Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 202.
И аще не достоит, то по коим правилом не достоит, и где святии отцы повелели тако пребывати, а обращающихся от еретик с тою же хиротониею не приимати? — ибо мы сего отнюд в писании не видим, но паче зрим, яко нужды ради с молением посольников посылаху и с простертием рук приходящих от еретик с тою же хиротониею приимаху.
Ответ, 202.
В 161-м и 180-м ответех засвидетельствовахом, яко святии отцы правилне и исторически от втораго чина еретиков отнюд не приемлюще бяху; такожде известихом и в 163-м ответе о еретицех донатистах, чесо ради ко оным ниже нынешнее время, ниже новостей пребезмерие, ниже нестяжание высокоправоверных лиц уподобствовать за крайнюю неудобность не возможно: убо и вам приводити себе не в сообразность о донатианех всячески неключимо есть.
Вопрос, 203.
Иоанн, патриарх Иеросалимский, от кого хиротонисан: от православных или от еретик?
Ответ, 203.
Иоанн патриарх Иеросалимский от множайших доводов познавается не от еретик, но от православных хиротонисан быти, ихже зде, на среду излагающее, представляем:
1. Преподобнии отцы Савва и Феодосий с сим патриархом Иоанном, кроме всякаго подобающаго от еретик обращающимся чина, сообщение имеяху. И аще бы сей Иоанн патриарх от еретик севириан хиротонисан был, всячески бы от тех хиротонисана сии великоревностнии отцы прияти не восхотели быша, якоже от их послания, писаннаго к царю Анастасию, севирианину, в старописаных и киевопечатных Минеях показуется, иже ни по самой нужде, аще бы и смерть случилася того ради быти, от севириан безглавных хиротонисан бяше.
2. В самом житии Саввы освященнаго повествуется сице: «Егда Севир еретик, во Антиохии от царя Анастасия приим власть, много на непослушающих его зла показа. (Ниже) Посла же ко Илии патриарху того Сидонскаго собора уставления, и виде яко не прия. (Ниже) Таже соборная уставления, с некими клирики и с силою царевою, во Иеросалим посла. (Ниже) И се слышав, отец Сава прииде во святый град со всеми пустынными игумены, и с соборными граматами пришедших от Севира изгнаша". До зде от жития Савы. Речеши ли, яко пришедшими клирики от Севира (в нихже аще и не бе епископа, но иными их ереси епископы) Иоанн рукоположен бе в патриарха. Но яко в приходе оных клириков во Иеросалим ниже Илия изгнася, ниже Иоанн в патриарха поставлен (дело бо се возбранено бяше оными отцы, из пустыни с Савою пришедшими): убо и места зде во истории не дается Иоанну поставлену быти от еретик севириян. Возглаголеши ли от последующих во истории, яко Алимпий, посланный от царя, Илию архиепископа, яко не покаряющася Сидонский еретический собор прияти, Халкидонский же четвертый вселенский собор прокляти, изгнав из Иеросалима, Иоанна же Маркионова, обещавшася сие сотворити, епископа во Иеросалиме постави. Но Алимпий не бе священнаго чина, но мирскаго: убо и поставити ему в епископа Иоанна не леть есть, разве точию повеле поставити. Убо и зде не видится, чтобы Иоанн от севириан еретиков хиротонисан бы был.
3. Воспречительствуеши ли паки, яко Алимпий своими епископы, своея ереси, рукоположи. Отвещаем. Понеже в житии Савы святаго, не точию для поставления Иоаннова, но и изгнания Илии патриарха, приити с граматами царскими во Иеросалим сему воеводе нагло, не повествуется, но зело коварно и лестно явив оныя грамоты, не чего ради иного, точию опасаяся прежде бывшия ревности отец Савы и Феодосия, да не той же мятеж, яков и прежде присланных ради клириков от Севира, сотворит: како бы возмогл, или с собою привести, или из иных стран призвати себе единомысленных епископов? Никако же, никако! Убо и остается разумети, яко аще Иоанн и обещася воеводе секретно велимое учинити, поставлен же бе от правоверных.
4. Вняти же и сему подобствует, яко Севир еретик во Антиохии бяше патриархом, далече от Иеросалима. И веждь убо, яко аще Севир и еретик был, но в догматех четвертаго вселенскаго собора; а перваго вселенскаго собора правил блюститель бысть, кой собор не повеле епископских престолов мешати в постановлениих. Того ради и сей Севир на Иеросалимский (не его предела) не посла своего епископа во Иеросалим поставити патриарха, но единых клириков с граматами, повелевающими еретический устав, положенный в Сидоне, прияти, придав им и силу воинскую от царя. Но что? — и се не успе тогда учинити, нахождения ради святаго Савы во святый град со многими иноки. Убо и от сего познавается, яко Иоанн не бе от севириан рукоположен.
5. Устав церковный издревле бяше, еже Иеросалимскому патриарху от Кесарийскаго митрополита поставлятися, якоже о сем в книзе о вере Острожския печати, на листе 136, извествуется. Но Кесария тогда во всяком благоверии бысть: убо, без всякаго прекословия, Иоанн поставлен бысть от православных, а не от еретик севириан.
И по всем выше предложенным доводам явствуется, яко Иоанн не бе от еретик севериан рукоположен, но от православных: убо ваши мнимыя доводы о приятии от еретик хиротонисаных не в стране правды, но в стране лжи на сущих богоносных мужей зело явственными обретаются. Виждь убо, вопросителю, яко ваше приобщение к новотворному иерейству понудило вас и самых православия ревнителей, яко приобщительных (подобне вашему сумазбродству) к еретической хиротонии приплетати. Оле, вашего блазнительства! О вас убо точне пророк свидетельствовал глаголя: "Потребиши вся глаголющия лжу".
Вопрос, 204.
И аще речете, яко от православных, а не от еретик: убо явите, в коих правилех таковаго повелевает на степень архиерейства возводити, который со всеговейным усердием обещася прокленути четвертый всея вселенныя собор (а с ним уже и все прежде бывшия).
Ответ, 204.
Аще Иоанн Маркионов обещася, а не еще (еще не) прия севировы догматы, или словом обещася четвертый вселенский собор прокленути: убо обещанное, а не исполненное, нигде в правилех церковных за самое дело не поставляется, якоже и в Номоканоне, на листу 723, словесное отвержение не извержением сана, но на некое время отлучением наказует.
К сему же Иоанн не в соборной церкви, ниже всенародне обещася вышеписанная учинити, но просте вещь обета сотворися некако и домовне, идеже бяше оный от царя Анастасия посланный Алимпий, котораго ради слабо сотворшагося обещания подвижеся и царь на гнев, и сего Алимпия от сана низложи. Или и се разумети леть есть, яко оный Алимпий власть имеяше в той Палестине, убо и живяше тамо. И како, близ живый, Иоанново непостоянство в ереси слышав, не пришел паки Иоанна во обете утвердити (понеже по Иоаннове поставлении зело вскоре преподобный Сава с прочими пустынножители, уведевше его к приятию севировых догматов склонившася и собравшеся, его утвердиша, крепце на догматех вселенскаго собора четвертаго стояти), дондеже царь в толиком разстоянии услыша. Двое зде подобает разумети: или Алимпий и сам в ереси той не тверд, или ни за что то упражднением ко иным делам полагаше.
Темже, правоверный тогда Кесарийский митрополит с прочими архиереи, емуже по обычаю долженствовало рукоположить Иоанна в патриархи, не погреши тако обещавшася его, тайне и лестне, и еще не сотворша самем делом, рукоположити.
А понеже случается по житию достойне, или не достойне рукополагати предстательствующим церкви архиереом, обаче равне в Дусе Святе рукополагают, по глаголющему: "Не всех убо (рече) избирает Дух Святый, всеми же действует; (Ниже) действует убо рукоположения благодать за коегождо спасение, и кождо по вере приемлет", и прочая (Номоканон О священ. л. 714).
Навыкни же и сему, яко Господь Бог не абие впадша во зло обнажает благодати своея, но по конечном ожесточении во зле, якоже и видим. Колицы быша зли июдеи и священницы их? Обаче единому и десяти прокаженным повеле показатися иереом, рек: идите, покажитеся иереови; сиречь: по закону животная принесите на жертву (3 Моисеов. гл. 5). Егда вниде Исус в церковь Соломоню, изгна вся продающия оттуду, рек: дом Мой, дом Отца Моего, — дом молитвы оную нарек. Егда же архиереи и старцы июдейстии вознесоша Исуса на древо, и конец злобы показаша, преста быти во оных церкви благодать Божия, еже Господь Бог раздранием завесы показа.
Зриши ли, до колико терпяше в них Бог благодатию своею, ожидая обращения их? И сия о ветхом. Что же речем о новой благодати? Егда бо на вечери тайней преломи хлеб, даяше в тело свое ясти учеником достойным, и недостойному Июде даде. И паки, повеле сие творити в свое воспоминание, назнаменова священниками их быти, не минув Июду предателя.
Оставляем же глаголати: внегда креститися Самарии, равне на вся Дух Святый возложением рук апостольских прииде, и на Симона волхва. Воззрим же и на древния еретики, иже, покрывающе свою ересь притворным благочестием, восхитиша епископские престолы, яков же бяше Несторий, Диоскор, Евтих, Фотин, Кирр, и прежде сих Павел Самосатский: дондеже открышася сущими еретиками и дондеже извержени из санов, действоваху благодатно.
И от сих предложенных, дадим указание о оном Иоанне Маркионове, обет давшем севирово общество приняти, или четвертый собор проклясти. Аще и падеся в том некако слабе и прикровенне, якоже выше рехом, и за то не мощно вменяти его за отчюжденнаго христианства и рукоположивших его за погрешивших полагати. Понеже и они не просте тако рукоположиша его, еже кроме праваго исповедания, якоже собора Карфагенскаго 11-е правило повелевает, но всяко при православныя веры исповедании его рукоположиша: убо и не есть повинен, якоже он, словесно обещавыйся Иоанн, паче же и не явленне, и еще делом не исполнивый, совершенным еретиком нарещися, сице и рукоположившии его никоего правильнаго вреда учиниша.
Вопрос, 205.
И оный рукополагатель, слыша таковое его мерзости исполненное обещание, и не убоявся хиротониса: то чему за сие обои будут достойни? — явите от святаго писания.
Ответ, 205.
Якоже в высшем ответе засвидетельствовахом, Иоанн не всенародне в церкви севировы догматы обещася приняти, но оному точию Алимпию; делом же исполнити, еже оныя явне повсюду разсевати, того во истории не видится: убо и рукоположившему таковаго под правильным наказанием не долженствуетъ быти.
[В прусском издании есть дополнение: "Делом же исполнити, еже оныя соборне пропоповедати, а Халкидонский собор прокляти, во истории не видится. Да и не мог. Ибо граждане иеросалимстии в православии бяху утвержени, ибо и по поставлении Иоаннове, егда хотяше епарх нудити (присланный от царя) Иоанна соборне прокляти четвертый вселенский собор, тому быти не попустиша: како бы прежде поставления, толь слабо о том Алимпию прилежащу, попустили Иоанну соборне прокляти халкидонский собор?"].
Вопрос, 206.
И оный патриарх Иоанн колико время в ереси и в собщении с еретики пребысть? — явите от святаго писания.
Ответ, 206.
Понеже история, о Саве Освященном писанная, не показует в сем обещании Иоанну долго пребыти: вскоре бо отцы (егда уведеша его склонившася Севировых догмат к приятию) притекоша, и точию не засташа посланных от царя, и тогда Сава увеща паки Иоанна на правоверие. И от сих словес истории явствуется зело краткое время Иоаннова в том пребытия. Сообщения же Иоаннова с еретики не видится быти. Аще и обещася, якоже быше рехом, прияти севировы догматы, но не Севира самого во общество прияти обещася, понеже Севир сам далече от Иеросалима бяше. Но и то делом исполнити от преподобных отец возбранен бысть.
Вопрос, 207.
И в пребытии тоя ереси кия подвиги о ней показа? и не принуждаше ли кого от святых к своей ереси? — известите от святаго писания.
Ответ, 207.
Ниже Савы и Феодосия преподобных во историях старописменных, ниже в киевопечатных, коего кому от Иоанна понуждения показуется. Что же в Прологе, в житии Иоанна Постника, сей Иоанн Маркионов еретиком и принуждателем кратко начертавается, но вопреки всем историям, о том в нижнем ответе изъявити потщимся.
Вопрос, 208.
И аще принуждаше к приятию ереси, и за непослушание святому Иоанну Постнику многи скорби и раны наложи, а потом и во изгнание осуди (Прол. дек. 7): и за сие оный севировы ереси разширитель, а благочестия христианскаго бывый ненавидец, чему достоин? — зде, не усомняся нимало, от святаго писания известите.
Ответ, 208.
Понеже в сей истории, в Прологе, Иоанна Маркионова еретиком нарицает; в Минеи же Четьи, в житии Савы Освященнаго, не тако глаголется, но: "Сава Иоанну вопияше: аще не послушает, тогда аки еретик прокленется". Зде убо не нарече Сава его еще еретиком, но аще не послушает, тогда аки еретик прокленется. Сие бо речение "проклянется" глагол есть безличный и будущаго времени, — тако бы рещи явленнейше: аще не обратится от своего обещания, но до конца в нем пребудет, то будет проклят от всех. Но яко вмале пришедших в ересь и учители церковнии не еретиком, но заблудником называть повелевают, якоже премудрии Иероним и Максим Грек пишут, сей обычай церковь святая за ради надежды исправления имеет, еже не абие вмале в противности кия впадших еретиками нарицати: ибо сицева вещь и над святыми случашеся, якоже о преподобном Герасиме, иже на Иордане, и о святем Григории, отце Григория Богослова, и о прочих, от каковы любо простоты намале впадших в еретичество; но не глаголются быти еретики. А наипаче от повести оныя о иереи некоем святом, речи некия севирианския ереси над божественными тайны приглашающем, емуже и ангел Господень сослужаше, рещи подобает (о нем же и ты в 223-м вопросе, аще и со иным разумом, надпомнил еси). Его же егда диакон, от Константина-града пришед, зазре в том, иерей же ко ангелу, аки спираяся, глагола: почто толико время замолча? И той ему отвеща, яко Бог положи человеком от человек исправлятися (Грамат. Иосиф., л. 32, в предисл.).
К сему же и сие припомянем, како оный мних ради поятия дщери идольскаго жреца отречется Христа, обаче идол отвеща жерцу: не дади ему дщерь в жену, яко еще Христос от него не отступает, о чем в Прологе генваря 16. Чтем же и в Лимонаре, во главе 4-й, яко по отгнании оригенистов от некия обители, авва Леонтий, вшед в церковь, виде одесную олтаря ангела Божия и слыша глас: отнележе посвящен бысть сей олтарь, мне поручен. Или и у самаго Савы не бяше ли оригеновы ереси обитель некая? Обаче коликою любовию он снисходил им в долготерпении за надежду исправлении, чти в житии того.
И сия приведохом ти не того ради, акибы и еретики самые Дух Божий имут, но увещательно предлагающе, да не мниши кого, вмале от простоты, или некоего ради устрашения впадша в кое зло, быти уже еретика и благодати Божия обнажена. Свидетель бо нам есть сему и святый Исаак, глаголя: яко "не егда содеем грех, бываем грешнии, но егда не возненавидим грех и не раскаемся в нем". Никон, слово 63 к концу.
Свидетельствует же сему и сам святый Сава, возопивый на Иоанна: "да не сотворит общения с Севиром! аще ли (рече) не послушает, то от всех отец пустынных, аки еретик, проклянется". Коего обличения отец Иоанн устыдеся, отвержеся Севира, и прочая чти в житии святаго Савы. Зриши ли, яко и отец Сава (яко же и выше речеся) не конечно еретиком Иоанна нарек, но егда бы увещаний их не послушал, тогда бы к сущим еретиком причтен был.
Темже в Прологе еретиком наречен бысть Иоанн дерзновеннейше, вопреки самой истории о преподобнем Саве, показуется.
А еже кую злобу на Иоанна Постника (по Прологу, аще в Минеи и несть сего) сей Иоанн показа, и то самыя вещи естество являет, яко по настатии патриаршестем должный плод обета нача открывати, и сих ради вин негли и истории сочинителю тако Иоанна еретика быти написати от ревности случися, и промчеся сие имя в роды. Истиною же Иоанн не пребысть еретиком, но православен и скончася. И тако сие ему имя и странно в наших ведениих быти, православному еретиком глаголатися, якоже страннейше есть и вышереченным святым, вмале поползнувшимся в ересь, еретиками нарицатися. Верно есть слово сие и всякаго приятия достойно.
Вопрос, 209.
Преподобнии отцы Сава и Феодосий по нужде ли Иоанна патриарха от ереси Севировы в правоверие прияли, или не по нужде?
Ответ, 209.
Могут ли святии разглашатися с своими устами самым делом? Никако же, никако. Ибо преподобнии отцы Сава и Феодосий, пишуще к царю Анастасию, в своем послании глаголаху: ни по самей крайней нужде, аще бы случилося и кровь свою пролияти, обещавахуся, да не приимут кое-любо лице от безглавных севириан хиротонисанное, или кого во общение [В прусском издании здесь вставлено следующее объяснение: "Подает же зде отеческое послание к царю разум сицев: понеже Севир присылал своя клирики, и с царскими воины, Илию изгнати; видяще же отцы насилие творимое церкви, опасающеся, дабы не был когда кто от еретик хиротонисан в патриархи, возвещают царю, яко таковаго никогда же приимут кого во общение"]. Зде же, по вам, аки забывше своих слов твердость, и без нужды Иоанна прияша от севировы ереси. Како будет? — недоумеем.
Но сия убо вами присно гдаголются; мы же сея клеветы на ревность преподобных отец ниже во ум прияти возмогаем. Понеже они Иоанна не яко от ереси обратившася прияху, но яко с правоверным патриархом единогласно еретика Севира и с прочими еретики прокляша, яже, удобнейшаго ради познания, от истории сице повествуем:
"И егда сицевое (сиречь во обещанных непребытие) Иоанново непостоянство уведано бысть царю, того воеводу (сиречь Алимпия) наказав, и инаго, именем Анастасия, воеводою посла. И той во Иеросалим пришед, Иоанна всади в темницу, дондеже Халкидонский собор проклянет. И виде Иоанн тако себе утеснена суща, проси его, да испустит се творити в церкви. И собрася народ в церковь святаго Стефана, идеже Сава с десятию тысящею притекоша; тамо же и присланный бяше воевода, ожидая слышати исполнения по указу цареву. Иоанн же взыде на амвон, поим с собою Саву и Феодосия, аки началников всего чернечества пришедша. Весь же народ на мног час вопияху: еретики прокляни, а соборы прослави и оправди! Тогда вси трие согласно прокляша Нестория, Евтихия, Севира и прочих еретик, не приемлющих Халкидонскаго собора. Тогда оный воевода со стыдом и боязнию избеже оттуду, благовременнее сице вознепщева себе сохранити" [Бароний].
Виждь убо и разумей словеса историчная. Нигде бо не глаголет, аки бы Феодосий и Сава прияли к церкви Иоанна от ереси суща, и отрицания его ради ересей пред ними на святительском престоле быти учиниша. Но вонми словесем опасно: егда бо восходити Иоанну на амвон, сам, аки патриарх, предъиде, Саву же и Феодосия в помоществование противу еретиков по себе поим, и став на амвоне, окрест постави — Саву по десную страну, Феодосия же ошуюю. И зри сказание истории: не Сава и Феодосий поимше Иоанна, но Иоанн поят с собою сия отцы; и не поставиша Сава и Феодосий Иоанна без риз прямо себе ко олтарю, и не повелеша ему колени преклонити, якоже обычай бывает отрицающимся ересей, да пред ними прокленет ереси; но он взыде прежде, и воследоваша ему Сава и Феодосий, и тако им трем, стоящим на амвоне, не ко олтарю обратно, но к народу лицем, аки слова Божия проповедником. И не глаголет во истории, аки бы един Иоанн еретики проклинал, но вси трие согласно прокляша ту еретики (Бароний, лето Господне 523 и 578).
Можно ли по тебе, о вопросителю! зде во истории признать, аки бы Сава и Феодосий Иоанна тамо от ереси прияли? Не можно, не можно.
Аще ли паки рещи по тебе: Иоанн патриарх, свидетельствуя себе отцем верна быти, еретиков проклинал? Но отцы кому себе свидетельствоваша верными тех же еретиков проклинати? Аще же в сем не удобоятно ти, то от гласа народнаго навыкни, прямо их стояща и просяща Иоанна, аки патриарха, да в силе Духа Святаго еретики прокленет, а соборы прославит; не к Саве просят, да он ему прокляти еретиков повелит, аки приемлющий Иоанна, но самого, аки главу церковную, просят Иоанна.
Аще ли паки, по вашему мнению, якобы своего ради приятия в церковь таково Иоанн проклятие творил: остается глаголати и сие, яко и Сава и Феодосий под неким умышлением у народа быша, и оное сомнение очищающе, проклинаху еретики. Убо, по сему, Сава слушал исповедание веры от Иоанна, а народ слушал исповедание веры от Савы и Феодосия. И кое се будет безумие! Аще же и иначе возглаголати о том, яко сии трие, обращени на народ, в сицево непщевание еретики проклинаху: Иоанн ради отцев, а отцы ради Иоанна, проклинаху взаимно? И самое то блядословие будет, еже и глаголати срамно!
Но, оставивше всякое о сем суеумие, глаголем истину. Коликое бо се разстояние времене между увещанием первым Иоанна и между церковнаго сего собора, в неже, когда дойде слух от Иеросалима в Царь-град и во Антиохию, и когда прислася Палестины держатель кой сего Иоанна свергнути во Иеросалим прииде, и коликаго времене требоваше дальний сей путь, в неже Иоанн службы архиерейския благочестно уже совершаше в церкви и ведом бяше от всех яко православен! А ныне бы прииде ему отрицание ересей в церкви пред отцы творити! Зело невежественне умствовати се будет. А наипаче, оставя православных епископов присутствие, (исповедатися) пред Савою, не имущим епископския власти — слушати исповедание веры и отрицание севирианских ересей, и решение тех, и в священнодейство благословити патриарха [На поле: Больший от меньшаго не благословляется], — коликаго беззакония исполнено дело се явилося бы! И приписовати таковую вредность к толиким отцем, ревнителем благочестия, како не гаждение? Како Богу не досада, сице облыгати святыя Его?
Вопрос, 210.
И аще не по нужде, то чесо ради они такую высокую степень дерзнуша прияти, а не подождавше и не поискавше ради приятия митрополита, или епископа православнаго?
Ответ, 210.
Кая польза искати преподобным отцем на приятие православнаго патриарха митрополита, или епископа? Но якоже вышшими ответы довольнейше изъявихом, Иоанн не бе от еретик поставлен, и в ереси севировой не пребыл, аще и обещася: убо и не прият бысть Иоанн от ереси, но яко правоверен еретики прокля.
Вопрос, 211.
По проклятии ересей, с православными патриархи Иоанн патриарх причтеся; и зазираше ли его кто-либо от святых, яко не епископом православным от севировы ереси в правоверие прият бысть?