Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Часть третия.
Ответ на сии вопросы [261, 262 и 263].
От свидетельств повеления правильнаго о исповедании грехов пред нерукоположенными
Раздел третий.
Подобный материал:
1   ...   27   28   29   30   31   32   33   34   ...   46
ЧАСТЬ ТРЕТИЯ.

РАЗДЕЛ, 7.


Вопрос, 260.

Аще вы (по сказанию вашему) утверждаете быти церкви без священства и таин церковных: убо откуду ваши учители тако утверждати научишася: до Никонова ли настатия, или после; еда от коего апостола, или святаго, или вселенской церкве повсемественное се предание, или за нужный токмо случай и время? О всем сем тонкочастне и явственно от святаго писания докажите.


Ответ, 260.

Еже о пребывании святыя церкве по нужде без священства нас истязал еси в 9-м и 10-м твоих вопросех: убо и мы, яко приличию того раздела, чесо ради ныне мы церковная ея чада по сему нужному и горькослезному случаю священства не имеем, и како без священства весма нужныя тайны по нужде во свое спасение совершаем, тамо засвидетельствовахом: но и в грядущем ответе о тайне покаяния извествовати будем. Прочее же о церкви, без священства по нужде пребываемой, в 305-м и прочих того раздела ответех потщимся еще предлагати.

А еже вопрошаеши: откуду (или, рещи, когда: ибо еще не веси и осмочастия, не точию иных свободных наук) тако мы утверждати научилися: до Никона или после. И зде яве не разумея вопрошаеши. Понеже от лет князя Владимира до Никона патриарха, Россия якоже бе цветущая благочестием, тако и священством изобильствующая: убо в нем и нужды никоея не бяше. Сия бо нужда, весма, весма отменная от прочих времен, с нововедения Никоном новотворств по всей России просыпася, и от тогда благочестие истинно лобызающии начаша скудствовати во оном. И аще желаеши известно ведати о сем, прочти историю о бегствующем иерействе, писанную от некоего нашего старейшаго мужа, жившаго близ польских границ, и известен будеши.


Вопрос, 261.

И аще не бяше таковаго обычая в древлебывшая времена, еже бы не имеющим священства и таин церковных спасение получити: то простолюдину, кроме иерея и инока освященнаго, достоит ли приходящих на покаяние приимати мужей и жен, аще не простолюдину, но неосвященному иноку, и по исповедании вязати и решити?


Вопрос, 262.

И аще достоит, то по коим правилом: по апостольскому ли, или по отеческому? Господа ради явите и сие без закрытия.


Вопрос, 263.

И аще речете, яко по нужди бяше таковый обычай древле: то где таковый обычай, еже бы в неприсудствии иерея приимали на покаяние простолюдины человек по пяти, по сту, или по тысящи или более, и вязали и решили? явите от святаго писания.


Ответ на сии вопросы [261, 262 и 263].

В сих убо твоих трех вопросех и триузлоплетенное нами видится завязание.

В первых вопрошаемся: Аще достоит, кроме иерея, неосвященым простолюдину или иноку приходящих на покаяние мужей и жен приимати.

Во вторых: Аще леть есть сим, по исповедании грехов, вязати и решити.

В третиих: О количестве приходящих к сим ко исповеди: по пяти, по сту или по тысящи.

На первое: Яко не точию во время неимения священства по нужди, но и во время мирное, простолюдини и простии иноцы на исповедь приимаху: и яко неосвященному иноку искусному, паче освященнаго неискуснаго, повелевается приимати во исповедь.

И сия убо оглавивше, поряду статиями свидетельства якоже священнаго писания, тако и правильных повелении, сице и исторических действотворении предлагаем.

И от священнаго писания, имамы святаго богобрата по плоти явственно вопиюща, и исповедати своя согрешения другодружне повелевающа: "Исповедайте убо (рече) друг другу согрешения, и молитеся друг за друга, яко да исцелеете". И паки той же: "Братие аще кто (рече) в вас заблудит от пути истины, и обратит кто его; да весть яко обративый грешника от заблужения пути его, и спасет душу от смерти. и покрыет множество грехов". Ияков., зач. 57.

Что убо сих апостоловещательных словес светлейшии; что сего свидетельства достовернейши; еже, рече, друг другу исповедати согрешения завещевает. Речеши ли, яко единым рукоположенным сие апостол завещевает. Но и не рукоположенным оное же завещание предлежит. Ибо другов имеем множае нерукоположенных, нежели рукоположенных. Тако и другим светлосиятельно уясняет: Аще кто (рече) обратит грешника. Не можеши рещи и зде, яко о освященных точию глаголет, понеже подобно сему превечная Правда Христос Спаситель глаголет: "Аще кто положит душу свою за други своя". Иоанн, зач. 51. Зри убо внятельно: и зде Христос не единым освященным завещевает, но всем купно. Сице и в сем апостольском речении подобает разумети: понеже присутствующу священнику искусну, имущу повеление от епископа, ему предлежит сие дело. Не присутствующу же оному, по сему писанию, может действовати сию тайну, по вышеписанному апостольскому повелению, и простолюдин искусный. Явственне же сие апостолоповелительное заповедание и церковнии учители, святый Варсанофий и Захария Копестинский, в подтвержение еже о исповедании грехов ко иноком и мирским привождаху, якоже ниже о сем известне начертается.

От свидетельств повеления правильнаго о исповедании грехов пред нерукоположенными.

Первое: Церковному тайнотолковнику сице вопиющу: "Всяк (рече) нерукоположенный ни таин строителем быти не может, но разве неких нужных случаев таин" [Катихисис мал., лист 35].

Второе: Не рече тайнотолковник: нужных случаев едина тайна (си есть крещение), но нужных случаев таин. Кия же суть нужных случаев тайны, о том книга о седми тайнах ведати дает: "Еже есте две: крещение и покаяние. еюже кроме несть леть спасение получити" [Гавриил Филадел. и Жез., лист 49].

Третие: Достоверствуется быти исповедь ко иноком неосвященным от вопросоответа онаго, еже положися в Потребнике, в Номоканоне отец афонских. Егоже яко на крепчайшее свидетельство зде полагающе написуем: "Вопрос. Аще суть иноцы священницы неискуснии слову, во еже приимати помышления. друзии же не суще священницы, знают сей искус, достоит ли сицевым помышления приимати неких, или ни? Ответ. Иже помышления приемлют, врачев искусных чин содержат, знающих на недужных подобная наводити былия. Аще убо кто есть священник, неискусен же, а другий не священник, искус же имея духовнаго деяния, сему паче священника, праведно есть помышления приимати, и правильно исправляти" [Потребник, лист 730]. И на стране напечатано: "Старча исповедь прията".

Четвертое: Во священней правильней книге Кормчей, в вопросоответех правильных Тимофея, архиепископа Александрийскаго, вмещается вопросоответ святаго Варсонофия сицев: "Вопрос. Добро ли убо есть исповедати кому от братии о мечтании, и сотворите ему метание, и рещи да молятся о мне. Ответ. Добро убо есть глаголати, но могущему слышати, а не юнейшым. сотворив же кто метание, должен есть просити молитися о нем. писание бо глаголет: исповедайте друг другу согрешения ваша, и молите друг за друга" [Кормчая лист 608].

Пятое: В книзе Зонаре, еже есть законоправильнике, в главе 46-й, засвидетельствуется правильным пределом сице: "Заповедаем совершенным мнихом и девствующим, яко не приимати жены к себе на исповедь, точию еже есть в старость доспел целомудренну и благочестиву, сий да наречется таковым, да не помышлением соблажняется. ибо диавол женами творит брань мнихом честным". Паки, во главе 47-й: "Егда хощет который любо прияти исповедь женскую, прежде да утвердит себе молитвами и молением, поя псалмы сия: помилуй мя Боже. весь доконца. и воспойте Господеви вся земля". И паки, во главе 48: "Посем да приимет во исповедь которую любо жену". Зри убо, что сих свидетельств крепчайше; что достовернейши; ибо еще при священницех, еще в полность церковную, еще во время присноцветущаго благочестия, бяше повеление. При присутьствии священных лиц, повелевашеся пред нерукоположенными исповедати грехи своя, приимати наказание, обнажати язвы не стыдитися, и приимати от искусных врачев, аще и не врачевскими ризами одеянных, но за искус, получати врачевание. Еще же и явственне Номоканоном засвидетельствуется, яко старча исповедь (церковию) прията, якоже явствовахом.

Шестое: Чтоже егда прилучится православных священников не быти, и нечестивым всюду обладати, тогда како о покаянии попещися; и что творити явствует. О том богомудрый, восточныя церкви ревнивый защитник, киевопечерский архимандрит Захария Копестинский, в книзе своей, во главе 36-й, засвидетельствует, глаголя: "Слыши (рече) о исповеди. иже грехи не толико учинены или мысли, такожде и страсти, и вси воли свои против отцов святых восточных науки. надобно конечне исповедати и познавати пред епископами и священниками, которыи от них благословение будут имети. и кожды грех подробну притчины его объявляти, и повинны исповедати, и для памяти. а кто не исповедует, и исповедь гонит и оставляет, таковый грешит на смерть, и избавление тратит, и церковному наказанию пристоит. и коли час имеешь, учащай до исповеди, и не обленися трудитися. и однако в той мере и разсуждение есть у отцов святых, а особливо подчас пригоды, и в недостатку презвитеров православных, и подчас преследования нынешняго на нас россов, и от папежников, и от тех которыя с ними заодно мудрствуют. такожде и в странах дальних, в которых православных иереов не достало, будущым тогда до латинских князей, и до панов с папежи римскими верующими. аще же сих призывания, несть в сем избавления, рече, пред оными исповедати: первая наука пред разумными и умелыми, убо иродиаконы или мнихи, или такоже и пред простыми человеки. якоже Ияков апостол глаголет во главе 5-й, учит исповедати друг другу грехи, и молитися друг за друга, яко да исцелеете. и паки: друг другу тяготы носите, и тако исполните закон Христов". И паки, ниже, тойже Захарий глаголет: "По свидетельству даже и простым и разумным исповедание грехов имеют приимати". До зде Захарий [книга вторая, кая содержит в себе глав 40, выпечат. в Острозе, лета от Рожд. Х. 1598, июня 11].

Темже хотящему беспрекословно последовати святей церкви, и сих свидетельств довольно на уверение. Понеже глаголет писание: "При двою или триех свидетелех да станет всяк глагол".

И тако, показавше от правильных законоположений, и от учителей церковных, повелевающих исповедати грехи своя пред простыми и нерукоположенными, приступаем к показанию и исторических свидетельств о приемлющих непосвященных исповедания человеча самовольне, по искуству жития и по оному писанию, глаголющему: "Елицы убо суть освященнии, по повелению епископа исповедания человеческая да приемлет. Несвященному же иноку, наказание его искусство дает власть примирения, аще убо себе самого безбедно соблюдает, и исповедающихся, Богови да приемлет". Номоканон [Потребник], лист 730.

По сему убо писанию, и древле не избраннии в причет, нерукоположеннии во священство: обаче неусыпное о душах человеческих попечение имяху, и дружния недостатки поправляху, и исповедания человеческая приимаху, и яко своя истая почитающе, правильно исправляху: якоже нижеписанная явят свидетельства.

1: Святый мученик Христофор две жене блуднице кающияся прият, и прощение подаде. [Маия, 9 день].

2: Святый мученик Кондрат отступльших христианския веры поучив обрати к покаянию, и кающихся их прием, помолися Богу прилежно да приято будет обращение их. [Минея киевопеч. марта 5].

3: Святая мученица Дорофея, премудрая дева, двух жен Кристину и Калисту, отвергшихся Христа, поучивши, паки к правей вере обрати, и даде им покаяние, помолися Богу о них да простит согрешение ею. [Пролог, фев. 12].

4: Повествуется в Пролозе о епископе, его же обрете инок, в пустыни 39 лет живша: иже исповедася мниху, како, мучения не стерпев, пожре идолом. [Пролог, нояб. 3].

5: Презвитер некий, впадш в прелюбодеяние, иноку исповеда грех свой, егоже инок епитимиею обложив, и прощение от грехов получити сотвори. [Пролог, сент. 25].

6: Диакон некий, падший в грех любодеяния, иноку исповедався, прощение получи. [Пролог, июль 25].

7: В Зерцале велицем повествуется о некоем грешнице, исповедавшем грехи своя отшелнику, и епитимию держати обещавшемся. Старец же рече: "аз тя разрешаю, во имя Отца и Сына и Святаго Духа". И тако умре человек он, и по 40 днех явися оному пустыннику, извествуя о себе, яко на пути спасения. Ниже: (И прирекшу ко оному отшелнику) "стократно приплоди тебе Господь, занеже от отчаяния мя избави, и к покаянию привлекл мя еси".

8: Мних некий, хотя пояти дщерь иерея идольскаго, отвержеся Христа и святаго крещения. Исповеда старцу велику грех свой, получи прощение. [Пролог, генв. 16].

9: В Патерице азбучном повествется, яко некий брат в блуд впаде и идолом пожре, и исповеда авве Лоту и епитимию от него прием, и прощение получи. [буква Л].

10: Жена некая прокаженному старцу исповеда грехи своя, и прият прощение. [Никон Черногор. слово 52].

11: В Патерике скитском повествуется о разбойнице некоем, 99 человек убившем, и старцу исповедавшемся, и тако умершем, и прощение получившем.

12: Во многочудесном житии преподобнаго Андрея нагоходца повествуется о некоем многогрешном человеце, во граде Ските бывшем, егоже преподобный Андрей епитимиею обложив, и на покаяние обрати. [житие старопис.].

13: Преподобнаго Дамаскина старец за преслушание отлучи, и по умолении от отец епитимиею обложи. [Минея киевоп. дек. 4].

14: В Старчестве новопостриженным иноком своя деяния и помышления своему старцу, с нимже в келии живет, исповедати начасте повелевает.

15: В книзе Кирилове приводит в свидетельство Иоанна Лествичника о исповедании ко учителем грехов, глаголюща сице: "Не прельщайся тем сыну послушниче Господень, еже не исповедати грехов своих, но исповедуй пред учителем своим грехи своя. невозможно убо есть стыдящуся человеку излечитися, но открывающу раны своя; открывай же и ты раны грехов своих, и яко врачу показуй их не стыдяся". Но учителем искусным и мирским не запрещает быти, якоже правило 15 святаго апостола Павла повелевает. [книга Кирил., лист 204].

16: В тойже книге Кирилове засвидетельствует Анастасием Синайским, сице глаголющим: "Аще обрящеши мужа духовна и научена, могущаго тебе лечьбу подати, без стыдения и с верою исповедайся ему тако, яко пред самем Господем". [лист 204]

Внемли сему свидетельству, яко не глаголет грехи нашя духовным иереом, но мужем исповедати: не извещевает искати иерея на исповедание грехов, но мужа, могуща уврачевати, и прочая.

17: В книзе Хрисмологион, во главе 5-й, исповедание трегубое быти свидетельствуется: "Исповедаем (рече) прегрешения наша или пред Богом, или пред священником, или ближнему".

18: Нерукоположенных же исповедь не точию правила, не токмо свидетельства историческая утверждают: но и воздушнии мытоимцы засвидетельствуют о себе, яко оной боящеся трепещут, еже пред священники или пред иноки бываемой, яко исповеданием и приятием от тех епетимий и работанием заповедей их, потираются в свитках их написанныя грехи. [В видении Григория, мытарство 20].

19: В страдании святыя великомученицы Екатерины повествуется, что мати ея имела у себе отца духовнаго старца, при мори в келии живуща: от негоже святая Екатерина научився благочестию, и крещения дар прия. [Минея киевоп. нояб. 24]. Святаго же Филарета милостиваго и не пострижена старцем именует, якоже в житии его, декабря в 1-й день, повествуется.

20: При показании же толиких исторических и правильных свидетельств, приводим в свидетельство святейшаго всероссийскаго архипастыря, Макария, глаголю, митрополита Московскаго: иже, яко губа, исполнен бе вод божественнаго писания, якоже явствуют труди его, собрания великих Миней четьих, иже достаточне списа мученическая страдания и преподобных жития. Сей убо премудрый муж, милосердием подвизаем, изложи синодик для помяновения умерших во вселенския суботы: в немже сице, глаголющи, засвидетельствует: "Помяни Господи душя, иже скорбь имеша по вся дни о своем согрешении, и слезы излияша, и простым человеком исповедаша со слезами или без слез. прости им согрешения их, и упокой их с праведными Твоими".

Прочия же свидетельства о исповедании пред нерукоположенными в третьем разделе представлены будут, а иная же, за множество убегая долготы, оставляем. На второе же задание, зде, во втором разделе, о вязании и разрешении нерукоположенных, исповедающихся пред оными, краткословне сице засвидетельствуем.

Понеже связание иное глаголется быти властительское, яковое суть от епископа, имеющаго на себе Христов образ, а иное есть частное, и по необходимости творимое от нерукоположенных. И сицевое связание не иное что знаменует, разве наказание, или обложение кающагося за грехи епитимиею (о чем и в вышших статиях кратко засвидетельствовася). Но и в Номоканоне неосвященному иноку повелевается правильно исправляти кающихся: правильное же исправление, в божественных правилех, тое быти видится, еже во оных полагается пост, в других же поклоны, во иных же милостыня и молитвы, инде на время от причастия удержание, индеже от церкве отлучение, и иная многая суть наказания: сие же все есть епитимейственное обложение (еже есть связание), и правильное исправление.

Но о сем подробну представляти за широкость слова не есть сего времени. Точию еще воспомянем о старце некоем, отлучившем ученика за непослушание, иже и пострада во Александрии за Христа: но обаче рака его исхождаше из церкве, дондеже не разреши его старец от запрещения. [Потребник скитск. и Пролог].

Показуется и от вопросов Константиновых, от ответов же святаго собора нечто подобное: "Вопрос, 11. И некто от сущих братии с нами, прежде седе в мире многих помыслы восприемля, сиречь дети духовныя приимаше в покаяние, паче ничтоже сведый от правильных заповедей: презвитеры же и мнихи, падшыяся с женами прием, и иныя тяжкия грехи прощаше всем, ничтоже отнюд творя, ни запрещения налагая. Ниже, от ответа: Обаче да не весма отчается, да вся дни живота своего, о умерших чадех духовных, якоже рече, молитвы и моления выну да приносит к Богу, и да просит, да простит ему Бог, великое се и тяжкое согрешение." [Кормчая, лист 580].

Зри убо, не за сие порицается сей духовник, еже приимаше во исповедь, но за неположение правильных епитимей оглаголуется. Обаче исповедавшыяся у него детьми духовными нарицаются: за них же (си есть умерших, за то, что их епитимеями не связовал) повелевается ему каятися и молитвы приносити. Зри сие внимательно, и разумей с добрым разсуждением, и приемли неупорственным разумом.

Раздел третий.

О количестве приемлемых духовных чад во исповедание неосвященными, еже от вас, вопросителю, истязуемся: бяше ли где сей обычай, в неприсутствии иерея, еже по пяти, по сту или по тысящи оным приимати. На что и ответствуем сице. Понеже не иерей имеет полную власть в разсуждении исповеди, но архиерей. Ибо иереи без архиерейска повеления не могут ни вязати, ни решити (разве такожде, якоже и простолюдини по нужде), о чем апостольское 39-е правило показует: "убо и иереи бес повеления своих господей архиереов, ничто более во исповеди простолюдинов сотворити могут". По Зонареву 90-му правилу: "аще кий иерей не имеет на се повеления архиерейска, по нужде точию при смерти может кающихся приимати". Якоже о сем во 168-м ответе довольно глаголахом.

Но в Номоканоне афонских отец к освященным тако глаголет: "Елицы убо суть (рече) освяшеннии, по повелению епископа исповедания человеческая да приемлют. не священному же иноку, наказание его искусство дает власть примирения, аще убо себе самого безбедно соблюдает, и исповедающихся, Богови да примиряет". До зде Номоканон [Потребник лист 731].

Сей убо образ храняще древнии святии отцы, и кроме повеления архиерейскаго, за искуство разума и жития своего, многих, паче же безчисленных на исповедь приимаху.

Таков бяше Антоний Великий нерукоположенный, иже многих на исповедь приимаше, и на покаяние направляше. [Мин. старописм. генв. 17]. Егоже похваляюще учители, сице глаголют: "Кто не удивится, или слыша, или зря, толикия инок полки, ихже он насади и воздела, и плод приносити устрои, евангелию достойный. (Ниже:) И аще и самое отроча вопросиши, кто иноком наставник, и истинному любомудрию начальник; отвещает: яко Антоний". Григорий инок, в суботу сырную [Соборник, лист 233 на обор., и лист 238].

Таков же бяше Пахомий Великий, не рукоположен сый, многия на покаяние приимаше: и Христа отвергшагося на покаяние прият, и епитимиею обложив исправи. [Мин. чет. старописм., маия 15 дня]. Его же церковь, законоположника и вожда, и пастыря овцам именующии, воспевает [стихера], и церковнии учители похваляюще глаголют: "Что Пахомий, ему же и одеяние иноческое ангел нося показа, являя, яко иже по разуму сие носящии, во ангельском чине причитаются. Каков бяше сей муж; колики тысящи приведе Господеви; колики свещи вжег; коликих душ попечение имев; егоже добродетельми издалеча влекоми, различных родов человецы течаху, подобно еленем, на источники водныя". Григорий инок, в слове в суботу сырную [Соборник, лист 241].

Сицев бе Сава освященный, еще до приятия священства монастырь создав, и братию собрав, помышления их приимаше. [Мин. Макар., дек. 5].

Тако и Златоуст, еще до поставления во презвитеры в монастыри живый, не точию инок, но и мирских помышления и исповеди приемляше, и ключимыя язвам пластыри от себе им подаваше. В житии его чудо 3-е, Маргарит, лист 25.

Сицевый бяше Иоаникий Великий не священник, помышления многих приимаше, и от иконоборной ереси некоего отступльша прият на покаяние, и совершенна христианина быти устрои. [Мин. Макар. нояб. 4 день].

Таков бяше нерукоположенный преподобный Василий Новый, иже многи у себе имеяй духовныя дети, и на покаяние их наставляше, и Григория, уклоньшагося мнением ко июдейству, чудесным явлением настави: якоже книга, нарицаемая Григориево видение, являет.

Сицевии убо быша и в первенствующая времена святыя церкве, якоже повествуют о святом мученике Кононе, иже мног народ от Исаврийския страны обращахуся им ко Исус Христу, исповедающеся и крещахуся. Минея четья макарьевская, марта в 5 день.

Таков бяше и зде в России, от пещеры яко солнце просиявый, преподобный Антоний, не рукоположен сый, иже братию имеяше, и многих помышления приимаше. Патерик печерский.

Но что много о сем приводити; исполнены сих образов патерики, исполнены жития преподобных отец, исполнены мучеников повести, исполнены отеческия книги, яко велицыи отцы и прочии пустынножители, не поставлени быша во священники, обаче пастыри быша велицыи, и стада толикая инок собравше, и помышления и исповеди многих приемлюще: не быша осуждени, не быша потязани, аще и в мирное время, аще и в полноту священства сия содействующе бяху.

Чтоже рещи летьствует о нынешних горкослезных временах, егда правильных священников ниже в полудне с запаленным лучем возможно где обрести; яко и писанному скончатися в нас прииде: "Во она времена (рече Даниил, муж желаний) разсыплется рука людей освященных". Глава 12.


Вопрос, 264.

В Потребнике Номоканона святых отец, идеже на концых тамо сущих правил напечатано сице: (Молитва, юже дают епископи духовным отцем) "Смирение наше от благодати, и дара даннаго ей, от всесвятаго животворящаго, и совершающаго Духа, возлагает тебе, во священноиноцех честному отцу, и прочая. (Ниже): Подобает же тебе и иноки постризати малаго образа и великаго, со законным их назиранием. сиречь, с приемником, и божественными молитвами". Ваши же старцы откуду таковую власть прияли, еже неосвященныя друг другу во иноки постригати, известите и сия?


Ответ, 264.

Еже во указанном тобою месте молитва, даемая от епископа духовноосвященным отцем, не на едино точию бывает пострижение во иноки, но паче завещевается в ней от епископской власти приимати человеков на исповедание. Ты же, сие минув, на едино точию дание власти от епископа священноиноку на пострижение во иноки устремился еси. Но коль множайшая ти свидетельства представлена суть в вышшем ответе, яко не точию по нужде, но и без нужды, во время мирное, и простии иноцы благоискуснии от церкве приимати во исповедь попущахуся. Якоже и от показаннаго тобою Номоканона явственно засвидетельствовахом: яко несвященному иноку искусному паче неискуснаго священноинока приимати повелевается. Темже аще приимати во исповедь, и тайну сию совершати покаяния несвященному повелевается: кольми паче иноческий чин преподати не невозможно есть: понеже и сей чин, по Иосифу Волоколамскому, покаяния образ носит.

Но мы сие, тобою представленное, оставльше, идеже никоего запрещения, ниже повеления (еже постризати неосвященным иноком) обретается: но на явственная свидетельства, якоже повелевающия во время нужды, в неприсутствии священника, постризати, тако и во время мирное, и священство имущее, многих несвященных, постризающих во иночество, от историй церковных и от иных писаний сице представляем.

1: На поместном соборе, бывшем в Константине граде во святой Софии, от председательствующих во оном патриархом вселенском, Антиохийскому, Константина же града патриарху Иоанну, на немже и всероссийский митрополит Максим присудствующ бяше: предстоящим же ту многим избранным попом и диаконом. И положишася посреде собора вопросы некия и ответы всякому, между иными вопросоответствоваху и о иноческом, кроме священника прилучающемся, пострижении сице: "Вопрос. Аще случится человеку в велицей болести, а не будет игумена, лзе ли постричи его. Толк.: Не токмо игумену и диакону, а не будет попа или диакона, а при смерти, то и причетник пострижет". Книга старохаратейная Кормчая в полдесть, Глушицкаго монастыря.

Подобне сему пишет и во уставе писмянном, в немже многия собраны суть уставы Кириловской и Сергиевской, и Генадия архиепископа Новгородскаго, от собрания правил, сице вопросоответствует: "Вопрос, 33. Аще случится человеку в велицей болезни, а не будет игумена, лзе ли епископу пострищи его. Ответ. Не токмо епископу, и попу и диакону, а не будет попа и диакона, а при смерти, да причетник пострижет". Устав, глава 352, от собрания правил.

Но и святый Иоанн архиепископ, Постник, в своих привилах тако глаголет: "Инок крещает и образ иноческий подает, и диакон по нужде крещает". Книга Иоанна Постника.

1: Виждь убо соборное и правильное повеление неосвященным постригати по нужде. Гряди же, предложити имамы такоже многих неосвященных иноков, постризающих и кроме нужды.

2: Преподобный Антоний неосвященный бяше инок, обаче во иноки постризаше: якоже постриже Павла препростаго, такоже и преподобнаго Илариона. О чем в Прологе, в 4 день, о Павле: О Ларионе же Великом, в житии его, в Минеи четией, в 21 день повествуется.

3: Преподобный Паламон отшельник, не священник сый, постриже во иноки Пахомия Великаго: иже последи началник бысть многим монастырем. Зри в Месяцеслове, маия 15: в Минеи четией, в том же числе, в житии преподобнаго Пахомия.

4: Но и сам Великий Пахомий не священник сый, якоже о нем Никон Черногорец в 36 послании книги Тактикона засвидетельствует, обаче многия к нему приходящия приимаше и постризаше: якоже в житии его, в Минеи четией, маия 15, повествуется.

5: Преподобный Антоний киевопечерский, не священник сый, приходящих ко иноческому житию приимаше и постризаше, якоже в житии его пишет. Но и в поучении святаго к братиям, иже к ним глаголаше: "Се Бог вас совокупи братие, и от благословения есте святыя горы, имже игумен постриже мя, аз же вас постригох". Подтверждает же о постриженных от преподобнаго Симон, епископ Владимирский, в послании своем к Поликарпу черноризцу тако пиша: "Илариона митрополита, и сам чел еси в житии святаго Антония, яко от того пострижен бысть, и тако священства сподоблен". Патерик киевопечерский.

6: Преподобный Зосима соловецкий, еще до поставления своего во священство, постриже некоего Марка рыболовца. Зри житие его, апреля 17.

7: Пишется в повести о Елисеи черноризцу, яко он пострижен бысть старцем несвященным. Зри книгу Иоанна Лествичника, слово 30, лист 296.

8: Повествуется от преподобнаго Никона Черногорскаго: "Старец некий во Олимбове горе, покаявшагося некоего зело грешника мирянина пред всеми, постриже его во иноческий образ". Книга заповедей Господних, слово 52.

9: Пишет в Прологе, в чудеси святаго Георгия, яко некий старец, не священ сый, постризаше многия во иночество. Зри месяца апреля, 24 день.

10: Преподобный Патермуфий, не священник сый, пришедша к нему некоего юношу, учитися хотяща, облече его во иноческий образ. Патерик египетский, слово 10.

11: Преподобный Зосима старец некоего разбойника прия на покаяние, и даде ему святый иноческий образ. Чти Пролог, февраля 4, и Лимонарь, глава 166.

И иная многая, яже о несвященных иноцех, пострижение творящих, елика писана суть в Минеях, елика в Прологах, елика в Патериках, и в прочих отеческих книгах, за множество оставляем. Хотящему бо последовати святыя церкве гласу, и сих свидетельств довлеет. Яко аще у нас по нужде и творится желающим от простых иноков пострижение: обаче не от нас сей обычай произыде, но от соборных повелений, и от церковных историй. И желаяй противствовати, не нам противляется, но вышепредложенным свидетельствам и святым богоносным отцем. Мы же, готовому последующе, премудраго Сираха послушаем, тако глаголюща: "Не отступай от заповедей старец, ибо тии навыкоша от отец своих".


Вопрос, 265.

Преподобный Симеон Фессалонитский, во главе 88, пишет сице: "Иже священническия молитвы отметаяй, и не требуя к совершению таин, ниже восприемляй: ниже убо крещение, ниже разрешение прегрешением, ниже чин иноков, священную молитву приемлет". Вы сие преподобнаго мужа речение приемлете ли?


Ответ, 265.

Приемлем святаго Симеона Фессалонитскаго, восточнаго учителя, и словеса его усердно почитаем. Но сия от него не по нужде глаголашася, еже в благолепие церковное имети священнические молитвы, при отправлении божественных таин, но в свободу и во время православнаго священства. Якоже и сам он бяше во время цветущаго благочестия, и благочестивых патриархов, и прочих архиереов: еже и сам такожде бяше архиерей Селунский.

А еже при самей случившейся нужде, или в неимении священства, или в чесом бывает совершенство тайны крещения, или како неосвященнии во иночество постризающе (кроме всякаго зазрения) бяху, о том довольно в прешедших 42, и 43 и в вышшем ответех засвидетельствовахом.


Вопрос, 266.

И аще приемлете, то чесо ради не последуете; ибо он утверждает, яко без священнических молитв чин иноческий не бывает. Вы же чин иерейства не имеете, и сказуете, яко и обрести его невозможно. Убо известите, како чин иноческий будет, кроме молитв священнических?


Ответ, 266.

Како убо невозможно обрести иереов; возможно убо не точию иереов, но и архиепископов полныя государьства видети, но точию еретических: к ним же вы приклонистеся, приемлюще беглых от них иереов. Нам же не дай Боже ниже помыслити, еже ко оным благосклонствовати. А еже како святыя соборы повелевают по нужде, кроме священника, иноческий чин преподавати, и како мнози преподобнии отцы и неосвященнии требующим иноческий чин преподаваху, о том в 264 ответе глаголахом.


Вопрос, 267.

Ельма убо от вашего самочиния привниде в вас всех чинов запустение, или паче рещи погубление. Рцыте убо нам: не о вас ли прорече избранный сосуд Павел: восхищающии недарованная, раздражают Бога? и дерзнувый таковая, не с нами борется, но с великим Архиереом Христом.


Ответ, 267.

Всяк убо, имеяй правый разум и доброе разсуждение, речет: не от нас запустение или погубление чинов привниде, но от Никона патриарха и от его последователей. Егда бо начаша новотворствовати в догматах благочестия; егда древнее святое предание дерзнуша отметати, и клятвами зельнейшими соборне тое предерзостне облагати; егда истинно истинное благоверие лобызающих начаша хулити, гонити и различным смертем предавати: тогда, тогда жалостне запустение всяким чинам наступи; тогда архиерейский чин свою благодатную доброту, чрез новопредание, увы, отдаления духовныя купли отлучи. Аще глава отпаде, уды ли не обрящутся в погубление.

И паки на нас привлекаеши не единаго апостола Павла, но всех апостол 2-е правило, еже якобы мы восхищаем недарованная, и чрез то раздражаем Бога, и прочая.

Но что суть наше восхищение, противное Божией воли? Сие ли еже по крайней нужде, неосвященнии суще, и несвященнически тайну совершаем крещения? Но повеление сие, еже крестити неосвященным, от самого Господа Бога Исуса Христа произыде. Якоже о сем засвидетельствуют Номоканон на листу 224, Зонарь в правиле 168-м, и 49-го правила святых апостол в толковании. Аще убо от самого Христа Бога повелеся, еже несвященным крестити: убо и несмы противоборцы с великим Архиереом Христом. Аще святии апостоли мнози неосвященнии крестиша: аще во оная апостольская времена не точию мужие, но и жены, учаще слову Божию, и обращающихся крещаху: аще сам апостол Павел, глаголавый сия, от неосвященнаго крестися, якоже сам во оном правиле рече: аще по апостолех святии мученицы и преподобнии отцы безчисленно множество народа учаще крещаху: аще во многих священных писании, и в божественных правилах повелено неосвященному по нужде крестити, якоже о сем довольно засвидетельствовахом в 10-м и в прочих ответех.

Убо, по тебе, вси сии, повелевшии по нужде крестити и крещающии, противоборцы Христу обрящутся? Отъиде. Аще бы по нужде от простых крещение отвержено было, то вси бы сии зазрени от церкви были, или тех действие писанием было бы отречено. И аще бы тако было, не было бы и правилами по нужде дозволено или повелено.

Темже, по всем сим видится доводам, яко не по нужде крещающии неосвященнии борются со Христом, но в свободное время и во иметельное правильнаго священства.

Или сие возхищение суть, еже неосвященнии ныне по нужде тайну покаяния совершают, и противно есть воли Божией; но утверждает сие священное писание, засвидетельствуют божественныя правила, показуют церковныя истории, яко сие (еже неосвященным искусным) исповедати не точию по нужде, но и без нужды, было дозволено: убо и в сем несмы противоборцы Христу Богу. Понеже Бог есть глаголяй во апостолех, или во святых отцех. Ибо в церкви, по гласу сосуда избраннаго, вся вещаются от Бога.

О прочих же некиих чинодействах, от простолюдин бываемых, довольно в прешедших ответах от священных писаний глаголахом, и в последующих глаголати имамы.

Разсмотрим же, по оному 2-му всех апостол правилу, кто обрящется из нас, восхищаяй недарованная, и раздражаяй Бога, и боряяйся с самем Христом. Но мы по нужде в вышепоказанныя вступаем тайны, и по повелению самого Бога и святых отец, якоже засвидетельствовахом: убо того ради и несмы восхищающии недарованная. Вы же по коему повелению, и по которому священному писанию во архиерейския дела вступаете, еже от еретик хиротонисанных иереов приемлете? еже изпадших на степень священства возводите? еже власть вязати и решити грехи оным преподаваете? еже церкви строити? еже мvро совершаете? еже антимисы устрояете? и иная безчисленная архиерейская действа всепредерзостне возхищающе творите? Несте ли вы сущия восхитители недарованнаго? несте ли самыя противныя раздражатели Бога? несте ли совершеннии противоборцы самому Христу Богу? Не на вас ли подлинно сей гласит апостольский гранес? Не вы ли под осуждением всех святых апостол сим правилом по правде обретаетеся? Воистину (яко же всем возможно видети), яко вы есте.


Вопрос, 268.

Аще же речете, яко в святей церкви якоже священницы, сице и не священницы нужды исправляюще. Якоже и поминаемии Филипп и Анания не священницы быша, но обаче крещаху: слышим ответ, но силы не имущь. О Филиппе и о Анании святый апостол изъявляет сице: "Аще бо Филипп скопца крестив, и Анания мене Павла, но не сама о себе восхитиста таковаго чина, но от великаго Архиерея Христа". Ваши же учители от кого прияли таковый чин, еже крещенных в три погружения паки крестити, и чрез сие паки Христа распинати, по словеси Иоанна Дамаскина?


Ответ, 268.

Не едини Филипп и Ананий, не священнии суще, крестиша, но и безчисленнии, якоже о сем в 10-м и в прочих ответех довольно рехом. И не точию историческая, но и правильная повеления, якоже диаконом, тако и прочим несвященным крестити по нужде обретаются. Аще бы сие 2-го всех апостол правила было бы по нужде крещающим не презвитером сущим запрещение: не бы последи учители церковнии, якоже Епифаний епископ Кипрьский и Аммоний, толкующе на 18 зачало деяний о Филиппе, повелевали по нужде диакону крещати: не бы последи вселеньстий учитель Григорий Богослов, в слове 2-м на святое Просвещение, в 25 стихе, сие апостола Филиппа действие приводил в свидетельство: не бы и учитель восточный кир Гавриил, архиепископ Филадельфийский, сего же Филиппа действие, в своей книге о седми тайнах, во главе 6, по нужде о крещении в подтверждение приводил. Убо тамо во апостольском правиле не по нужде, но без нужды неосвященным творити крещение запрещается. А еже на ты святаго Иоанна Дамаскина словеса наносиши, еже он, в 4-й книге о вере и о крещении во главе 10-й, на прекрещающих вторично от православных, истинно крещенных в три погружения во Отца и Сына и Святаго Духа, ревностно вопиет, и апостольский глас на таковых помогает, еже сии второе Христа распинают. Но сие твое наношение елико к словесем апостольским и богоноснаго сего мужа несогласно, толико и ко всем божественным правилом отнюд явится несогласно.

Понеже апостол в 312 зачале (егоже Дамаскин в свидетельство приводит) пишет явственне о таковых, кия не от еретик, но о тех, кия от сущих правоверных второе в покаяние обновляти дерзают, еже и глаголет: "Невозможно (рече) просвещенных единою, и вкусивших дара небеснаго, и причастников бывших Духа Святаго, и добра вкусивших Божия глагола, и силы грядущаго века, и отпадших паки обновляти в покаяние, второе распинающе Сына Божия себе и обличающе". Божественный же Златоуст сие апостольское место сице протолкует: "Невозможно (рече) вкусивших дара небеснаго, сиречь оставления, и причастником бывшым Духа Святаго, и добраго вкусившым Божияго глагола, учение зде глаголет, сил же будущаго века. кия глаголет силы, или еже чудеса совершати, или обручение Духа, и отпадшым паки обновлятися в покаяние, второе распинающым себе самым Сына Божия и изобличающым". До зде Златоуст.

Слыши убо апостола Павла, и его апостольских словес изъяснителя Златоуста: яко тем невозможно второе паки креститися, кия вкусили дара небеснаго, си есть оставления грехов, и причастилися на оном освящении Святаго Духа, и обручилися Того силою, и насытившеся Божия глагола, сиречь учения, и прочих при том бываемых даров.

Но воньмем: бывают ли сих даров причастниками еретицы? А понеже много о них глаголахом, яко они не оставление грехов при своем крещении подавают, но еще умножение, и связание нечестия. Понеже не Духа Святаго благодать крещаемаго от еретик осеняет, но Дух дияволь. Понеже не с Духом Святым крещающии еретицы крещаемаго обручают, но (по премудрому Максиму) с начальником своим диаволом. Понеже не Христовым учением от еретик приемлющии крещение исполняются, но учением того же диавола; якоже вышеименованный Максим Грек глаголет: "Всяка (рече) ересь начальника и учителя имеет в себе диавола". В книзе его, во главе 76-й.

По сим убо апостольским и отеческим словесем, второе крещающии от еретик, ни мало не подвержени будут под суд христораспинательства. И аще от еретик, крещаемых в три погружения, крещающии паки второе, будут подвержени второхиротонисательству: убо и сами апостоли, писавшии в своих правилах, от всех еретик не приимати крещения, под сие осуждение подвержени будут. И древлевосточнии и западнии во времена Киприанова соборы, повелевшия всех еретик второе крестити, такожде под сие суждение подвержени будут? и Василий Великий, повелевший во имя Отца и Сына и Святаго Духа в три погружения воздержников еретиков крещенных второе крестити, под сей же, по вам, суд подпадывает? и собора Лаодикийскаго толковник, такожде крещенных в три погружения еретиков фотиниан повелевающь крестити, тому же суду, по вам, подлежащь явися? И вси премнози, якоже на соборех бывших, святии отцы, такоже и кроме соборов писавшии, аще и трех погруженцов, но обретшихся во множайших и великих ересех, не приявшии, но повелевшии от сих еретик второе крестити, сему же от вас трепетному суду? Оле всепредерзостныя вашея смелости, подпадательни явишася. О чесом прочти внятельно наш 44-й ответ, к нему же сообщи и 21-й, и тако не будеши вящьше сего трепетнаго суда на ны, аще и последния, но сим собором и святым апостолом, и святым богоносным отцем всеусердно последовати, неразсмотрительно тако налагати.


Вопрос, 269.

Аще ли же сего вашим учителем, якоже Филиппу и Анании, не дадеся: то како вы их прияли, убо ли без всякаго свидетельства?


Ответ, 269.

Еже како, и чего ради, и где в писании Филипп и Анания приводятся во свидетельство о крещающихся по нужде, в прошедшем ответе рехом. И такожде прочти и 34-й ответ и прочия, и известишися.


Вопрос, 270.

Аще же ваши учители имеют свидетельство, яко послани суть на таковую проповедь, еже крещенных во имя Святыя Троицы в три погружения паки крестити, то явите: от кого послани, от апостольских ли приемник, си есть от патриархов ли, или от архиепископов и епископов?


Ответ, 270.

Уже довольно мы трудившеся глаголахом в 21 и 44-м ответах, приводяще от всех священных писаний, чесо ради мы ныне премалейшии от российския церкве крещение не приемлем, еже есть от тоя приходящих паки вторично крестим. А еже от кого послани, или повеление имеем, то о сем сколь многая ти свидетельства в 1-й части явихом. Зри же и 49-е правило святых апостол с толкованием, повелевающее и нерукоположенным в причет крещением некрещенных просвещати, глаголющее тако: "Ибо Господь наш Исус Христос, на проповедь посылая ученики своя и апостолы, рекий: шедше рече научите вся языки, крестяще их во имя Отца и Сына и Святаго Духа" [Мф. 116]. По сему убо повелению, всякому православному христианину подобает крестити в три составы единаго безначальнаго Бога, а не в три сыны, не в три утешители. И святый Августин к Фортунату пишет: "Обыкоша и мирстии людие к потребе крыющымся подавати крещение". Иероним святый в двоесловии на цветоносцы сице глаголет: "Вемы леть быти и миряном крестити. ибо якоже кто приимет, тако и дати может". Инде же глаголет [Пролог, август 28]: "Где убо суть глаголющии, простьцем уже нам при напасти не мощно крестити не сущу ту иерею. и прочая".


Вопрос, 271.

И аще послани, то явите известно послание ваше, яко да и мы веру имем учению вашему.


Ответ, 271.

Аще хощеши не нам, но божественному писанию вероятельствовати, то прочти первую часть сих ответов и вышший ответ, и тамо много положенным свидетельствам последуй: и если нелицемерно желаеши, можеши незаблудный себе обрести (по нашему времени) путь.


Вопрос, 272.

Аще же не послани, то како проповедят; и чесо ради развращать положенныя от Бога во святей церкви чины; убо устыдитеся не по разуму сего вашего мудрования.


Ответ, 272.

Глаголет пророк Илия ко Ахаву: "не аз развращаю Израиля, но ты и дом отца твоего". Сице и мы ти глаголем: не мы, но ты весь дом ваш, еже есть собрание ваше, развращаете положенныя от Бога во святей церкви чины: якоже первыя части во ответех, и в прешдшем 267 кратко засвидетельствовахом.


Вопрос, 273.

Аще ли сие тяжко вам быти мнится, убо явите, кия чины в вас не запустеша?


Ответ, 273.

Несть убо нам никоея тяготы свидетельствовати о истинне: но велия суть нам тягота, еже вас видеть в толико великом вашем заблуждении, от негоже вы никакоже не можете возникнути. а еже что мы от таинств во свое спасение содержим, по повелению от святыя церкве, в нужное сие время, то о сем в 10-м и в 263-м, и в прочих ответех доволно засвидетельствовахом.


Вопрос, 274.

И аще положенныя у вас Богом чины не упражнены, изъявите: убо ли каждаго чина у вас с молитвословием и прочим воследованием действие совершается?


Ответ, 274.

Многажды о том же вопрошаеши, убо и нам леностно сотворил еси прилежати к твоим вопросом. Понеже ниже божественное писание, ниже свободныя науки дозволяют о едином многословствовати. Но мы в том себе от твоих вопросов облегчаем, еже на един ответ, о том учиненной, обычно ссылаемся. Убо шествуй обратно, совопросниче, на 42 и 43, и прочия в первой части ответы, и тамо искомое обрящеши.


Вопрос, 275.

Аще ли совершается, то явите, коего чина у вас действие над приходящими от ересей совершается: архиерейскаго ли, или иерейскаго?


Ответ, 275.

Паки ли бредить не престаеши, о вопросителю! Еже первыя части во втором разделе сему времени колико вопрошал еси. Ныне же, запамятуя оная, приялся еси паки тая же возвторяти. Иди вспять и положенныя тамо свидетельства прочти, и более нас не утруждай излишними.


Вопрос, 276.

И аще в вас сих чинов не имеется, то како и коим чином приемлете; и како имамы о вас разумети: убо ли вы татие и разбойницы, иже не дверьми ходящии (си есть не имеюще яснаго свидетельства от святаго писания), рцыте нам непостыдно.


Ответ, 276.

Татие и разбойницы суть не точию дирою влезают, но и чрез ограду священнаго писания прескакивают [Евангелие учит. на память Златоуст,. и Кормчая лист 568]. Но мы ясно от священных писаний в 1-м и 2-м, такожде и в прочих разделах доволно о своем чиносодержании по сему нужному времени засвидетельствовахом. О вас же ясно доказахом, яко вы суть разоряющии от Бога и от святых апостол, и от святых отец положенныя чины. Тако и всесвященное писание не точию развращающии, но и ложно святых оклеветающии: убо всячески вы татие и разбойницы и суть и познаваетеся. Якоже от мимошедших ваших вопросов и на них наших ответов удобно есть всякому читателеви познати.


Вопрос, 277.

При крещении, бываемом от еретик, которыя из них в три погружения крестили или обливали, и во время крещения их, и имена им были наречены во имя прилучившагося святаго, и таковым где повелено давать иныя имена, изъявите от святых писаний.


Ответ, 277.

Святейший Филарет патриарх во втором своем соборном изложении таковым белорусцем не повелевает, приходящим в российское государство, имен прекладовати, кия из них быша заблуднически обливателное крещение содержаще, но под паствою содержашася вселенских патриархов, и в папино учение не скланяхуся. От тех бо не точию он имен прекладовати не повелевал, но и молитв и младенческаго отрицания не глаголати: о чем уже довольно о них во ответех 134-м, 135-м, 136-м и 152-м извествовахом. А еже от сущих еретиков, и от требующих святаго крещения, святая церковь, обрящающихся в приятии никоего средствия с еллины не полагает, но точию, якоже и оных, к православию приобщати повелевает. Убо и в преложении имен равне со оными поступати подобает. Якоже и беяше творимый сей обычай в древлероссийской церкви. Тако князю Владимиру в крещении с чады его, и прочим российским князем, преименовавимся во иныя звании. Тако и от латин приходящим имена прелагахуся: якоже Исидору Ростовскому, и Прокопию Устюжскому, и Евнутию князю Литовскому, иже наречено бысть в крещении Иоанн. Такоже и супружнице великаго князя Симеона Иоанновича имя преименовано бысть из Августы во Анастасию. И иным безчисленным, приходящим в Россию и крестящимся, имена прелагахуся. Речеше ли, яко в латинах, и во иных западных странах странная имена давати обычай имеют. Но аще и странная, но святых, поих мнению, или, паче рещи, по их языку. Якоже во Швеции и в Дации, и во иных землях, нарицаемый у них Юган, по нашему значит Иоанн. Петер, по нашему Петр. И иныя мужеския и женьския имена такоже указуют. Но и в российской нынешней церкви многим такоже имена странная дают: якоже Юрья и Богдана, и во имя Димитрия Ростовскаго проименуют. Еще же и самыя имена святых противу древних превращаются. В мужеских: вмсето Николы, Николай: вместо Доримента, Доримедонт: вмсето Козмы, Косма: вмсето Викулы, Вукол. И в прочих языческих: вместо Израиля, Исраиль. Паче же в господьственных: вместо Исуса, Иисус. Такожде в женских: вмсето Парасковии Пятницы, Параскева Пятка. и прочая безчисленная продолжения ради оставляем. Что убо много глаголати о превращении имен. Но и в самом чине, от еретик приходящих и приемлющих святое крещение, повелевается имена прелагати. Ибо тамо во осмый день во имя святаго прилучившагося имя крещаемому нарещи извествуется, идеже сице пишет: "Первие (рече) повелит тем архиерей, или иерей, прекланяти колена пред дверми церковными. и знаменует приходящаго. 3-жды. и глаголет молитву сию. в ней же и имя ему наречется во имя святаго, егоже прилучится быти памяти, во осмый день". Что убо сего свидетельства яснее, и что достовернее может быти, яко святая церковь повелевает неотложне от ересей приходящия имена прекладати; понеже вси еретики мнятся святым подобитися, и имена в нарицаниях своих имети: обаче святая церковь не взирает на еретическое некое подобеньство, но на противеньство оных догматам, от святых отец положенным, зрящи судит. Якоже ревностный тоя учитель, преподобный Максим Исповедник, противу монофелитов еретиков, глаголющих имети святых в своем диптисе месяцесловном, ответствова: "Кая (рече) польза от имен и воспоминания онех, егда догматы тех суть отвержены" [Минея четья, генваря в 21 день, в житии преп. Максима Исп.].

Конец седмаго раздела.