Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 185.
Никейскаго собора святии отцы от новатиан како приимаху и впредь приимати како повелеша? Великороссийскую церковь вы ныне по коим правилом священства обнажаете? — известите нам от святаго писания.
Ответ, 185.
Како Никейскаго собора святии отцы от новатиан не приимаху, о том уже в 180-м ответе засвидетельствовахом. А еже чесо ради от великороссийския нынешния церкви священства отбегаем, то о ея новшествах в 21-м ответе и в 44-м в разделе 1-м доволно предложихом: понеже она многия в себе древних великих еретиков ереси вмещает: понеже и нынешним латинским, люторским, калвинским и срацынским, и прочим иноязычным ересем причащается: понеже обливательное, единопогружательное и покропительное приемлет крещения: понеже с таковое имеющими крещение всякое имеет сообщение, и сих некрещенных сущих приемлет за крещенных: понеже не трисоставным крестом печатлеет хиротонисуемаго, но четвероконечным, в крайнее несогласие учителем церковным: понеже не чрез двоеперстное сложение, но чрез пятиперстное странносогбеннаго, хиротонисающе и на самой ставильной грамате изображает: понеже при хиротонисании преужасно древлепреданныя Христовы и апостольския и отеческия догматы и предания проклинает.
Сих убо ради и иных пребезчисленных вин, великороссийския церкве священство не приемлем. Но не мы сему неприятию началовводители есмы, но собор священных страдалец и бегствующии самопрежнии иереи, о нихже мы в 27 ответе засвидетельствовахом.
Вопрос, 186.
В правиле 8-м перваго вселенскаго собора сице изъявляет: "Аще будет во граде истинный епископ, таковый бо почтен будет, иже исперва истинный епископ, и един на епископстем престоле седит; той же, иже от чистых нарицаемый епископ, яко презвитер почтен будет". Зде, яко пред страшным судиею стояще, изъявите: чесо ради повелевает епископу презвитером нарицатися, — еретическаго ли ради поставления, или иного чего ради?
Ответ, 186.
Чесо ради от наватианския обративыйся ереси епископ сводится в презвитерскую степень, о том в 180-м ответе правильно засвидетельствовахом: убо зде таяжде повторяти за продолжение оставляем.
Вопрос, 187.
Аще же речете, яко не еретическаго ради поставления, но яко не достоит двема епископома во едином граде быти, того ради и презвитером ему повелено быти. Зде опасно просим вашу любовь, — изъявите: аще устроит ему старший епископ в селе негде епископию, и тамо оный, иже от чистых, епископ будет хиротонисати и литоргисати и прочая тайны совершати, равную ли он благодать к совершению тайн с теми, иже во благочестии хиротонисаемыя, имети может?
Ответ, 187.
В 180-м ответе показахом, яко святая правила правильно хиротонисаннаго от правоверных епископа сводити в презвитерскую степень зельно запрещают. Убо остается разумети, яко ради еретической хиротонии сводити в нижнюю степень отцы святии перваго собора наватианских епископов повелеша. Но вся сия, аще сводити, аще епископом негде устроити в селе, не тако просто с тою хиротониею, от еретик полученною, оставляются быти, но, якоже в 180-м ответе изъявихом, поставляеми быша снова от правоверных епископ. Показахом же, яко сельстии епископи власти не имут хиротонисати. Убо наватианским епископом, аще и по обращении, не видится после миропомазания и с посвящением от православных совершенной власти имети в хиротонии, еже бы и епископа на свое место хиротонисати, якоже и донатианстии епископи по 99-му правилу сея власти исключаются. Причина же тамо наивящши та быти извествуется, чтоб паки в раскол сии, того любители, не обратилися быша.
Вопрос, 188.
Аще ли не равную, но меныпую, аки бы от еретик хиротонисан: то известите зде о том, аще написано обретосте, яко не равную, но меньшую благодать имеет?
Ответ, 188.
Благодать Святаго Духа равна есть (аще и дарове не равни суть); обаче еретическая хиротония благодати Святаго Духа не причащается, и не точию еретическая, но и раскольническая, якоже в 161-м ответе изъявихом. Убо наватианский епископ, обративыйся в правоверие, не за тем рукоположением оставлен бысть, якоже ваше мнение в том усилуется, но, якоже во ответе 180-м засвидетельствовахом, наватианстии епископы и презвитери снова паки хиротонисатися повелевахуся. Убо аще сии и священнодействовали, но не тою властию и благодатию, юже во еретицех получивше бяху, но тою, юже от правоверных епископов. А еже хиротонисати от новатиан обращенному епископу и на свое место поставити епископа, якоже и в вышшем ответе рехом, власти нигде не приписуется, разве точию презвитера и диакона совершити; в селе же устроенному и то совершити не попущается.
Вопрос, 189.
Преподобный во иеромонасех Матфей, в сочинении правил, в составе а, изъявляет сице: "Новатианы егда сосложатся уставом святыя церкве, своя степени да приемлют, презвитери убо суще, или диакони; ащели же епископи, и сих во свои епископия возвращати". Вы сие правило преподобнаго Матфея о обращающихся еретицех за право ли приемлете?
Ответ, 189.
Преподобный Матфей о новатианских епископах и причетницех не от себе глаголет, еже им приимати своя степени; но тое же правило 8-е перваго вселенскаго собора протолкует. Но того не изъясняет, еже како приимати им прежния своя степени: не на изъяснительном же не должно полагатися крепко, и свое мнение тем утверждати, якоже и вселенский учитель Василий Великий глаголет: "Словеса (рече) святаго писания, яже видятся сомненна и покрыта, изъявляются и открываются, и толкуются явными и яснореченными во инех местех святаго писания, а не явная мрачными и неявными разумевати, но явными мрачная" (кн. О постничестве гл. 268). Преподобный же Матфей написа точию приимати степени своя новатианским причетникам, обращающимся в кафолическую церковь; а еже како приимати, того не написа: убо и должно полагатися не на сих мрачнореченных глаголах, но на тех, идеже писано есть, како они приимаху своя степени, еже есть от епископов православно-кафолических, имеющих полномощную власть во святей церкви, и с руковозложением православнаго епископа, о чесом в 165-м и 180-м ответех довольно изъявихом; а не тако просто приимаху с еретическою хиротониею, якоже ты мниши.
Вопрос, 190.
В правиле 69-м Карфагенскаго собора изъявляет сице: "Иже от Донатия поставленнии, во исправление пришедше, да будут приятни". Вы сие правило приемлете ли?
Ответ, 190.
Правило сие 69-е Карфагенскаго собора приемлем; но в ключимое время и на ключимыя лица (сиречь полномочныя епископы) к приятию, и на сообразныя вины обращающихся к кафолической церкви [якоже о сем правиле во 164-м ответе глаголахом]. Аще же не тако приимати будем, якоже сие, тако и прочия правила: то, по преподобному Никону Черногорскому, якоже во 2-м слове о не разсмотряющих времена и вины глаголет, главою снити и горняя долу быти извествует.
Вопрос, 191.
Аще приемлете, то чесо ради вы ныне приходящих от великороссийской церкви священников не приемлете, ибо и они во исправление приходят.
Ответ, 191.
Несть убо несть иного исправления отступающим от великороссийския церкви, точию всеконечно совлещися пресомнително новодействуемаго крещения, якоже о сем в 21-м и 42-м ответех премного довольствовахом. Убо кое исправление по отвержении крещения хиротонии воздолженствует имети; аще не снова таковых паки хиротонисати ключимствует. Якоже Севаст Арменополь, на 19 правило перваго вселенскаго собора пиша, сице глаголет: "Павликиане да воскрещеваются, и аще непорочни и паки да хиротонисаются, аще и предхиротонисашася". Книга 1-я.
Извествовахом же и собственне вкратце во 164 и 185 ответех о невозможности приятия нынешния великороссийския хиротонии, зде же паки таяжде к повторению не принадлежит.
Вопрос, 192.
От севириан хиротонисавшихся преподобнии отцы приимаху, согласно ли они сие правилом святых отец творили?
Ответ, 192.
О, Боже сохрани сего лжесловия на преподобных отец, еже бы рещи о них, яко приимаху во общество хиротонисавшихся от еретиков севириан, коего приятия отнюд нигде во историях не видится быти! Преподобных же отец Савы и Феодосия во историях не точию приятие ими хиротонисанных от севириан, но и зельное отвращение показуется, якоже в 161-м ответе написахом, и зде такожде засвидетельствуем. О чесом прежде в житии преподобнаго Савы, от послания их к царю Анастасию греческому, сообщителне с преподобным Феодосием, сице явствуется: "Да верует (реша) твое державство, еже глаголем пред Богом и пред избранными ангелы, яко ни коим же словом ни образом пристанем к злым онем расколником, не отступим же законнаго правильнаго чина, ни приложения сотворим святей апостольстей вере ни по коему же образу; ни лице от еретик хиротонисаемо когда приемлем; аще се будет нуждею на нас, грех ради наших, то крови наша усердно пролием о сей святей вере". Минея Четья старописьменная, декабря в 5-й день.
В житии преподобнаго Феодосия, в послании к царю Анастасию: "Двема неким предлежит нам, о царю, или жити мерзце и несвободне, безглавными совосхищенным бывшим, или умрети добре, правым отеческим последующе преданием. И се ведый буди, яко смерть нам предпочтеннейша есть за истину. Не точию же мы, иже в стране сей пребывающии, новым сим лжесловием не последуем, и предваршим законом святых отец прилагаемся, но ниже инде где киих чрез сие почитающих терпим, но благочестивне сих отметаем и проклятию предаем, и хиротонисуемых же от безглавных по нужи мы не приемлем". Минея старописьменная, генваря 11 дня.
Такожде и в киевопечатней сему подобно пишется тако: "Не приемлем бо (рече) новых догмат, но предварших отец законом последствуем; а иже кроме сих иная защищати прияша, тех благочестивне отметаем и проклятию предаем; и хиротонисуемаго от безглавных ни единаго по нужде приимем; не буди нам то, о Христе царю!" Минея киевопечатная, генваря 11.
Виждь убо, о вопросителю! како глаголеши, яко приимаху преподобнии отцы Сава и Феодосий от севириан хиротонисанных! А они, ни самыя ради нужды, отнюд не желаху оных прияти, яко и крови своя пролияти того ради готови являхуся.
Темже яве от сих предложенных свидетельств является твое лжесловие на преподобных отец Саву и Феодосия; но и от последующих вопросов не не покажется твоих лжей изобильство. От премудрых же мужей обличаешися, глаголющих тако: "Иже кто на лжах утверждается, сей пасет ветры" (Сирах).
Вопрос, 193.
Приятие Иоанна патриарха Иеросалимскаго, хиротонисаннаго от севириан, преподобными отцы Савою и Феодосием, законно ли и правильно сие быти сказуете?
Ответ, 193.
Нигде сего не пишется во историях, ниже Савы Освященнаго, ниже Феодосия Великаго, ниже во иных которых,чтобы Иоанн патриарх Савою и Феодосием, яко еретик и от еретиков хиротонисанный, прият бы был от ереси обращаяйся; но якоже от тебе о сем в вопросех 203, 204, 205, 206, 207, 208 и 209 и в прочих по ряду истязуемся: следовательно и сего вопроса решение, яко о том же, тамо предложити вознепщевахом. Убо тамо да созерцаеши.
Вопрос, 194.
И аще не законно, то чесо ради они тако пративно правилом святых отец сие творили?
Ответ, 194.
Зело законно и правильно преподобнии отцы Сава и Феодосий творили, еже не точию пред простейшим народом, но пред самем зловерным кесарем исповедали свое неприятие от севириан хиротонисанных, даже до ревнования самых претерпения нужд и пролития кровей, якоже в 192-м ответе засвидетельствовахом. Ваше же паче незаконное и весма чюждое приятие иереов изъявляется быти, на преподобных же отец Саву и Феодосия и на патриарха Иоанна клеветосоплетение показуется, о чесом и в грядущих ответех известится.
Вопрос, 195.
В правиле Никейскаго собора, и Карфагенскаго собора, и преподобнаго Иоанна Китрошскаго, и Матфея Иеросалимскаго, и Севаста Арменопульскаго повелевают от еретик хиротонисанных и обращающихся приимати: известите, чесо ради они приимати повелеша и сами приимаху? или кая им в том бяше нужда, яко и от еретик приимаху?
Ответ, 195.
О, сколь чудный вопроситель сей есть! Не престает многажды о едином вопрошати и тем много усугубляет свои вопросы. Но суть ли сие важности касающееся дело, еже, отбегая, паки на тоежде возвращатися? Сие бо несть человеческо, разве песие. Ибо сие животно, не довольствуяся единым напуском на прохожаго и пропустив онаго, паки обращается лаяти на неповиннаго путешественника. Но мы уже, Божиею помощию, вергохом камень на ваше о сих правилах мнение и суетное и неопасное положение на сомнительном, о чесом прочти вышеписанные ответы 163-й, 173-й и 180-й, и будеши удовлителен. И аще, еще воспросительствуя, хапати будеши положенное тамо в ответех: убо да научиниши тому подобающее возъответствование.
Вопрос, 196.
В правиле 66 Карфагенскаго собора и в 70 святии отцы изложиша не токмо своею волею приходящих от донатиан к соборней церкви приимати, но и посольники к ним послаша, да молят и проповедают мир и совокупление к ним от всех церквей, аще покаявшеся приложатся на правоверие. Убо известите нам: кия ради вины посольники к ним присылаху, воеже молити и просити их, яко да приложатся на правоверие?
Ответ, 196.
Каковии убо были еретицы донатисты и чего ради Карфагенскаго собора и прочии святии отцы таковое к ним снисхождение показоваху, и како обещаваху места на своих престолех епископом их имети, о том 163 ответа в 1-м доводе вкратце известихом: убо зде да не повторим таяжде.
Вопрос, 197.
И аще святии отцы приходящих от ересей приимаху, то чесо ради вы сим святых отец правилом противитеся, и обращающихся на покаяние с тою же хиротониею священников не приемлете? И чрез сие вы себе не кроткаго и мирнаго Христа ученицы показуете быти.
Ответ, 197.
Несть се кроткаго и мирнаго Христа след учеников, еже вин еретических качество и количество не разсмотряти, еже времена и лица не соединствовати, еже невозможность отнюдную настоящих еретиков хиротонии к приятию не разсуждати, еже полномочие в хиротонии не имеющих заедино со имеющими полагати: сие бо не суть Христову и апостольскому и отеческому учению последование, но есть еретичеству крайнее прилепление, и недарованных чинов восхищение. Убо по 2-му всех апостол правилу, недарованная восхищающии с самем Христом борются; такожде и приемлющии что от еретик, не что ино приимати нудятся, по Христову словеси, как вместо гроздов терние, или вместо смоквей — репие (Мф. зач. 21; Лук. зач. 27; Иоанна Никейскаго в слове на армен).
Но о сем убо доволен буди предложенными в 163-м ответе о донатистах, такожде и несравненно от сих отстоящих в своих новопреданиях нынешних новороссиян; нас же остави во излишных быти не утружденных.
Вопрос, 198.
Аще ли паки возглаголете, яко аще святии отцы и приимаху, но паки повторне хиротонисаху, убо изъявите: кто и когда и кого хиротонисаху обращающихся от еретик?
Ответ, 198.
Довольно ти изъявихом в 161-м ответе, якоже от еретик крещение не приятно, тако и хиротония; но аще киих и во вторый чин по смотрению святии отцы полагаху под миропомазание, обаче и от тех, после помазания, снова паки хиротонисати повелеваху.
Вопрос, 199.
Аще же вы утверждаете, якобы святии отцы повторне хиротонисаху: убо известите нам, у вас ныне кто приходящих от еретик похиротонисует ли, или ни?
Ответ, 199.
Явственне церковно-тайнотолковнику вопиющу: (яко) рукоположения силы никтоже имать, точию епископове (Катих. малый л. 34), и прочая о сем во ответе 173-м довольне глаголахом, яко не точию простолюдини, но ниже презвитери кую любо власть, аще и малейшую, в хиротонии имеют. Паче же 1-е и 2-е правила всех апостол грознейше и трепетнейше в неданная вскакати запрещают. Но вы, уже чрез приятие ваше иереев, сей всенепреложный евангельский и отеческий, паче же самого Христа Спасителя предел предерзостне прескочивше; мы же, аще и вступаем по крайней нужде в некая действия, но в дозволенная самем Христом Спасителем и Его ученики и прочими апостольскими престолонаместники: о чесом предовольнейше в 10-м ответе и в прочих, якоже о нашем пребывании по нынешнему горкослезному времени без священства, тако и о наших действах, доводствовахом. А еже чесо ради не приемлем от новодогматствущей ныне церкви, якоже крещение, сице и хиротонию: о сем уже в 21, 44, 161, 163 и 185, и в прочих ответех премного засвидетельствовахом.
Вопрос, 200.
И аще сего у вас не имеется, еже бы приходящих от еретик повторне хиротонисати: то убо ли кроме священства и доныне пребываете? — изъявите и сие без закрытия.
Ответ, 200.
Рехом уже в первейших ответех, яко истинных хиротонисателей епископов ныне не видится: убо без онех и священство не может состоятися. Ваше же приятие иереев, отвне приходящих, не на соблюдение правил происходит, но на явное развращение, и пределов всецерковных всепредерзостное разрушение, якоже во многих уже ответех доводствовахом. Мы же, аще и пребываем без священства, но храним заповеданная, еже бы не прейти святых отец пределы, по писанному: не прелагай предел вечных, яже положиша отцы твои.
Вопрос, 201.
Егда где-любо воспоследует нужда в священницех, нецыи же от еретик втораго чина приидут во обращение, епископи или презвитери: то достоит ли таковых с тою же хиротониею, нужды ради, прияти, или не достоит?
Ответ, 201.
Не точию от втораго чина, но и от третияго, в нынешнее время принять хиротонисанных неудобно и невозможно есть; понеже вси еретицы, в своих тайнах, Духа Святаго лишаются, якоже святии учители церковнии вопиют: "Иже (рече преподобный Никон Черногорец) от церкве отступльшеи, не ктому имеша благодать Святаго Духа в себе: оскуде бо подание, внегда пресещися последованию. (Ниже) Ктому не могуще благодать Святаго Духа инем подати, от неяже тии отпадоша". Никон Черныя Горы, слово 63.
Премудрый же Максим Грек глаголет: "Оно же буди ведый, яко всяка ересь начальника и учителя имать диавола". Глава 60. Ученик же его Зиновий мних глаголет: "Имать бо всяк еретик в себе дух диаволь, тем и противится Святому Духу". Соборник малый, гл. 11.
Аще убо по святым учителем вси еретицы в действиях своих таин не присещаются от Духа Святаго: убо обращающиися иереи от ереси долженствуют сей дар получить не от инаго кого, но точию от епископа, понеже над хиротониею епископ обладательство имеет, а не иерей; и аще прилучится и от малейших еретик хиротонисанный иерей и обращаяйся к святокафолической церкви, не иерей (понеже он точию с верными сочетовает), но архиерей священных даров Святаго Духа, еже священнодействовати, сподобляет, и аще таковыя должности возведения не прияв иерей от Духа и дерзаяй в сем, ни что же творит. Ибо сей дар Духа Святаго во архиереи токмо. И сколь чюден убо воистину в них сей дар и велий! Яко егда в них сей угаснет, убо вся чины церковныя соугаснути с ним имут и не священными обрящутся. Ибо кроме его ни иерей, ни жертвенник может быти, якоже божественнейший Дионисий в книге 3-й о церковном священноначалии, во главе 5-й, пространно пишет. Но за долготу сия оставляем; токмо от главы 77-й Симеона Фессалонитскаго сия приведем зде. Глаголет бо: "Яко епископа токмо мvро и хиротонии, и чрез него во всех действиях епископская подается благодать". И паки той же: "Иерей не действует тайны без жертвенника, сей же мvр освящает, мvр же чрез архиерея токмо совершается: и убо кроме архиерея, ниже священник, ниже жертвенник весма; вся сия чрез архиерея суть". До зде Симеон.
И сих ради свидетельств, где архиерейства не будет, тамо и иерейство и тайны престанут. Ибо в Книге о вере, московския печати, во главе 23 о юнитах списатель пишет: "Яко егда отступиша пять владык к римскому костелу, с митрополитом Рагозою, и того ради вмале не сгорети святыни случися церковной, аще бы на той час не подъити патриарху Иеросалимскому Феофану, и посвятити митрополита в Киеве, и тако вознести святыню в рустей церкви". И сия убо в Книге о вере. Но ты вонми: не убо со онеми архиереи до конца и иереи отступили, обаче не воспоминает како либо на тех святыни церковней остатися исполнением. Темже, како убо возможно есть не точию от великих и средних еретик, но от малых обращающихся презвитеров, паче же епископов, в нынешнее время, не имеющее правильнаго священства, прияти? Никако же не мощно, никако; сие бо дело, еже обращающагося презвитера от ересей устроевать на священническое богослужение не иерейско есть, но епископско, якоже и во Изложении святейшаго Филарета патриарха о белорусцех явствуется, понеже велено тамо иерею, исповедав обратившагося простолюдина, доложить святейшему патриарху, власть имущему апостольску, или иному коему святителю, и той како разсудит о нем того и сподобит; и аще изволит архиерей новопришедшаго иерея во обычный его чин благословити, и таковаго иерея сам архиерей на первую степень возводит, якоже о том в грамоте патриарха Антиохийскаго Макария писано: "Ихже вторицею не хиротонисати, облачит их (рече) архиерей, и на коемждо облачении одежд глаголя псаломския стихи, ихже обыкохом глаголати и мы, егда облачаемся прежде службы; молитва же рукоположения ни едина глаголется; точию, егда одеют их, вручает им книгу службы, и во время причащения, причащает их якоже и прочия священники новохиротонисаннии". До зде от грамоты.
Подобне и о испадших священства иереех есть видети, о чем есть в предисловии Номоканона, и в Баронии, лета Господня 864, чис. 4, и лета Господня 869, чис. 5.
По сим убо предложенным свидетельствам, не точию от втораго, но и от третияго чина, кроме епископов, ни по нужде, иерей не может другаго иерея, отвне приходящаго, яко лишеннаго в рукоположении дарования Святаго Духа, прияв, удостоить на священнодейства. О вторем же чине уже в 161-м и 180-м ответех написахом, яко без второхиротонисания святая церковь после миропомазания никакоже приемляше. Убо всячески, якоже от втораго, тако и третияго чина еретиков приходящих иереов без епископов отнюд ниже по самой крайней нужде прияти невозможно.