Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   38   39   40   41   42   43   44   45   46

Вопрос, 382.

По сказанию церковных учителей, антихрист будет царствовати полчетверта лета, и потом убиет его Господь Духом уст своих. Засвидетельствует о сем муж желаний во главе 7: "дастся в руку его. до времене времен, и пол времене". Книга Кирила Иеросалимскаго. Ипполит, в Соборнике лист 134. Синоксарь в неделю мясопустную. Книга О вере, глава 30. Апокалипсис, глава 13. Небеса, книга 4. Вы сия времена како приемлете? и царствования антихристова колико лет сказуете быти? явите и сия с показанием от святаго писания.


Ответ, 382.

Весьма бы довлителен был на вопрос 361 ответ, ибо тамо пространно писано, яко седмица новаго Христова закона не есть определьна, но символическа, юже разделити пророком и антихристу глаголется: убо от тоя можно познати и антихристов приход быти не на полчетверта лета.

Такожде и в 366 и 367-м ответе показахом, яко антихрист по тысящи лет от воплощения Божия Слова приидет на полчетверта лета. Но от тысящи, всем можно ведети, яко уже не полчетверта лета прейде: и от сих не невозможно уведети, якоже не во уставных летех пророчество Илии и Еноха быти, тако и антихристово царствование.

Но понеже уже последний от многочисленных ваших вопросов сей вопрос числится, и в народе многое о сем таинстве истязание происходит (еже глаголется иносказательне на полчетверта лета прийти антихристу), того ради судихом и на сей вопрос, с показанием священнаго писания, и с правым разсуждением, и сей ответ начати: и с Божиею помощию совершити, на славу и честь и похвалу святокафолической воюющей на земли церкви, и ликующей, яже на небеси. И тако убо предъизвестивше, входим в самое показание священных писаний о сокровенном разуме сем, еже о полчетверте лете антихристова царствования.

Тайнозритель неизреченных откровений, и тайноглагольник вышних Божиих таин, возлюбленный ученик Христов Иоанн Богослов, в соборном послании своем пиша, тако глаголет [1 соб. посл. Иоанна, зач. 71]: "дети последняя година есть. и якоже слышасте яко антихрист грядет, и ныне антихристи мнози быша, и от сего разумеем, яко последний час есть". До зде Богослов. И от сего явственно показуется, яко дух антихристов уже в мир прииде, и антихрист в мире есть уже: и время есть последнее, в неже дух антихристов уже царствовати прият начало. Того ради и нарицает Богослов быти тогда последнюю годину, таже и последний час нарече тогда быти: яве яко не уставную годину, ниже уставный час нарече в тогдашнее время, но духовный в том сокровенный заключает разум. Понеже всему миру известно есть, яко множество лет продолжися, отнележе глагола сия апостол, яко 1790 лет и вящьше преидоша. Убо разумеем, яко не уставную годину, и не уставный час нарече апостол. И аще сия не уставна, убо от сих разумети дается, яко не уставны лета суть и сии, яже три и пол, в них же антихрист царствовати имать. Глаголет бо оный же тайнозритель [Апокалипс., глава 20]: яко зверь, сиречь диявол, связан на тысящу лет. И егда скончается тысяща лет, подобает ему отрешену быти на мало время. И егда, рече, скончается 1000 лет, разрешен будет сатана от темницы своея, и изыдет прельстити вся языки на четырех углех земли, Гога и Магога собрати их на брань, их же число яко песок морский.

Ипполит же святый толкует [в толк. Апокалипс. малорос. кутеинск. печ.]: "отнележе бысть связание сатаны, от сшествия во ад Господа нашего Исуса Христа, в лете 5533-е, до лета 6533-го, как выполнится 1000 лет, в той час отвяжется сатана не прелесть през лет полчетверта". Творец книги О вере, во главе 27 пишет сице [лист 238]: "по тысящи лет развязанныи ангел бездне совершил, яко той Силевестр Магус, и по нем его по се время отступницы предаша закон". И паки той же во главе 28 пишет [лист 244]: "за развязанием сатаны прельстишася, отлучишася, возвратишася, от преданных святыми апостолами Петром и Павлом, ими же всуе они щитятся заповедей. и осуетишася в мудрости своей, и измениша славу Божию, в подобие тлеющаго человека папу".

Зри духовный разум, иже о летех трех и пол. Яко егда в лето 6533-е разрешися сатана, оттоле начало прияша три и пол лета, в них же антихрист царствует.

Темже, аще и рече Богослов, яко подобает отрешену быти на мало время: обаче всему миру известно есть, яко по тысящи лет, за развязанием сатаны, едва не осмь сот лет уже прейдоша, в них же царство антихристово утвердися. И во главе 17 пишет: "пять их пало, и един есть, а другии еще не пришел: егда приидет, мало ему подобает быти". А в толковании того стиха протолкует: "последнее же антихристово мучительство, еже мало время державствовати имать. аще бо на первое их единоначальство возрим, зане овая убо от них на 500 лет начальствоваша, овая же на 1000 лет, ин же инако, и всякое число летнее, мало есть противу святых безконечнаго царства".

Зри Богословский разум, еже глаголет мало время антихрист царствовати имать: яко аще и 500, или 1000 лет, но мало есть противу святых безконечнаго царства. Полчетверта же лета от разрешения дияволя до скончания века. Якоже во Апокалипсисе протолковася [Апокалипсис трехтолков., глава 20]: "егда исполняется 1000 лет, в той час отрешится сатана, до реченнаго ему времене, еже три и пол лета, и потом будет конец". Якоже и в Зерцале мирозрительном пишет [Зерцало мирозрит., часть 2, глава 31]: "двадесять лет царствова Саул во Израили, писание же глаголет две лете царствова". О том бо и пророк Давыд глаголет: "яко тысяща лет пре очима Твоима Господи, яко день вчерашнии, иже мимо иде, и стража нощная". Такожде и Петр апостол, в соборном послании во главе 3, пишет сице [2 посл. зач. 68]: "едино же сие да не утаится возлюбленнии, яко един день пред Господем, яко тысяща лет. и 1000 лет, яко день един".

Хощеши ли, о вопросителю, да явим ти и из примеров, еже твое умствование (во уставныя полчетверта лета царствование антихристово полагающее) зельне ратующих. Таже и конечне успокоим наше слово, от долгопротяжения твоих вопросов.

Но донележе не внити во оная, судихом на празе разсуждения священных писаний постояти, и тако начати оныя. Аще убо Павел апостол, и Иоанн Дамаскин, и прочии учители церковнии, антихриста человека быти определяют [к солун., глава 2, зач. 275. книга Иоанна Дамаск., глава 36]. Сказуют же ему святии литерально, якоже и ты в вопросе наупомянул еси, полчетверта года царствовати. Первый год на упражнение сие себе прострет, еже бы ему взыти на престол и утвердитися на нем [Кирил Иеросалим.]. А во остатных полутретьи годе, увещати вся языки. Но како увещевая, может человек в толь краткое время покорити всея вселенныя безчисленныя народы, и толикия грозныя орды, и толикия сильныя державы, и толико великая государства, и толико пространныя империи, толикия провинцыи, аки спящих, и аки младенцев, или агньцев не противящихся, всех под свою державу подвести: а наибольше сего, послати во всех сих, от вселенныя на поклонение к себе собрати. Вещь великаго недоумения исполнена, и ум человеческий сего объяти не может, еже бы толикая в сия времена содеяти. Но не точию человеку, но и дияволу сия содеяти не мощно. Ибо самовластие вси имут, живущии на земли человецы. И тое абие и диявол на своя коегождо преложити и содеяти, да поклонятся ему вси, не имать власти. Или и сие рещи: аще бы он своими бесы и соделал да обратят человеков, отвращенных от Бога, во еже ему покоритися и имети его за царя: но вси прийти к нему на поклонение, аки человецы, в краткая сия времена не могут.

Речеши ли, яко антихристу воцарившуся поклонитися приидут часть некая малая от земли, по оному: яко же от всего царства един бывает в лице всего царства людей, еже что содевает в посольстве оном. Но божественное писание не тако извествует быти. Понеже тайнозрительный Богослов вопреки сему глаголет сице [Апокалипсис старопечатн.]: "и чюдися вся земля во след зверя. [Ниже:] И дадеся бысть ему область на всяком колене людей, и на языцех и племенех. и поклонятся ему вси живущии на земли". Апокалипсис, глава 36, стих 160. И еще тамо же: "и сотворит вся малыя и великия, богатыя и убогия, рабы и свободныя, да даст им начертание на десней руце их и на челех". Апокалипсис, глава 36, стих 167.

Подобне же и Ипполит: "послет (рече) в кииждо град и страну повеления с бесы и с чювственными человеки, глаголюще: яко царь велии явися всей земли, приидите вси и видите крепость его и силу. сей бо живот вам дарует, и богатство многоценно, и чести великия. [Ниже:] И вси тесноты ради пищныя приидут и поклонятся ему. и даст им знамение на десней руце и на челе, да никтоже честный и животворящии крест сотворит десною своею рукою на челе". До зде Ипполит.

Зри, яко же во Апокалипсии, тако и у Ипполита сказуется. Не часть некая, или не посольством, но кийждо приидет к нему. и поклонятся ему от мала и до велика, от рабов и господ и прочих, и той сам даяти имать комуждо начертание на десной руце и на челе. И паки Ипполит глаголет: "и даст им льстец малы снеди, печати ради своея скверныя". Видиши ли, в коликом належащем на земли гладе, он даяти им будет пищи некия малыя за приятие печати его.

Но несть ли се странное глаголание? и каково се удобство, еже бы бывающу на поклонение пред ним, исполнение прияти пищи на еликое пропитание свое? и како оттуду кийждо в дом пристяжет?

Аще и скудно, но елико довлети коемуждо дом свой препитати. Еда великими кораблями кийждо ехати от него имать? и како сушу прейдет? и где оныя корабли возмет? мрак некий воистину глаголание се. И да не чювственно то разсуждая, суесловия некоего наполним. Гряди убо, якоже ти обещахомся, и примеры к заграждению таковаго мнения, еже полчетверта лета, чювственно царствовати антихристу зде положим. Слыши же и разумевай.

Кесарь Август, аще и всего круга земнаго людей бяше монарх и самодержец, обаче далече не бяше толикаго множества народа людей, елико настоящее се время имать. Ибо не в давное время, от сего настоящаго года 7098-го назад около двухсот с небольшим, обретена бысть великая часть света земли Америка, безчисленными народы населенная, юже нарекоша четвертую часть мира сего. Кая страна во дни Августовы ни в слуху бяше. Обаче аще и далече во мнейших от сего народа дань кесарева собирашеся тогда грошевая [Минея чет. киевопечат., сент. 1 индикта], но за велие разстояние стран и за множество народа того, в пятое лето в кесарскую казну оная дань збором окончевашеся. Что же бы рещи ныне, аще бы со всего круга земнаго таковому самодержцу дань повелевати грошевую собрати, коликих лет воистинну на сей збор потребуется. Не оных августовых пяти лет, но и десять лет мало, еже бы оный збор един окончати.

Прейдем же из примера сего на другое. Сему же антихристу, не ведому сущу всем, хотящу толикия дикия ему страны изследити, преодолети, покорити, привести к себе на поклонение, мало ста лет на таковую возможность. А наипаче сих ради вин:

Первая вина, яко каждая провинция, каждое королевство, каждое царство, свои области имут, и великия в ней осторожности, а наипаче свои уставы, и свои обычаи вер, застарелыя нравы утвержденны содержат. И како восхотят абие, толикое познание, толикия нравы и уставы, и обыкновение, и застарелость веры отложивше, прийти на послушество того повеления? никако. Аще чюдесы не удивит, и сих ради не отвратит: ибо многия страны имут в себе разных чюдотворцев, якоже свидетельствуют истории многих веков. Аще войною восхощет стяжати сия, не победит: яко многия провинции и королевства имеют преславныя ратоборцы военных дел, яко по суху, тако и по водам ныне явишася. И кий новоявлен таков, на оныя страшныя ратники дерзнул бы? и како преможет, не во еже прогнати, но во еже еще вся оныя под ся покорити, а наипаче веры и нравы их отъяти, и на свою волю отвержением преложити: паче же и на едину веру разноверие сие и в един год учинити, еже и тысящи годов на сие мало есть?

Зри убо, коликую силу имяше и счастие оный Александр Македонский, во еже пленити страны, покоряти себе люди токмо в дань. Малыя части мира покори, елико точию возможе доити до индийских предел, и покорити Ассирию, и подвести ю под себе: и монаршество ту устроив, и умрети. Но коликих времен требоваше на оная, аще и всю подсолнечную пройти. И еще не на сие нахождаше, еже бы вси во едином его о верах нраве были. Что же бы требовал, аще бы и на сие дерзнул, еже на божество себе увещать, и жертвы Богу достойныя ему приносити. Ибо, аще и во тме неведения, сицева света яково ныне, людие быша тогда: обаче внегда Александр востребова от лакедемонян богом нарицатися, смеха их наполни, яко от смертных человек ищет себе Божества наименования [книга Хрисмологион, предисловие]. Зри, какоже настоящий народ, приявше толик свет ведати Христа Бога истинна, и внезапу на таковую тму человека боготворити бы пришли: баснословие бо будет некое, еже яве и телесне сия зрети и надеятися.

Вторая вина. Аще всех ему к себе от всея земли на поклонение приводить, народу будет несносно, царствам великая утрата, домом конечное разорение: яко каждому господину с рабы, каждому царю со всеми под рукою его сущими, и каждому мужу с женою и с детьми из домов своих изступати, и пусты домы оставльше, идти ко антихрсту на поклонение. Кая сия суета? и которая сия есть возможность? и чим может убогий отдалече со своими прийти? яко иньшнему, ни треми леты мощно далныя страны, великия преходя моря, и бывши тамо, в дом возвратитися: и возвратившися в дом, обрящет ли кто в живе кая животная? о страннаго слышания, и чювствам человеческим не подъятаго. Кому бо се слышавшу, вероятие может быти.

Третия вина. Аще прийти толикому от всея земли народу ко антихристу, кое место даст? кия обители? кия пищи на сие продолжительство времен уготовит? В неже и сия допросы принадлежны всем сотворити, сиречь допросити каждаго, отрицается ли печати Творца небесе и земли? и обещевается ли самому антихристу последовати во всем? И тако истязавши коегождо, меты на всех, якоже речеся, положити. Зри, коликих времен на сие потреба. Но да не глад и хлад сия объимет, и не от воздушных нападений безгодно смертию скончаются, коликих храмов, пищей и других востребовати будет нужда, или наипаче разных язык како глаголы слышати хощет: ин бо сице, а ин ины словес глаголания имать.

Примеры бо суть сия приведения, яковое определяется во установлении и полчетверта лета. А дела, являемыя в нем, толика не возможна суть, яже и глаголати вредословия некоего полно.

И таковыми пустыми скасками плотьстии плотьскими разумы разсуждающе иногда и римляне, тысящнаго числа убояхуся, яко антихрист в тое родится [Бароний, лета Господня по 1000, 1, 2, 3 и 4]. И полчетверта года царство его бывши суд страшный востанет. Мнози, сего ради мнея, вознебрегше о благих мира, и о церковных благоукрашении вознерадеша, и антихриста чювственно на царстве седяща не уведеша. Прочее отложьше все оное страхование, и все то мнение во лжу обратиша, паки на первая своя пожелания приидоша, тако и доселе в том нечювственно пребывают.

Темже, совопросниче наш, от таковаго приклада и нам подобает стрещися, даже бы не пострадати что в том плотьским и внешним любопытством, духовная и умная ищущим. Подобает бо Божия и высокия премудрости Его тайны не женьскими некими и младенческими любопытствы гадательная умствовати, но премудрых толковников о том созирати с великим прилежанием (якоже и выше от части сих, некая словеса отчасти предложихом). Вам бо дано есть разумети тайны царствия Божия, прочим же (плотьским и нерадивым) тыя в притчах, да слышаще не слышат, и видяще не разумеют.

Но како не суть сия сокровенная тайна, еже пророков Илии и Еноха проповедь, и антихристова царствования, во едину седмицу лет время символически заключает. Не сия ли суть во Апокалипсии, в показанной книзе, едина есть от символических тайн сокровенная тайна. И сию мнози (грубоумне, якоже един еси ты от сих) слышаще не слышат, и видяще не разумеют. Толикая сия тайна, яко не простыя мысли виновна: но и любомудрии, сея прикрытых символов недоведомость открывающе, доити не могут.

Но от ваших тако простых подлогов писмен, уже не есть символ сокровенной, яве бо притекающии и смотрящии на сия малосмысленнии, не не могут женьская некая сия баснословия вытолковати, что день и час Божия прихода на землю от сих предельных лет мощно дознатися. Яко аще пророцы пришедше, и полчетверта года пророчествовать будут, тако и антихрист полчетверта же года тоя седмицы другую половину разделит на свое царствование, на него же сам Господь приидет, то не самое ли уже и время суда Божия указание отселе обрящется. Како убо не есть сие мнение младенческаго разума сопричастно, иже сии во юдолех ходяще, мнят быти небо приручно и рукою досячи могущо: а не мужем сущим, с высоты гор разума смотрящим.

Апостол бо яве глаголет: "день Господень яко тать в нощи". Но и зде не самый той день глаголет, воньже Господь пришед не кончаем сотворит, но и самый год Его в сем утаен. А не яко по плотьскому мнению антихриста видевше, уже аки время мощно и простым без толкования знать. Разуменно бо, яко по нему день точию не узнаем, а год всяко узнаем: полчетверта бо года кому не ведомо. Темже и невежда увесть приход Божий.

Оле страшнаго сего доказания суда Божия. О нем же учеником рек [Мф, 102, Благов., лист 193 на обор. Мр., зач. 62, лист 82]: не токмо ангели, но ни сын человеческий по плоти не весть. А ныне, по вашему мнению, еже антихристову приходу (от вас мнимому на полчетверта лета быти на царстве) можно дознатися в кой год Господь с небесе на суд приидет. Како убо сие разумение, еже чювственно толковати лета сия, не безместно будет. К сим убо, привели бы тебе и разная описания лет царствования антихристова, их же инии сказуют полчетверта лета, а инии 7 лет, а инии иначе: но время уже престати от долгословствования, да не себе и прочим отяготим пространностию изъявления. Слушающе о сем словеса оная Господня: "яко несть ваше разумети времена и лета, яже Бог Отец положи во своей власти". Деяние святых апостол, зач. 1.