Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Часть пятая.
Подобный материал:
1   ...   31   32   33   34   35   36   37   38   ...   46
ЧАСТЬ ПЯТАЯ.

РАЗДЕЛ, 10.


Вопрос, 333.

Самая наша Истина, Христос Спаситель, глаголет: "Аз убо, рече, приидох о имени Отца Моего, и не приясте Мя. ин же придет во имя свое, того примете". Вы убо сие речение како приемлите? к кому оное глаголано? и о ком сие речено быти сказуете?


Ответ, 333.

О таинстве немалом ищеши, о вопросителю, у нас словесе. В неже мы вступати, зрящее свое неискуство, зело трепетни и опасни есмы. Ибо, прежде неже о таких вещех тайнозрителю своему Иоанну яви Бог, показа ему о сем книгою запечатленною [Апокалипс. слово 5, глава 11, стих 70]. И како мы невежествующии, в плотьская погребени сущее, дерзнем ко оным тайнам словом приступити, или что закрытаго глаголати. Ибо седмь громов апокалипсических, иже тайну Божию в небеси возгремеша, хотя Иоанн глаголющая ими написати, запрещен бысть ангелом не писати некоих ради, да видящее не видят, и слышащее не разумеют [Того ж, глава 28, стих 122 и 123].

И сих ради вин, не достигшим нам высокаго разума, лучше есть о твоем сокровенныя тайны (о сыне погибельном антихристе) любопытстве отрицатися, да не худосильством плавая глубину сию, не погрязнем. Мощно бо есть и от инших преданий церковных дознатися о прелести нынешняго последняго времене, и о спасении своем попещися, якоже о сем довольнейше в 21-м ответе и в прочих предложихом. Но подвизает нас апостоловещательный глас, повелевающь быти готовым ко всякому ответу. "Будите (рече) готови ко всякому ответу, вопрошающему вы слово о вашем уповании". 1 послан. Петра, зач. 60.

Обаче аще всемилостивый Бог яви угоднику своему тайну сию запечатленною книгою некоих ради, якоже рехом, но не не показа ему, якоже о сей тайне, тако и о прочих, в наше спасение. И всею душею ищущим посторонними разумы, и сие оною же запечатленною книгою яви: ибо она в деснице Божии зрящеся, внутри и наружи написана. Сим Благий яви, яко нерадивым Божия тайна скрыта, а тепле ищущим яве есть. А наипаче при окончании Апокалипсии, ангел от лица Божия Иоанну не повеле сию книгу пророчествий запечатлети [Апок., глава 71, ст. 301]. И таковых ради даров милости Божии к нам, аще мы на разрешение сих таин и недостойни, но достойными возглаголем.

И прежде нежели вступити имамы в решение Христовых словес, ко июдеом (о приятии ими инаго, си есть антихриста) реченных, должное возмнехом о разумах священнаго писания зде вкратце слышателем предложити, ими же разсуждается все божественное писание.

Вопросиши, колико их обретается? Отвещаем: Понеже купно общне сугуба быти глаголются:

письменный

и духовный.

Духовный разум разделяется аще и на многшия, обаче на начальнейших три:

на аллегорический,

на анагогический,

и на евтропологический.

Аллегорический разум сказует о воюющей церкви на земли, например: Церковь есть всеблагочестивое христианское собрание, в благоверном разуме обретаемая.

Анагогический разум сказует о ликующей церкви, яже на небесех, яже есть всех святых в небесном Сионе торжествующих.

А евтропологический разум сказует о нравней, еже есть внутрь всякаго православнаго христианина, по добродетелем заключаемей церкве.

Сицевыми разумами должно суть и о антихристе разсуждати, а не тако якоже вы заключаете в един точию писменный разум сказание о сем погибельном сыне. Понеже Христос Спаситель писменне ко июдеом рече, по духовному же разуму. Аллегорическии может сказатися ко всем еретиком. По анагогическии, к самому диаволу, первому отступнику. По евтропологическии же может и всяк нарещися осуждаяй друга, или не приемляй грешнаго на покаяние, и прочих ради вин антихристом. Якоже много видим и христиане тако нарицаемии бяху не точию от учителей, но и от самого Бога. И Петр апостол, за сопротивление Христу, сатаною от Него наречен бысть. И сия убо разумы, ради познания предает нам риторическое учение. Мы же достовернейше согласившее сие речение Христа Спасителя нашего ко июдеом со учителями церковными, яко тии не точию ко оным сии полагают, но и ко всем языком, преступающим Христов закон и ложная учения предающим. Преблаженнейший Андрей Кесарийский, растворяи громы апокалипсическия. Сей премудрый учитель, толкуяй о пришествии в мир сына погибельнаго, не на единых точию июдеов сие Владычне речение указует (яко бы по вам, ко онем токмо приидет) но ко всем не веровавшим Истине. Идеже сице пишет [Апокалип., глава 20]: "яко по тысящи лет, человек беззакония, сын погибельный придет, да суд примут вси не веровавши Истине, но благоволиша о неправде. по апостолу и по Владычнему словеси реченному: Аз приидох во имя Отца Моего, и не приемлете Мене. ин же придет во имя свое, и онаго приимете". До зде Андрей Кесарийский.

Виждь убо сего толковника разум, яко не на июдей (по тебе) показа, но и на вся не веровшая Истине, и благоволившия о неправде, по апостолу и по Владычнему словеси реченному. И сим апостоловещательным гласом показует, яко он не о июдеох рекл есть таковая, но о всех не верующих Истине. Еже к селуняном пишет: "зане любве истинныя не прияша, воеже спастися им, того ради послет им Бог действо льсти, воеже веровати им лжи. да суд примут вси не веровавши Истине, но благоволиша о неправде". Такоже являет, яко и Христос не ко июдеом токмо, но и ко всем веровашим Истине рекл есть таковая: "Аз приидох во имя Отца Моего, и не приемлете Мя. ин же придет во имя свое, и онаго приимете".

Гряди убо, изъявим ти и иная реченная от Христа Спасителя ко июдеом. От святых же учителей сия словеса, и ко всем отступником и еретиком возречена суть.

В книзе Кирилове, в знамении 10-м, о антихристе пишет сице: "и тако с великою нуждею и тягостию придет ко июдеом", якоже святый Кирил впреди, в знамении 11 пишет. знамение 11. "Тогда сущии во Июдеи, да бежат на горы. и иже мук не могут терпети, отрадит им Христос на время бежати, да не соблазнившеся, или убоявшеся мук, вечно погибнут. а которыя постраждут доблественно, паче всех мученик первых начальнейшими будут, иже в то время за Христа муки примут: ибо не с простым человеком, но с самим диаволом побиются. но токмо и от страха мук. но котории и от прелести их не отвратятся страхования ради, яко имут много их соблазнитися прелести ради, глаголюще: яко и Христос ничесо болшее того не сотвори. и аще бы то не угодно Богу, не попустил бы. не ведуше, яко убо сие действо Божие, того ради посылает Бог ради первых действ. еже есть злии, иже не вероваху Истине. посылает им прелесть, даже услышав, осудившеся погибнут, ибо не к правде, но ко лжи присташа неправеднии. аще бо в вере пребудут доконца, спасутся, и большую мзду себе воспримут, иже Судия пришед всем воздаст по делом". До зде суть знамения о антихристе святаго Кирилла.

Зри убо, можно ли словеса святаго Кирилла (по тебе) писменно разумети, яко глаголет: "антихрист ко июдеом с великою нуждею и тягостию придет, сущии же во Июдеи да бежат на горы. и яко мук не могут терпети, отрадит им Христос бежати да не погибнут. а котории постраждут муки, паче всех мучеников первых начальнейшими будут, иже за Христа муки приимут". То убо ли о жидох сия исполнитися могут? никакоже. Жидове бо веры во Христа Бога не имут, и тягости и нужды от антихриста не примут, и за Христа терпеть муки не будут, и боятися им нечего, и на горы бежати им не нужно есть: а и в своей вере доконца пребывати им не спасено есть, и мзду от Христа приимати не за что, но и антихриста они без нужды с любовию вместо Христа примут. Вся же сия никакоже о июдеох збытися имут, но разве во Христа верующих языцех: июдея бо исповедание от учителей толкуется. Аще ли же и Кирил святый глаголет о антихристе, яко к жидом придет, и от них прият будет: но о том, в знамении 6-м, толкователь словес его, Стефан Зизаний, тако пишет: "Но жестоковыйнии якоже и жидове папежницы, великаго Победителя Господа нашего Исуса Христа видящее во убожестве, возгордеша, и Ему противящееся. опресноки, мерзости египетския работы, и до сего дне жрут, ничего на жертву не закалают, иже антихристу предотечи и его помощники". Кирилова, лист 37.

Зри и зде разум святых учителей, яко жидами нарицают еретиков папежев, июдей же наричют инде и верующих от язык во Христа. Якоже сам Христос о антихристе рече: "тогда сущии во Июдеи да бежат на горы. Протолкует же сие Златоуст сице: иже суть в христианстве, да прибегают к писанию". Книга О вере, глава 23.

Зри духовный разум священных писаний. Христос рече: "да бежат на горы". А Златоуст протолкова: "да прибегают к писанию". И паки, ко июдеом рече Христос: "на Моисеове седалищи седоша книжницы и фарисеи. вся яже рекут вам творити творити, по делом же их не творите. имут бо сан, но жития суть нечестиваго". Обаче не ко июдеом токмо, но и ко всем учителем церкве Христовы толкуется по Златоусту. И паки, ко июдеом рече Христос: "горе вам книжницы и фарисеи лицемери, яко затворяете царствие Божие пред человеки. сами не входите, и хотящым внити возбраняете. и горе вам вожди слепии, и прочая". Обаче не ко июдеом единем, но и ко учителем церкве Христовы и ко еретиком, неправе мудрствующим, разумеется по Златоусту. И паки, ко июдеом о церкви Соломони рече Господь: "дом Мой, дом молитвы наречеся, вы же его вертеп разбойником сотвористе. и того ради учителей жидовских изгна Господь из церкве, яко куплю деют, и глагола: се оставляется дом Мой пуст". Обаче не ко июдеом токмо, но ко учителем церкве новой благодати разумеется, иже неправе мудрствующее, закон содержат, и таковых всех изгоняет Христос из своея церкве. Яко же пишет божественный Златоуст в слове о лжеучителех, глаголя сице: "и тогда Господь отгна, и наконец опустение и разорение прорече, хотящей быти погибели. супротив мыслящым глаголя: се оставляется дом Мой пуст. зрите, како словеса Господня дело быша. врази бо неприязни, церковныя еретицы, ничим же разни прочих поган, не знающих Бога, во вся роды погибели предадятся, по словеси Господню глаголющему: всяк сад, егоже не насади Отец Мой небесный, ископается. еже и збысться, сам бо первее сотвори и показа. по возшествии же Его на небеса, божественнии апостоли возвратишася на них, и по тех святии учителие, и по временех бывающыя святыя соборы, тех не покаявшихся истязавшее, изгибели предаша, по писанному: погубиши вся глаголющая лжу". До зде Златоуст.

Такоже и Мелетий, патриарх Александрийский, на отступных и новомудрствующих учителей пиша, в 10-м послании своем тако глаголет: "яко пастырие наши отступиша, или заблудиша, яко и нам не мощно ся без них сохранити: но несть тако несть, мощно бо быти без них. зане сам Бог их из церкве изгнал и обесчестил, понеже недостойнее тыя престолы содержат, и то имя на себе носят. и не мни яко слава им се, но безчестие, и вечное отпадение Христа и святых Его. се же ти покажем не нагими словесы, но писанием, яко сии не быша пастырие, ниже учители, ниже верни: но быша блазнители, прелестницы, и разбойнический престол, силою имений, злата и сребра, и человеческою помощию и ухищрением восприяша. да именьми, а не церковию владеют. дирою влезли, а не дверми по Христову словеси, и прочая". До зде Мелетий.

И паки, ко июдеом рече Господь: "яко вы отца имате диавола". А Златоуст, в слове о лжеучителях пиша, на еретики приводит, глаголя: "яко сынове лукаваго и духоборцы, охулившеи Дух благодатный, имже не отпустится ни в сий век ни в будущий. имиже путь истинный хулится имать. к сему же и чада лукаваго диавола. якоже к ним Господь рече: яко вы отца вашего есте диявола. и Богослов Иоанн: ведома суть чада дияволя". До зде Златоуст.

И аще тако суть, якоже святии учители истолковаша, яже от Христа ко июдеом реченная, и ко всем еретиком, и недостойне престолы содержащим прикладна суть: убо и сие, еже ко июдеом (прийти антихристу) реченное: "Аз приидох во имя Отца Моего, и не приемлете Мене. ин же придет во имя свое, и оного приимете". Не ко июдеом же токмо, но и ко всем не веровавшим Истине, но благоволившим о неправде разуметися имать. Понеже преподобный Ефрем, в слове 105-м о антихристе пиша, сице глаголет: "темже пречистый Владыка духом лестчим хощет искусити весь мир, понеже везде и повсюду злая содевают". Той же: "понеже сами восхотеша человецы Бога отступити, а неприязнь прияти". До зде Ефрем.

Зри разум писавшаго: не о июдеох токмо, но о всем мире глаголет святый, яко (рече) сами восхотеша Бога отступити, а неприязнь прияти. Убо и сей святый согласная с вышепомяновенными пишет, не о июдеох (по тебе точию) но и о отступльших от веры Христовы.

Тако убо зде, яко в предисловие о антихристе входящее, и сими твой вопрос удовольствовахом. Прочее же о пришествии антихристове ко июдеом, такоже и ко всем языком, в грядущих ответех пространнее писати имамы.


Вопрос, 334.

Во Откровении Иоанна Богослова, во главе 4, написано о коленах двунадесяти патриархов: зрим же яко колено Даново с прочими не учинися. Убо известите, чесо ради оное колено с прочими не учинися? ибо и Дан бяше сын Иякову якоже и прочии.


Ответ, 334.

Духовным сущим сказуемым, духовныя премудрости, а не мирския потребы, ко еже разумети глаголемая, глаголет сие преблаженный Андрей Кесарийский [Апок., глава 16, ст. 9].

Зде убо, по предложению твоего вопроса, не о едином колене Дановом нужда рещи прииде, но и о прочих дванадесяти коленах Израилевых. Понеже ваш разум единственно вратится, во еже всякое священное писание чювственно, разумом писменным разумети, убо и заблуждаете во тме вашего неведения. Божественный же Афанасий Великий не тако, по вашему, священная писания разсуждати повелевает, и глаголет [Иосиф Волоцкий, глава 15. Потребник иноческий, лист 359]: "яко потреба, хотящему разумети божественная писания, истязовати со многим опаством плоды, и лице, и ум глаголющаго. Сего ради глаголет божественный апостол: яко писмо убивает, Дух же живит. понеже много от божественных писаний аще не по писанию разумеется, то плоды истязовати со многим опаством, сокровенная в божественных писаниих, и сего убо Дух живит. не разсуждаяй же сия, но по писмени разумеваяй, и сего убо писмя умерщвляет, и того ради во многия ереси впадают". До зде Афанасий.

Того ради, о вопросителю, ныне бы ти должно, аще желаеши, разумети силу словес в божественных писании. со многим опаством испытовати плоды Духа, сокровенная в божественном писании. А не по писмяни бродити, еже есть плотским мудрованием умерщвлятися. Темже, прежде нежели внити во ограду испытания о дванадесяти коленах Израилевых, запечатленных печатию Бога живаго, и последовательне о колене Дановом, не причтенном со оными, зде убо на празе постояти долженствуем. Ибо иносказательне сосуд избранный, о обращении всех жидов при последних временах ко Господу нашему Исусу Христу, глаголет: "яко (рече) недоумение отчасти Израилеви бысть, дондеже наполнение языком внидет, и тако весь Израиль спасется". К римляном, глава 11, зач. 107.

Сие убо спасение Израилю, новолюбителнии архиереи, Стефан Яворский и прочии, указуют пред самем судном дни, а како сказуют, слыши: "егда (реша) жидове прельстятся антихристову учению и поклонятся ему, тогда Илия и Енох исправят их, и к вере святой и Мессии истинному приведут". Противу коего их мнения (емуже и вы последуете о спасении чювствительном колен Израилевых) сице ответствуем: Самая Истина и предведец Господь наш Исус Христос, в зач. 87-м, иже от Луки, первее помалу, таже и яве поведа печали и беды во дни пришествия антихристова. И о тех печалех и бедах, хотящих быти, во образе вопрошения назнаменова своим учеником тако: "обаче Сын человеческий пришед на облацех, обрящет ли веру на земли". Великий же Златоуст и святый Феофилакт, сицевыми словесы сие вопрошение решает: "во образе вопрошения, редко тогда обретаемых верных. тольма бо удержит тогда сын беззакония, якоже прельстити и избранныя аще мощно. обаче же не много обретаемых, и в просте нрав уподоби: якоже кто есть убо верный раб и мудрый. и зде убо тожде являя, яко мало будет, иже к Богу тогда и человеком веру храняще. тогда и Господь молитися уча, веру помяну, являя сокровенное, яко мало будет молящихся тогда, зане и вера в малых обрящется: пришед бо Господь на облацех, не обрящет веры на земли, токмо не во мнозех". До зде Златоуст и Феофилакт.

Слыши убо зде самого Спаса, и святых церковных учителей глаголющих, яко пришед Господь на облацех, не обрящет веры на земли, разве не во мнозех. Новых же учителей, и ваше разумение показует, яко тогда весь род жидовский, или вси племена их спасутся. Како убо сие согласно покажется учению Христову и святоотеческому? Вы глаголете, при последних временех, при самем сыне погибельнем, спастися всему жидовскому роду, и всем племенам их. Христос же со своими последователи сказуют, не точию спасение в жидох оскудеет, но и во всех языцех. Ибо пришед (рече) Господь на облацех, не обрящет веры на земли, точию не во мнозех.

Яве убо ваше сие разумение показуется плотское и враждующее, по апостолу, на Дух, и защищающее не быти еще пришедша сына погибельнаго: но ожидающее обращения всех жидов к вере Христовой. Духовному же разумению святых отец, сей разум зело сопротивоборствен и сливающь времена и лета обрящется.

Божественный же Златоуст, обличая сливающих времена, и не ведящих и не проницающих глубину разума священных писаний, тако глаголет [Маргарит, лист 176 обор.]: "иже убо (рече) времена не ведяй реченных вещей или збывшихся, како возможет показати любопрящымся пророчества сан". Темже, аще желаеши уведети время, обращение жидов бывшее, или о глаголанном от апостола Павла изследовати, еже есть о сем: "дондеже исполнение языком внидет, тако весь Израиль спасется". Слыши, како пророк согласная сему вопиет: "придет от Сиона избавляя, отвратит нечестие от Иякова". Речеши ли, и сему пророческому словеси збытися во времена антихристова, прельщаешися тако глаголя. Понеже, якоже апостолом реченное, не о антихристовых временах глаголет быти, тако и сие проречение: но о Христовых и апостольских, и о последи бывших. Не от единых жидов о обращенных, но от всех язык во Христа Бога нашего веру извествует. Якоже другий пророк, прорицая о пришествии Христовом в мир, и откуду быти, являет сице: "и ты (рече) Вифлееме земле Июдова, ничим же меньши во владыках Июдовых. из тебе бо изыдет вождь, иже упасет люди своя Израиля".

Святии же учители церковнии, во евангелии на Рожество Христово протолкующе, тако глаголют: "и упасет, рече, люди моя Израиля, а не потомит или пояст. друзии убо цари не пастыри бяху, но волцы и томители, Христос же пастырь есть благ и добр. якоже и сам глаголет: Аз есмь пастырь добрый, и познаваю своих си, и познаваем есмь своими. люди же рече Израиля, и сущих от жидов, веровавших и от язык, Израиль бо сказуется ум зряй Бога. отнуду бо вси зрящии Бога, и верующеи Ему, и свершающеи святыя Его заповеди, израильтяне суть, аще и от язычник суть". До зде от толкования. О сих убо израильтян, си есть всех верующих во Христа, аще от жидов, аще от язык, сосуд избранный написа: "егда же (рече) исполнение языком внидет, сиречь егда Христос явится, тогда весь Израиль спасется". Не едине жидове во Христа верующии, но и язычницы отриновени быша от спасении, тогда спасутся. Израиль бо, якоже святии учители протолковаша, сказуется ум зряй Бога, от всех языков, верующих во Христа.

О сем Израили точно и святый Богослов во Апокалипсисе, во главе 7 пишет, о нем же и ты в вопросе своем означил еси: "видех, рече, четыре ангелы, стоящыя на четырех углех земли, да не дышет ветр на землю, ниже на море, ниже на всяко древо. и видех инаго ангела, восходяща от востока. и возва гласом велиим к четырем ангелом, имже дано вредити землю и море, глаголя: не повредите землю, ниже море, ниже древеса, дондеже запечатлеем рабы Бога нашего на челех их". Андрей же Кесарийский толкуя сице: "Сие же, рече, аще и частне древле бысть, веровавшым Христу, от разорения Иеросалима от римлян избегшым, во многия совершающым тмы по велицем Иякове, являющем блаженному Павлу множество их". И паки той же глаголет: "но во время пришествия антихристова, наипаче же будет печати животворящаго креста, отделяюще от неверных верныя, непосрамленне и дерзостне знамение Христово пред нечестивыми носящыя, прочим пребывающым не помогаемым за свое их нехотение помощи. И слышах, рече, число запечатленных 144 000, запечатленных от всякаго колена сынов Израилевых. от колена июдова, 12 000 запечатленнии. Июда исповедание толкуется. чрез негоже явленнии бывают спасаемии, исповедание еже во Христа из Июды возрастшаго. от колена Рувимова, 12 000 запечатленных. Рувим сын видения сказуется. чрез негоже знаменуются стяжавшии духовное видение, чистоты ради сердечныя. от колена Гадова, 12 000 запечатленных. Гад искушание по Иове. от колена Ассирова, 12 000 запечатленных. Ассир блаженство. имже, жительства ради достойнаго, указуется наследующии Владычнее блаженство. Владычняго стояния одесную Христа сподобляемии, и сыны света и дне нарицаемии. от колена Неффалимля, 12 000 запечатленных. Неффалим молитва, еюже начертаваются прилепляющиися Богу непрестанною молитвою. от колена Манасиина, 12 000 запечатленнии. Манасии забвение, сиречь забывающии задняя, отеческия домы, ради божественнаго речения. от колена Симеоня, 12 000 запечатленнии. Симеон послушание, сиречь оправдаемии послушанием божественных заповедей. от колена Леввина, 12 000 запечатленнии. Леввий прият, имже разумеются приятии от Христа за жительство священнолепное. осмый же Леввий учинися, яко по осмих дний воскресения истинному священству указуему сущу. от колена Исахарова, 12 000 запечатлении. Исахар мзда, сиречь приемлюще от Бога мзду, яко добродетельне жительствующеи. от колена Завулоня, 12 000 запечатленнии. Завулон жилище силы, или благовония, имже разумеются укрепленнии в страсти вселением Христовым, и благоволением Его, якоже глаголет Павел. от колена Иосифова, 12 000 запечатленнии. Иосиф приложение, сиречь приемлющии нужная. яже ко еже жити в части приложения с царством небесным, якоже глаголет Господь. от колена Вениаминова, 12 000 запечатленнии. Вениамин сын болезни, или сын дне, или сын денницы, сиречь исполняющий число сие сердечными болезньми. аще ли же вернии тогда от еврей, избегшии пленения римскаго, или еже и паче вернейше спасаемии при кончине от июдей верою. зане, якоже глаголет апостол, по внитии исполнении язык, весь Израиль спасется. и обое приятно есть. известное убо опаство от коегождо колена, мнится являти умножение апостольскаго семене. дванадесятицею дванадесять умножаемому, навершаеми числе 1000, тако совершенная 1000 свершаемому. ученицы бо быша семене падшаго на землю за человеколюбие, и многоразличными всемирнаго спасения плод возрастившаго. возраст же утвержение приемляху первии Христовы ученицы. наипаче от троих, Духа Свята, иже с небесе на ня сниде, и сердца их верою твердою, и теплою ко Христу раждеженному, и мужество имать велие на брань, со всеми того мира противными даде. второе, умножахуся и возрастаху общею сердечною любовию друг ко другу, по реченному: народом же веровавшым, рече, бе сердце и душа едина. ни един же что от имения своего глаголаше свое быти, но бяху им вся обща. третии же, еже есть и дивна во очию нашею, умножахуся и возрастаху гонением, и мучением, и убиением. елико бо их убиваху и умерщвляху веры ради во Христа, толико умножахуся. и иных убо егда убивают, престают быти: правоверных же егда убиваху, выну и наипаче умножахуся. сице в начале во Иеросалиме, и по вселенней возрастаху христиане". До зде убо о дванадесяти коленах Израилевых, прообразуемых от верующих во Христа, чрез 12 святых апостол учение по вселенней тогда умноженных, их же святый ангел прочим повеле запечатлети печатию Бога вышняго. А не тако, якоже вы мните с новолюбцами, еже при антихристе от жидов обращенных, по числу от колен Израилевых, или жидовских, запечатлети ангелу заповедася. Его же вы, яко еще не видяще, ожидаете, в противность Христовы церкве учителем. В защищение же еще ожидания прихода антихристова, сице убо должно суть и о Данове колене духовне разумете, и от него родитися антихристу. А не писменне непщевати, или паче, по вашему мнению, отлучену быти сему седмому сыну Ияковлю Дану, и от того колену происходящему, или от онаго антихристу родитися. Но сие убо точию уподобительне рече, а не существенне, якоже ниже следуемыя о сем укажут свидетельства. Понеже патриарх Ияков, внегда благословяше своего сына Дана, рек сице: "да будет Дан змий, при пути седя и хапля пяту коню". Бытия, глава 49. Сим изречением не уничижаше Ияков своего сына, ибо не рече: Дан есть змий. Но да будет Дан змий, в будущем времени предъявляет быти разумному Дану и змию лукавому диаволу. За тезоименитое во имени, а не в действиях Дану уподобитися хотящему. Того ради Ияков патриарх, ведая что хощет быти на кончину, под именем чювственнаго Дана разумный Дан и змий диявол, образне над чювственным Даном предрек сице: да будет Дан змий, при пути седя и хапля пяту коню. Которая словеса Ияковля, священный Ипполит восприем, видом вопроса и ответа предложив, рече: "змий кий сей; но иже изначала льстец, прельстивый Адама". В слове Григорий Богослова о нищелюбии, Никита Ираклийский толкует: "да будет Дан змий, при пути седя и хапля пяту коню. се же речеся образне и чювственне. разумный же Дан диявол, коегождо нас пяту, сиречь кончину века стрежет". Соборник, лист 78 на обор. Но яко убо чювственно быти Дану змием на кончину века отнюд неудобно, ибо ниже телесному, паче же душевному естеству человечю в змия претворитися, от Зиждителя всех Бога не повелено есть. Дан бо той, яко человек сый естеством умре, или его потомки скончашася, како убо на кончину века сего, или он, или от его потомков змий ожити может? Никакоже, никако. А понеже от онаго же колена быша некия праотцы, иныя же и по благовещению ангел родишася и богоугодно пожиша, якоже Маной, родивый Самсона. Елиав, вторый по Веселеиле, творец ковчега Господня. Езекииль пророк, судия бе в пленении в Вавилоне колену Данову. И иныя безчисленныя от колена Данова, не полагаются быти во отверженных от прочих колен. Но ниже в самом разделе земли Ханаанския, Моисей не отдели того участия и сие колено. Убо аще и во Апокалипсисе с прочими оное не учинено речеся, но тако речеся не чювствительне, но иносказательне разумом аллегорическим. Якоже и Христос глаголет ко июдеом разумом иносказательным: "змиеве, порождение ехидново". Но како человеку возможно от ехидны родитися по естеству? Никакоже. Но и самая ехидна по естеству не может своих чад раждати. Убо и о Данове колене, и о рождении от него антихриста, не есть чювственное сказание, но символическое. Якоже и о двунадесяти колен Израилевых, запечатленных от ангела, не есть чювственное, но относительное на верующия во Христа от жидов, и от всех языков. Прочее же, яко антихрист чювственно не может от Данова колена родитися, в наступающем ответе да глаголется.