Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Первое: каковая есть антихристова печать. Второе
Подобный материал:
1   ...   34   35   36   37   38   39   40   41   ...   46

Вопрос, 342.

В книзе Кирила Иеросалимскаго напечатано сице: Антихрист к жидом приидет, яко христос, и от жидов прият имать быти, даже их обольстит. Наипаче и церковь сотворит, да во большее сомнение их вложит, глаголяй себе от колена Давыдова. Ипполит Римский: "и той воставит во Иеросалиме каменен храм". Соборник, лист 127, сниз. строка 2. Вы сие писание како приемлете, чювственно ли жидом церковь воздвигнет, или ни?


Ответ, 342.

В варивших ответех довольно засвидетельствовахом, яко антихрист не точию к жидом, но и ко всем языком не имать чювственно приити, и Богом именно нарещися. Тако и церковь ему жидом воздвигнути, и в ней сести яко Богу, чювственно отнюд невозможно. Сих ради:

Первое: Пишет святый Кирил Иеросалимский о разорении церкве и священства и жертвы июдейской, сице [Кирилова, знамение 6, лист 32]: "Яко збысться и скончася власть июдейская, и церковь разорена. [Паки:] Иже бысть в стени жертвы храма Соломоня, и то совершися и исполнися в самой истине, по глаголех пророческих". До зде Кирил.

Речеши ли, яко паки воздвигнути антихрист храм Соломонь чювственно жидом имать. Но противу коего твоего мнения, писменне, а не духовне разумеваемаго, отвещает Златый языком: яко церковь их конечне погибе, и паки возставитися от человек не может. О чем сей святый вселенский учитель, в слове 3-м на июдеи, толкуя пророчество Даниилово, сице глаголет [Маргарит, слово 3 на июдеи, лист 106 на обор.]: "По седмидесяти седмицах потребится помазание, и суда не будет в нем, и град и святое растлится со игуменом грядущим, и иссекутся якоже при потопе. ниже останок будет, ниже корень прочее возрастающе. [Ниже лист 116:] А яко о римлянох сия речена быша, Иосиф, якоже в предних показахом, рекл есть. которое убо вам остало есть прочее слово; егда другая убо писания являются пророцы со уставлением временем рекше. сему же никоторая же время уставше, но и сопротивное прирекше, яко даже до скончания будет запустение. и яко не лжа суть реченная, принеси и еже от тех самех вещей представим свидетельство. аще бо не начали быша храм созидати, имели быша глаголати: яко аще восхотели быхом начати, и зданию прикоснутися, всяко убо возмогли быхом и успели. ныне же тех показуя, не единою, ни дващи, но и трищи наченьших и распадшихся, якоже во олумбийских подвизех, яко не несумнительну быти церковному венцу. [Ниже:] Яко аще убо человек бы разорил она, мощно бе и от человек паки восприяти та. Богу же сущу, низложившу тех град, невозможно есть, яже божественному мнящися суду, силе человечестей преобратити когда. яже бо Бог святый совеща, рече, кто разорит; и руку Его высокую кто отвратит; якоже бо аще возставит, и восхощет пребывати, низложити невозможно есть человеком. сице, и яже аще низложит, и хощет пребывати та низложена, возставити несть. [Ниже:] И ныне аще идеши во Иеросалим, нага узриши основания. и аще вину поищеши, ни едину же ину, разве сию услышиши. и сему свидетели мы вси, при нас бо не прежде многа времене бысть". До зде Златоуст.

И аще церковь Соломоня конечне разорися, и священство их погибе, возставити же ся паче от человек не может. Но тако до скончания века низложена быти Богу извольшу, и силе человечестей Божия суда преобратити отнюд невозможно. Множае паче антихристу, человеку сущу беззакония, сыну погибельному, возставити тую церковь не возможнейше есть.

Второе: А понеже убо, яко богоубийцы они жидове, закону Моисеову ныне сопротивни обретаются, и церкве Соломони весьма отчюждишася, яко от ложных учителей во многоразличныя впадоша ереси и прелести, и доконца погибают, о чем древлецерковнии святии учители засвидетельствуют. Якоже святый Феофилакт в Благовестнице, от Иоанна во главе 4, в зач. 12, сице пишет: "Ибо поистинне, по летех Христова пришествия, во еллиньство июдеи мудрии совратишася. и являет фарисейская ересь, рожденицы, и звездочетия верования". Такоже и в книзе Кирилове, в слове о пременении пасхи, объявляет [Кирилова, глава 34, лист 313]: "Яко нынешние новые жидовские учители, премениша закон свой о пасхе". Еще же в Потребнике, в чине от жидов приходящих, во отрицании и в проклятии закона их, являет в них многия ложныя учители и ересеначальники. И многия внове приятыя законы, яже Моисеом не преданныя. И многия показуются в них ереси, волшвения же, и чародеяния, и обаяния. Еще же показуется в них и такое нечестие, яко Ирода, червьми растленнаго, аки Христа почитают, и проч.

И аще жидове в таковых обыкоша неистовствах, и в толиких и таковых закоснеша законопреступлениях, и во многоразличных омразишася ересях и прелестях, убо како им требе быти церкве Соломони, и законнаго исполнения. Но таковаго в них тщательнаго усердствования быти ненадежно есть.

Третие: Аще попустим разуметися существенне по истории, еже антихристу жидом воздвигнути храм, или церковь Соломоню, то убо попустим ему и чювственне во оней седети, и все подобающее благочестие и служение к себе оному обратити. Но сицевое создание церкве антихристу, и в ней седение и служение ему, хотящееся быти яко Богу, зело несогласно будет, якоже святым церковным учителем, тако и самому вещи естеству.

Павел апостол сице о сем ведати дает [к селуняном, зач. 275]: "и открыется (рече) человек греха, сын погибели, противник и превозносяися над всякаго глаголемаго бога или чтилища, тако сести ему в церкви Божией аки Богу, показуя себе яко Бог есть". То Павел. Но разум словесем его, уподобление некое вещи знаменующь тако, аки бы рек: толико он в себе вознесется, подобно Богу хотети ему в церкви Божией сести. А наипаче сей предлог в церкви силу такову зде имущь, якобы рещи между и посреде. Кая могут возглаголатися: толико ему в себе вознестися, как Богу посреде церкве главнейшим сести. Церковь бо иногда не стенами огражденная, но верных во Христа собори, в нихже тому вознестися первоседательством Божиим. И не глаголет над Творца естественнаго Бога ему вознестися, но над глаголемых богов, то есть на начальников, власть имущих духовную, или мирскую, над сих вознестися, нижайше оных себе поставит: что признаваем от учителей, (якоже в 339-м ответе, во втором показании явихом) на чине папежском збытися в Римской церкви. Ибо он тако превознесется, показуя себе в церкви Христове наместником Христовым единаго, и прочим восточным патриархом главою и началом всякия духовныя власти, аки бы от него вся силы благодатныя истекают. И он всея вселенныя судия един, а не восточнии. Темже и яве на нем сие апостольское слово, превознестися над всякаго глаголемаго бога, совершися. О чем на сие и Златоуст глаголет: "и сядет в храме Божии, показуя себе бога. не рече глаголюща, но покушающася показати". До зде Златоуст.

Коль явственно Златоуст доказа, яко сему чину папежску в том явитися, еже и видим. Иначе же несть мощно быти, сих ради:

1: Глаголет бо апостол Павел, яко сести ему в церкви Божией аки Богу. И аще на писмены едины взирати, так просто умствовати, яко антихрист человек сядет в церкви видимаго здания, и вместо Бога себе кланятися людем повелит, что весьма быти невозможно.

2: Еще невозможнейше, по Златоусту [Беседы апостольские], сести человеку плотновидному в церквах. Како бо может един во многих церквах седети, всячески неудобно и не возможно суть.

3: Аще, человеку сущу антихристу, будут, аки Богу сущему, поклон отдавати, како не будет сущее идолослужение, божеское поклонение твари отдающее. Воньми убо, Арий иногда Сына Божия тварию нарицаше, а поклон Ему божеский отдаяше: оттого ради святии возгнушахуся умствования его, разумеюще, яко диявол древнее идолослужение хотя оживити в верных, еже нарицати тварию и тому божеский поклон отдаяти. Коль же паче сие идолослужение быти вменится, человеку просту антихристу, аще божеский поклон отдаяти, еже и пророчеству сему будет противно. Ибо Златоуст сказует [Беседы апостол., на зач. 275], яко не введет антихрист во идолослужение. Подобне же и Ипполит пишет [Соборник, в нед. мясопустн.]: яко первии мучители повелеваху мучеником Христовым Христа отрещися и идолом кланятися: а сей не тако, но токмо печати Творца небеси и земли повелит отрещися. Тоже и Кирил святый пишет: не вознестися антихристу на Бога Творца всяческих, но на глаголемых богов. И како се может быти, антихристу божеское поклонение: а наипаче от сих, иже Христа за истиннаго Бога верует. Не мало убо поистинне на сие взыскание потреба, ибо великих дел в сем настоит нужда.

Вняти же сие подобает, глаголет бо ему в церкви аки Богу сести. Но что сие странное? (ибо по проречениям, якоже в 339-м ответе, в первом показании явихом, чина церковнаго ему быти подобает). И аще царь будет он, то кая потреба ему седети в церкви; егда полаты подобательныя царю не треба ему будет, или лучше ему возмнится на седение церковь. И не глаголется по некоим временам садитися в церкви, но всегда седети. И кая уже та церковь церковию будет, аще таковый царь в ней невыступно седети будет, идеже многим мятежем и плищам свойственно быти. Странное некое глаголание. аще бо во образ антихристов бяше Нерон, в толиком сластолюбии и песней, и пиянствах, и играх, и в трубных гласех, и органех, и в прочих роскошах был: коль паче, образуемому антихристу, без совести вся дни свои во играх и смехах, и органных гласех, и пиянствах, и всяком сквернодействии провождати, неже Нерону образу его. И что его церковь будет, разве хлевина. Коликих бо ему, и прокладному его житию, пресыщению и пиянству, жен и блудниц потребуется, якоже чревобожным следствует. И в таковом распускном житии, церковь ли ему годе в седении аки затворнику, идеже гульбы, утехи и игры. Ибо человеку доконца забавному, якоже образ его Нерон яви. И что за дивное глаголется, аки привязану во едином месте седети. Помысли, аще бы тебе кто всякаго наслаждения удовольствие предложил, только ни камо из места того не изходил бы, не отрекся ли бы того всего предложения: ибо всякому наслаждению требуется свобода, свободе гульба, гульбе обхождение с человеки. И тако, не есть единаго места пребывание, не есть безмолвия. Наипаче же такому, всея земли самодержцу, идеже потреба многих прехождений, многих судов, раздаяния указов и повелений. Идеже потреба быти на предстоянии слуг многих, идеже потреба многих мест седение, многих пределений на жительство, яко самому царю и жене его, и прочим при ней служащим, так и постелям. Не безплотен бо обещевается историаписательно быти, ниже постник, но великий сластолюбец, и великий грехолюбец, имать той быти. Чего ради и Бога Творца отречется, и самому сатане дом и жилище душа его будет. И не токмо он, но и прочих на ту погибель понуждати тиранством своим будет. И кое се странное слышание и вероятия отстоящее. И сих ради всех обстояний его, всячески неудобно делу сему плотско или описательно по естеству быти, еже бы присно во едином месте быти. А наиболее, мощно ли сему совершенно явитися на многих местех, по Златоусту, в церквах единому седети. Но разве ино нечто в седении сем признавати невещественно, могущо седети во многих и повысюду. О чем в Большом Катихисисе пишется: "яко нечестивая ересь его, или повеление, обладает церкви святыя. кое ея обладательство и воинство антихристово нарицается". Зри о сем в Катихисисе, во главе 4. Сему послушествует и евангельское слово. И святый Кирил сице глаголя: "егда узрите мерзость запустения на месте святе, реченную Даниилом пророком, стоящую, кто чтет да разумеет". Какое место в толковании сказует мерзость запустение во святей церкви, опресноков на святем жертвеннике положение. Кии образует не животный хлеб, но мертвое некое и бездушное тело, мерзости суще достойно. О чем зри в Кирилове, в знамении шестом.

Сему послушествует и Феофилакт в Благовестнике, во главе 13, в зачале 60 от Марка, лист 80, сия глаголя: "мерзость бо запустение есть, всякое разумение сатанинско, стояи на месте святем, на нашем разуме".

К сим же и сие да глаголется, яже о сем в риторичестей беседе 3, сице: "обрящеши, рече, ересь помрачающую день спасения, время благоприятно, оскверняющую святая места". Риторика Феофана Прокопевичь.

И сие подобательное есть место, и можное есть антихриста на нем седяща в церкви Божии, якоже рехом ти. И аще вериши учителем церковным, приими се, яко кроме сего не можно глаголатися.

Четвертое: Хощеши ли уверитися от предреченных, яко антихристу жидом церковь Соломоню чювственно не возможно есть воздвигнути. Яко и сести, или седети в ней, или, по Златоусту, в церквах неудобнейше суть. Но понеже на Кирила Иеросалимскаго, глаголюща иносказательне, опираешися, яко он глаголет антихрист жидом церковь сотворит: убо гряди в той же книзе Кирилове известим ти, яко в Риме папежником антихрист церковь Соломоню покусится создати. Якоже премудрый толковник словес святаго Кирила, Стефан Зизаний, на шестое знамение сице пишет: "но жестоковыини (папежницы) якоже и жидове, великаго победителя Господа нашего Исуса Христа видяще во убожестве, возгордеша, и Ему противящеся. Опресноки мерзости египетския работы, и до сего дне жрут, ничего на жертву не заколают, иже антихристу предотечи суть и помощники. иже строятся совершенную Христову жертву везде помрачити, а их мерзость работы египетския вместити, и на месте святем поставити ложь со истиною вкупе. и место готовят князю мира сего последнему, глаголюще: яко наш един имать быти отец и папа. и всех по своей воли во всем мире сберет, егоже и жидове имут восприяти. понеже он возмет власть величайшую мерзость египеския работы. и со иным богомолием, церковь Соломоню древняго закона прелести ради создати покусится". До зде из Кириловы.

Воньми убо от сих глагол, яко и папежницы нарицаются жидами, за еже по жидовски опресноком причащаются, и тем антихристу предотечи и помощники сказуются быти. И последнему князю мира сего (си есть антихристу) папе место готовят, которой всех соберет под свою область, егоже и жидове восприяти имут. И сей со иным богомолием (сиречь со органы) церковь Соломоню древняго закона прелести ради создати покусится. Зде убо в толковании зело явственно мнение твое разрешается: и дает разумети не чювственно о создании Соломони церкви, но духовно. Но и сам святый Кирил, ниже твоей выписки, о пришествии антихристове к жидом, явственне уже быти назнаменует. Якоже в 10-м знамении сице глаголет: "приидет же (рече) антихрист тогда, егда в жидовской церкви не останется камень на камени по словеси Христову". До зде святый Кирил.

Когда же сие бысть в жидовской церкви, еже камень на камени не остася? Яве, яко по 40-ти летех от вознесения Господня царьми Римскими доконца сия разорена бысть, якоже о сем в 340-м ответе помянухом. Темже, по святому Кирилу, и антихрист тогда к жидом прииде.


Вопрос, 343.

Такоже и о печати сквернаго антихриста блаженный Ипполит предвозвещает: "и даст им знамение на руце десней и на челе, да никто же честный и животворящии крест сотворит десною своею рукою на челе, но связана рука его будет. и оттоле власти не имать знаменати своя уды, но прелестнику приложится, и тому единому послужит. печати же его, иже на челе и на десней руце, есть число 666". Вы убо сию печать, еже на челе и на десней руце, какую быти сказуете? и связание руки какое быти разумеете? явите с показанием от святаго писания.


Ответ, 343.

Понеже сей твой вопрос содержит два истязания. Первое: каковая есть антихристова печать. Второе: и что связание руки, от получения антихристовой печати.

И тако мы, по чину твоего вопрошения, и отвещание творити начинаем о печати антихристовой.

Первое: Аще, по блаженному Ипполиту, папе Римскому, во всем уподобится льстец Сыну Божию. Но во святей Божией церкви печать Христова (сия же и знамением нарицается) не единообразна суть. Но яко многоразличныя вещи и действа печатию нарицаются.

1: Нарицается крест Христов печатию. И сим ограждающиися, чрез двоеперстное сложение печатлеются. Еже и разньствоватися сим будут Христовы служители от антихристовых, якоже о сем нижеследующия свидетельства явят. Святый Иоанн Богослов во Апокалипсии пишет [глава 7]: "Сущее. И видех (рече) инаго ангела, восходяща от востока солнца, имущаго печать Бога живаго. и возва гласом велиим к четырем ангелом, имже дано бысть повредить землю и море, глаголя: не вредите землю, ниже море, ни древеса, дондеже запечатлеем рабы Бога нашего на челех их. От толкования: Сие зде блаженному указуется превышайшей святей силе, повелевающей казнителем святым ангелом ничто же соделати согрешившим, прежде даже познают истины служителей, запечатлением разделенных бывших. сие же аще и частне древле бысть веровавшим Христу, разорения Иоеросалима избегшым: но (убо якоже речеся) во время пришествия антихристова, наипаче будет печати животворящаго креста, отделяюще от неверных верныя, непосрамленне и дерзновенне знамение Христово пред нечестивыми носящыя". До зде Апокалипсис.

Сия же словеса апокалипсическия согласне древним, и от новых Стефан Рязанский взем от древних, протолкуя о положении печати Христовой на челе и на всех удех, сице глаголет [книга Камень веры, о кресте, часть 230, глава 2, лист 195]: "Андрей святый Кесарийский с прочими многими, словеса оная апокалипсическая толкует о знамении креста святаго, имже мы по древнему церкве православныя обычаю благочестне знаменуемся. и глаголет: яко во время антихристово сие знамение будет различия людей Христовых от антихристовых. Сия есть печать, о нейже Жених небесный к невесте своей глаголет [Песнь песней, глава 8]: положиши мя яко печать на сердцы твоем, и яко печать на мышцы твоей. Сия словеса Амвросий святый толкуя в книзе о Исааце, печать на сердце, печать на мышцах. на челе убо, яко да всегда его исповедуем. на сердце, яко да всегда его любим. на мышцах же, яко да всегда благая делаем. знамение на челе, яко на месте стыдения: да не стыдимся исповедати распятаго Христа, иже не стыдится братию нас нарицати. знамение на сердце, яко на месте любления: да возлюбим Его, возлюбившаго нас всем сердцем. знамение на мышцах, да поработаем Ему Господу нашему, и тяжесть крестную понесем на раменах наших. Сия наша есть печать, еюже от июдей и от язык разньствуем. сие наше есть знамение, от лобнаго места на лбы нашя пренесенное знамение во благо". До зде Стефан.

Сице рече Стефан (и не хотя наше возпроповеда) по древнему церкве православныя обычаю благочестне знаменуемся. Его же истолкование яве показа, яко печать сия есть символ самого Христа. Его же два перста сложа, два естества исповедающе, на себе крест воображаем. Тем же и глаголет о себе Христос: "положиши Мя".

О чем и святый Кирил в поучении 12 пишет: "не стыдимся (рече) исповедати Распятаго, на челе со дерзновение персты назнаменовати креста печати". А святый Петр Дамаскин во своей книзе пишет: "яко два перста (их же на крестное воображение слагаем) являют распятаго Господа нашего Исуса Христа во двою естеству". До зде святых учителей о печати христиан истинных. О ней же Ипполит пишет: яко антихрист во дни своя повелит не Христа, но Его печати отрицатися правоверным. А о печати антихристовой той же Ипполит пишет тако: "даде Господь верующым в Него знамение честный крест, подобне и той даст свое знамение". И святый Ефрем глаголет: "начертает змий свое знамение за крест Спасов". Явственно же в Велицем Катихисисе сказуется: яко кия не возносят узаконеннаго воображения крестнаго десницею на чело и на прочия уды, и тамо от тех и антихристовой печати приятие есть. О чем во главе 23 сице пишет: "иже не приемлют на себе Христова крестнаго знамения, сиречь десницею своею узаконеннаго воображения не возносят на чело главы своея и на живот, тако же на правое плече и на левое. аще убо реченнаго сего Христова крестнаго знамения не приемлют, то уже яве есть, еже имать прияти на чело свое и на десную руку антихристову печать, по реченному: идеже бывает света лишение, ту бывает тме пришествие". До зде Катихисис.

Пишет же в книзе польскаго наречия, именуемей Мессия правдиваго, о печати Христовой истинной, и о антихристовой ложной, сице: "яко Христос Мессия правдивыи, дал всем православным христианом пятно свое крест святыи, жебы его христиане при себе имели, и оным чело свое и члонки и инши жегнали, и его шановали. бо мы христиана правдиваго по тым познаваем, есть ли шанует крест святыи, и его при себе мает, и оным ся жегнает. а кто креста святаго не шанует, и оным ся не жегнает, и при себе не ховает, той не есть христианин, але есть альбо поганин, альбо жид, альбо геретик. так антихрист людем пятно свое будет давати, жебы на тое пятно глядучи, кождыи познавал, иже то суть слуги антихристовы". И паки в той же книзе пишет: "егда жид в божнице еллинской ночевал, и услышавши приход бесов, знаменал себе крестным знамением. тогда диявол, ощутивши его, возопи: горе горе, сосуд празден, но запечатлен". До зде из Мессии правдиваго.

Темже от вышепредложенных показася, яко и сия есть печать Христова, еже крест начертовати на всех удех тела двоперстным сложением, по древнему преданию, с проображением символа Божества и человечества: убо и антихристова печать, такоже во изображении будет являтися. Аще и не в подобном и неподобная, обаче, не по вашему мнению, чювственное начертание некое имети будет. А еже како новороссийская ныне церковь прияла в своем знаменовании, противном древлецерковному, изображати антихристову печать, зде за удолжением слова не вмещаем: но о сем глаголати имамы в 345-м, и прочих по нем ответех.

2: Нарицается печать и крещение Христово, о чем учители церковнии, якоже во святых книгах, тако и во историях засвидетельствуют: В Благовестнике, от Луки в зач. 79, на листу 165; От Иоанна, в зач. 36, на листу 170; в Лествице, на листу 84; Григорий Богослов, в слове 2, на святое Просвещение; в житии Варлаама и Иоасафа, ноября в 19, в поучении ко Иоасафу; в житии священномученика Феодора епископа Киринейскаго [Минея чет., Пролог]; в Потребнике, в чине крещения, в молитве пред крещением; в Минеи служеб., генваря 2 день; в Трипеснце на павечерн., песнь 8, стих 1. Во всех сих местех крещение Христово печатию нарицается. Убо и антихрист, хотящий Сыну Божию уподобитися, подобне будет иметь у себе такоже крещение, яже и печатию его нарещися имать.

3: Нарицается печать хиротония. Беседы апостольския, лист 1995.

4: Нарицается печать миропомазание. Матфей Иеросалимский, состав г, глава 12.

5: Нарицается печать покаяние. Лествица, лист 84.

6: Нарицается же ся печатию, или запечатлением, вера православно кафолическая. Якоже о сем святая церковь воспевающи глаголет [Кондак в неделю святых отец по пасце]: "апостольское проповедание и отец учение, церкви единою верою запечатле", и проч.

И иныя убо вещи деятельныя и видительныя, знаменающия печать, за множество оставляем.

Темже, якоже в церкви святей Христова печать многоразлична, и в многоразличных вещех и действиих духовных заключаема суть: тако убо и антихристова печать многообразна же и различна, и в различных вещех и действиях духовных нечювственне начертаема изобразуется. Якоже в толковании Апокалипсиса, и содержания ради жития нечестиваго и словеснаго и детельнаго исповедания, глаголется начертание антихристово на руце и на челе прияти. О чем в древлеписменном, инаго толкования на глав. 13, сице пишет: "аще кто озвершемуся тому антихристу повинется, и нечестиваго жития содержит, того образующее. или словом, или делом того исповесть бога, сие бо сказует на руце и на челе даемое начертание". И белорусских малых Апокалипсисах: "знак (рече) на руке и на челе, словом и учениом повиновенье". Златоуст же сказует, запечатление, яко ничесому же остати прочее. Маргарит, слово 3 на июдеи.

Второе: Какоже связана имать быти рука десная от печати антихристовой, и не имать власти знаменати уды своя честным крестом, на сие тако отсловствуем:

Понеже всякому есть ведомо, что всяк правоверный християнин приимет от Бога знамение честнаго креста от святаго крещения, якоже о сем пишет в слове о крестном знамении, во Псалтыри Иосифовских печатей. Чти тамо в надписании червленых слов. И крещением напечатлевается на души и на серце крещаемаго знамение Христово [Катихисис Бол., глава 61], которое не истреблено и неизменно пребывает. Но на небеси и на земли неотъемлемо есть.

Такоже и противный Христу антихрист, подобяся Сыну Божию, дает своим прельщенным свое знамение во своем крещении. Им же и напечатлевает на души и на сердце начертание зверино, которое не истреблено же и неизменно пребывает, на небеси и на земли неотъемлемо имать быти.

Аще ли же, по Златоусту, и по инем учителем церковным [Златоуст, Беседы апост., на Матф. нравоуч. 54. и Беседы апост. лист 1995. Пролог, март 13. Иосиф Фессал. в нед. 3-ю поста и Феодор Студит. Симеон Селун., глава 62. Кирил., лист 275], крещение крестом подобает восприяти, печать рукоположения крестом. Без того бо, рече, ни крещение, ни литургия не бывает, ни иная кая духовная вещь. Якоже тако и бысть, яже во Христовой церкви вся крестом Христовым совершахуся. Подобне и во антихристовой церкви знамением (аки крестом Христовым) крещение и вся тайны, и вся духовныя вещи совершаются, без того же (антихристова) знамения отнюд не бывают. А якоже, по святому Ефрему [слово 105], крещение святое знамением християньским нарицается, убо и антихристово крещение знамением антихристовым нарещися может. И якоже приимшии знамение Христово от святаго крещения, яко чада Христовой церкви, и наследницы царства небеснаго, область имут честным крестом знаменати своя уды: и тако уклоньшеся с пути противнаго, убегают и от лица лука. Якоже царственный пророк Давыд провозглашает: "дал еси боящымся Тебе знамение, еже убежати от лица лука". Приемшии же знамение антихристово от крещения, яко чада погибели, и наследницы вечных мук, область имут антихристовым знамением своя уды знаменати. И тако уклоньшеся пути праваго, шествуют путем противным, и не могут того пути убежати. Яко знамение сквернаго богоборца от крещения приемше и обносят, и удобь ведоми, и знаеми тому (по Ипполиту) бывают. И за еже яко не прияша сии крестом Христовым крещения святаго, совершаемаго во Христовой церкви, того ради не имут области и знаменати своя уды знамением Христа Спасителя, и связаны суть руце тех таинственне. Над сими бо область имеет диявол, по реченному во Апокалипсисе: иже не имут печати Божия на челех своих, сиречь невернии не крестишася во имя Отца, и Сына, и Святаго Духа, и не знаменани знамением честнаго креста, над сими область имеет диявол". И паки: "Еже бо умнии прузи уязвляют человеки подобно скорпиям: являет, яко на концы лукавых деянии, сокровена есть душевредная смерть. Ей же подлежат незнаменани божественною печатию на челех, и просвещением животворящаго креста, чрез Духа Святаго не облистаеми тако, яко по Владычнему словеси, ниже возсия свет их пред человеки, в славе божественнаго имене".

И от сих двою предложении ясное от писаний свидетельство, что есть печать, или знамение антихристово, или что суть связание десницы от получения оной. И прочее о последующих приятию оной, в пред идый, известити имамы.