Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   33   34   35   36   37   38   39   40   ...   46

Вопрос, 339.

Глаголется убо во святом писании, яко антихрист будет противник, якоже и от самого именования видети есть, яко уподобится льстец Сыну Божию, явите от святаго писания.


Ответ, 339.

Понеже от сего твоего предложения, еже антихристу лицемерящемуся, уподобитися Сыну Божию, разумети долженствует сугубо: яко ниже антихрист царь будет чювственный, ниже Богом именно наречет себе.

Первое: Аще антихрист по всему хощет уподобится Сыну Божию, якоже Ипполит изрече: "царство же Христово не чювственное есть, но внутреннее. глаголет бо Сын Божий: царство небесное внутрь вас есть" [Лука, зач. 86].

Такоже разумеется и царство дияволе, или антихристово, внутрь же сокровено быти. И не в едином лице, но во многих лицех его пришествие в мире сказуется, якоже в 337-м ответе явихом. Не царя же чювственна, но святителя, и к своему духовному святительскому уставу приводящаго. И якоже вси древнии еретицы не по видимому образу показуются нечествующе, но по внутреннему заключаемому разумению, о чем 21 ответа, во второй части, засвидетельствовахом. Тако и самый той сын погибели антихрист, не по видимому образу показуется нечествующ, но по внутреннему же заключаемому нечестию. Якоже о нем пишет вышереченный святый, Ипполит папа Римский, сице глаголя: "егда бо и не являшеся ныне сын погибельныи, невидимо нас ратуя кознем, и заколением нас отводя и устремляя. тогда же, егда сам хощет самообразно приити, и начнут его зрети человецы истинно. что убо, или кое не сотворит лукавство, и лесть, и мечтание, во еже вся человеки прельстити, и отставити от праваго пути, и от дверей царствия". И паки: "во всем уподобится льстец Сыну Божию. Лев Христос, лев и антихрист. Явися Христос агнец, явится и антихрист агнец, внутрь сый волк". И паки той же: "во всем изравнитися хощет Спасу нашему сопротивник" [Соборник в нед. мясопустн.]. Такоже и святый Ефрем глаголет [Ефрем, слово 25]: "образ приимет истиннаго пастыря, да прельстит овец стада". И премудрый Стефан Зизаний глаголет [Кирилова, лист 26 на обор.]: "к своему духовному святительскому уставу приводит восхищающи". Блаженный же Андрей Кесарийский тако пишет [Апокалипс., глава 13]: "любопрится ложь на прелести человеков, еже подражати истине: ибо рече, ложь истине последовати тщится". И аще антихристу извествуется образ истиннаго пастыря прияти, аще во всем Сыну Божию уподобитися и изравнитися, аще и есть обычай всякой лжи истине последовати, убо свойственно есть ему не чювственным царем быти. Чювственное бо мира сего царьство, не подобно есть царству Сына Божия. Зане и сам Христос Бог рече: царство Мое несть от мира. Но духовною божественною властию, на небеси и на земли Сын Божий царствует.

Убо и антихрист, аще во всем уподобится Сыну Божию, то не чювственным царем мира сего имать быти, но духовною прелестию власть восхитит. И того образ истиннаго пастыря прияти восхищет, да прельстити овец Христова стада возможет. Аще бы восхотел той чювственное мира сего царьство прияти, то не бы таковое прежде в лицемерии духовное проходил состояние. Но походил бы прежде храборски, показал бы велию в бранех победу. Многия бы повоевал грады, якоже и прочим царем чювственным имеется обычай. Но таковаго образа неимущему, но тиху и кротку, любовну же и примирительну, чтущему благоверие, и во упражнении чтения проходящему, и посту навыкшему, и чюдеса показующу велия, свойственно есть таковому духовною властию быти, и образ истиннаго пастыря имети, и овец Христова стада прельщати, и духовная действа Христова совершати, и тем Сыну Божию во всем уподобитися, якоже и прочии духовнии пастырие, образ Христов носящии [ибо епископ имеет образ Христов, Кирилова, лист 577].

И аще той антихрист сказуется, яко всякое лукавство, и лесть, и мечтание, ко прельщению человеком имать показовати, убо свойственно есть таковому неявныя хулы на Бога показовати, но притвором благоверия, и от писания похищенными словесы, и развращенне толкуемыми, яко же обычай прочии еретицы имут. Того ради антихрист и писанию навыкнет, да возможет прельщати человеков.

Како же и каковым образом царьскую власть антихрист восхитити глаголется, о том божественная писания явственно нам показуют. Якоже святый Кирил с премудрым своим толкователем Стефаном Зизанием тако глаголют [Кирилова, глава 4, лист 21]: "Ибо о всем том назнаменано явственными глаголы, яко и простейшии человецы видяще и слышаще разсудити могут, яко антихристу место его самодержавное царское света сего уготовано будет". Той же во главе пишет: "яко дух лукавыи, седя на царстве Римском, седмь духов лютейших поимет себе, и приходит к человеку тому лесть последня, горше первыя". Зде внемли силе словес, якоже глаголет Кирил: дух лукавыи, сиречь сатанин. Той же глаголется дух антихристов, иже седит на царстве Римском. Дух бо ни яст, ни трудится, ни стареет, ни смерти подпадает; но присно есть и пребывает, седя на царьстве Римском. И всегда той обрестися имать, и всякое свое действо дияволе слугами своими совершити и исполнити возможет. О чем той же святый в 10-м знамении пиша глаголет: "яко сатана себе ученики себе учинит, иже по онаго воли сами собою начнут действовати". А якоже аще и место самодержавное царьское в Риме антихрист содержати возможет, обаче не мирскаго, но духовнаго чина человек будет. О нем же Кирил святый глаголет: "яко приходит к человеку тому лесть последня, горше первыя". И паки: "не от царей, ни от царьска рода воздержит царьство, но прелестию восхитит власть". Знамение 10-е, лист 49.

Второе: Како же антихрист уподобится Сыну Божию, или богом наречется, еже есть похитит Божию власть? О том приснопомнимый святый Кирил Иеросалимский сице глаголет [Кирилова, лист 24]: "А иже не веде учит, без ума дмяся, и не держит Христа главы, из Негоже все тело, и сам чинится вместо Христа главою церкви Христовы, той есть антихрист". И паки [лист 45]: "Иже имать сести на Римской власти, и ту на земли обогатится, и вместо Христа прозовется, и всех к себе от церкви отвлечет". Такоже и Мелетий, патриарх Александрийский, в послании 4-м пишет: "Препояса бо себе (рече) Римский архиерей начало, или власть некую мучительскую, и имя мучительства поддаде, еже бо всем блаженнейшим архиереом и учителем вселенским посполито, сиречь обще есть. Римский же все единому себе привлачати насилует. папою хотяи назватися един, и един быти церкви началом и главою. [Ниже:] Зане велия некая глаголет о себе, и самому себе достоинство и власть утворяет, имиже Сына Божия начало и господьство низлагает. но сие велеречие зверю некоему свойственно быти, проувиде Даниил муж желаний, которому зверю уста бяху велия глаголющая. [Ниже:] Еже бо себе вместо Христа соборною главою нарицати, яве есть, яко чюждим Христа творит, восхищая себе начало и власть Христову. не старого ли Рима папа, соборную главу, соборныя церкве, издалеча и помалу начиная, ныне и вконец главою себе сотвори" [Кирилова, лист 454]. Протолкуя же словеса святаго Кирила Стефан Зизаний, тако глаголет [Кирилова, лист 46]: "Иже вместо Христа быти сам прозвася, и учинися князем мира сего, и обогатися областию, и всего мира обдержателем прозвася, восприят на ся Божию и святительскую власть, по всей вселенней послов посылает, и всех царей к своему престолу совокупляя. Даже и оный великий град Вавилон, на пролитие крове готов будет. которыи Вавилон, сам Христос пришествием своим помрачит. о сем чти во Апокалипсисе, главу 17, и на листе 26-м. Папа же Римский, отринувся от греческия области, и от царства, и взяв на ся не токмо престол и власть царскую и святительскую, но и Божию. готовя престол, якоже пишет, по 1000 лет, в старом Риме старейшии. а последнии князь мира сего, человеки от всех царей земных к себе в повиновение привлечет. и якоже первее на греки, тако и на иныя мечем начнет воевати, и всех християн, и всяко колено начнет льстити, дабы ему яко богу поклонилися. различными коварствы, любовию, дарованием, обращением, прошением, грозою, войною, посольством, и слуги своими, к своему духовному святительскому уставу приводит восхищающии, дабы никто не пребывали в прежней православней вере, единыя святыя кафолическия апостольския церкве греческаго закона, и от святых отец уставе изложенном на вселенских соборех. и на его бы Римския новыя полныя еретичества уставы приступили. иже по вся годы, то сице, иногда инако, устав пременяет, и се есть знамение последнее антихристова наставления". До зде Кирил.

Согласуяся древним некто от новых учителей премудрый философ и богослов Софроний Лихудиев, в книзе своей именуемой Мечце, пиша о превозношении папежей Римских, тако глаголет [в книзе Мечце, по конец книги]: "Звягут (рече) папежницы (яко папа) всякий закон, всякий суд в себе самом имать. он, рече, все может творити, еже Христос творит. он есть, глаголют, зде на земли по вознесении Христове на небеса вторый христос, и туюжде власть имать и силу, юже и Христос имяше, прежде неже вознестися на небеса. он, глаголют, имать совершенную мощь обоего меча мирскаго и церковнаго, зане папы и Христа един есть престол. он судия есть вселенныя, сам ни от кого имать сужден быти. он вся судит, зане ничто же может согрешити. Зде, о сицевом превозношении папине, не неприлично есть рещи, апостолом святым Павлом глаголанная: да никто же вас прельстит ни по единому образу. яко аще не приидет отступление, и открыется человек греха сын погибели, противник и превозносяися паче всякаго глаголемаго бога или чтилища, якоже сести ему в церкви Божии, аки богу. Яко папа о себе мечтает, еже толкуют святии и мудрии толковницы, яко сести ему не во Иеросалимстей церкви, но в Римстей. о сем довольно разумевай". До зде Лихудиев.

Зде испытай силу словес, како папа Римский Богу уподобляется: како на поклонение всея вселенныя владык в повиновение приводит: како вся колена земная к себе на поклонение, яко богу привлачает. Ибо не чювственно сие действует, но яко сего ради Богу уподобляется. Иже не восхоте равномерно с прочими патриархи почитатися, но главою церкве соделася. Сего ради и сан Христов на себе восхити, и тако антихриста себе содея. Обаче не глаголется к царским уставом ему преводити, но к своему духовному святительскому уставу. и не извещает, яко Богу Божию честь ему от покаряющихся возсылати, но точию на его Римския новыя полныя еретичества уставы приступати усилует. Разумей же и сие, яко едино имя папино нарицается, еже отринувся от греческия области, и взяв на ся власть царскую, и святительскую, и Божию. Обаче не едино лице папино, еже отринувся от греческия области, и взят тую власть на ся, но многия лица во едином заключитися имут: яве бо от сего, яко, рече, начат по тысящи лет в старом Риме старейший. Но папа Римский от греческия области отринувся еще до тысящи лет. О чем выше сего показуется глаголет [Кирилова]: "ибо дух антихристов, един от духовных старейшии Лев, третии папа Римский, бывыи по рожестве Христове в девятом сте, восемдесят четвертаго лета, той содела сие: иже первое вси западныя властодержавства от области греческия, и от Цареградскаго престола отведе, и другаго царя в Риме учини, Карула Великаго". О чем и в книзе О вере, во главе 30, воспоминает глаголя: "но ниже убо слышится имя римских царей, якобы рещи от великаго Карла. всю власть от тех времен папа на ся привлече, и вкупе царь и святитель наречеся, не явный ли сей антихристов предотеча". До зде из книги О вере.

Обаче от Карула до тысящнаго лета, 116 лет продолжися, от еже раздор царству учинен бысть. И многия папежи на престоле том по разорвании быша. А начат отступление (или рещи конечно нововводити ереси) по 1000 лет, уже не Лев, но Силивестр папа. Якоже в той же книзе О вере сказуется [книга О вере, глава 27, лист 238]: "по тысящи лет развязанный ангел бездне совершил, яко той Силивестр Магус. и по нем его даже по се время отступницы предаша закон". До зде из книги О вере.

Темже, аще и едино имя папино нарицается, еже о разорвании царства, и о взятии царской, и святительской, и Божией власти, обаче во множество лет продолжением, многия папежския лица тую власть содержаша, и предаша закон свой содержати.

И от сих всех вышепредложенных свидетельств достоверно научаемся, якоже божественная писания показуют нам: самого последняго антихриста, не мирскаго чина царя быти, но духовнаго чина, и суща святителя, иже к своему духовному святительскому уставу приводящаго. Не чувственно Богом себе нарицающагося, или уподобляющагося Богу, но восхищением неподлежащия ему власти. И поклонение такожде не чювственное себе, яко Богу творити повелевающаго, но исполнением его еретических уставов. И не в едином лице, но во многих лицех. И не собою токмо, но и посланием и слугами своими. Не единообразно же, но различными коварствы: обещанием, прошением, грозою, казнию, войною. И не в едино время, ни ко единому токмо уставу имуща приводити, но многолетно продолжаемо, и по всягодно устав пременяюща. Иже нарицаются его антихристовы римския новыя, полныя еретичества уставы, к ним же приводити имать восхищающи. И в сих заключается многия духовныя лица, иже мечем воюют, и веры ради труждати и мучити повелевают. А царства и власти поседающе силою и коварством, под свою власть покаряюще, якоже Кирил святый в знамении последнем о антихристе явственно поведает.


Вопрос, 340.

По сказанию церковных учителей, антихрист родитися имать от скверныя жены, мнимыя девицы, от Данова колена, следовательно, яко и чтити имать зело язык жидовский. Тии бо и до ныне чают пришествия его. Убо ли ныне по чаянию их прииде к ним мессия, известивше и сия?


Ответ, 340.

В вышепредложенных ответех довольно рехом, яко святии учители церковнии, глаголанныя историально речи, якоже о пришествии антихристове ко июдеом, тако и о рождении его от колена Данова, и от жены скверныя, мнимыя девицы жидовки, не к единым относят жидом, но и ко всем языком, убо зловерне мудрствующим.

Богоубийцы же жидове, из давных лет, паче же от самого их убиения на кресте Спасителя нашего Исуса Христа, антихристу усвоишася, и его вместо Христа уже духовне прияша. И беззаконие их совершися, и исполнися, и запечатлеся, и ничтоже прочее остася, и дух антихристов уже прияша. О чем святии учители церковнии свидетельствуют. В начале возлюбленный ученик Христов Иоанн Богослов, в соборном послании своем глаголет сице: "всяк дух, иже не исповедует Исуса Христа в плоть пришедша, от Бога несть, сей есть антихристов, егоже слышасте яко грядет, и ныне в мире есть уже". До зде Богослов. Жидове же не исповедуют Исуса Христа в плоть пришедша, и се яве есть, яко в них дух антихристов. И паки Богослов глаголет [зач. 71]: "кто есть лживый, точию отметаяися, яко Исус несть Христос, сей есть антихрист". Жидове же отметают Исуса Христа и глаголют, яко Исус несть пришедый мессия (си есть Христос): и се яве есть, яко в них лживый антихрист есть. Такоже и в предисловии того послания сице есть: разсуждает же в послании сем, что есть свойственно антихристу. Быти же сие еже глаголати, не быти Исуса самого Христа. Жидове же, глаголющии таковая, яко не быти Исуса самого Христа, присвояются антихристу, его же и дух в себе имеют. О нем же Богослов глаголет: "яко и ныне в мире есть уже".

Той же Иоанн Богослов, во Откровении своем, во главе 16 пишет: "яко 1-й ангел, излия фиал свой на землю, и бысть гной зол на человецех, имущих начертание зверино, и кланяющихся образу его. А в толковании того стиха протолкует: яко сие бысть во время первыя печати, егда июдеи твердовыи ослепоша, на них же бысть начертание зверя, сиречь дух антихристов". И в малом Апокалипсисе, белоруской печати: "гной зол, затвердение сердеца жидовския. альбо першее оскорбление церкве, за Христа и за апостол". И от сицевых богодухновенных и тайнозрительных откровений показуется, яко богоубийцы жидове антихриста прияша, и к нему усвоишася, и дух антихристов, и печать его скверную имеют в себе, и образу зверину уже покланяются.

Еще же и божественный Златоуст, в слове 3-м на июдей пиша пришедшим временем, сице глаголет: "много (рече) согрешают, но верховное злым когда будет; егда Владыку своего убиют". Сия глагола и Христос: "исполните меру отец ваших. раб убиесте, приложите и Владычнюю кровь. Зри согласна разумения: Христос рече исполните. пророк глагола, еже совершитися грехопадению, и еже запечатлетися греху. что есть запечатлетися; яко ничесому же остати прочее, и еже привести правду вечную. кая же есть вечная правда; разве от Христа данная. и еже запечатлети видение пророка, и еже помазати святое святым, сиречь престати пророчеству прочее. се бо есть еже запечатлети, оставити помазание, оставити видения. сие и Христос глаголаше, яко закон и пророки даже до Иоанна. зриши ли, како все совершенно зде претит опустение, и грехом воздание и неправдам. не бо простити, но месть воздати согрешением их воспрети Бог. и когда убо се бысть; когда отъята быша пророчествия совершенне, когда помазание разрушися, яко не ктому паки на то же восприити. аще мы умолчим, камение возопиет. сице бо свидетель есть вещем глас. ниже бо имамы другое время рещи, в неже сии пострадаша". До зде Златоуст.

Какоже возлюбит род жидовский и чтити их начнет, на сия святый Кирил возглаголет тако [Кирилова]: "яко антихрист к жидом приидет аки Христос, и от жидов прият имать быти. (Ниже:) приидет же антихрист тогда, егда в жидовской церкви не останет камень на камени по словеси Христову. (Ниже:) Тогда он приидет со всякими знаменьми и чюдесы ложными, обзирая и собирая вся идолы. (Ниже:) Смотрил же есть, и се рог той воздвизает брань со святыми". И паки на знамение шестое в толковании о папежниках глаголет: "место готовит князю мира сего последнему, глаголюще: яко наш един имать быти отец папа, и всех по своей воли во всем мире соберет. егоже и жидове имут восприяти, понеже он возмет власть величайшую мерзость египетския работы. и со иным богомолием церковь Соломоню древняго закона, прелести ради созидати покусится". до зде из Кириловы.

От сих яве есть, что есть жидовство и церкве жидовския создание, сиречь бываемых дел у жидов: опресноки и органы на службу Божию, яже в жидех быша, той восприимет. Ко июдеом же глаголется тогда прийти, егда не останется церкви их камень на камени. И сие бысть по 40-ти летех от вознесения Господня царьми Римскими Веспасианом и Титом. По коем разорении, доконца жидове отвержени быша от Бога. Им же доселе Бог долготерпение свое показоваше, ожидая их обращения. Но яко на злейше прихождаху, во всеконечную область антихристу приидоша. Но аще желаеши ведати, како антихрист над жидами и чювственным царем во Иеросалиме уже царствует, то увеждь сицевым образом. Понеже духозрительный пророк Даниил о звери четвертом сице прорече: "Смотрех же зверя сего, сиречь четвертаго, и 10 рог по нему. внимах же рогов его, и се мал рог взыде, яко отрасль, и три рози пред ним искоренишася от лица его". До зде Даниил.

О сем звери Ипполит святый толкует: "которыи сии зверь; но Римское царство". А малаго рога толкует, самого антихриста быти, иже возставити хощет июдейское царство. Трие же рози от него искоренишася, три царства являет: Египетское, Ливийское и Ефиопское, их же убиет ополчением брани. О чем в Хрисмологионе, на четвертую монархию сице толкуется: "Зверь сей имяше десять рогов, сиречь десять царств зане монархия Римская егда бе во власти своей цветущая, тогда имяше под собою десять царств. Сиречь: Италийское, Францужское, Германское, Испанское, Аглицкое, Сарматское, Панонское, Ассийское, Греческое, или Македонское, и Египетское. Та же и глаголет пророк Даниил: яко между теми рогами ростяше рог малый, сиречь царство некое, еже три царства сотре. о розе сем малом великое прение есть между учеными, каковое царство бысть. мнози глаголют, яко рог малый знаменует антихриста и царство его, о немже в третией книзе последней пространно расположим. большая же часть толкует рог малый быти царство Магометово, или турское. сего ради и мы последуем большей части и толкуем, яко рог малый Магмет ложнаго пророка, начальника царства турскаго предзнаменова". До зде Хрисмологион.

И в книзе Златой чепи: "яко от антихриста развратится Константинополь град. тако на скончание трею лет, или полчетвертаго, во святый град внидет. яко Гог антихрист, а Магог персянин есть. егда же узрим персянина с царем греческим исходяща, и расширяющаго на греческия страны, и тогда разумеем безблазна, яко той есть, иже глаголется с персянином исходит антихрист". До зде из Златой чепи.

А еже три рози искоренишася от лица малаго рога, сиречь антихриста, три царства являет, якоже Ипполит святый глаголет: Египетское, Ливийское, и Ефиопское. И сия три царства, Махмета начальника турскаго ученицы, уже победиша за многая лета. О чем история, в суботу 5-ю святаго и великаго поста, о чюдесех Пресвятыя Богородицы свидетельствует, како царствующий град древле, от насилования перскаго и варварскаго, заступлением Пресвятой Богородицы невредим сохраняшеся, сице [Триодь постн. по конец книги]: "Чюдо 3-е на агаряны. Но паки понеже всюду насилие их взятся на величество, от восток и от запад возрасте, и во множество изыде. и первее убо приидоша в Перское царство, и оттоле во Египет и Ливию, дающе слово христианом, яко не нудити их преступати православныя и непорочныя, иже во Христа Бога нашего веры. егоже и не сохраниша, но многия мученики показаша, понеже не восхотеша попрати честнаго креста. сие бо творити христианы нудяхуся, и якоже рещи, всю землю обыдоша пленующе. обтекаше и Индию, и Ефиопию, и Испанию, и Мамврусийский язык, и Ливию. последи же всех и на той самый царствующий град ополчишася, хотяще его прияти". До зде от истории.

И от сего показуется, яко три оныя царства, сиречь Египетское, Ливийское, и Ефиопское, Махметовы ученицы, сиречь агаряны, уже победиша. Зане всю землю обыдоша пленуще, и Египет, и Ливию, и Ефиопию: и во свое владение покориша, низлагающе тамо веру христианскую, и многия мученики показаша. Инаго же по сих еще побеждения царством онем быти нечаемо, такоже и жидовскаго еще падения быти ненадежно есть.


Вопрос, 341.

И аще уже прииде, то убо ли собра от расточения жидовския люди? и чтит ли язык жидовский? понеже он чтити имать зело язык их. Изъявите и сия без закрытия.


Ответ, 341.

Каковым убо образом антихрист приидет к жидом, и от расточения их соберет, и их чтити имать, о том от предъидущих и последующих ответов известитися имаши. Обаче, да не явится место сего ответа праздно, от книги Кириловы, польскаго наречия, о папе Римском противу вашего вопроса да ответствуется. О чем в знаке 2-м, антихристова настатия, пишется сице: "Отрвавшиися бискуп Римский, и цесаря на сторону отложив, взявши на ся не токмо столицу и власть цесарскую мирскую, но и Божию. и готовя столицу, як пишет, почавши по тысящи лет в старом Риме, старшему и остатнему княжити света сего люд, от всех краев земли до послушенства своего притягает. [Ниже:] А на его Римския новыя, полныя уставы соизволили бы, которых не мало, што рок иначии становит, отменяет. а то есть знак певный настатия антихристова". Подобне же и во осмом знаке пишется о папе: "По всей (рече) вселенней послов (своих) разсылает, всех царей к себе и к своему престолу совокупляя. даже оный великий град Вавилон совсем на пролитие крове готов будет, которыи Вавилон Христос истинным своим царством помрачит". До зде из Кириловы приведохом вкратце.

Отнюду же мощно дознатися, яко не токмо Рим, но и всякое отступление может всех всякими образы на поклонение, или подданство тоя ереси собирати, или влещи. А понеже антихрист возлицемерится Христу уподобитися, убо якоже и Христос собирати имать от различных стран, а не единых жидов. Понеже, по преподобному Ефрему, и Едом и Моав, и сынове Аммоновы, яко своему царю, поклонятся ему с радостию. И тии будут во первых поборницы, исправляюще царство его. По толкованию же церковных учителей [Песнь Моисеов.; Толк. Апокалипс. тол. глава 17; Канон Андрея Критскаго, в четв. пятой нед. поста], Едом землен сказуется, еже земное мудрование и помышление церковь гонит, сиречь нечестивыя мужие. Се бо и зверь, по тайновидцу, из земли исходяи сказуется, сиречь от земнаго и сквернаго жития. В земленом бо житии, правда Божия незнаема есть и не составляется. Едом именовася, еже глаголется разжение души любогреховны. Таковыя убо народы нечестивыя соберет от расточения всех стран, иже будут исправляти его прескверное царство. А не по твоему мнению (еже ты восприял еси писменне, а не духовне все писание толковати) точию единех жидов соберет. Тии бо, якоже от вышшаго ответа указася, изначала от Христова их отступления антихристу присвоишася, и его царство исправляют.