Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 338.
И аще вам печать его явлена, и на челе и на деснице даема быти разумеется, убо и самого его вам познати нетрудно есть: то явите его, кто есть он? якоже бо печать его видима и чювственна, тако и он видим и чювствен быти должен.
Ответ, 338.
В 333-м и по нем в последующих ответех изъявихом, яко антихрист не может указатися чювственно, еже ему приити к единым точию июдеом, и родитися от Данова колена и от девицы жидовки. В 343-м же ответе и в последующих известихом, яко и печать антихристова, еже на челе и деснице даема от него, не суть же чювственна, но духовна. А понеже и от прочих его чюдес удобно есть познати, яко не суть чювственна суть о нем разумеваема, но духовна, о чем в 360-м и прочих ответех известити имамы.
Вопрос, 349.
И аще по печати его, заключающей число 666, уже пришедша быти сказуете, то явите, откуду прииде и от коего языка?
Ответ, 349.
Всемирнаго прелестника антихриста приход, не ко единому языку, ниже единовремен есть, о чем в 333-м и по нем в последующих ответех ясно уведати имаши. А еже на число 666-е, паче же по учителем церковным 1666-е, о пришедшем на северныя страны, в 368-м ответе, и 381 о исшествии откуду Гога и Магога известити имамы, того ради зде глаголати оставляем.
Вопрос, 350.
И аще прииде, то к кому прежде прииде? и от кого прият бысть? и поборают ли по нем жидове, понеже они будут первии поборницы, исправляюще царство его?
Ответ, 350.
Довольно уже ти глаголахом от священнаго писания в 333-м и по нем в девяти ответех, к кому и прежде прииде сын погибельный, и прият бысть от кого. И паки особственне в 368-м, како на северныя страны прииде, известити имамы.
А еже кия в первых поборницы будут антихристу, исправляюще царство его, о сем преподобный Ефрем ведати сице дает [слово, 105]: "Воцарившужеся (рече) змию на земли, с радостию сии людие поборницы будут. Едом паки и Моав, еще же сыны Амоновы, яко своему царю поклонятся ему с радостию, и тии будут в первых, исправляюще царство его". Сия убо Ефрем святый о поборницех антихристовых аллегорическии изглагола. В толковании же, како имут разуметися Едом и Моав и сынове Аммоновы, слыши [Триодь постная, четвер. 5 недели, песнь 4]: "Едом Исав наречеся крайняго ради женонеистовства на смешение, невоздержанием бо присно разжизаем, и сластьми оскверняем". И паки: "Едом наречеся, еже глаголется раждежение души любогреховны".
В толковании же на псалом 82 премудрый Иероним святый глаголет [Псалтырь толков., псалом 82]: "Моав от отца сказуется, иже есть диавол. [Ниже:] Аммон, народ смущен, иже есть еретицы". Явственне же Владыка Исус Христос, в пришествие антихриста сказует всякия умножитися скверныя похоти в человецех, якоже во время праведнаго Ноя, и разорения и запаления градов Содомских. О чем чти в двух Благовестиях: от Матфея 102, от Луки 87 в зачалех с толкованиями. И паки прочти книги О вере, от главы 23, лист 215, и известишися.
Вопрос, 351.
В Благовестнике, в зачале 17, в толковании напечатано сице: "ин же, рече, приидет, антихрист яве, яко себе единаго хощет явити, яко един бог есть. Мене убо, во имя Отчее пришедша, и глаголюща себе от Отца послана, не приемлете. онаго же, во имя свое пришедша, приимете". Вы сие писание како приемлете, будет ли антихрист имя Отца небеснаго проповедывать, или себе единаго будет явить токмо?
Ответ, 351.
Пишет к галатом в 1-й беседе великий Златоуст: "яко таковая бо есть (рече) дияволя прелесть, еже не нагия предлагати льщения. аще бы рекли быша, отступити от Христа, то яко лестьцов и губителей хранили бы ся. ныне же оставльше их в вере еще, и прелести благовествование имя возложше, понеже благовествование нарицающе свою прелесть".
Премудрый же Максим Грек, опасая правоверныя, повелевает еретическаго писания блюстися, глаголет бо: яко они не явныя прелести в нем тщатся предъявляти. Но под видом лицемернаго благочестия, сокровенное лукавство подлагати показуются. О чем сице пишет: "да навыкают сице вси, яко обычай есть общ вкупе зломудренным еретиком, привсеяти во своих писании некия догматы благочестивыя, да сим образом достоверна являются и благоприятна бывают, от православных списуема ими хульная", и проч. Слово 10.
Сице убо, ниже антихрист явно себе Богом явити, или кумир свой, во имя свое написующи, поставляти имать: но под именем Божиим, вся с прелестию начнет действовати, якоже о сем в 339 ответе изъявихом. Сице убо и прельщеннии от него, не явно к нему возглаголют, яко ты наш еси Христос Бог. Но якоже о них Кирил святый извествует, начнет о действиях его тако глаголати [Кирилова, знамение 11, лист 54]: "яко и Христос ничего больши того не сотвори. и аще то неугодно Богу, не попустил бы". Явственне же показа в себе образ (антихристов) папа Римский, иже вместо Христа быти сам прозвася, и учинися князем века сего. и обогатися областию, и всего мира обдержателем прозвася.
Восприят на ся Божию и святительскую власть, по всей вселенней послов посылает. И яко посланнии от него лжепророцы, мерзостное запустение начинают творити, сиречь жертву опресночную во олтари на престоле поставляют, якоже Кирил святыи свидетельствует [Кирилова, знамение 6, о антихристе]. От святаго же Златоуста, сия мерзость кумир антихристов нарицается.
Обаче таковый кумир его не есть во образ чювственнаго человека папы, ниже под именем написуется папежским: но безквасный опреснок в предложении обретаем есть, именем Исуса Христа подписуется, аще и с воображением двочастнаго креста: в действе же воспоминание творится Христа Бога и Его страсти. И в сицевом предложении, ниже таинством воспоминания, ниже надписанием имене Христа Исуса, ниже самою материю опреснока, явственне не творится воспоминания папежска, и не образуется о нем во употреблении оном отнюд ничто же, но подражательно Христовой истине творится. Обаче всего сего ради прикры тако нечестия, яко бы согласующими глаголы и действами благочестию. Но самою вещию и умствованием, согласующими крайнему еретичеству, не оправдуются и не пользуются, паче же и осуждаются, яко кумир его, сиречь антихристов, наречеся быти. Яве же есть, яко не иныя коея ради вины, но за еже яко по воли его антихристовой, угодное ему творится, в противность же истинному Христу Богу и его святей церкви. Сея бо ради вины, всяк таковый антихристом явитися или нарещися возможет, по святых боговещанных апостол гласу [Правила апост. 52]: "противная бо творя Христу, и противяся заповедем Его, антихриста себе быти творит". И яко всяк преступаяй, и не пребываяй во учении Христове, Бога не имать [соборное послание Иоанна, зач. 75]. И яве есть, что не имеяй Бога, не может быти с Богом. О таковом сам Христос Бог во евангелии глаголет [Матф., зач. 47]: "иже не сыи со Мною, сей на Мя". И аще, по словеси Господню, не сущии со Христом, на Христа есть, убо сей есть и противник Христу антихрист. Якоже Дамаскин святый глаголет [книга Небеса, глава 28]: "заеже бо не за Христа, но на Христа, сего ради и антихрист глаголется".
И сея ради вины, яко еже противная творити Христу, и противитися заповедем Его, преступати же и не пребывати во учении Христове, всякому не имети Бога, и не пребывати в Бозе, и не быти с Богом: но быти на Бога, яко противная творити Христу и заповедем Его, и сего ради сотворитися таковому антихристу всячески суть. Явственне же Мелетий патриарх, новин ради, инаго Христа, паче же антихриста, вводити исповедует [Кирилова, 6 послание Мелетия патр., лист 483]. "Егоже бо они (рече святии отцы) и мы исповедуем, сей вчера и днесь, той же и во веки. а егоже новины их вводят во вселенную, противная мудрствующе, и оныя новины иного некоего днесь проповедают, паче Его же проповедаху". И ельма аще сицевии не имут Бога, и не проповедают Христа истиннаго, но инаго некоего. Не имеющии же Бога, не имут и божественнаго света, но во тме пребывают. Идеже бо света лишение, ту и тме пришествие [Катихисис Больш., глава 28, о антихристе]. Аще ли же тме пришествие, ту и область темная, света непричастная. Кое бо общение свету со тмою, рече апостол; или кое сложение Христови с велиаром. Сего ради чюждо есть беззаконным славити Святую Троицу, Отца и Сына и Святаго Духа [Минея мес., сентября 8 день]. Аще ли же тяжкосерд сый, якоже рече писание, и лжу ища, дерзает на молитвенныя глаголы, да весть, яко не небеснаго, но присподняго таковый призывает отца [канон на Рожество Богородицы, песнь 9; Никон Черныя горы, слово 51]. А понеже Римский папа истиннаго Христа Бога нагло не отвержеся никогда же, но вечную главу церкви своей исповеда быти, себе же другую главу предаде имети. И сицеваго ради дерзнутия, от восточных патриарх отитловася, яко бы вместо Христа той сам прозвася, и учинися князем века сего, и всего мира обдержателем прозвася [Мелетий патр., в послании 4-м]. И яко отсечеся от церковнаго их телесе, истинная и вечная глава. Отженеся от своея церкве Христос, низложися же и господьство Сына Божия, восхити же ся начальство и власть Христова папою. Аще бо той и не отсекаше от своея церкве начальство и власть Христову, но вечною главою церкви своей исповеда быти. Но яко себе другую главу быти вменяше, то и не благоволи Бог своей церкви две главе имети. Ибо две главе телу (по церковному гласу) змию свойственно, а не телу Христовой церкви [Катихисис Великий].
Темже, аще папино имя главнейшее господьство, над церковию их усилуется вместитися и прославляемо быти: убо от него вместо Христа истиннаго, аки от главы, вся церковныя уды, живущую силу восприимати должньствуют, того ради и славитися в папежанех их папе аки Богу подобает. И сей убо явный знак антихристов в них заключается. И от сего познавается, яко папа Римский не имя Отца небеснаго проповедает. Понеже вместо Христа себе главою церкви проповедати, сие есть свойственно Сына Божия. Во имя Отчее пришедша отметати, себе же единаго точию являти, яко сущаго христа, паче же антихриста. Ибо по Его же Христову словеси [Иоанна, зач. 15]: "иже не чтет Сына, сей не чтет и Отца пославшаго Мя".
Яве убо папа, по Владычнему же словеси и по толкованию Феофилактову, ин есть приходяи во имя свое, и себе единаго тщится явити. Якоже Христос глаголет сице: "Аз (рече) приидох во имя Отца Моего, и не приемлете Мене. ин же приидет во имя свое, и онаго приимете". И от сего яве есть, яко аще папа Римский сан Христов на себе восхити, и всю власть и честь Христову на себе привлече: убо и не есть славимо от него имя Бога нашего, но свое ему токмо. Якоже о нем в предних ответех о антихристе изъявихом.
Прочее же должность имуще ко изъявлению и о самом последнем антихристе, о нем же пронареченное число зверино 666 являет, яко приити ему (по апостолу) во свое ему тогдашнее время. Но якоже выше рехом, папа Римский не явно восхити на себе сан Христов, но именованием главою церкве. Сице убо и великороссийская церковь не явно Христово имя отверже, но некако прикровенно. По Златоусту, таковая бо есть дияволя прелесть, еже не нагия предлагати льщения, якоже о сем выше предрекохом. А понеже и прочия веры, аще и Христовыми нарещися от содержателей тех усилуются, но от учителей церковных прелестию бесовскою порицаются. Иныя (глаголюще) веры не суть православны, и не достоят нарещися верою [Мелетий, послание 10]. И ничтоже о них глаголется, точию, яко не сыи. Суетни бо и ложни и бесовския наричются. Якоже Ияков апостол глаголет [соборное послание]: яко и беси веруют и трепещут. И яко неложны глаголы свидетельствуют вещи.
Восхощем ли новоизданныя догматы, и предания нынешния церкве испытати аще православны, то обрящем оныя ересям согласны и анафеме подлежащи, якоже в 21-м ответе довольнейше изъявихом.
Возжелаем ли самое спасительное Господа нашего Исуса Христа имя испытати аще право и истинно глаголется, то истинно и право глаголемо быти отнюд не обрящем. Глаголет же апостол Павел: никто же бо может рещи Господа Исуса, точию Духом Святым. Они же новомудрствующии, российския церкве учители, от показаннаго числа зверина 666, имя Исусово во всех тайнодействах церковных, и во всех славословиях Божиих, отнюд во именовании не употребляют, паче же и ругаются ему, и коварно ухищряют, дабы имя Господа Спасителя не именовано было. Глаголют бо [Димитр. Рост. в Розыске, глава 15. Питирим в Пращице ответ 146, и Обличение]: Яко бы со единою гласной литерой пишемое имя Исус, не знаменает Исуса Спасителя, и Избавителя, и Исцелителя душ наших, но иного Исуса равноухаго. И предаша глаголати со двема гласныма литерома усугубляемо имя Иисус. Союзную литеру (и) приложивше, со предлогом пишут, и усугубляемо глаголют, Иисус. И сим мудрованием, яко имя Спасителя Христа Бога, тако и самого с сим имянем Спаса нашего Исуса Христа поругавше, отвергошася. И чрез таковое дерзнутие, Богови зелне приражаются. Глаголет же апостол Иоанн Богослов во своем послании [соборное послание Иоанна, зач. 71]: "иже глаголет, яко Исус несть Христос, сей есть антихрист, отметаяися Отца и Сына". И в предисловии того послания, что есть свойственно антихристу; быти же се, еже глаголати не быти Исуса самого Христа. Они же не Спасителя, ни Избавителя, ни Исцелителя душам нашим, но равноухаго нарекоша быти. И ельма, аще не исповедающии Исуса Христа в плоть пришедша, от апостола осуждаются, яко антихристов дух имети им [Иоанн Дамаскин, книга Небеса, глава 8]: кольми паче свойственнее и сообразнее антихристов возлаголется, иже имя Спасителево Исус похули, и самого Того истиннаго Христа Спасителя поругавыи: и не Спасителя, но равноухим порекши отверже: в лепоту таковый антихрист наречеся. И исполнятся о таковом святаго Ефрема реченное, еже о антихристе пиша глаголет [слово 105]: "всяцем бо коварством кует, да отнюд имя Господа Спасителя пресвятое и славное не именуется во времена змиева. бояжеся и трепеща святыя силы имене Спасова, се творит немощныи".
Темже по предложенным показуется, яко папа Римский, аще и не похули, ниже отверже Христа главу церкве, но точию другую главу себе восхоте имети, и сего ради отриновен бысть от Бога, и благодати Его отщетися, и в лепоту антихрист наречеся, и приношение жертвы их кумир антихристов именовася: кольми убо паче, божественное имя Исуса Христа отрину, и самого Того Спасителя равноухим нарещи дерзнувый, другаго же Иисуса по своему зломудрию повеле имети, и спасителем почитати, страннейшему осуждению таковый повинен будет, и вящшее отмщение подъимет. Свойственнее же и сообразне, и изряднее, антихрист таковый праведно нарещися возможет, на кончину века грядыи, и себе единаго являяи по числу еже о нем 666. В лепоту бо от него и жертве приношения кумиру антихристову нарещися, и мерзости запустения, стоящей на месте святе. И чрез таковое приношение, во всех церквах духовне антихристу сести яко Богу, и себе тако человеком являти, и от них божественную честь приимати.
И сицевии, иже истиннаго Бога своего отвергшии, и богохульне обругавшии, иного же Иисуса аки Бога себе предпочетшии, и имя Иисус, яко честно, на своих сердцах написуемо имуще [Апокалипсис, глава 16, зач. 46, ст. 1 и 2, лист 71], какоже от прельстившаго их антихриста исцеление получити возмогут, яко имя его в души и сердцы обносят? никакоже. Сицевии бо причаститися имут со зверем чаши гнева Божия, якоже во Апокалипсисе явствуется.
Вопрос, 352.
И аще антихрист себе единаго яко Бога хощет явити, то како тайну крещения будет совершать, понеже он себе единаго проповедать будет? или тако без крещения всем повелит быти?
Ответ, 352.
И аще, по святому Ипполиту, и по инем учителем церковным, антихрист по всему уподобится Сыну Божию, то убо и у антихриста не не имать быти крещение. И яко не чювственно в себе крещати своим предотечам повелит, но инако и прикровенно [предотеч. же священ. от Златоуста сказуются быти, Соборник, лист 413]. Якоже и имя свое не чювственно, но сокровенно являти всюду заповедает, о чем и в вышшем ответе явствовахом. Сице убо, яко же рехом, прикровенне и крещение в свое имя устроит, и истиннаго крещения во истиннаго Исуса Христа отрицатися повелит, якоже от предлежащаго ответа уведати имаши.
Вопрос, 353.
В Соборнике, на листу 132, напечатано сице: "таково нечто и придобру ненавистнице будет. отрицаюся, глаголюще, печати Творца небу и земли, отрицаюся крещения, отрицаюся службы моея, и тебе прилагаюся и верую". Зде опасно просим вашу любовь, Господа ради известите, убо ли и ныне отрицание христианскаго крещения где бывает?
Ответ, 353.
Слыши убо, аще желаеши истинно уведати, како ныне отрицаются, по святому Ипполиту, приступающии к великороссийской нынешней церкви, печати Творца неба и земли, и крещения. И не точию печати и крещения, но и самаго имене Спасова. Како отметати повелеваются всех древлепреданных обычаев же и догматов. како тая вся клятвам и анафемам ужасно отсылати принуждают.
Присяга новороссийския нынешния церкве. В ней же, к приступившему к ней от древлеправославныя церкве, тако глаголется [лист 1]: "Востани и обратися к западом, и отрецыся всех заблуждений еретических, в нихже пребывал еси доселе. [Ниже:] Отрицаюся всех заблуждении и хулении, всякаго соборища раскольническаго, и того, в немже и доселе пребывах. [Ниже, лист 2:] Проклинаю их и последующих им. [Ниже:] И не знаменающихся тремя первыми персты, но двема указательным и средним. [Ниже:] И имя Иисусово, пишемое сице Исус. [Ниже:] И аки некрещенных крестят. [Выше:] Книги церковныя новоисправленныя, раскольническими и еретическими блядословящих, аки сквернейших проклинаю и анафеме предаю. [Ниже, лист 3:] Буди я проклят и не прощен, и в сем веце и в будущем. [Ниже:] И виждь себе, яко избавился еси от сети смертныя, и от погибели вечныя. [Ниже:] Чти православно Отца Вседержителя, и Иисуса Христа Сына Его. [Ниже, лист 4:] Аще же сия лицемерно глаголю, или когда бесовским наваждением в прежнее заблуждение, аки пес на своя блевотины возвращуся, да возвратятся на главу мою вся клятвы и анафемы, на еретиков и отступников от святых отец на вселенских соборех и поместных реченная. [Ниже, лист 6:] Верую и исповедую и приемлю святое воображение креста Христова, сицевым видом воображенное ["+"] на просфирах и на прочих вещех и местах, и поклоняюся и лобызаю. Верую и исповедую быти православно, и приемлю предания святыя восточныя и великороссийския церкви, еже знаменатися тремя первыми персты. [Ниже, лист 7:] Проклинаю всех, иже ныне не крестятся тремя первыми персты, но крестятся двумя персты указательным и средним, и прочих учат тако, да будут прокляти и анафема. [Ниже:] Проклинаю всех хулящих, и отметающих воображенный крест Христов на просфирах сицевым образом ["+"], и пишемое имя Спасителево сице Иисус, да будут прокляти и анафема". До зде от присяги.
Зде убо воньми, о вопросителю, несть ли ныне збытия словес тайнозрительнаго Богослова, о богопротивном антихристе глаголющаго сице [Апокалипсис, зач. 36]: "и дано ему бысть брань творити со святыми и победити их, и хулити имя Божие, и скинию Его, и живущих на небесех". И не даст ли печать свою скверную на покаряющихся ему. Якоже тобою предложенный в вопросе святый Ипполит о нем глаголет [Соборник, лист 136]: "и даст тем льстец малы снеди, печати ради своея скверныя. печати же его, иже на челе и на десней руце, есть число 666. [Ниже:] Злыи вождь, агнец неправедныи, древле завистник, и убо покаряющихся ему знаменает печатию своею". И паки выше [лист 126]: "Даде Господь, иже в Него верующым, знамение честный и животворящии крест, подобне и той даст свое знамение". Согласне же и Сирин он свой возглашает глас [Ефрем Сирин, слово 105]: "егда начертае змий свое знамение за крест Спасов". Той же святый знамением християнския веры крещение именует [Ефрем, слово 102]: "вопросит (рече Судия праведныи) знамения, имже знаменахомся во святей церкви, аще цело будет сохранили".
Сего убо знамения (си есть крещения) и антихрист повелит отрицатися, а свое знамение на покаряющияся ему наложити потщится. А понеже, по указу государя, перваго императора, кия крещены быша от ваших беглых попов, иже крещены и рукоположены по новоисправленным книгам, от тех крещенных не повелевает крестити: а от простолюдин, крещенных по старопечатным книгам, паки крестити тамо повелевается.
Темже, от предложенных зри со вниманием, кого отрицаются, и кому соединяются. Кого проклинают, кому покланятися повелевают. И которое крещение приемлют, которое же не приемлют. Разумеваяй да разумеет.
Вопрос, 354.
Прежде бывшия еретицы наватиане и донатиане, и прочия им подобныя, творяху ли христианскаго крещения отрицание, или не творяху?
Ответ, 354.
Сии, тобою изъявленнии еретицы наватиане и донатиане, весьма в воздержныя преклонилися уставы, не следующе правым царьским средним путем. И мняху, яко святокафолическая церковь палася человеческими грехами. Якоже о них Бароний, в лете Господнем 258, и 319, и в прочих, довольне повествует. Того ради по своей прелести, кафолически крещенных, вторично перекрещевали. Обаче не видится таковых клятв и анафем при крещении их, на кафолическое крещение и предание излагаемых. Не изъявляется на имя Спасителево, и крест Христов, и двоперстное сложение, таковых отрицательств и проклятий творимых, якоже в вышшем и в прочих ответех изъявихом. Прочее же вси еретицы глаголются быти, по Богослову, антихристи: по инем же учителем церковным, антихристовы предотечи. Поелику бо в своих преданиях нечествуют, по толику и к Богу приражаются.
Вопрос, 355.
Ариане и севериане, и яковитяне, и иконоборцы, и прочия подобныя им, кия персты на знамение честнаго креста слагаху?
Ответ, 355.
В старопечатней Кормчей, во главе 39, Димитрий митрополит Кизический о яковитех: в Потребнице же, в чине от латин приходящих, о единовольниках изъявляется: яко сии еретицы единым перстом точию перекрещивают от левыя страны на правую. И от сего показуется, яко прочия члены главу и живот двема знаменоваху. Аще бы не двема, то не речено было, яко единем перстом перекрещиваются от левыя страны на правую. Яве остается разумети, яко прочия члены перекрещивали двема, а не единем, якоже и обычай тогда повсемественный бяше. Единем же прекрещаху, во изъявление своея ереси: они бо едину, а не две воли во Христе исповедоваху. О арианех же и иконоборцех нигде явственне не глаголет, како они, или коими перстами крещаху, убо и мы глаголати о них явленнейше недоумеем.