Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   23   24   25   26   27   28   29   30   ...   46

Ответ, 211.

Якоже в 209-м ответе засвидетельствовахом, Иоанн патриарх не бе ни от кого от ереси прият, понеже в ней действительно не утвердися: убо и зазрения нигде, яко о неправильном, по тебе, приятии не видится.


Вопрос, 212.

Кия ереси скверныи еретик еретик Севир имяше, и коим еретиком подобен, изъявите от святаго писания?


Ответ, 212.

Кия ереси сей еретик Севир име, о том во 44-м ответе, в разделе 3-м изъявихом: зде же повторяти таяжде не годствует.


Вопрос, 213.

От единовольников хиротонисавшихся и в правоверие приходящих с тою же ли хиротониею приимаху, или повторе хиротонисати повелеша?


Ответ, 213.

Преподобный Максим Исповедник, зельнеший обличитель единовольныя ереси, сей премудрый учитель сих еретиков о тайнах, тако же и о самой хиротонии их, сице глаголет: "Ибо иже (рече) сами от себе прокляти суть, и от поместнаго собора, бывшаго в Риме, извержени и священства отчуждени, тии кая совершают таинства? и который дух приходит на тех, иже от таковых хиротонисаются"? Минея киевопечатная генв. 21, в житии Максима Исповедника.

По сим убо словесем преподобнаго Максима Исповедника, единовольническая таинства и хиротония ничтоже суть, якоже и Дух Святый не приходит, но яве дух лукавый, еже познавается от сего вопросительнаго речения: "который, глаголаше, дух приходит на тех, иже от таковых хиротонисаются"? Явственнейше же Феодор Валсамон, патриарх Антиохийский, от сих еретик хиротонию церковию отметну быти засвидетельствует, еже он в ответех к Марку, патриарху Антиохийскому, тако глаголя, пишет: "Вопрос 25. Монофелита, иерейский имея обет, покаянием обратися в по нам православную веру, и приятся и посвятися; помале же обращься на свою блевотину ереси, яко первее бысть; но паки, яко глаголет, по себе самому быв и грех разумев, в православную веру прибеже и приятся, подобне обращься блудному, понеже хощет иерейства сподобитися, ищет творительному научитися. Ответ. (Ниже). Довлеет сице зле поползньшуся приятися по правилам объятию, иерейства бо не сподобится". Кн. 5 Севаста Арменополя.

От сих убо предложенных свидетельств явствуется, яко единовольных хиротония ниже Духа Святаго причащается, но духа лукаваго, ниже и церковию приемлется. А якоже и приимати не летьствует, ибо подобнии сим еретицы, арменове, смотрителне под миропомазание приемлются, законне же и крестити повелеваются: убо от таковых еретиков святая церковь никакоже приимаше хиротонии, якоже в 161-м ответе показахом.


Вопрос, 214.

Пиррос, егда пристал к православным, с тою же ли хиротониею прият бысть правоверными, или повторе хиротонисан бысть?


Ответ, 214.

Нигде не пишется, чтобы сей Пирр (аще и еретик бе монофелитския ереси) от сущих еретик хиротонисан был. Пишет бо великий летописец Бароний, яко прежде сего Пирра патриарх бяше в Царе-граде Сергий, кой акафист, поемый в похвалу Богородице, изложи и устави: сей исперва благоверен показовашеся, на конец же откры ересь единовольных, тай содержимую в себе, за что от Господа смертию наказан бысть. На его же место от православных рукоположен бысть сей Пирр: ибо не бе еще тогда патриархия Цареградская сею ересию повреждена (Кн. о вере Острож. печ. л. 136 на обор.), сице и Ираклийская митрополия. От того бо митрополита по правилом рукоположен бысть Пирр в православии, и потом яве единовольныя ереси себе быти показа, за что не вдолзе в подозрении бысть о отраве царя Константина, и избеже из Царя-града, оставя престол свой, во Африку, идеже и прение сотвори с Максимом святым о вере. Читай Барония, лето Господне 639 и 642.

Показуется же от сих Пирру не от еретик сущих рукоположену быти: понеже он рукоположен бысть еще до соборов поместнаго в Риме (о немже и в вышшем ответе от жития Максима засвидетельствовахом) и пятаго вселенскаго, на которых сии еретицы единоволнии совершенно прокляти и извержени быша. Темже от тогда хиротонисавшихся от единовольников святая церковь никако же приимаше, о чесом в прешедшем ответе написахом, якоже и от прочих еретик, — Нестория, Диоскора, Евтиха, Фотина, и Павла Самосатскаго, и прочих, — дотоль приимахуса тайнодействия, егда не бе еще на них соборов; по соборех же никако же, но всячески от тех отметаема бе хиротония: понеже до тех еще благодатно действоваху, по отрешении же тоя уже оныя отпадоша, убо и таинства тех безблагодатны учинишася. Сице убо и единовольнии, до вышереченных соборов еще тоя благодати причащахуся, по онех же совершенно отпадоша, сице и хиротонисаннии от сих церковию не прияти быша, якоже и в прочих ответех о сем пределе еретическом многажды глаголахом.

Но от вашея страны и сия лжа соплетается, якобы от ереси Максим Исповедник, не епископ сый, Пирра прия, обратившася в церковное исполнение. Такожде я от тебе в вопросе сем, не от власти высочайшия, но правоверными просто прият быти сказуется.

Обаче сия ваша лжа от самех церковных историй обличается. Понеже от повести о Максиме не сего научаемся, аки бы он Пирра, от ереси разрешив, служителя олтарю устрои, но точию сего, яко Максим от ереси Пирра увеща прением, на коем прении и африканстии епископи быша, послушающе святаго Максима с Пирром прения. И егда препрен бысть Пирр, приста к правоверным, и прият бысть от церкве любезно и честно с титлою патриаршею [На поле: 3ри, от церкве, а не от Максима Пирр прият; но в церкви епископи]. И бывшу ему тамо, состави книжицу православнаго исповедания, и пойде с нею к папе Феодору в Рим, подаде ю папе, в ней же отрицание своея ереси сотвори; почте его папа, и на патриаршество Константинопольское возвращен бысть, и при олтаре своем папа престол его постави, почитая его яко патриарха Константинопольскаго. Читай о сем в Минеи житие преподобнаго Максима, генваря 21, и в страдании святаго Мартина папы Римскаго, апреля 14, и Барония лета Господня 645.

От сих всех яве есть, яко не токмо Максим не име власти Пирра патриарха примирити олтарю святому служити, но и сами африканские епископы, точию сам папа, владея всеми африканскими епископы, пред нимже Пирр прокля на писме ереси своя, и от папы разрешен бысть от ереси, и олтарю святому служити вчинен: ибо вящший чин вящшим исправляется.


Вопрос, 215.

Третьяго вселенскаго собора в правиле 1-м, 2-м и 3-м написано: "Аще кто не прииде прокляти и осудити Нестория, да будет извержен". Нецыи же епископи не точию не хотяху прокляти и осудити Нестория, но паче еще и помогаху Несторию еретику, и велицыи на благочестие наветницы быша; потом же обратишася в правоверие и прияти быша: убо ли повторе их хиротонисаху? Ибо они по правилом извержению подлежат.


Ответ, 215.

Подобствуеши ты, о вопросителю! заблудившему путешественнику, и ходящему по стремнинам, и мещущуся семо и овамо, обаче нигде желаемаго себе праволежащаго пути не обретающу. Ибо давольно уже на правила и истории совращался еси, желая утвердити свое иерейство; но того во оных себе помогающаго не обрел еси. Како бо истина лжи помощи имать! И ныне третияго вселенскаго собора к правилам, изложенным о еретицы Нестории, развращенне приступил еси, непщуя себе и в сих полезное получити.

Понеже разум ваш наиболее к третиему правилу того собора прилипает, глаголющему сице: "Аще который епископ, или презвитер, или диакон, от Нестория священничества лишен, той преосвящен есть; а егоже он приял, той не освящен". До зде правило.

От сего убо правила, якоже ваше общество, тако и ты, оному последуя, мнение свое утвердити возжелал еси, якобы от Нестория еретика, или рещи и от всех несториан, последующих оному ересиарху, хиротония в сих правилах приемлется, не разсуждая время и вины последующаго сим: всегда ли от сего ересиарха, или от него последующих прията хиротония, или точию до соборнаго осуждения и проклятия? Или сице рещи: чесо ради ови епископи прияти, овии же извержени? или кая нужда собору бе писати? Тако убо не разсмотряюще, но просте, паче же лукаве закрытыми очесы сия правила предлагаете. О, вашея слепоты! Всуе убо, всуе труд ваш проливается. Кроме бо всякаго благоразсуждения к сим правилом прилипаете, якоже от толкования сих и от прочих доводов явственне вам противное известится, идеже сице пишет: "Егда собрашася святии отцы на Ефесстем соборе, и нецыи от митрополит отлучишася от правоверных и мудроваху повеления еретическая злочестиваго Нестория епископа Константина-града, в человека верующаго и жидовская смыслящаго, и Келестина епископа Римскаго, нецыи же от епископ осташа и не приидоша на собор, и не восхотеша осудити, ни прокляти неосвященную сию и злочестивую епископу, но паче побораху и помогаху им: сего ради убо повеле святый собор помогающих Несторию и Келестину, и тою ересь держащих, и тако смыслящих, изврещи от сана и от церкве изринути. Епископом же и презвитером, ихже бе Несторий и Келестин от священничества извергл, занеже право мысляху и вероваху, тем паки прияти свой чин; тако же паки и иже от своих епископов извержени быша за некая злая дела, и от Нестория и от Келестина прияти и оправдани быша, паки не священни, и абие да извержени будут". (Кормч. л. 90).

Дозде толкование, в немже коль явственно показана вина, еяже ради глаголет святый собор от Нестория лишенным быти священства, тем преосвященным. Но сии вси священнаго чина, зазревшии Несторию, того ли самаго Нестория, или токмо его епархии быша? Обаче святый сей собор не истязует, яко до него еще Несторий в данной ему архиерейской власти бяше, и сим собором лишен тоя. Убо и ставленнии им равны с прежде ставленными до него быша. Вина же сего собора до священных лиц не сия бяше, от Нестория ли, или до Нестория рукоположени были; но оная, яко многия им священнаго чина за обличения извержени быша. Многажды же и то бывает, яко аще епископ малогодный кого от своя епархии священства извержет, не может иныя епархии епископ без общаго суда того на священство возвратить. И сему приклади мнози. Диоскор, аще и ересь име, и по своей ереси некия за противность изверже, обаче до общаго собора никто их разрешити дерзне. Что же, и Феофилом изгнанныя бывше, приидоша просити милости у Златоуста о том, еда прияты быша к церкви? Никакоже; но проси посланием Златоуст о сем, аще Феофил и великих злоб исполнен бяше. И таковых ради вин и Несторием изверженных священства сии святии отцы Несториево связание, бывшее на них, разрешиша токмо, а не от ереси прияша, и похвалиша ревность тех о благоверии, и обличение их вознесоша, и в ничто оное лишение священства поставиша, глаголюще: "аще кто от Нестория не священ, той преосвящен есть; а иже от него прияти быша, отлучившеся от своих епископов за некая злая дела, тии паки несвящени и извержени да будут". Такожде и тех епископов, кии Несторию и Келестину помогающе и поборающе бяху, и ниже на собор приити и прокляти сих еретиков не восхотеша, и сих святый собор изврещи и от церкви изринути повеле. Сицев убо разум сих третияго вселенскаго собора правил суть. А не тако, якоже вы мните, чтоб тамо от Нестория, или от его последователей, по обнажении сана и по проклятии, прията бы была хиротония, еже всячески сему есть несогласно, и отнюд противно. Понеже обычно есть святей церкви всякому противнику терпети, и не вскоре обнажати сана и лишати благодатнаго действия. Многая бо изрекохом ти и в варивших ответех, яко всякаго ради противнаго мнения не бывает абие еретик, яко многим и святым случашеся и случается, аще же в том некако и обличаем на мале, ибо многажды и чувство онаго обличения обличеннаго то объяти не может, или обличник сам малаго ума: темже многащи сие место долготерпению оставляется, да оно паче негли исправит братнее падение [На поле: Златоуст о свящ. сл., гл. 4: коликим долготерпением падших исправляти.]. Ибо ничто тако Бог хощет нам, якоже спастися, и в разум истины приити. Сего ради с долготерпением всяким повеле нам друг друга исправляти, глаголя: аще брат твой согрешит в тя, обличи его между тобою и тем единем; аще ли ни, то поими с собою и другаго; аще ли ни тако исправляется, то рцы церкви; аще ли ни церкви послушает, да будет ти яко язычник и мытарь. А Василий Великий к сим Христовым словесем приложил и сие глаголати: "аще кто и церкви не послушает, но ежели лукаваго сего указанием церковь не вредится, и по обличении долготерпети подобает". Сицево бяше милосердие от церковных предстателей и к Несторию. И како не хотяху погибели святии пастырие истины, повемы, да услышиши, кто он бяше, и на сие прииде, и что его дела конец.

"Несторий бо сей, прежде неже взыти ему на престол Константинопольския церкве, иерей бяше Антиохии града, муж сущь великаго жития и премудрости. И тоя ради его славы, по смерти Сисиниевы, царь Феодосий возведе его на престол Константинопольския церкви, и в начале сего принятия престола велие рачительство показа на искоренение еретиков. Обаче в тое же лето и сам тяжкую ересь сицевым образом нача. Употреби той Несторий некоего епископа Дорофея, аки толкователя своего, на разглашение онаго хуления, а сам еще стыдяшеся, и в церкви, при нем седя, дерзне ко всему народу той Дорофей возгласити: иже Марию наречет Богородицею, да будет анафема. Сему весь народ удивися, и общения с ним имети не хотяше. Феодорит епископ Кирский, имея велие с Несторием дружество, в начале ересь его защищаше; но пришед в чувство, описа его, како изначала людем являшеся смирен и о мире не брегущь. Во второе же лето своего пастырства Несторий ересь свою во вся страны разширяти нача. Но Кирилл Александрийский велие тамо посланиями утверждение подая. Феодосий же кесарь почиташе Нестория, понеже сам его на оное епископство устрои; не похваляше же его учения, обаче не возбраняше его прежде соборнаго осуждения: егда бо монаси поношаху ему, а друзии дерзновеннейшии яве на него в церкви вопияху, яко еретик есть, он же темнице их предаваше, и бити их повелеваше, и во изгнание посылаше. Предлагаху сие кесарю монаси, и даша ему просительное писание, просяще, дабы за их обиды не творил отмщение Несторию, но дабы веру святую от его злаго учения защищал и не медля собор устроил бы. Писаше же и увещаваше святый Кирилл Нестория, дабы веру святую целу сохранил и единогласия церковнаго не терзал бы; удержаваше же и клириков цареградских, иже у него совета просяху, дабы еще о нем кесарю не доносили и ереси на него не возлагали, ожидая его исправления. Того ради и собора египетскаго еще не хотяше составити Кирилл, на немже можаше такожде предати анафеме тех, иже Марию не исповедают Богородицу. Сия вся кафолическая кротость и терпение и любовь отлагаше.

Дойде же сей о Нестории слух и в Рим, и писа папа к Кириллу, аще тако есть; Кирилл отписа к папе, яко тако есть. В лето же третие своего архиерейства написа Несторий и к папе своего исповедания словеса, в нихже Христа простым человеком именуя, а рождьшую его Христородицею. И сие его писание папа соборне в Риме прокля, а Кириллу написа, наместником его своим поставляя, яко да возвестит Несторию, аще в десять дней не исправится Несторий, проклят да будет. Но приим сие, Кирилл не скоро о том к Несторию яви. Писа же от собора Александрийскаго ко клиру Цареградскому, возвещая им о проклятии на Нестория от папы и о разрешении тех, ихже Несторий прокля. В четвертое убо лето патриаршества Несториева третий вселенский собор на Нестория во Ефесе собрася, и сице на нем Несторий, непокоривый в ереси, из священства низложен святыми, и проклят (заочно, ибо не единою зван бысть, не прииде ко отцем, тем и глаголаша): понеже Несторий звание наше презре и послов наших не припусти, понуждени есмы то, емуже безбожно учаше, разсуждати, и егда уразумехом от его писания, еже зде явно почтеся, и от вещания сего, еже из уст в том граде слышано, яко зле научает и нечестиво мудрствует. По законом и правилом, и по писанию святейшаго римскаго епископа Келестина, с плачем и не хотяще, сие плачевное изречение творим: Господь наш Исус Христос, Егоже он похули, сим собором тогоже Нестория от сана епископскаго низлагает, и от чина и общения священническа осуждает. Сие изречение вси епископи подписаша, ихже бяше множае двухсот, и писаша о том к Несторию. По соборе же сем Несторий на покаяние в монастырь святаго Евпрепия заключен; и егда не каяшеся о том, на горшее во Асен пустыню изгнан, и тамо пребывая лютою смертию погибе: язык бо его червие расточиша, изд еще геену себе исповеда". Дозде о Нестории (Бароний, лето Господне 428, 429, 430, 431).

Виждь убо, колико святии Несторию терпяху, в какой ереси и гордыни пребывающу; в коих злых действова, священства не обнажен, и благодать Святаго Духа содействоваше ему; егда же обнажен священства, тогда и благодать ему содействовати преста.

Сего ради удивительно есть ваше неразсмотрительство соборных сих правил, еже отставленных от Нестория священства, за преосвященных вменяемых, к еретиком священства лишенным прикладаете, кия давно отчуждены быша благодати. Несторий бо исперва от благоверных епископов рукоположением прия благодать, и действова до обнажения онаго; а еретицы, осужденныя соборне, от того времени уже не имут благодати: темже и ни коего уподобления в суде Несторию, или от него рукоположенным (до собора) не имут. Убо и приводити сия вам правила себе в помощь весьма неудобно и постыждение суть.


Вопрос, 216.

И аще речете, яко аще и прияты быша, но обаче не без хиротонисания: убо объявите, кто и кого повторне хиротонисаше?


Ответ, 216.

Кия убо от Нестория, или от последующих ему епископов, еще до собора третияго вселенскаго хиротонисани быша, тех без всякаго прекословия святая церковь приимаше без повторнаго хиротонисания, якоже и в вышшем ответе доволнейше изъявихом; по соборном же осуждении и проклятии и извержении из сана Нестория, нигде в правилах и историях не видится, еже бы от еретика сего, или ему последующих хиротония приемлема: паче же негде увидиши сих обдержне и воскрещевати повелеваемых: яко же о сем 44-го ответа в 3-м разделе написахом. Убо по крещении, или миропомазании может ли хиротония прията быти; судите.


Вопрос, 217.

От несториан, сквернейших еретик (о них же Святый Златоуст изъявляет, ничим же лучших богоубийц жидов и прочих поган, не знающих Бога*), аще обратятся к правоверию, достоит ли таковых с тою же хиротониею приимати, или не достоит?


Ответ, 217.

[* В прусском издании: Откуду взял вопроситель, что Златоуст о несторианах пишет? Ибо Златоуст был прежде Нестория: Златоуст успе в 407, а Несторий бяше в 431 лето].

Рекохом ти уже в варившем ответе, яко нигде не видится от несториан приятия хиротонии, а еже в 215-м вопросе сослался еси на правила третияго вселенскаго собора, но колико не правдословно, паче же и ложно ваше указание возъявися, якоже мы во ответе доволнейше ти предложихом! Аще же где инде обрел от несториан хиротонию приемлему святою церковию, то молим тя покажи нам. Мы бо не точию хиротонию приемлему от несториан обретохом, но нигде и крещение сих отметаемо, якоже в 44-м ответе засвидетельствовахом.


Вопрос, 218.

Како убо от сих скверных и ничимже лучших богоубийц жидов прияти хиротонию! — речете; но убо докажите, кто от святых предаде, еже бы от несториан, якоже крещенных, сице и хиротонисанных, паки восповторяти, и чрез сие паки Христа распинати?


Ответ, 218.

Оле ваших злохульств, еже за повторение крещения и хиротонисанных от еретик [за повторение крещения и хиротонии еретической] христораспинателями тех нарицати! Еда убо святии собори и святии отцы, иже инде под мvро и проклятие приемлющии, а инде и крестити повелевающии, по тебе, христораспинатели суть? Или сам Тимофей презвитер великия церкве, извествовавый сим еретиком, именно несторианом, восприимати святое крещение, по тебе, христораспинатель есть? Отыиди! Никто бо доселе таковых злохульств на таковых отметателей еретических тайнодейств не испусти, кроме ваших расширенных уст, на ревнителей благочестия: вы бо первии толь усерднии защитницы еретических действ показастеся, не устыдевшеся не точию нас, но и святых отец христораспинателями нарицати. Убо не со оными и часть свою наследствуете, но с противниками сими, приразившимися своею хулою ко Христу Спасителю нашему и Его угодником, святым богоносным отцем. Со оными же (си есть сопротивниками святыя церкве), Боже сохрани, не впасти бы вам во едино и наказание.


Вопрос, 219.

От ариан, скверных еретик, како святии отцы приимати повелеша? и с тою ли хиротониею, или повторне хиротонисаху?


Ответ, 219.

В 161-м ответе явствовахом, яко от ариан и прочих подобных им еретиков поставление святая церковь не приемлет: убо зде повторяти таяжде оставляем.


Вопрос, 220.

Ариане и наватиане, и прочия подобныя им единым ли чином приемлемы бывают, или разныя чины имеют? И есть ли у святых отец такое разньствие в приятии хиротонии, еже бы от наватиан хиротонию приимати, а от ариан и прочих подобных им хиротонисанных повторяти? — Явити от святаго писания.


Ответ, 220.

Явствовахом в 161-м и 180-м ответех, яко единствен есть в приятии чин в церкви обретаем, еже арианом и наватианом, и прочим подобным еретиком; единственно же, тамо засвидетельствовахом, якоже от ариан, тако и от наватиан не приемлему хиротонию. Убо зде повторяти не разсудихом.


Вопрос, 221.

Арианскою ересию мало едва вселенная [мало не вся вселенная] повредися; егда же свет истинный возблиста и тму арианскаго заблуждения обличи, тогда мнози епископи начаша от ереси обращатися, их же святии отцы, Афанасий и Мелетий Антиохийский, приимаху, или повторне хиротонисаху?


Ответ, 221.

Нигде не видится сих архипастырей церковных, Афанасия и Мелетия, чтобы они от ариан хиротонию приимали, или приимати повелели. Наипаче Великий Афанасий, в третием своем слове на ариан, не точию хиротонию, но и крещение арианское похуляет и не приемлет. Такожде и святейший Мелетий патриарх не не опасашеся поставления оных, яко и сам того прияти отбеже. От вашея же страны утверждается, якобы Мелетий от еретик рукоположение прия; но сие лжеплетение явне обличается от множайших церковных историков, яко он был рукоположен Евсевием, епископом Самосатским, сущим православным по Христове церкви поборником, о чем читай самое житие его февраля 12 дня, такожде и Барония в лете Господнем 360, и блаженнаго Феодорита епископа Кирскаго.

Но аще и обрящеши онех, или других неких, сообщающихся со арианы, или от онех с хиротонисанными; но и от сего кая вам ко искомому вами польза обрящется? Понеже тогда со арианами правовернии не еще во общении разньственни быша, якоже при поставлении Мелетиевом, сице и с прочими арианская мудрствующими, с Феликсом папою, и Евдоксием патриархом Цареградским, правовернии обществоваху. Но еще тогда собора на сих еретиков не бяше, и таковых правил не бе изложено [На поле: Афанасий бе в лето царя Константия арианина; собор же Лаодикийский при царе Уаленте; Мелетий же на втором вселенском соборе бе, и преставися ту]. По коему неуставлению и Василий Великий Уалента царя арианина во исполнение церковное прия. И о сем его оправдает поместнаго собора, иже в Лаодикии, правило 6-е, тако глаголя: "аще и Василий Великий Уалента царя во исполнение прия: не бе бо и еще сего собора, и правило не бе изложено". И того ради во образ того ныне приимати не подобает, аки неуставное по уставлении: понеже последи сих случаев вся сия святыми соборы запретися.

Сице бо и до собора аще и от арианская мудрствующих кто рукоположился бе, не отметается тоя [т. е. хиротониии] еще до онаго, за благодатное действие, якоже от Нестория до третияго вселенскаго собора рукоположенныя не изринушася, или якоже и Анатолий, рукоположенный на патриаршество Константиноградское от Диоскора, еще скрытую ересь имущаго и до собора четвертаго вселенскаго, не изхиротонисан бяше. Чесо же ради сие долготерпение во святей церкви до еретиков употребляшеся, о том, о Нестории, в 215-м ответе довольно явихом. А наипаче и сам Бог, во гресех наших долготерпеливый, исправления нашего ожидает, якоже о содомлянах ко Аврааму рече: глас вопля их вниде во уши Господа Саваофа, и иду соглядати их, аще тако есть по воплю их [На поле: книга Златоуст о священстве, слово 2, гл. 4]. Сему последует в падениих и церковь Христова: не абие устремляется на казни, но к милости паче взирает. Но сие творит тогда, егда еще соборне тех не осудит; егда же по соборе, не убо сие чадолюбие имеет, но яко с противниками поступая обретается.

Но вы о сих арианех не тако разсмотряете, но сливаете времена, и еже до собора что учиненное, якоже и по соборе, неразумне приемлюще и несправедливе, на святых отец ложне указуете, якобы они от сих еретик хиротонисанных приимаху, чего отнюд нигде не обретается. Но веждь убо, яко по соборах Лаодикийском и втором вселенском нигде от ариан хиротония не приемлется, якоже и от послания Константиноградскаго собора к Мартирию епископу Антиохийскому извествуется, еже от сих еретик обращающихся вторицею хиротонисати повелено есть, о чем в Кормч. во гл. 37, на л. 293, и Севаста Арменополя в внизе 4-й явственнейше показуется.