Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   24   25   26   27   28   29   30   31   ...   46

Вопрос, 222.

Аще же речете, яко аще и приимаху, но обаче и похиротонисаху: убо объявите нам, где написано обретосте, яко святии Афанасий и Мелетий от арианския ереси обращающихся повторе хиротонисаху.


Ответ, 222.

Вышепредложенным ответом удовлителен буди, в нем же таяжде, яже и зде следуемая, писашася.


Вопрос, 223.

В Патерице скитском, в слове 36-м (и Прол. мар. 13) пишет о некотором презвитере, яко егда святую литургию служаше, ангелы видяше одесную себе и о левую. Бе же сей презвитер приял чин иерейства от некоего еретика епископа, и егда литургию пояше, употребляше ту еретическия глаголы, понеже прост сый и неискусен божественнаго писания: известите, от коего еретика сей презвитер приял чин иерейства?


Ответ, 223.

Христос, Спас и Бог наш, в святом своем Евангелии глаголет: "вы отца вашего диавола есте, и похоти отца вашего хощете творити; егда глаголет лжу, от своих глаголет, яко ложь есть и отец лжи" (Иоан. гл. 8). И паки: "лукавый человек от лукаваго сокровища износит лукавая" (Мат. гл. 12). Сия убо Христос глаголет к лжущим и неправедная смышляющим. Что же святии апостоли на таковых вопиют? — услышим. От них же Иаков брат Господень тако глаголет: "не хвалитеся, ни лжите на истину" (Иак. гл. 3). Сосуд же избранвый, Христова уста, взывает: "темже отложше лжу, глаголите истину кождо искреннему" (к Ефес. гл. 4). Аще и пророков испытаем, и они устремителне на лжущия вопиют: "погубиши вся глаголющия лжу" (Псал. 7). Или паки: "иже утверждается на лжах, сей ветры пасет" (Прит. гл. 9). Сице убо Христос Бог, сице святии апостоли, сице и пророцы притужнейше аще и на просте лжущия вооружаются. Кольми паче на клевещущия и лжущия на святых Божиих угодников, и тою лжею простейшия влекущия в гибельный беззакония ров, якоже и настоящая твоя сущая ложь на онаго презвитера, иже ангелы сослужебники себе удостоивыйся получити, егоже оклеветуеши, якобы чин иерейства от некоего еретика епископа приял. О, лживче! Где в показанных тобою историях обрел еси, еже бы ему от еретика епископа иерейство получити? Тамо бо не глаголет иерейство от еретика ему получити, но точию службу литоргийную от еретик приял, сиречь словеса еретическая вмещенная в литоргийную службу. Вонми же и реченным ему от диакона: "сия (рече), яже глаголеши, не суть правыя веры, но от еретик суть, противящихся Христу". И паки на непослушание призвитерово возопи диакон: "Отче! блазнишися, не приемлет бо сих глаголющих правоверная церкви Божия". Слыши убо, — не обличи его, яко зде приял еси хиротонию от еретик, но глаголет ему: яже глаголеши, сия не суть правыя веры. Зде убо слово не о приятии иерейства, или хиротонии от еретик, но о приятии еретических словес точию в службу, ихже диакон вопияше ему отметнути. Явственнейши же Максим Грек, приводя во свидетельство сего презвитера, тако пишет: "Что же (рече), честный презвитер он, иже велия ради своего беззлобия и честнаго жития, сподобивыйся от божественныя благодати ангела выну зрети, одесную олтаря стояща и сослужаща ему? Не единым ли диаконом, пришедшим к нему от Константина града и служащим ему, исправление прият, о немже толика лета от неведения согрешаше, речи некия севирианския ереси приглашая над божественными тайны"? (Грам. Иосиф. л. 32). До зде Максим.

Виждь убо и сего богословнаго учителя, свидетельствующа истину: не рече о сем презвитере, яко прия иерейство от еретик, но явственне глаголет, яко точию речи некия сиверианския ереси приглашал над божественными тайнами, подобне якоже и Кириак отшельник два слова получил ереси несторианския, сице и сей точию речи в литоргию приглашати севирианския ереси по неведению прия, а не иерейство получи.

Но сколь удивительно есть ваше пристрастие к сему вашему иерейству, яко того ради коего святаго, коего учителя церковнаго, коего преподобнаго отца, кое священное писание не оклеветасте и не превратисте на свой разум, якоже в прешедших и последующих вопросех весь разум вашего согласия достаточно объявил еси! Вправду бо, якоже впреди рехом, ваше согласие не на истине, но на лжах почивает: убо и пасет ветры.


Вопрос, 224.

Преподобный Иоанн Дамаскин о иконоборцах пишет: "сию убо аще испытаем ересь, о питомницы церковнии! обрящем всех ересей нечестивейшу". И аще от сих сквернейших еретик обратятся в правоверие, достоит ли от сих скверных без повторения, якоже крещенных, сице и хиротонисанных, приимати? — известите от святаго писания.


Ответ, 224.

Сия иконоборная ересь не по обычаю иных ересей начало своего изращения имеет. Ибо не священными учители (си есть патриархи, или епископы) оная в правоверныя разсеевашеся, но мирскою властию (аще при ней и епископы быша), еже есть самодержавными государи. Якоже насильнически властию сия ввождашеея, тако повелительне самодержавными же благочестивыми последи цари и искореняшеся. Понеже началовводитель сея глаголется быти царь Лев Исаврянин, юже сей и последующии ему царие широце распространяху мучительски. На седмом же вселенском соборе иконоборная ересь проклята бысть. Последующии же быша ей наиболее из мирской части: убо сии царски благочестивыми цари, Ириною и Константином, и наказани быша. И тако последи сего собора не остася сея ереси последователей (кроме в тайне содержащих). Но аще и при Льве Арменине сия паки оживлена бе, но Феодорою и Михаилом совершенно без остатка искоренена бысть. Убо каковый чин уставляти долженствует той ереси, кая себе последователей своих уже погребенных имеяше, и нигде на коем престоле тоя ереси епископ обреташеся? Темже еже в кий чин определяти сию, како не излишнее дело обрящется? Обретахуся ли где нецыи прилепшиися к сей, но в тайне имеюще содержаху, явне же ниже усты что смеяху рещи о ней.

Подобне убо и зде, в России, жидовская ересь в новогородцех прозябаше, аще и от властелей сильных, обаче далее не можаше укоренитися, понеже православныя государи ю властелски искорениша: убо и чина какова-любо на обращение сих писати не летьствовало. Сице убо и на иконоборцев, совершенно искоренившихся, святей церкви не нужно было чина на приятие излагати, еже и не обрящеши нигде сего писана.

Обаче же православнии церковнии учители, якоже сами на себе от иконоборныя ереси недугующих не терпяху хиротонии имети, сице и иже хиротонисанных от сих отвращахуся и не приемляху, о чесом в 161-м ответе писахом от жития Феофилакта Никомидийскаго о Павле патриархе Цареградском, отвергшем иконоборное поставление. А о патриарсе Мефодии и преподобнем Аникии велицем, не приемлющих от сих рукоположенных, чти Пролог марта 8-е число, и Минею Четью Макария митрополита, ноября в 4 день.


Вопрос, 225.

И аще речете: како убо от сих неосвященных архиереов, безбожных и окаянных тех иереев, приимем крещение, или хиротонию, понеже ересь их всех нечестивейше ересей! Но убо известите: кто от святых предаде, еже бы иконоборцев паки покрещевати, или похиротонисати?


Ответ, 225.

В вышшем ответе указахом уже, како сия ересь иконоборная не по обычаю прочих ересей начало своего производства имеет, како она возрасташе от нечестивых государей, от благочестивых же искореняше без остатку, темже и нигде во святей церкви о сих еретиках чинопроизводства не обретается: убо и нам от себе извещавати, или сих определяти в кий-любо чин, како не излишно суть? А еже святии учители церковнии хиротонию от иконоборцев отвергаху и не приемляху, о сем в 161-м ответе явихом.


Вопрос, 226.

Вы ныне великороссийскую церковь како вменяете быти: убо ли горши иконоборных ересей, и единовольных еретиков быти ю сказуете?


Ответ, 226.

Многажды мы от тебе о уподоблении нынешния великороссийския церкви к прочим еретиком вопрошаемся: но о том и мы многажды тебе рехом. А понеже о ней уже мы в 21-м ответе довольнейше глаголахом, убо зде паки возвторяти таяжде за излишество почитаем.


Вопрос, 227.

И аще горши оных еретик быти ю вменяете: убо явите, от кого вы таковый глас предприясте, и кому вы за сие дерзновение будете достойни, яко простецы суще, таковое дерзновение восхитисте, и кроме соборнаго суда и разбрания, священства обращающихся от великороссийской церкви обнажати?


Ответ, 227.

Кия убо ереси из прошедших иконоборных и настоящих великороссийских важнее обрящутся, досмотрите 21-й ответ, и тамо можете важность извесить. А еже судити великороссийскую нынешяюю церковь, еже под чин крещения требующих подлагати, еже священства в них священнаго не признавати: не от нас сие исперва произыде, но от священных страдальцев, и от собора соловецких отец, такожде и от прежних бегствующих благочестивых иереев, о чем в 21-м ответе засвидетельствовахом. В 21-м же ответе многодоводьствовахом, чесо ради не приятно есть новодействуемое крещение. И аще не приятно крещение, кольми паче священство. Такожде и прочими ответами довольно свидетельствующе глаголахом.

А еже от тебе истязуемся, яко мы, простцы суще, таковое дерзновение восхищаем, и прежде соборнаго суда и разбрания. Но учители церковнии, якоже простцем священных, погрешающих о вере, судити повелевают, тако и прежде соборнаго суда и разбрания от ереси содержащих епископов отлучившихся, похвальными гласы ублажающе, чести всякой сподобляют [На поле: Беседы апостол. лист 3113, и 2550], о чем вкратце во ответе 167-м изъявихом.

Речеши ли паки, яко великороссийских архипастырей явственне никто от великоосвященных православных изверже из сана? Отвещаем. Не годствует сицево мнение. Ибо благодать Божия сугубо пребывает в нас, и отъемлется нас. Якоже показуется: Филиппу, единому от седми диакон, крестившу иногда Самарию, ни на единаго их Духа Святаго дарование исцеления сниде; Анании же, крестившу Павла, сниде Дух Святый. Сему убо разньству разуметися подобает, кия суть вины, яко обоим быти диаконом, а действия различная явишася чрез них. Мнится бо, яко идеже присутствуют главнейшия чины, тамо оставляется тем совершенство вещи показати; а идеже сим не сущим, благодать Божия о себе чрез меньшия совершенство творит, како убо той же Филипп, во отдалении тех присутствия, крести евнуха на пути, Дух Святый сниде.

Подобно есть рещи и о твоем истязании (еже како от нас, простолюдин сущих, обнажается священства великороссийская церковь). Аще где присутствуют вящшия чины, то тыя по данней им власти еретичествующих извергают; аще ли не надеемо где сим то творити, или оных несть, тамо, по обличении двою и трех свидетелей, самая их правила извергают, якоже третий вселенский собор возгласи: кто не проклинает Нестория проклят есть, того правая вера проклинает [На поле: Бароний, лето 431, Кормчая]. И римский папа никогда же соборне руками извержен и от церкве изгнан бысть; обаче писание изверженным его нарицает и действа никакова от него, яко отпадшаго лика, правоверным приимати запрещает. Чти о сем соборное изложение Филарета патриарха и Максима Грека главу 37. Что же и собор соединения возглашает не точию на настоящия ереси, но и на грядущия? "Вся (рече), яже чрез церковнаго предания и учительства и воображения святых и приснопамятных отец новосотворенная и соделанная, или посем содеятися хотящая, анафема". Кормчая глава 71, л. 641.

Аще ли иначе, по вам, разсуждати, и ожидати соборнаго суждения, то не точию священство сие не приимати, но и ереси отлучитися никогда времени не обрящется. Но и вы сами вопреки тому учинисте: великороссийския церкве прежде соборнаго суда и разбрания, чин вторый от себе, не последующе священнострадальцем и бегствующим иереом (кроме Феодосия), изложисте.


Вопрос, 228.

Павел патриарх цареградский, егда (сойде) с престола патриарша, и прииде в монастырь, и восприят на ся схиму, и тамо преставися, рцыте убо: яко ли единаго от простых его церковь прият и погребе?


Ответ, 228.

Аще убо и приемлет, или нарицает церковь Божия Павла патриархом, материи ради и формы еретическаго тайнодейства, сиречь возложения рук на главу хиротонисуемаго и приглашения словес во время рукоположения, убо не единаго сего ради Павел патриархом именуется, но и вси, в еретиках поставляемии, глаголются быти иереи и архиереи, обаче еретичестии глаголются, аще не покаются. Аще же покаются от ереси, и тогда возглаголются архиереи, еретическое поставление имущии, действовати же потому священная не могут, аще от православнаго архиерея власти благословением на священнодейство не приимет: ибо то подает едина совершающая священство Святаго Духа сила, коея еретицы отнюдь не имут, но токмо соборныя церкви архиереи имут.

Речем же ти о сем уподобительне. Зри убо скудельника, из вещества и вида сосуд содевающа. Вещество его есть глина, а вид его есть сосуд соделаный; обаче сице показанный сосуд имя свое носит, а без огня совершенное свое действо явити не может. Якоже и еретическая хиротония, имя носящи, без Духа Святаго не покажет своего действа совершенно без совершительныя силы.

И аще разсмотрим совестно о сем Павле патриарсе, то зело вашему разуму и приятию ваших иереов сопротивоборно обрящется.

1. Аще и злейша сия ересь быти глаголется; но еще при Павле не бысть собора на иконоборцев: убо аще бы и прияти до соборнаго суждения, не есть вещь противству велию подлежаща.

2. Обаче Павел патриарх, от иконоборцев рукоположився, не почте то рукоположение, не пребысть до смерти в нем без сомнения, но, оставя престол, прия схиму, каяся, и тако преставися добре во исповедании православнем. От вас [вероятно ошибка в рукописи, может надо: К вам] же приходящии иереи от таковых же иереев благословляются на священнодейства, зело противно оному Павлу, отложившему, а не пребывшему в своем священстве. Засвидетельствует сие житие святаго Тарасия патриарха, достоверствует же и житие святаго Феофилакта Исповедника, яко по божественному жребию Тарасий взыде на престол Константина града и божественный архиерей показася, Павлу же Кипрскому волею изшедшу с престола, занеже от иконоборец архиерейство приемшу и недостойна себе нарекшу. Пролог, март 8.

Аще убо Павел и до собора архиерейство приял есть, обаче оное волею отверже и недостойна себе держати нарече. А можно бы и исправити, понеже бяху тогда православнии патриарси и архиереи; но онаго возгнушася. Коль паче летьствовало бы вам гнушатися ваших иереев, от толиких вящших ересей влекущихся, и неправильне приемлемых. Верно и праведно бы сих отметати и не приимати.


Вопрос, 229.

И аще вы мните, яко един от простых вменися, то чесо ради церковь святая и доныне его с православно кафолическими архиереи прославляет и величает? А понеже святая восточная церковь о отлагающих иерейство сицев имать устав: аще кто отложит иерейство и егда умрет, то не подобает на него возлагати патрахиль, но яко единаго от простых, тако да облекут его: убо Павел святый не отложи архиерейства, аще и от еретик хиротонисан. Аще бы отложил, не бы церковь восточная с титлою патриаршею его прославляла.


Ответ, 229.

Не тако убо разумеется во историях о Павле, якоже ты мниши. Понеже в варившем ответе доводствовавахом ти, яко от еретик поставленных церковныя истории от нарицания имени епископска не отставляют; но аще по церковным степенем не приимет православнаго посвящения, не может в еретичестей хиротонии праве и благодатне действовати [В прусском издании: но аще чрез православнаго епископа дара священия Святаго Духа не приимет, не может в еретической хиротонии действовати]. А еже глаголеши, яко Павел не отложи архиерейства, сия глаголеши якоже вопреки самому Павлу, оставльшу патриаршество и пошедшу в путь покаяния, и самем делом показавшу, яко и схиму на себе возложити ему, и совершенно того отрекшуся царице Ирине и собору, тако и историям церковным, извествующим о святем Павле, яко волею изшедшу с престола, занеже от иконоборец архиерейство приемшу, и недостойна себе нарекшу, якоже Пролог марта в 8-й день засвидетельствует.

Да еще в помощное себе приводиши устав церковный, еже отлагающим иерейство при погребении не велено патрахиль возлагати. Но сие всячески вопреки вашему желанию обрящется. Понеже Павел, аще и патриархом за прежде бывшую от иконоборец материю, или форму нарицается, а еже в патриаршестем чине и образе ему погребение учинити, нигде не глаголется. Како бо, не точию иноком, но и схимо монахом учинившуся, во архиерейском сане и чином, тому подлежащим, церковь можаше погребение ему учинити? Зри чин погребения иноком, идеже отложившему чин священства не повелевает уже патрахиль возлагати. Аще убо божественная правила при животе епископу, приемшему иноческий чин, не оставляют святительских должностей отправляти: коль паче по смерти, якоже о сем святейший Никита митрополит Ираклийский, на вопрос Константина Помфилийскаго, сице ответствует: "О епископех правило изложено есть, да егда возмут на себя мнишеский образ, ктому да не действуют святительских, но оставляют епископию, яко своею волею с высоты места святительства смирения образ изволиша. Такожде презвитером и диаконом по правилу второму устав да держится, еже в Константине граде в преименитей церкви святыя Софии собравшагося святого собора, иже и седмый собор утверди". Кормчая гл. 55, л. 584. Подобне и в Номоканоне афонских отец вопросоответствуется сице: "Вопрос. Аще подобает по вине извержену бывшу священнику, или волею священство оставльшу, зазревшу же себе, предглаголати: благословен Бог наш, и: Боже ущедри ны, и: Христос истинный Бог наш, или кадити кадильницею, или причащатися внутрь алтаря? Ответ. Никако: ибо в простолюдин место учинен бысть". Потребник великий, л. 728 на об.

Темже по сим предложенным свидетельствам, аще Павел оставил патриаршество, аще в покаяние, за получение от иконоборцев архиерейства и за подписание на иконоборство, пойде в монастырь, и аще не точию иночество, но и схиму великаго образа прия: убо и патриаршеских отправлений при погребении не бяше, но яко схимонах, таковым чином и погребеся.


Вопрос, 230.

На седмом вселенском соборе, по проклятии ересей, послушаемо бысть иконоборных епископов чистосердечное покаяние, и место им между православными епископы дадеся инем же, не весма ереси отмещущимся, суд на иное время отложиша, обаче и тех, потом покаявшихся истинно, святый собор прият, и не отстави их от санов своих: убо известите, похиротонисаху ли кого повторе?


Ответ, 230.

Несть сего во истории святаго Тарасия писаннаго, еже бы на седмом вселенском соборе отцы хиротонисанных от иконоборец принимали в покаяние и между православными епископами место определяли, но впадшим в ересь, тем убо покаявшимся, место в соборе между епископы православными дадеся. И зде убо различие есть немало между православными, и впадшими во иконоборство, и теми, иже от иконоборец рукоположенными: сии бо последнии не могут впадшими, или отступившими во иконоборство нарещися, понеже хиротонию свою не от православных прияша, но от иконоборцев имеют: убо и отступившими не нарицаются. Темже яве познавается, яко святый Тарасий с прочими отцы тех епископов покаявшихся прияша и между православных епископов место определиша, иже от начала епископство свое получиша от правоверных, и последи в ересь иконоборную впадше, якоже о сем явственно подтверждается в житии святаго преподобномученика Стефана Новаго, еже кия на соборе Константина Копронима, волею или неволею, поползнувшиися епископи в ересь иконоборную, тии на седьмом вселенском соборе покаяшася. Идеже сице пишет: "Мнози бо (на соборе Константиновом) от них (си есть епископов), аще и ясно зряху царево с патриархом заблуждение и озлобление церковное видяху, обаче не смеяху ничтоже рещи противно, боящеся гнева царскаго и патриаршаго и беды бывающия правоверным, и соизволяху деющемуся злочестию, чесого послежде, на истинном седмом соборе, в царство младаго Константина и матере его Ирины, отрекошася, и с покаянием исповедающеся, к благочестию обратишася; а тогда, на еретическом том соборе, вослед царя и патриарха поидоша". До зде от жития Стефанова (Мин. Чет. нояб. 28).

Убо сим кающимся епископом, православно хиротонисанным, кое надлежит чинити повторение хиротонии?

Но аще бы и от иконоборец хиротонисанных приял Тарасий со отцы, то и сие приятие не во образец вашему приятию иереов есть.

1. Еще ставлени быша от иконоборец до собора на них и до конечнаго проклятия.

2. Приял их полномочный во власти хиротонии, а не иерей, ему же должность сию имети возбраняется.

3. Аще и приял их, но смотрительне, усмирения ради церковных смятений.

4. Последи же вселенскаго седмаго собора, когда уже сия иконоборная ересь совершенно отвержена и проклята бе, нигде не видится приемлемых церковию хиротонисанных от иконоборец, но паче возбраняемых, о чесом в житии Иоаникия Великаго явствуется, яко он и патриарх Мефодий от сих хиротонисанных зело не приемляху.Темже убо и приводити сия вам отнюдь несогласно и противно правилом обрящется, и самей истории разуму несослагательно будет.


Вопрос, 231.

И аще речете, яко оных аще и не похиротонисаху повторе, понеже еще древнейшаго и православных архиереов бяху они поставления, но потом во иконоборство совратишася; но докажите, все ли онии епископи бяху от православных архиереов хиротонисани.


Ответ, 231.

Вси ли онии, отступившии и покаявшиися от иконоборныя ереси, от православных хиротонисани, мы того ведати не можем, понеже история о сем явственне ведати не дает. Обаче, аще бы нецыи и от иконоборствующих рукоположени были, и то вашему иерейству не образец есть: ибо еще до соборнаго проклятия рукоположени быша, и епископами, власть имущими полномощную, прияшася. О сем пространнее в варившем ответе рекохом.


Вопрос, 232.

И аще вы мнением своим покушаетеся опровергнуть приятие от еретик хиротонисанных, егда приходят к правоверию, глаголюще, яко недостоит от еретик хиротонисанных приимати (понеже всякий еретик имать в себе дух диаволь и тем противится Святому Духу); но убо докажите: предаша ли святии отцы поне едино правило на седмом соборе, еже бы обращающихся от еретик, якоже крещения, сице и хиротонии обнажати? — ибо и они знаяху, яко еретицы противятся Святому Духу.