Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   16   17   18   19   20   21   22   23   ...   46
Часть первая.

раздел, 5.


Вопрос, 126.

Святейший патриарх Филарет Московский и всея России, егда убо о папежницех взыскание творяше, о еже како приходящих от латин (от лютерския, от калвиньския, и от черския ереси) достоит приимати, и в соборном своем изложении законоположи, глаголя тако: "Подобает, убо и римлян, и всех (аще от лютеран, или от черкас любо от жидов) иже от различных еретических вер, приходящих к нашей православной вере греческаго закона, подобает совершенно крестити". Вы сие законное святейшаго патриарха повеление како приемлете: о всех ли чинех сие речено, или перваго чина токмо еретиках?


Ответ, 126.

Святейший всероссийский пастырь патриарх Филарет понудися всеосвященный собор собрати, и сие написати соборное изложение вины ради сицевыя, якоже и самое явствует оное изложение. Понеже ему представлено бысть от двоих священников Иоанна и Евфимия на Иону Сарскаго и Подоньскаго, что он им не повелел двоих ляхов латыньския веры крестити, точию мvром помазати. Котораго и повеле он пред собою, паче же пред собором, представити, и учини Ионе крепчайшее истязание. Сей же, защищая латин, некая несвойственная и недостоверная привождаше, еже не крестити приходящих от латин.

Чесо ради сей всецерковный пастырь, ревностию распалився Илииною, извлече из церковных недр мечь духовный, еже есть священная правила, за что долженствует латин и прочих различных вер еретиков крестити. И не рече по тебе точию лютеран и черкас, или жидов, но всех различных вер еретиков. Кая убо нужда святейшему Филарету патриарху писати о лютеранах или жидах; понеже оныя ляхи, их же прияти повеле Иона, латыняне бяху, а не люторцы, или жиды. Обаче он не единых латин, и люторцов, или жидов, или черкас, якоже ты рекл, но от всех (без изъятия) различных еретических вер приходящих к православию христианьскаго закона повеле совершенно крестити. Якоже в самом в соборном изложении, от самого святейшаго патриарха Филарета твердейше изглашается сице: "Аз же (рече) по малей силе моей, елико благодать Святаго Духа настави мя, вседушно попекохся о сем и правила святых апостол, и святых отец прилежно смотрях со вниманием. и истязовах со испытанием того ради, да уведят вси людие, всея российския земли. яко вси еретики, различных еретических вер не имут права святаго крещения, еже водою и Духом Святым. и того ради от всех еретических вер различных приходящих к православию, християнскаго закона, подобает совершенно крестити, святым крещением. по преданию и содержанию святых вселенских патриарх, еже утвердиша по правилом святых апостол и святых отец. всех же убо еретических вер, по святым правилом святых отец, сквернейши и лютейше есть латыняне, папежцы. понеже всех древних еллинских, и жидовских, и агарянских, и еретических вер ереси проклятыя в закон свой прияша". До зде Филарет патриарх.

Сие убо святейшаго всероссийскаго пастыря изглашение, елико к разуму всех еретик (а не по тебе точию латин, или лютеран, черкас и жидов) крестити, зело соглашается, толико вашему мнению весма противствует сих ради вин:

1: Понеже Филарет патриарх изъяви, яко он разсмотре, еже от всех различных еретических вер приходящих к православию совершенно крестити, от правил апостольских и отеческих. Но в правилах апостольских и отеческих о сих еретиках отнюд не поминается. А яко и не быша во оная времена сии еретицы (кроме жидов), но последи уже всех соборов произыдоша. А разсмотре по оным правилам, всех еретик второе крестити. Яве познавается, яко не о единех тобою помяненных еретиках писа Филарет патриарх, еже от них приходящих крестити второе, но о всех различных еретических вер. А яко и суть вси еретическия веры, аще павликиане, аще ариане, аще и инии, иным ересем последующе бяху.

2: Во изглашении сем святейший патриарх и вину наводит, чесо ради не суть приятно и право от всех еретик крещение, яко не имеют при оном присудствующаго Святаго Духа. Но Онаго не точию при латыньстем и иных тобою помяненных еретиков крещении присещения не бывает, но и при наватианьском крещении, якоже в толковании перваго правила Василия Великаго извествуется. Убо и за ради лишения Святаго Духа при крещении еретик, не годствует, по святейшему Филарету, от тех приимати крещение.

3: В том же изглашении ниже глаголет: "Яко всех еретических вер, по святым правилам святых отец, сквернейши и лютейши есть латыняне, папежницы". И зде убо не глаголет: лютейше есть лютеран и черкас: но всех еретических вер, по святых отец правилам, лютейши суть, яве яко прежде помяновенных в правилах святых отец.

4: Чего же ради лютейши винословствует; яко всех древних еллиньских, и жидовских, и агаряньских, и еретических вер ереси прияша, того ради и суть лютейшия еретики латыняне учинишася. Но и не по тебе точию, якоже в 129-м вопросе рекл еси, не трехпогружательнаго ради крещения лютейши суть. И не единаго ради развращеннаго крещения сих повеле крестити, но и прочих ради многих вин, якоже ниже изъявится.

5: Древлеправославная Россия не от Филарета патриарха начало восприя, еже всех еретик крестити, но от лет князя Владимира, якоже той же Филарет патриарх засвидетельствуя глаголет: "Такоже как и Московское государьство (в вере греческой от князя Владимира) учинилося, и от того времене, и по се время того не бывало в Московском государьстве, чтобы еретиков латин, и иных различных вер еретиков не крестили". Зри убо, не от патриарха Филарета или от тех времен Россия обычай восприя всех еретиков крестити, но от времен князя Владимира, приявшаго веру от греческаго православия: с нею же и обычай сей, еже крестити всех еретик приявшаго. В кое убо время сих тобою помяненных еретик лютеран и черкас еще не бяше.

6: Не точию же от Филаретова изложения возможно есть видети, яко в нем всех еретик повелевается крестити: но и новии учители засвидетельствуют явственне, яко того ради они сего изложения в своих новопечатных книгах не печатают, что во оном повелевается всех еретик совершенно крестити: якоже Нижеградский Питирим в своей книзе Пращице, во ответе 165-м довольно о сем пишет.

7: Показуется же и от последующих того изложения, яко не за едино точию развращенное крещение, якоже ты рекл еси во 129-м вопросе: но и иных ради вин, якоже от римлян, тако и от прочих еретических различных вер приходящих повелевает крестити:

аще суботьствуют;

аще Пасху превращают;

аще по планитом манихействуют;

аще Духа Святаго на два начала (еже исхождением и от Сына) разделяют;

аще грехи без епитимей разрешают;

аще многия вины в свой закон вмещают;

и прочая.

О чесом и в 44-м ответе, в разделе 4-м засвидетельствовахом.

От сих убо предложенных вин яве показуется, яко святейший Филарет патриарх не единех латин, лютеран и черкас повеле крестити, но и от всех различных еретических вер: и яко не развращеннаго ради крещения точию, но и важности ради еретичества и многих ради вин, якоже преднаписахом.


Вопрос, 127.

Аще же возглаголете, яко о всех, а не о первом чине сие речено: то изъявите, единем ли чином святейший патриах Филарет от ереси приходящих якоже от латин, или от яковитян, и от прочих подобных им принимал?


Ответ, 127.

В вышшем ответе доволно рехом, яко святейший Филарет патриарх, законообдержне засвидетельствовав от апостольских и отеческих правил, еже всех еретик без изъятия крестити повеле, а не о едином, по тебе, первом чине возглагола. И не еже от латин и прочих, но от всех различных еретических вер приходящих (рече) подобает совершенно крестити, по преданию и содержанию святых вселеньских патриарх, еже утвердиша по правилом святых апостол и святых отец. В том убо определении, еже всех еретик крестити, могут заключитися ияковитяне, понеже и тии в крещении своем пришествия Святаго Духа лишаются. Обаче тии еретицы не во время святейшаго Филарета патриарха быша, но зело в прошедшия времена. Якоже о начальнице сея ереси Иякове, именуемом Цанзале, у Барония повествуется, бяше в лете Господнем 535-м, во времена пятаго вселеньскаго собора, причастник вящьший Евтихиевой и Диоскоровой ереси. От того убо Иякова Цанзала и арменьская ересь произыде, яко той же Бароний ниже повествует, и в Кириловой книзе, во главе 30, на листу 266 показуется. Такоже и Тимофей, презвитер Великия церкве, яковитян и армен во едином полагает чине, о чесом в старопечатной Кормчей, на листу 636 явствуется. Армен же еретиков святейший Филарет патриарх, в соборном своем изложении, во главе 1, второе крестити от святых правил засвидетельствова. Яве, яко он не взираше на трехпогружательное еретическое крещение, и не разделяше смотрительным обычаем на чины, но на тех ереси, и лишение пришествия Святаго Дух в их в крещении (еже и древлеприемлемых под миропомазание благословных ради вин и нужных), повелеваше паки вторицею крестити. Такоже и прочих еретик, маркионитян, фотиан, воздержник и водопредстателей, приемлемых иногда под миропомазание, засвидетельствова от правил святых отец совершенно крестити, якоже в Потребнице, во главе 7, на листу 581-м явствуется.

Оставляем того изложение засвидетельствовать о белоруссийцех, еже оных точно пребывающих в чинех же и уставех, яко же крещения, тако и в прочих тайнодействиях восточныя церкве, но с западною соединяющихся, повелевающее, не взирая на точность крещения, второе крестити, якоже в 44-м ответе раздела 3-го, в статии 22, изъявихом.

Виждь убо, о вопросителю, сего всероссийскаго пастыря, и всех еретик повелевающаго крестити, и разньственне изъявляющаго вин ради, а не и единаго ради развращеннаго крещения, заповедающаго от тех не приимати крещения: и приемлющих древле по смотрению под миропомазание, засвидетельствущаго от святых правил, паки второе сим приимати крещение, а не пребывати под еретическим осквернением: и яве соглашающагося со святыми апостолы, и святых вселенских и поместных соборов правилы.

Темже престани, престани блазнитися о благоревностнем святейшем всероссийстем патриарсе, иная и иная о нем смышляти, в противность того архипастырской на еретиков богоугодной ревности. Или онаго изложению покорися, повелевающему без изъятия всех еретиков крестити. Или аще с ним, и в его полце и под его повелениях не желаеши пребывати: то, аще твоей совести не противно, согласися с Питиримом, Нижеградским епископом, с сущим защитником Никоновых новопреданий, с зельнейшим же ненавистником сего соборнаго изложения, и душепагубным оное нарицающим и клятве предающим за то едино, что оное повелевает от всех различных еретических вер приходящих совершенно второе крестити. Зде убо на изволение ти дается: или со светом согласитися древняго предания, и за то получить немерцающий свет невечений: или со тмою зломудрствования и всезлейших ругательств на богоугодную святейших древлероссийских архипастырей ревность: якоже от онаго защитника новшеств в книзе Пращица, во ответе 165 показуется.


Вопрос, 128.

И аще речете, яко святейший патриарх всех единым судом обложи (си есть совершенно крестити повеле): но зде докажите, аще крещенных во имя Отца и Сына и Святаго Духа, по апостольскому преданию в три погружения, повеле паки крестити?


Ответ, 128.

Аще святейший Филарет патриарх от всех различных еретических вер приходящих (якоже во 126-м ответе рехом) повеле крестити: убо и трипогружательное имеющих еретик крещение со именем триипостасныя Троицы, но со онех зломудрствованием Святей Троицы, или и иным противствованием святей церкви (якоже в 44-м ответе изъявихом), яве повеле крестити. Аще армен еретик от святых правил засвидетельствова паки крестити, убо и трепогружательное крещение имеющих повеле крестити. Ибо арменове не точию в прешедшее время, но и в настоящее со именем триипостасныя Троицы трипогружательне крещают. И паки, аще засвидетельствова воздержник, водопредстатель, павликиан и фотиан второе, от святых правил, крестити: воздержницы же и прочии еретицы в три погружения и со именем триипостасныя Троицы крещаху. Убо явственне и Филарет патриарх в три погружения крещение имеющих еретик крестити, якоже о сих еретиках в 44-м ответе и в вышшем изъявихом: такоже и в прочих белороссийцев трепогружательное имеющих крещение, но с папою римским соединяющихся, повеле крестити совершенно в три погружения. Темже явственне видится, яко святейший Филарет патриарх и всех еретик повеле крестити, и трипогружательное имеющих крещение, но со зломудрствованием еретическим, всячески не не повелеваше и от тех не приимати крещения. Верно есть слово сие, и всякаго приятия достойно.


Вопрос, 129.

Аще же речете, яко аще и в три погружения, то повеле паки крестити. Но не обличит ли вас той же святейший патриарх, иже изъявляет в чине проклятия о развращенном еретическом крещении: "Проклинаю творящих развратно святое крещение, аще и во имя Отца и Сына и Святаго Духа глаголют. но обаче крещают во едино погружение, а трижды не погружают. инии же токмо обливают водою, и не глаголют, якоже повелеша святии апостоли. но они глаголют, крещаю тя аз поп". И прочая зри в проклятии ересей. О трепогружаемых же коего чина действуется воследование изъявите имянно?


Ответ, 129.

В чине проклятия ересей не глаголет по тебе того, что тое точию отвержено от еретик крещение, которое не в три погружения, аще бы в коих не обреталися вящьших ересях: но проклинает точию в римлянех развращенное крещение, а не о прочих еретицех глаголет. Яве познавается твоего святаго писания развращение: идеже чесо не глаголет, тамо по твоему разуму припрягати усилуешися. Но воззри на прешедшия ответы, и тамо самую ясность соборнаго Филаретова изложения увеси, повелевающаго всех обще без изъятия еретик крестити. Узнаеши и разньственне о неких еретицех глаголющаго, и святая правила указующаго, аще и трипогружательное имеющих крещение, заповедающих оное от тех не приимати. Вскую явственне писанная о искомом претекаеши, а о ином же глаголющая во свидетельство тщишися насильнически приводити. О развращенне! не довольно ли ти бысть древлесоборная и отеческая правила мимошедшими вопросы развращати. Но и зде всепоследняго от первейших благоревностнаго всероссийскаго пастыря мнишися привести к растленному ти уму в согласие: яже не точию символически реченная к желанию богопротивныя ти воли склонити нудишися, но и явственне реченная на свою прелесть превратити подвизаешися. Виждь убо, виждь, яко суетне блазнишися, и несрасленная приводити понуждаешися. Ибо ино есть глаголати о качестве крещения, ино же еже разсмотряти, достойно ли есть оно к приятию. А понеже в проклятии ересей, точию у римлян развращенно деющееся проклинает крещение. Но тое проклятие нигде не глаголется, чтоб оное и им напечататися повелеся. Соборная же изложения первое и второе его быти почитаются: первое о еретицех римлянех, другое же о белорусцех. В них же явственне от него написася, которых ради вин от римлян неудобно есть приимати крещение, и чего ради и прочии древнии еретицы вторично крещатися повелевахуся. И убо в нем не за едино точию развращенное крещение повелено есть римлян крестити, но иных ради ересей, яже в 126 ответе кратко упомянутых.

Темже от всех ваших доводств признавается, яко не мы лжи сплетатели, якоже в последующем ответе от тебе оглаголуемся, но явственнейше ваше лжесвидетельствование и неправость на благоревностнаго и святейшаго патриарха и есть и познавается.


Вопрос, 130.

Посему яве есть, яко святейший патриарх повелевает крестить от всех различных еретических вер приходящих к православию не просто, но токмо перваго чина еретиков, якоже и самое действие изъявляется в чине проклятия. Вы же чесо ради оболгасте святейшаго патриарха, яко бы он не разделяя повелевает крестити, аще перваго, аще втораго чина еретиков?


Ответ, 130.

Несть убо никоего разньствия во изложении святейшаго Филарета патриарха в приятии от еретик приходящих: но единьственне во оном видится повеление от всех еретик не приимати крещения. А еже от проклятия ересей тобою приводится, яко от римлян развращенно творимое крещение проклинается: и сие убо суть не во образец приятия от еретик трипогружательнаго крещения. Понеже, якоже многажды глаголахом, святейший Филарет патриарх и не развращения ради в крещении от еретик не приемлет крещения, но иных ради вин. Убо не от нас лжесвидетельствование возлагается на сего всероссийскаго архипастыря, но от тебе и от тебе сущих твоих согласник, якоже явственныя глаголы явственне повелевающия совершенно всех еретик крестити. И сия превращающих на свой разум, якобы не о всех тамо еретических верах речено бысть: тако и чина проклятие к Филаретову изложению приписующих. И аки бы прежде его оное не бяше, чего тамо не преднаписано. Но кто от имеющих разум может глаголати, яко тамо речено бысть не от многих еретик крестити, идеже изрекошася от всех; разве точию той, иже лишен есть человеческаго разсуждения. Или, истее рещи, свойственно есть сущему уроду, претворяющему в несмысленных глаголаниях многая в малое, или безчисленная в два или три заключающих. Сице убо, о несмысленне, случися и в вашем несмысленном разуме, таковая подобная несмысленным разумети и глаголати, и явственне лжесловствовати на разум благоревностных мужей. Но сия убо оставльше глаголати, к предлежащему ответу приступаем.


Вопрос, 131.

Святейший патриарх не точию слияние всех еретиков во едино сотвори, но паче еще и разбрание изыскав, положи грядущим по нем сыновом, тако глаголя: "Се не новое предание введше, но древнее укрепляюще поновихом, и последующе заповедем святых апостол и богоносных отец, якоже они заповедаша о еретицех и о раскольницех". Вы же откуду таковое утверждение предприяли, еже всех еретиков, единым судом, якоже обливанцов, тако и трепогружаемых, облагати? явити от святаго писания.


Ответ, 131.

Аще убо святейший Филарет патриарх, якоже словом, тако и делом показуется, еже не новое, но древнее святых апостол и богоносных отец укрепляющ предание. Но святии апостоли явственне показуются не приемлюще от всех еретик крещения, яко же 46, 47 и 68 их правила показуют. Такоже и богоноснии отцы не приемлют от еретик, аще и в три погружения: аще же и приемляху, но приемляху смотрительне, а не законне, о чесом в 44-м ответе пространнейше показуется. Убо вся ведущ сия святейший пастырь, в правду написа: яко не новое, но древнее предание укрепляюще, соборне поновиша: и зело законнейше повеле от всех еретик приходящих, не точию за обливательное крещение, но и вин ради еретических, совершенно крестити в три погружения, паче же в таковое время, в которое не древнии еретицы, но новейшии лютейше онех в своем зломудрствовании возрастаху. А еже мы откуду утверждаемся, еже не приимати якоже обливательнаго крещения, тако и трипогружательнаго, обаче от еретик действуемаго: о том достовернейше достаточне показанная в 21-м и 44-м ответех внимательне потщися прочести, и не будеши вящше ны испытательне истязати.


Вопрос, 132.

Святейшаго патриарха Филарета соборное изложение все ли приемлете?


Ответ, 132.

Святейшаго и всероссийскаго пастыря и патриарха Филарета не точию едино о римлянех и о прочих еретицех приемлем изложение: но и второе о белороссийцех, им же соборне написанное, изложение приемлюще, всеусердно лобызаем.


Вопрос, 133.

Крещенных от неких не в три погружения, но обливанием, с приглашением триех божественных ипостасей, чрез обычай церковный, или повелением всея церкви где любо. И оное крещение когда и от кого порицаемо ли бяше крещением еретическим? изъявите от святаго писания, кроме всякаго натягощения и своемышленнаго приуподобления.


Ответ, 133.

Многая разньства в сем твоем вопросе показуются быти. Первое, вопросил еси о крещенных обливанием, с приглашением триех божественных ипостасей, чрез обычай церковный. Второе, таже чрез обычайное обливательное крещение, в повеление всея церкви ввел еси. Третие, и паки обливательное крещение бяше ли где порицаемо крещением еретическим, истязуеши.

На которыя твои в вопросе сем несогласныя между собою положенныя диспуты кратко сице ответствуем. Аще убо, якоже рекл еси, обливание есть творимое чрез обычай церковный, якоже и есть: ибо не точию от апостол, не точию от учителей церковных, но и от всея святыя грекороссийския церкве, не обливание, но трипогружателное всюду действуемо и воспроповедаемо бяше, якоже выгорецких ответов в 50-м, в статии 35, довольно засвидетельствовася. Како убо во втором твоем диспуте тобою речено бысть, яко негде от всея церкви повелено есть. Где же повеление сицевое обретается, того не указал еси. Аще же от апостол, аще и от святых отец, но всюду трипогружательное, а не обливательное проповедася. Како можно где во святей церкви (кроме в части заблуждения, или неведения) обрестися. Никакоже никако. Но и в третием твоем диспуте предложенное, ко обороне некоей клонящееся обливательнаго крещения, еже когда и от кого оное, глаголеши, крещение еретическим нарицается. В 59-м же и в прочих колико потился еси, еже бы едино не трепогружательное еретическим крещением сотворити: зде же той труд свой презрев, увязался еси за обливательное крещение вопрошая, от кого оное еретическим порицается. Мы же, держащеся правых мер истиннаго разсуждения, обливательное, по святых отец гласовом, нарицаем само по себе не истинным и не крещением: яко же 2-го вселенскаго собора в толковании 8-го правила, и в книзе правыя Веры, на листу 287 показуется. И еретическим может нарещися, яко не от православных, но от еретик бе взаконяемо: от православных же разве заблуждением неведения, а не от самаго общественнаго положения где законне определяемо. Убо и еретическим может нарещися, еже от произшествия еретик, понеже не православне по преданию церкве, но еретически суть действуемо. И сие может преименоватися метонимически, или за действителей еретиков еретическим, от коих аще и трипогружательное еретическим именословится, или паки за вещь, яко не православне, но еретически содеваемо: о чесом в мимошедших 59-м и прочих по нем ответех довольно глаголахом: но трехпогружательное крещение точию от еретик за ереси не приемлется. От православных же везде и всюду повторение трех погружательнаго крещения зело запрещается: обливательное же крещение без изъятия, аще от православных по неведению, аще от еретик, нигде не приемлется за крещение, якоже в предлежащих ответех изъявится.