Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   19   20   21   22   23   24   25   26   ...   46

Вопрос, 165.

Вы ныне не имеете ли нужды, якоже в священницех, тако и в причетницех?


Ответ, 165.

Како мы, всепоследнии, не имеем нужды? Но не в сих священницех, или причетницех, коих вы из столь величайших и множайших ересей неправильно и не по чину всецерковному извлецаете, не на пользу себе и в противность всей евангельской истине; но имеем мы нужду, и усердное показуем желание к получению священства богопреданнаго, котораго мы ныне не точию видим, но и слышати отнюд не сподобихомся. Аще ли вы где такое обретосте, изъявите нам подлинно с яснейшим указанием святаго писания. И аще такое укажите, с великим нашим усердием и благоговением приступити к таковому имамы.


Вопрос, 166.

И аще не имеете, то явите, откуду такое изобильство (си есть священников и причетников) обретосте.


Ответ, 166.

Довольно о сем уже в первейших ответах части и раздела перваго глаголахом: яко мы за неимением правильнаго священства, изобильства в священниках и причетницех не точию скудствуем, но и весма онех не имеем. Надежду же свою полагаем, по нынешнему нужному времени, на правую нашу кафолическую веру. Аще же чего доити не возмогаем, убо упованием то навершити тщимся. Якоже и сосуд избранный в послании к римляном вопиет, глаголя: "Упованием бо спасохомся. упование же видимо, несть упование. еже бо видит кто, что и уповает; аще ли егоже не видим надеемся, терпением ждем. сице и Дух способьствует нам в немощех наших". Зачало 98.

И по трех отрок гласу вопием нашему Сердцезрителю: "Во время сие несть вожда ни пророка, ни жертвенника, еже пожрети пред Тобою. но душею сокрушенною и духом смиренным да прияти будем. (ниже): Тако да будет жертва наша пред Тобою днесь, и скончаем по Тебе, яко несть студа уповающим на Тя". Триех отрок песня 7-я.


Вопрос, 167.

Священник аще, зазрев своему епископу нечто в правоверии, отъидет на ину страну, и тамо церковь воздвигнет, и людей собор соберет: то будет ли достоин правильному запрещению? — явите от святаго писания.


Ответ, 167.

О сколь ваше удивительное пристрастие к новотворному священству! Котораго писания и котораго правила вы к своему криворазвращению припрягати не потщастеся! Но и зде, аще явне и не указал еси, о чюдне, обаче мы вемы, яко сей разум ваш к 15 правилу второперваго собора влечется, еже якобы тамо не за ради точию от погрешающаго в правоверии епископа священник, зазрение полагаяй, отходит, но яко бы от того неправовернаго епископа и с полученною хиротониею отходя, и с тою приемлется честно от правоверных, в чесом зело погрешающе обретаетеся. Понеже то правило 15-е второперваго собора сему разуму отнюд не причастно есть, яко же самое то правило яснейше укажет, егоже слагающе того же собора с 13-м правилом (удобоятнаго ради познания), глаголющия сице [Кормч. второперваго собора прав. 13 и 15, лист 221]: "Аще который, рече, презвитер, или диакон, якоже се мня, сведый своего епископа согрешша, прежде суда и уведения всех епископ собора отступит от общения его, и не поминает имени его в службе, да извержется, и всея священническия чести да будет лишен; последующии же ему, аще суть священницы, своея чести да отпадут: мниси же и мирстии человецы да отлучатся, дондеже обратятся". (Ниже, в 15 правиле:) "Аще же нецыи отступят от некоего епископа, не греховнаго ради извета, но за ересь его, от собора или от святых отец не ведому сущу, таковии чести и приятия достойни суть, яко правовернии". До зде от правила.

Внемли убо разуму сих правил, в них же сие обретается:

Первое. Яко отлучающихся священников, или мирских человек от епископа, за греховныя действа, прежде собора всех епископ, овых из санов извергают, других же от церкве отлучают.

Второе. Аще же кия отлучаются и кроме соборнаго суда от епископов своих, но за ересь кую либо, ведомую или неведомую от святых отец, таковии не точию казни никаковыя не понесут за свое безвременное отлучение, но и чести и приятия достойни, яко сущия правоверию опаснии хранителие обрящутся.

Но можеши ли зде вместити свое разумение, яко отступившии от епископа, ересь имущаго, отступиша и с хиротониею, от еретика имеюще ю? Отъиди, — понеже зде не глаголет, яко сии презвитери в таковом разуме от имеющагося епископа хиротонисашася, но едино точию засвидетельствует тех за ересь отлучение, яве яко внове от таковаго епископа воспроповеданную. Понеже и от сего явствуется, яко от внове зачатыя епископом ереси отлучение презвитеров правило сие показует, яко аще, рече, и до соборнаго суда отлучаются от епископа за ересь, чести и приятию суть достойни. Убо явленнейше есть, яко сие правило 15, не от таковых епископов о отлучающихся священницех изглашает, кия (епископи) в себе давную и явную имеюще бяху ересь, и от собора православных конечне за ту отлучени и извержени быша и клятве церковней предани, но и еще от собора, или от киих святых отец неведому сущу. Яве, яко мнению вашему изглашение того правила всячески не согласует (но в настоящем правиле 15 отнюд сего не изображается, убо и влечение вашего разума ко оному отнюд неправедно и неправильно). Изволяяй же да чтет 69-й ответ о пределе суда церковнаго на воставляющих ереси. Но коему бы вещь сия удивлению достойна была, или вам помощна, аще бы до собора и конечнаго извержения и от таковых поставлени бы были? Понеже священства изобнажается епископ, или презвитер за противность в правоверии на соборе; до собора же от многих еретиков тайны принимахуся, якоже от Павла Самосатскаго, и от Нестория, и от прочих множайших; последи же собора отец и по осуждении, не ктому приимахуся от них тайны. Но в настоящем 15 правиле отнюд сего не изображается: убо и влечение вашего разума ко оному отнюд не праведно и не правильно. Такожде и изъяснитель сего 15 правила, преподобный Матфей Властырь, вам согласнаго отнюд не назнаменует, якоже он состава 600-го во второй на десять главе, тако пиша, глаголет: "Аще ли же патриарх негли, рече, или митрополит, или епископ, которую убо ересь, от божественных отец зазренную, народне и нагою проповедует главою: иже от того приобщения освеняющи, или ограждающе себе, не точию не достойным муце быти, но и прикладныя православным почести да сподобляются. Не бо епископом, но лжеепископом и лжеучителем зазреша; не в раздоры соединение церковное разсекоша, но и от раскол и раздор церковь потщашася разрешити, елико по тех силе. Чего ради и мы, добре творяще, ветхаго Рима отрекохомся приобщения и прежде соборнаго разбрания и суда". Согласует же сему и священный Златоуст, повелевая от зазорно живущих священников не отлучатися, от погрешающих же о вере не точию отлучатися, но и судити оных не запрещает, о чесом в Беседах на послание к Тимофею 2-е, тако глаголет: "Яко подобает повиноватися учителем и священником, и не судити их, аще и житие имут укорное; аще же о вере погрешают, тогда не подобает покарятися им, но и отбегати и судити их". Бес. апостольск., л. 2508.

Изволяяй же ведати о сем пространнее, да прочтет ответ 10. Мы же согласне вышепредложенному 15 правилу согласная отдавше, и известне уведевше, кия и от них отступающия от своих епископов зазренни и отвержени, кия же чести и приятию достойни показуются: и тако с выше надлежащаго от себе не глаголем.


Вопрос, 168.

Священник егда приимет поставление от архиерея, не получив же сый благословения воеже вязати и решити, но точию литоргисати; егда же приспеет нужда воеже исповедати кого любо, то достоит ли таковому послушати требующаго, или паче наблюдати повеление архиерейское?


Ответ, 168.

Вязание и решение во грехах кающихся священниками (паче же вашими попами, весма новшествующими епископами поставленными и от тех самовольне отлучившимися) не бывает в вязание и решение. Ибо сам Господь сию благодать единым апостолом даде, и не просто словом даде, но дуновением божественным своим: якоже богогласный Иоанн написа, глаголя: "и се рек (Исус) дуну и глагола учеником: приимите Дух Свят, имже аще отпустите грехи, отпустятся, и имже держите, держатся". Пишет же преподобный Иосиф Волоцкий к преосвященному Нифонту Суздальскому тако: "Зрите ли, яко Святым Духом и вязати, и разрешати, и оставляти грехи, и держати; кроме же благодати Святаго Духа никтоже может кому сия сотворити". Но сей дар Христовы власти единых апостолов, и тех наместник епископов (якоже выше и ниже изъявится), а не попов [Номоканон, лист 715]: темже и ни что же есть вязание и решение ваших попов, паче же связание грехов обрящется, якоже и в Номоканоне глаголется: ни что же бо кто дает не имеяй, и ни что же приемлет от неимущаго, аще и мнится имети: не может бо человек имети, не приим от Бога. Занеже которой поп без повеления и заповеди святительския что действует, подобен есть согрешению нерукоположне действующаго. Зри Номоканон л. 715.

Что же в Регламенте о священниках и правильно ставленых (аще и от новых) глаголется? По Номоканону согласная написано сице: "Ибо священник изгнан за преступление, или своевольно сам оставив врученную себе церковь, уже почитай не священник есть и великий грех приемлет, действуя священническая, и приемлющии того сугубому греху подлежатъ". Зри л. 76. И се о правильно рукоположенных, согласное Номоканону; а о неправильных что и рещи. Ибо сицевии не точию что большая, но и меньшаго благословения народу подати в силе священства Христова не могут. Ибо вся сия архиерейския суть силы, а не поповския.

Гряди убо, изыдем и на самая апостольская правилная запрещения, яже иереем без повеления своего епископа ничесоже творити повелевающая [Кормчая, лист 10 на обор.]. Якоже в них видети есть правило 39, в немже пишет сице: "Без воли епископа своего презвитери или диакони да не творят ничто". Толкование. "Несть достойно презвитеру, или диакону, без повеления епископа своего, ни людей вязати, еже есть отлучати, или умножати или умалити епитимию, сиречь запрещение, или ино что таковое творити, аще не будет дано им от епископа о том писания. сиречь приимати в покаяние, и вязати и разрешати. Кроме того не могут творити: яко епископу суть поручени людие Господни".

И паки, Карфагенскаго собора правило 43 повелевает ни нужди нашедшей разрешити кающагося без воли епископли, в немже пишет сице: "Кающимся противу грехов епископ да даст запрещение; презвитер же без воли его, и нужди нашедшей, не разрешит кающагося". Толкование. "Иже от Бога приемши власть епископи вязати и разрешати, противу числа греховъ и противу обращения кающагося от грехов, запрещения повелевают; презвитер же без повеления епископля ни умножати, ни умаляти запрещения не может, ни кающихся в заповеди сущих разрешит, ни божественных даров сподобит их, аще и отшел будет епископ". До зде Кормчая.

Блаженный же Симеон Солунский во главе 49-й пишет: "Еже убо иереом действовати сицевое, по нужде бывает и с повелением епископским, и не присутствующу ему, но священствующу. И большия грехи, се есть отрицание веры и убийство, и священников падения к епископам просити подобает, и ина, елика отбегают исповедникова разума, и вся творити с епископским советом, яко епископа дело сие свойственно". И паки тойже на вопрос 13: "Темже презвитери не имут хиротонии во еже решити и вязати, но токмо епиекопи". (И ниже) "Ниже убо воля есть презвитеров во вся разсуждати, наипаче же отрицании не могут разрешити, токмо епископи, ниже убийства". И паки в том же ответе: "Темже презвитери, яко семьдесят чина имеюще, и не имеют волю Духа подати, сиречь благодать: или хиротонисати, или мvро творити, или разрешение дати в Дусе". До зде Симеон.

И в Номоканоне глаголется (л. 722): "Имут бо (рече) архиереи власть запрещати и решити, якоже и святый собор определи, яко закон вязати и решити от Бога приемшии".

Филадельфийския же церкве предстатель, блаженный кир архиепископ Гавриил, о священстве глаголет: "Епископу убо дело есть, еже учити, крестити, вязати и разрешати человеческия грехи, и рукополагати прочия вся церковныя степени. Сия бо непосредне Господь святым апостолом подаде; ими же по всей вселенней рукоположени бывше епископи, благодать и власть сию прияша, якоже святый Климент Римский епископ от верховнаго апостола Петра, и святый Тит Критский епископ от святаго апостола Павла, и друзии святии апостоли и ины в иных местех рукоположиша епископы". (Ниже). "Священником же дана бысть власть от рукоположивших я священнодействовати пречистыя тайны, и преподаяти сия верным, якоже чин и последование взыщет святыя церкве". Книга о седми тайнах, глава 6.

Зри убо правила апостольская и отеческая, яко и правильный священник ни по нужде не может кающагося без повеления своего епископа разрешити: коль паче не правильный сего учинити не может.

Но рцы нам о своих попах: чиею властию тии вяжут и решат грехи кающагося? а наипаче кое правило повеле вам когда отвне пришедшаго попа на степень священнодейства возводити? Ибо в предисловии Номоканона пишет: "Якоже не возможно ему (сиречь попу) хиротонисати, сице ни на степень священнодейства испадшаго паки возвращати". Дозде Номоканон.

Ваши же попы в должность архиерейскую вступльше смело, не смотря правильных от Духа Святаго чиноположений, как река некая, вземшеся из брег, ни во что уставленныя пределы вменивше, на вся беззакония от своевольства и роскоши возлияшася. Апостольское правило 1-е, комуждо в данном чине пребывати повелевает; а закрепя сим словом Божиим, повелевает, глаголя: не суть бо наша, но Божия. Вы же, по страсти своей поборающе, ни во что гром сей смертоносный положисте; своя басни выкладываете, якоже и от вопросов ваших познавается: таже, вопиете, власть и благодать Святаго Духа епископом и попом, и прочая.

Оле, вашея дерзости! Отсюду у вас новое Евангелие отверзеся, и новое апостольство, от лет Христовых небывалое, воспроповедася? Но о сем убо прекратим речь в настоящем ответе; в грядущих же нечто сему согласное предложити намерение имеем.

Но глаголеши, яко самая нужда понуждает во исповедь входитити кающагося, аще и неповеленному от епископа, священнику.

Ответствуем. Входити убо летьствует, но не таковою властию, якоже приемый от епископа повеление, паче же при смертной нужде, да и то правильно рукоположенному священнику от православнаго архиерея, якоже Зинарь [Зонар] во главе 90-й повелевая, глаголет сице: "Иерея аще кто от человек умираяй зовет исповедатися ему, а иерей отрицаяйся речет, яко не имам повеления от архиерея, не смею се сотворити, и аще умрет сей человек, не исповедався, то грех сей на иереи том, понеже не вня писания глаголюща: да не отвратиши приходящаго к тебе, и оскорбиши дух его, безумный иерею. Добре глаголеши, яко не имам повеления; но нужды ради притекающаго к тебе приими Бога ради. Тем же да покается иерей той три лета, поклонов сто на день". Дозде Зонар.

Виждь убо, яко и приняти повелевает сие правило не повеленному от епископа иерею во исповедь принимати, но при крайней нужде смертнаго часа; прочее же не глаголет правило сие властельски с кающимся тому священнику, во отличность несвященным, но образом смиренным приять повелевает, Бога ради; да к сим же несть такого определения ему, чтобы и прочих, здравых сущих, к себе во исповедь вводити; еще же не такому попу сие учинить повелевается, которой бы имел неправилное иерейство. Вашим же попам, ни смертной ради нужды, где дозволение во исповедь кающагося приняти обрящется?

Речеши ли сие, яко простолюдини, и без повеления епископскаго, и здравых сущих приемлют?

Отсловствуем. Афонстии отцы в Номоканоне освященному по повелению епископа кающихся приимати сказуют, не священным же в примирение кающимся имети искусство определяет. О чесом пишущи, тако глаголют: "Елицы убо суть освящении, по повелению епископа исповедания человеческая да приемлют; не священному же иноку, наказание его искусство дает власть примирения: аще убо себе самого безбедно соблюдает, и исповедающихся Богови да примиряет". И паки выше. "Аще убо кто есть священник, неискусен же, а другий не священник, искус же имея духовнаго деяния, сему паче священника праведно есть помышления приимати, и правильно исправляти". Номоканон, л. 730.

О исповеди же несвященных в 261 ответе засвидетельствуется.

Темже сия вся вышепредложенная свидетельства, еже священнику под властию быти повелевают епископа и его волею кающихся примиряти, или аще ему не дозволится во исповедь принимати, но точию священнодействовати, ключима суть правильно поставленным священником от правоверных епископов. Вашим же иереом ничто суть ключимо: понеже писание святое гласит верным, а не вне обретающимся. Убо без всяких свидетельств ваши иереи из ограды церковныя исключени суть, и ниже что им от церковных действ поручено суть: но весма всего чужди суть.


Вопрос, 169.

И аще достоит паче наблюдати повеление архиерея своего, нежели требующаго и исповедующаго грехи своя и кающагося со слезами, изъявите о сем от святаго писания.


Ответ, 169.

В вышшем ответе явствовахом, како презвитер должен под властию своего епископа жити, и како грехи кающагося приимати, такожде и в смертную нужду. Зде же таяжде да не повторим.


Вопрос, 170.

И аще умрет той, иже требоваше исповедатися, и разрешения грехов своих желая получити, не получив, не послушавый же священник не будет ли повинен какому правильному запрещению, аще и не имел повеления архиерейскаго?


Ответ, 170.

Явихом о сем в 168-м ответе; зде же, долготы убегающе, таяжде глаголати оставляем.


Вопрос, 171.

Священник, егда получит через хиротонию власть иерейства, не приим же благословения вязати и решити: и той священник равен ли с мирянином к приятию грехов исповедания, или не равен?


Ответ, 171.

Аще убо апостольская правила без дозволения епископа ничто творити не повелевают; аще отеческая правила ни по нужде запрещенному во исповедь приимати иерею не дозволяют; аще Номоканон без повеления и заповеди святительския иерея действующаго подобне нерукоположне действующим согрешающа известует; аще Зонарь таковым иереям точию при крайней смертнаго часа нужде приняти во исповедь кающагося дозволяет, якоже в 168-м ответе засвидетельствовахом: убо таковый священник, аще и правильно хиротонисанный, не не есть равен в приятии кающихся на исповедь неосвященным, паче же аще не искусен будет, и в равенстве не полагается; якоже от Номоканона в вышереченном ответе засвидетельствовахом.


Вопрос, 172.

И аще равен, то явите: где о том предписано, яко равен с миряны?


Ответ, 172.

Аще вышеписанный ответ согласиши со 168-м, всяко искомое не не обрящеши.


Вопрос, 173.

Святый Златоуст пишет: чрез архиерейская и священническая уста и руку сам Бог благословляет. Вы о сем благословении како разсуждаете? — обое ли заедино приемлите, или едино другаго больше быти разумеете?


Ответ, 173.

Яко не искусиша Бога имети в разуме (глаголет апостол) предаде их Бог глаголати неподобная, или превращати разумы святых отец к своей прелести. Везде бо ты, о чюдне, аки рыба нудишиса противу быстрин разума законнаго шествовати, не изволяя упокоити свои мысли на догмате евангельском, на правилах апостольских, на учительстве и обычаи восточныя церкве; но на неизвестных и развращенных словах иерейства своего действа утвержати тщишися: ибо вы (со своим иерейством) границы богоуставныя в священстве своем прешедше, и тщательно показуете иерейству своему некую часть удельную архиерейству в хиротонии оному изъявити, да в приеме своих попов благословение равносильно возпроповедите всем. Темже и не сообразно Златоуста приводиши себе во утвержение, глаголюща тако: "чрез архиерейская и священническая уста и руку сам Бог благословляет". И от сего словеси иерейско благословение со архиерейским единако быти возмечтал еси. Оле, богопротивнаго твоего гласа! Аще ли единако: то равно ему, как и архиерею, испадшаго степеней попа на тыяжде благословением паки возвращать, и запрещением благодати священнодейства обнажать, последовательно и еретическия хиротонии благодатныя устроевать, и олтаря служителя вчинять. И тако архиерейству не малая обида сотворится, и Духу Святому велия противность израстет, иже устрои во своей его церкви разныя степени священных чинов, и коемуждо свое делание даде, по своей Его воли. Архиерея бо в церви постави главою быти, прочия же аки удове от него силу приемлют, и той, аки первейший в дарех, от самаго Бога непосредственне дары Духа Святаго приемлет: прочии же степени, посредством его дары духовныя приемлюще, прочим людином преподают во спасение. Слыши убо, како глаголет о различии чинов блаженный Симеон архиепископ Селунский, в книзе своей, на вопрос 36-й, сей: Кое различие епископа, или иерея? и чесо ради не хиротонисает иерей, но токмо литоргисает и крещает? Глаголет: "Различна суть Духа дарования, и овому дается сие, овому же оное дарование; вся же сия действует един и той же Дух, яко же писано: и овым убо положи Бог в церкви быти, первое апостолы, второе пророки, и прочая. Темже, овый есть прочитаяй людем, овый ангела, овый диакон, иже служитель у божественнаго Дионисия именуется, овый же иерей, иже совершителен глаголется, яко даже до сего, еже совершенно действовати может, не воздавати же дарование; овый же есть святитель, яко священная и божественная вся действовати могий, и воздавателен сих сый: тем же и просветителен именуется, яко в себе источник имея просвещений, совершеннейшую благодать. Якоже и Спаситель о Себе же глагола и о своих ученицех, сам убо и телесно исполнение всего Божества имеяй, ученицы же Его по причастию Его дарования. Темже и: Аз есмь (глаголет) свет мира; учеником же: вы есте свет мира; чрез сих убо наследников его архиереев благодать, якоже свет, всем воздавается; иереи же сию благодатъ не имут, но токмо священнодействовати и крестити, и сия убо кроме архиерейския не сотворят силы, и мvром и хиротониям". Той же Симеон Селунский, во главе 75-й сице сказует: "Единый действует епископ, свидетель свещателен сый, яко подражает Бога Отца светов, и Его же обилует благодатию, си есть дарования даром, и всяк чин, и вся тайны, и все совершенство чрез него". Паки той же [глава 76]: "Якоже бо от источника света, вся церковная чрез него совершаются; темже свящателен именуется епископ". И паки той же : "Яко от епископа токмо мvро и хиротонии, и чрез него во всех действиях епископская предваряют благодатию. Слыши, ничтоже действовати священник может в Дусе, или иное что действовати, аще хиротонию не имеет; сия же от архиерея есть: убо архиерейство чрез ню действует [глава 77]. Паки: иерей не действует тайны без жертвенника; сей же чрез мvро освящается; мvро же чрез архиерея. Ниже жертва, ниже священник, ниже жертвенник, весма убо вся сия чрез архиерея суть". До зде Симеон.

Подобне же и святый Феофилакт архиепископ Болгарский (Благовест. Лук. зач. 95) в толковании на словеса Христова, разделяя чины, глаголет: "Ибо в церкви чин совершение имать, предстоящими украшение; и ни болшем лепо быти, ни мнее; еже слова благодатию трие сии образи в церкви: очищение, просвещение, и совершение, три сия действа наследуема чинов; диакони очищают оглашением учения, презвитери просвещающе крещением, архиереи же священныя чины поставляют и совершают". Дозде Феофилакт.

Согласует же сему и в Катихисисе малом (л. 43) глаголемое: "Рукоположения (пишет) силы никтоже имать, точию епископове".

Блаженный же кир Гавриил архиепископ Филадельфийский о виде священства сице глаголет: "Вид есть божественная благодать, яже руковозложением святительским на рукополагаемаго низходящи, и совершена того иерея творящи".

Что же речет нам небесный ум, Дионисий Ареопагит, услышим, иже во главе 5-й книги своея сице пишет [Дионисий Ареопагит. книга О священстве, глава 5]: "Знаменай, яко освятити и свершити мvро несть презвитера, но ниже жертвенник совершити, да принесет на нем, ниже хиротонисати: сия бо един священноначальник сотворити имать, ихже кроме священник ниже крестит, ниже принесет, но в предсвященных от епископа священнодействует". До зде Дионисий.

В предисловии же Номоканона пишется: "Мирских человек простых грехи в менших со искуснейшими (поп разсуждает), иереев же и протодияконов грехи, яже извержения томления наводят, епископом суду подлежат; да не дерзнет духовник разрешати их: якоже бо не возможно ему хиротонисати, сице ни на степень священства испадшаго возвратити". До зде Номоканон.

Вся же сия предложенная подкрепляют и апостольская правила. Якоже 1-е всех апостол тако глаголет: "Кождо в данном ему чину да пребывает, и не преступает заповедей: не суть бо наша, но Божия", и проч.

Суть же и ина множайшая священная писания, отнюд в равенство, якоже в действиях, тако к действиям в благословении иереов, к епископом не приводящая. Но виною краткости оставляем.

Напоследок же и сим примером объясняем неравенство благословения иерейскаго с архиерейским, не яко, глаголем, по святости жития, или по преданности того действия, но по силе неравенства преосвященнаго чина. Ибо и сам священный Златоуст (якоже о нем повествуется в житии его), егда бывш иереем, восхоте во Антиохии при патриархе Флавиане исцеление преподати на славу Божию жене старейшины града, не первее сам, яко по тебе равным, благословением огради воду, но патриарха о сем моли, и ему покропити глаголаше, еже и бысть. Яве, яко и написавый сия, ведый достоинство и силу архиерейския власти, не дерзаше входити, аще и не в запрещенная, пред вышшим себе.

Но гряди и сим примером объясним подобающее коемуждо чину. Противу солнца лежащее сткло, или вода, лице солнца и свет приемля, яве в себе солнце и свет того воображает; от сткла же и воды отпрядающий луч к стене, един луч без лица солнечнаго показует, от тоя же храмине един свет, а не луч разлиятелен бывает. Сице же разумети леть и о церкви Христовы дарех: лице Божие и свет его дарований непосредственне во архиереи, аки в стекле и воде солнце; а от него луч един во иерейство преподается; от иерея же народу не луч, но аки един свет, раждается благодать. Читай о сем в третией книге Дионисия Ареопагита о церковном священноначалии, во главе 5, пространнее.

И сих ради вин, како может быти иерейско благословение со архиерейским одинаково? — разве в том, в неже на поставлении прия, а не в хиротонии, и подобных. Но и в данных ему архиерейство действует, или, рещи, благодать архиерейская, яко луч отпрядающий, действует. Темже аще и действует, по Златоусту, Бог якоже во архиереех и иереех в благословении, но точию кроме хиротонии; в хиротонии же, якоже той же Златоуст в беседах на послание 1-е к Тимофею написа, епископом отдает власть имети. Чти в толковании его на зач. 283.

Ты же, о дерзновенне, силу власти и благословения и в хиротонии иереом с епископами имети равную нудишися, якоже и существует сие ваше мудрование во всем вашем согласии, и сие в народ, яко тлю некую, влагаете, да вси, взирающе на сия ваша словеса, с верою к попам вашим приступают, мняще в них суще быти такое достоинство. Зрите, о боголюбцы и правды законныя взыскателие! како человекоугодники свои догматы пишут, и какими законами надеются последующий народ к Богу приводити: не взирающе ни на самого Бога приказания, и на святых апостол правила, и святых отец повеления, свое новое апостольство и учительство заводят, и в том хвалятся. О, безчювствия! Ибо акпостоли и прочии вси святии архипастыри церковнии учат, да знаем в чинех церковных различие даров Духа Святаго: ину власть и благодать епископов, а ину власть и благодать Святаго Духа иереев и прочих, от коея их науки сице глаголати повинни: "того же Духа Святаго власть и благодать епископом и попом", а не сице глаголати: "та же власть и благодать Святаго Духа". Ибо аще глаголати: та же власть и благодать Духа епископом и попом, слияние и равенство есть даров Духа Святаго, и глаголание се есть зловерно и еретическо мнение вносящее, яко по всем действиям равен есть поп епископу. Сице бо глаголяй бяше, или сливаше власть епископскую со иерейскою, Арий, еретик, иже от Понта, якоже о нем святый Епифаний Кипрский во исчислении ересей, во главе 75 пишет: "А еже глаголати: того же Духа Святаго власть и благодать епископом и попом", се глаголание благоверно. Ибо от коего Духа Святаго власть епископу, от Того же Духа Святаго власть и благодать и попу, но во иной силе, и во ином действе.

Прочее же во исполнение изволяяй да чтет ответы, в первом разделе положенныя, и сего раздела 168 ответ: мы же на предлежашия ответы простираемся.