До зде Иезекииль.
Великий же Афанасий пишет ко Антиоху князю во ответе 109: "яко Дан искочи от Васана, еже есть Скифополь". В Гранографе о Скифии сказует, что северная есть страна руская, якоже ниже о сем речется. А во Псалтыри толковой сказует: "яко от севера возгорятся вся злая, на вся живущая на земли". В Апокалипсисе же трехтолковом пишет: "яко во украшении вышняго града Иеросалима, седмыи камень иакинф, чермен есть. которыи обретается в стране северной, иже суть готфи, венцы. которыи иакинф уподоблен Дану, седмому сыну Ияковлю, сыну Валину, рабы Рахилины. глаголют же, яко той Дан своим сыном глаголаше: по летех и временех будет ваш князь сатана. о том бо и отец его Ияков прорек бяше: Дан тебе судит змий, седящая на пути и хаплющая пяту коньску".
Из сих свидетельств довольна речь произвеститися имать, яко Дан изскочи от Васана, еже есть Скифополь, преполунощнейшая и предалечайшая страна. И по козмографии: яже есть на севере земля руская. От тех скифских предел, Гогу и Магогу двигнутися Андрей Кесарийский сказует. Гог же есть антихрист, Магог же безчисленное воинство его наричет, якоже ниже о сем известится.
Но и Стефан митрополит, в новоизданней своей книзе о кончине мира, во главе 11 [лист 98] сице пишет: "Что есть Гог и Магог? Якоже о сквернавем имени антихриста различна суть мнения, яко же преднаписася, тако и о сих именах Гог и Магог различная толкования".
Услышим, что о сем повествует Андрей Кесарийский в вышереченном слове: "Мнят (рече) нецыи, яко Гог и Магог суть скифстии языцы, ихже нарицаем гунны, всякаго земнаго царства и языка многочеловечнейшыя, и в брани храбрственнейшыя. самою же Божественною рукою, ко еже обдержати вселенную всю, удержаемы и воспрещаемы даже до разрешения дияволя. [Ниже:] Ведати же подобает, яко Иезекииль пророчествова: яко сии языцы в последняя время приидут, с силою тяжкою на землю Израилеву падут, и седмь лет в тех же оружиих за множество их огню горящу и палящу. [Ниже, лист 99:] А яко паче последним летом сравняется и согласуется сих пришествие, явлено есть. [Ниже:] Второе же, за еже писано есть о Гоге, яко от днии древних уготовится, и в последняя лета приидет. Третие же, занеже в настоящем Откровении, пророчествующим будущая, писана суть при конце века сего Гогу и Магогу прийти". До зде Андрей святый.
Амвросий святый и Августин о сих мудрствуют сице [Стефан, лист 99 на обор.]: "Первое: Гога и Магога глаголют быти брань и гонение антихриста на церковь Христову. Второе: Гога разумеют быти антихриста, Магога же безчисленныя полки антихристовы: ибо Иезекииль Гога именует князем, Магога же нарицает землю или народ. Третие: Магога нарицают скифов, се же того ради, яко Афет имеяше сына именем Магога (якоже пишется в книгах Бытия, во главе 10), иже насели землю и водворися тамо, идеже ныне обитают скифи. якоже о Ханаана, сына Хамова, палестиньска земля нарицается Ханаан: и людие хананейстии, или хананее. Тако и от Магога, сына Афетова, земля скифская, и людие, в ней живущии, именуются Магог. От сих можно мнением проразумевати, яко Гог, или антихрист, имать сподвигнути на брань Магога, си есть премногия и пресильныя скифския народы, и теми гонити церковь Божию во всей вселенней. падет же со всеми силами своими на горах Израилевых, огнем свыше поражен, якоже гадательствует Иезекииль пророк во главе 39". До зде Стефан.
А понеже Иезекииль прорицает Гогу и Магогу прийти от конца севера: и понеже Афанасию Великому от Скифополя, си есть от севера, антихристу (от Иезекииля нарицаемому Гогу) прийти сказующу: и понеже и учителем церковным во Псалтыри протолкующим, яко вся злая от севера возгорятся: и понеже во Откровении Иоанну Богослову показано [глава 8], яко прельстившуся Гогу, собратися на брань, их же число, глаголаше, яко песок морский: и понеже Андрей святый сия словеса о Гоге и Магоге протолкова, яко Гог и Магог суть скифския языки, всякаго царства и языка, якоже зрим (глаголет), многочеловечнейшия, и в брани храбрственнейшия, самою же Божественною рукою, и еже одержати вселенную всю, удержаемыя и воспящаемыя даже до разрушения дияволя: и яко при концы века сего, Гогу и Магогу прийти глаголет: убо нужно есть изобрести:
Первое: Кто жительствует во стране северной? Второе: Кто в преполунощней стране, скифския языки многочеловечнейшия обретаются? Третие: Что есть Гог и Магог, князя росска, Мосох и Фовель? Которым повелевает пророк приуготовитися от многих лет, и в последняя лета прийти во многом собрании от места своего от конца северска на землю Израилеву, и тамо пораженным быти от Божияго гнева, свыше огнем и камением горящим одожденным, идеже будут мучими во веки веком. О сих известий нужно есть вопросы таковы предложити:
О севере, или о полунощи.
Вопрос 1. Что есть полунощная страна, и киих и каковых жителей содержит в себе?
Ответ. Повествовано есть в Синопсисе Киевском, яко прародителю нашему Афету осташася страны на запад и полунощь, в Европе лежащия, в третией части жребия, в ней же славянороссы, или московския народы жительство имеют [лист 4], и проч. Европия же содержит в себе преславны и крепки государства, богатства и велие множество людей храбрых и сильных и мудрых. Сему бо Афету дадеся достояние царское, храбрость воинственна, и разширение племене его [Стрик. книга 1, лист 6. Синопсис, лист 2]. Афет бо толкуется разширение, или разширителен. Народ же Афетов, прочих всех силою, мужеством и храбростию превзыде, страшен и славен всему свету бысть (яко ветхии и достовернии летописцы свидетельствуют). Ни в чесом бо ином, но точию в деле воинственном упражняшеся, и оттуду препитание и всякия нужды своя исполняше. И от славных дел своих, наипаче же в воинском, славянами, или славенами зватися начаша. Сего ради, в память славы народа славеньска, древний российскии князие, сыном своим имена припрязающе, к славе даяху [Синопсис, лист 3]: якоже Святослав, или Светослав, Ярослав: Мстислав, сиречь мстяися о славе: Мечислав, яко славен бе от меча, и прочая сим подобная.
Такожде и о народех сармацком (в той же Европе, третие части света, жребия Афетова, идеже ныне седят татарове) писано [Иосиф осторож., Синопсис, лист 9]: зане вся земля от сих людей трепеташе. [Ниже:] Откуду под тем сарматцким именем все прародители наши славенороссийстии: москва, россы, поляки, литва, поморяне, волынцы и прочия заключаются.
О скифах.
Вопрос 2. Кто в преполунощней стране скифския языки, их же Андрей святый Гогом и Магогом нарицает?
Ответ. Во Алфавите толковом, в знамении В, писано сице: "Варвария сирская во стране северней, еяже нарицаху Скифиею внутреннею, иже суть готфи и давники". В знамении Г: "Готфи пошли от татар". А инде пишет: "Готфи пошли го немец. и живут готфы в стране северней, иже нарицается Скифия и Варвария внутренняя сирская". В знамении С: "Скифия: казары, скифский татарин. А грецы Скифиею Великою нарицают руския грады: Киев, Чернигов, Переяславль, Полотецк, Ростов и прочия грады".
Такожде и в Синопсисе, или Летописце Киевском, о народе сарматском писано сице [Печ. в лето 7188, лист 6]: "Сармацыи страна есть вся в той же Европе, третией части света, жребия Афетова, обаче сугуба есть: едина скифская, идеже ныне седят скифи, или татаре. вторая, идеже москва, русь, поляки, литва, прусы и прочия обитают. Откуду под тем сармацким именем, все прародители наши словенороссийскии: москва, россы, поляки, литва, поморяне, волынцы и прочия заключаются".
И в Гранографе, воглаве 10, такожде Великою Скифиею руския грады повествовательно нарицает, сице глаголя: "царство российское державы исперва велицыи князи нарицахуся, многих великих градов: Владимира и Пскова, Мурома и Ростова и иных многих градов. и бысть крещена от великаго князя Владимира Киевскаго, и нарицашеся Великая Скифия".
О россах.
Вопрос 3. Что есть и кии, у Иезекииля помяненныи, Гог и Магог князя росска?
Ответ. Киевский Летописец, на листу 5-м, о народе руском изъявляет сице: "российскии народы, тыяжде суть славяне: единаго бо естества, отца своего Афета, и тогожде языка. ибо яко славяне, от славных дел своих, искони славеньское имя себе приобретоша: тако по времени, от россеяния по многим странам племене своего, россеяны, а потом россы прозвашася. [Ниже:] Недалече Великаго Нова града лежаще: иныя от реки Роси, друзии от русых власов, с яковыми и ныне везде суть руси. [Ниже:] Тако все древнии летописцы: гречестии, росийскии, римскии, польскии свидетельствуют. наипаче и божественное писание, от пророчества Иезекиилева, во главе 38 и 39-й, имя тое россов приличне изъявляет, нарицающе князя роска Мосох и проч. И тако россы от россеяния своего прозвашася: а от славянов именем точию разньствуют, по роду же своему едино суть. и яко един тойжде народ славеньский, нарицается славенороский, или славнороский. [лист 13] Иныи же россы страною, естеством же едины, в полунощных странах над езером Иамером широко седоша: а прочии над Волховою рекою, идеже создаша Нов град Великий, и Гостомысла некоего, мужа нарочита, от среды себе в князя избраша. и по времени град сей в толику славу и силу возрасте, яко некоим летописцем немецким Кранциусом в сицевую притчу ему внити: Кто же может или дерзнет на Бога и Великий Нов город? Егда же в Велицем междоусобии и многом нестроении российскии народы быша, не согласующеся во избрании от среды себе властелина, советоваше. он же нарочит и разумен муж, в Великом Новгороде живущь, Гостомысл, да пошлют к варягом и триех братии, иже бяху князи изящнейшии, и в храбрости воинской изрядни, на княжение российское умолят. понеже варяги над морем Балтийским, еже от многих нарицается Варяжское, селения своя имуще, языка словеньска бяху, и зело мужественны и храбры".
О Мосохе.
Вопрос 4. Кии Мосох у Иезекииля пророка воспоминается?
Ответ [Синопсис лист 7]. "Мосох, шестыи сын Афетов, внук Ноев, толкуется от еврейска славеньски вытягающий и ростягающий: от вытягания лука, и от разширения великих и мужественных народов московских, славенороссийских, польских, волынских, ческих, болгарских, сербских, карвацких, и всех обще, елико их есть славенска языка, природне употребляющих. той бо Мосох по потопе року 131 [Стрик., лист 91] [Ниже:] И тако от Мосоха, праотца славянороссийскаго, по наследию его, не токмо москва народ великий, но и вся Русь, или Россия, вышереченная произыде. аще в некиих странах мало что в словесех и пременися, обаче единым славеньским языком глаголют". И в повести известной, со свидетельствы историков, писано сице: "рос же обретается в Иезекииле пророце тако: князь Рос Мосох, Фовель". И на се свидетельствуя, сказует Евсевий Феодосион, и седмьдесять Библии преложение, яко у Иезекииля помяненный Мосох, московских знаменитый предводитель.
О наречии Москвы.
Вопрос 5. Царствующий град Москва от чего зватися Москвою нача?
Ответ. [Синопсис, лист 8] "Наречие то Москва, от имене праотца Мосоха изшедшее, аще оно искони вестно древним летописцем бе, обаче на мнозе и в молчании пребываше". "Начало же прия здания и звания от славнаго патриарха нашего Мосоха. Москва бо град от Мосоха праотца своего [Из повести извест.]".
"Москва бо город над рекою, от имене ея нареченныи [Синопсис, лист 8], наипервей с древа создан бысть: и не значен даже до великаго князя Иоанна Даниловича, иже престол княжения от Владимира града в Москву град принесе.
И тако величеством славы престола княжения, от Владимира града пренесеннаго, богоспасаемыи град Москва прославися, и прародительное в нем имя Мосоха в народе российском обновися. еже неувядаемою памятию в веки цветущи, изряднее же благодатию Божию от силы в силу, и от славы в славу преспевая, на высочайший степень самодержавнаго царствия востече". До зде Синопсис и прочия истории.
Тако Гог антихрист, Магог же безчисленныя полки его быти показуются. Тако сим изыти от севера, или полунощныя страны, доводствуется. Тако сии скифскими языками от Андрея Кесарийскаго нарицаются. Тако и от Афанасия Великаго антихристу оттуду изыти свидетельствуется. Тако и прочии учители толкуют, от севера всем злым возгоретися. Тако Скифия Великая, руские грады именуются. Сице, у Иезекииля пророка помяненный рос, роский народ показуется. Тако, у того же Иезекииля помяненный князь Мосох, Московский знаменитый предводитель глаголется. Сице, царствующий град Москва, по имени прародителя нашего Мосоха нарицается.
Сия вкратце о Гоге и Магоге рехом, прочее не дерзающе неизследимых судеб Господних бездну испытовати скудоумием нашим, псаломски вещающе: "яко возвеличишася дела Твоя Господи, зело углубишася помышления Твоя. муж безумен не познает, и неразумив не разумеет сих". Псалом 91.