Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы
Подобный материал:
1   ...   12   13   14   15   16   17   18   19   ...   46

Вопрос, 64.

Что есть еретическое крещение, и от кого оное произыде, и кому дадеся?


Ответ, 64.

Понеже в 59-м ответе, о сем апостольском правиле глаголя, довольно засвидетельствовахом: яко еретическое крещение, не за еже незаконнаго ради точию действа, еретическим именуется, но действителя ради, еретика суща. Такоже и прочия тайны, от еретик действуемыя нарицаются.

Но зде остается точию решить оное имя, еже есть еретическое, какое оно суть. Понеже вси суть глаголи в священном писании на грамматических утверждаются правилех: убо ради наияснейшаго ведения, судихом зде грамматическаго разума предел предложити, и тем слышателей от сумнения свободити. Ибо по грамматическому разумению, собственное имя, еже собственную и известную вещь знаменует, яко: Арий, Нават и прочая. Нарицательное же имя есть, еже общия и безизвестныя вещи знаменует, яко: еретик, раскольник и прочая. Обаче по разделению нарицательное имя есть трегубо:

существительное;

собирательное;

прилагательное.

Существительное имя есть, ему же приложено быти не может, сиречь: учение, крещение, священство, и прочая от сих, яко: ересь, раскол, и прочая.

Собирательное имя есть, еже единьственным числом множество являет, яко: соньм, спира, и прочая.

Прилагаетльное имя есть, ему же приложено быти может: учение, крещение, священьство, и подобная сим, яко: еретическое учение, или раскольническое, сиречь еретическое учение, или еретическое крещение, или еретическое священьство, или еретическое благословение, и прочая. Темже, по сему грамматическому разумению, его же древнии святии учители предаша на разсуждение священнаго писания (якоже Дамасково солнце, паче же всея вселенныя, во осмочастном своем слове глаголет), показуется речение сие, еже есть еретическое, не собственное быти, но нарицательное: и убо не собственную, но общую и безизвестную вещь знаменует. По разделению же нарицательнаго (еретическаго) разумеется быти имя не существительное, но прилагательное, ему же приложено быти может: (сиречь) учение, крещение, священство и прочая, яко: еретическое учение, или еретическое крещение, или еретическое благословение, или еретическое священство, или еретическое причащение, или еретическое служение и прочая. И по первому прилагательнаго имени разделению, (еретическое) разумеется быти, имя отименное, или притяжательное, понеже от нарицательнаго имени еретикова происходящее. Еретик бо, имя нарицательное от существительных, вида первообразнаго: еретическое же от него производящее быти является, того ради и отименное нарещися может, яко от нарицательнаго имени еретикова производимо есть. Притяжательное же быти разумеется, яко вещи коея приятжение знаменует, сиречь: еретиково крещение, и прочая, зане еретиком действованно бысть.

Такоже и по виду производных имен, якоже в грамматице полагаются, виды суть два:

первообразный;

и производный.

Первообразный вид есть, иже от инуду не производится, якоже: еретик, расколник и прочая. Производный же вид, иже от первообразнаго происходит, яко же: еретический, еретическая, еретическое. Сцевии суть имена вида не первообразнаго, но производнаго, яко от первообразнаго имени еретикова производимыя, и суть вида производнаго.

Темже убо о сем речении еже показахом, яко еретическое таковую силу содержит, еже первообразнаго вида имя собою являюще, имже вещи коея приятжение знаменует, сиречь еретиково, или раскольниково, яко еретиком действованно.

А понеже яко не собственное имя се, убо и не собственную вещь собою знаменует, сиречь, не не исправность действа в погружении крещения или ересь кую: но яко нарицательное имя се, убо общую и неизвестную и вещь знаменует. И по разделению не существительное имя се, понеже без приложения прочих речений, никоея вещи (сиречь: учения, или крещения, или прочая) само собою указати не может, но суть прилагательное. Ему же аще что приложеши, сиречь: учение, крещение, священство, тогда и разум изъясняется. Яко еретическое учение, и еретическое крещение, и еретическое причащение, и еретическое благословение, и еретическое служение, и прочая. Без приложения же аще и речется еретическое, то не точию существа вещи, сиречь ереси коея, или погружения неисправнаго, но и самаго действа, сиречь учения, или крещения, или священства, и прочаго не указуется. Того ради не мнится быти действа неисправнаго оное именование (ибо общую безъизвестную вещь собою знаменует), и не существо в крещении неисправное (якоже ти о материальной и формательной винах вознепщевася быти): но с прочими речении различных действ церковных купно сопрягаемо, и разум открывающее является. И яко отименное, убо не от действа неисправности, но от имени еретикова происходящее быти разумеется. Или яко може рещися притяжательное, еже коея вещи притяжение знаменующее, сиречь еретиково или раскольниково, зане еретиком или раскольником действованное. И по виду аще глаголется еретическое, убо зрится быти вида не первообразнаго, но производнаго. Яко еретик, имя суть вида первообразнаго, еретическое же от него производимо, и есть се вида производнаго.

И от сего грамматическаго разумения ясне показуется, яко еретическое крещение не от действа, но от действующаго крестителя, еретика сущаго. Может же нарещися и единопогружательное крещение, такоже и обливательное, еретическим, от происхождения или от взаконения. Понеже не от православных суть взаконяемы, но от еретик. Но якоже правилами святых отец и писаньми оное не истинным и не крещением именуется, якоже в толковании 2-го вселенскаго собора 8-го правила, и в книзе О вере на листу 287-м явствуется: убо и мы, по согласию с священным писанием, тако именуем.

От кого же изыде еретическое крещение вопрошаеши, и кому предадеся; яве яко от еретик, и повинующимся их еретическому учению предается. Того ради еретическим именовася, яко от еретик действуемое суть.


Вопрос, 65.

Колико еретических крещений? и все ли между собою согласуют? или паче разньствуют?


Ответ, 65.

В прешедших ответех многажды засвидетельствовахом, яко тое есть еретическое крещение, еже от еретик действуемое. А коликая суть? Елико ертических учений и соборищ обретается, толико и крещения суть многая. Но яко не не по исправности крещения точию еретическое может нарещися от еретик действуемое крещение: но от еретик действуемое еретическим именуется, якоже в 59-м ответе и в вышшем довольно глаголахом. Понеже аще трипогружателное, аще же и единопогружателное или обливательное, в 8-м правиле 2-го вселенскаго собора, и на листу 287-м книги О вере, не истинным и не крещением именуется. Не погрешит же кто, оное и еретическим нарещи, от еретическаго взаконения, яко не от православных, но от еретик суть взаконяемо.


Вопрос, 66.

Аще еретик крестит кого любо кафолическим крещением, то где и от кого порицается оное крещение еретическим?


Ответ, 66.

О сколь неопасный ваш показуется замах, дивный вопросителю, яко и тму светом нарицати не устыдился еси, еретическое крещение нарицая кафолическим. Откуду сей ваш предел разумения изыде; от коих недр священнаго писания? А понеже нигде во оном не обретается, то яве показуеши себе защитником еретическим: понеже действа их мниши быти кафолическими: понеже сие прилагателное имя кафолическое, по учителем церковным, разумеется соборный и всегдашний, или средняго рода соборное и всегдашнее, якоже богомудрый Захария Копестинский в книзе своей, во главе 5-й засвидетельствует. Такоже и авва Берында на букву К толкует: "Кафолик (рече) вселенский и соборный, который седми вселенскими соборами утвержденную веру держит". Лист 284.

Темже от кафолика кафолическое и соборное может быть и крещение, или иныя кия тайны, еже есть от седми вселенскими соборами утвержденныя веры происходящия. Что же Бароний глаголет; услышим: "Нарицахуся христиане (рече) и кафоликами, ради разньствия от еретиков, еще во время апостолов. иже тако церковь Божия в своем символе нарекоша, си есть кафоличсекую, о том сице глаголет Пациан: имя имам христианин, прозвание же кафолик. оно именует мя, а сие показует. [Ниже:] да познаем, како имамы быти верными христианами и кафоликами: ибо единением и послушанием к святей церкви и к начальником нашим, того имени сподобляемся". Бароний, в лете Господнем 43.

Зри убо, како бывает кафолик, и чего ради нарицается: яко разньствия ради с еретики, и единения и послушания к святей церкви, такоже и к началником церковным. Темже кий пример положим твоему мнению, еже нарицаеши кафолическим еретическое крещение, и никоего разньствия оному не полагаеши. О защитниче лжи! аще убо, по тебе, кафолическое суть крещение еретическое, убо и прочия все тайны еретическия и действа имут кафолическими именоватися. Отъиди. Якоже не возможно суть тму светом нарещи, или блато златом, тако и еретика кафоликом, или от еретик действуемаго крещения кафолическим именовати: от имени бо нарицательнаго, и прилагательное заимствуется, якоже в 64-м ответе от грамматических правил показахом. Но ваше вопрошение паки усугубляется: где трипогружательное от еретик действуемое крещение (по тебе кафолическое) еретическим нарицается; но летьствовало бы повратить вопрошение к твоему лицу: где в божественном писании кафолическим крещением от еретик действуемое нарицается? Но от вас того обрести всячески не чаемо, разве коим любо криворазвращенным усильством, якоже и ис праваго древа кривое творити.

Слыши внятно богоносных учителей, паче же всея святыя церкви гласы, яко не точию таковое крещение еретическим нарицаемо, но и скверным инаким и нечестивым. Якоже вселенский учитель и патриарх Александрийский Великий Афанасий, в слове 3-м на арианы и прочия еретики, в нем же и о их крещении, тако глаголя, вопиет: "Сии же бедствуют прочее, и о самой полности тайны, глаголю же крещении. аще бо во имя Отца и Сына дается совершение, не глаголют же Отца истиннаго, за еже отметатися из Него подобнаго существа, отметают же ся истиннаго Сына, и иного себе, не от сущих зданнаго возтворяюще, именуют. како не всеконечно тщее и неполезное от них даемое есть; притворение бо имущее, истинну же ни едину имущее к благочестию помощь. не бо во Отца и Сына дают ариане, но в Зиждителя и здание, в тварь и Творца. якоже ино есть здание кроме Сына: тако ино будет от истинны мнимое ими даятися, аще и имя Отца и Сына, за написанное, именовати притворяются. не бо глаголя просто Господи, сей дает, но со именем и веру имея праву. сего убо ради и Спас не просто заповеда крещати, но первее рече: научите, таже сице крестити во имя Отца, и Сына, и Святаго Духа. да от учения вера правая будет, и с верою крещения совершение приложится. Многия убо и иныя ереси, глаголющыя точию имена, не мудрствующыя же право, яко же речеся. ниже веру здравствующую имущыя, неполезну имут и от них даемую воду, скудствующую благочестием. яко же и кропящемся от них паче сквернитися в нечестии, неже избавлятися. Тако еллини убо Бога устами глаголюще, безбожия же имут порок, яко сущно сущаго и истиннаго Бога не знают Отца Господа нашего Исуса Христа. тако манихеи и фруги, и Самосатовы ученицы, имена глагоюще, ничтоже мнее суть еретицы. тако поряду прочее и Ариева мудрствующе, аще и чтут написанная, и глаголют имена, тии ругаются приемлющым от них, вящьше иных еретик нечестивейшии суще". До зде Афанасий.

В велицем же Катихисисе по вопросу отвещательно глаголет: "Поистинне ничтоже у них (еретиков) несть истинно. но все убо от смышления своего. како могут совершати действа Божия на игралищах своих; аще и Христа проповедуют, и веру свою похваляют, но вся сия льстиво и лживо творят. аще и церкви своя, и клирики церковныя, и писания божественная почитают, и мнятся еже тем же крещением крещатися, такоже и тайны божественныя, еже есть пречистое тело и честную кровь Христову имети. но вся сия не тако имеют, но инако и нечестиво. о нихже смею рещи. иже и маркионити глаголются, учаще три начала Божеству проповедати, и крещение дают не едино, но две и три. и папежи опресноком причащаются, и начало Божеству второе вводят, еже и от Сына исходити Святому Духу. македониане ветхий и новый завет приемлют, обаче другая пророки вводят. таже и пепузини, и варсунофиане, и инии мнози еретицы. [Ниже:] о них же святый Иоанн Златоуст глаголет. праздники убо и святыя дни празднуют, и святых апостол и мученик. но вся во отвержении веры истинныя, от своего умышления творят. и лживыя пророки имеют, и вся сия творят ко прельщению верным. якоже святый евангелист Матфей глаголет. востанут бо рече лжехристи, и лже пророцы. и елико бо аще не трезвятся, и праведни прелщатися будут. Сего ради разумети имамы, яко еретическая писания, и прзднества, и службы, и тайны, и проповеди не суть правы". До зде Катихисис.

И от сих свидетельств показуется, яко ариане, аще, по Матфею Иеросалимскому, и точно нам крещают: обаче Афанасий Великий крещение их равно монтанианскому и павликианскому крещению быти вменяет, и не крещение, но паче осквернение нарицает. И не точию же сих единех, но и прочих, не право мудрствующих и веру не здравствующую имущих, крещение не полезно, но скверно быти вменяет. Такоже, и по Катихисису, аще и тем же мнятся еретики крещатися крещением, но инако и нечестиво. И поряду исчисляет македонианское, еже по Матфею Иеросалимскому, точное нашему крещению бяше. Обаче, якоже и маркионитское или папежское, и прочих еретик крещения, за едину полагается, и обще выше о всех глаголется, яко инако и нечестиво суть. Не точию же се едино, но и о всем действе их купно глаголется, яко поистинне у них несть истинно: но вся, рече, льстиво и лживо творят ко прелщению верным. И повелевается разумети нам, яко еретическая писания, и празднества, и службы, и тайны, и проповеди не суть правы. Зде убо ясно известися, яко аще и точное крещение нашему крещению, обаче, по тебе, кафолическим не именуется, но скверным, инаковым, неправым и нечестивым. На соборе же, иже при священномученице Киприане, и явно крещение наватианьское и прочих (понеже на тех собор его вящьше собран бяше) еретическим именует: о чесом Бароний кроникарь, в лете Господнем 258-м, сице повествует: "Сотвори собор Киприан, собрав из Африки и Нумидии епископов 71: на котором вси уставиша, яко еретическое крещение ни есть истинное крещение, и не может в крещение вменятися". До зде Бароний.

Такоже и перваго вселенскаго собора 19-м правилом повелеваются вторично покрещеватися еретики павликиане, кия крещение содержаху трипогружательное: о чесом в 44-м ответе а разделе 3-м, и в статии второй засвидетельствовахом.

В толковании же онаго 19-го правила явственно сих павликиан крещение еретическим нарицает, идеже сице пишет: "От павликианския ереси приходящии к соборней апостольстей церкви, да покрещеваются второе. первое бо крещение, не крещение, понеже еретическо бе". Кормчая, лист 40.

В заключение же всех сих предложенных, слыши, вопросителю, святейшаго Иоанна митрополита Никийскаго, како он, пиша на армен еретиков (имеющих точное крещение нашему) и на тех, кия оное защищающих и приемлющих, вопия, глаголет: "Сии проклинаеми да предани будут диаволу. уже да не имут места спасению, но да будут от Христа чужди. аще убо толикими от всех святых прокляти бывше, и от Христа отгнани, и диаволу предани, и до скончания века от всех христиан проклинаеми, како паки истиннии христиане от правоверных прияти будут; какоже и лживи христиане, и лживи правовернии, скверное их крещение, и жертвы их, яко истинныя и крепкия творят, аще бо тмократицею прокляти бывше, и диаволу предани; како от анафемы и от клятвы благословение изыдет; или како от диавола духовное и святое дело совершается; а от анафемы благословение не бывает, и от проклятия молитва не исходит, и от диавола Христово таиньство не совершается. и от гноища благоухание не исходит, и от гнилаго трупия иныи не исцелится, ниже от червивых удов здравие иному телеси подается. ни паки от ереси, или от неверия, духовное действо исполняется, ни от неверных ниже зловерных и нечестивых совершенное и благоприятное крещение может быти. темже проявленно, яко крещение их, и вся яже от них, неприятна и непотребна суть". До зде Иоанн Никейский.

Тако убо показахом, яко арианское крещение аще точное нам, обаче скверным нарицается. Тако изъявихом, яко церковь святая, в Катихизисе, тако действуемое крещение (якоже и от правоверных), но от еретик, инаким и нечестивым сказует, такоже и македонианское с прочими в единоравенстве полагает. Сице и святии на соборех трехпогружательное, но от еретик, еретическим именуют. Сице со всеми вышесказанными, и святейший Иоанн митрополит согласуяся, таковое крещение скверным, неприятным и непотребным нарицает. Темже убо, яко мнение вашего нарицания кафолическим еретическое крещение доводами ис книг отвергохом, тако и требование о нарицании еретическим от еретик действуемое крещение удовольствовахом. Верно слово сие, и всякаго вероятия достойно.


Вопрос, 67.

Перваго чина еретицы о непорочней бане бытия како мудрствуют? и богомерское свое действие в крещении како употребляют?


Ответ, 67.

Святая правила и церковныя истории не о многих еретиках перваго чина извествуют, погрешающих о святей бани святаго крещения, якоже се: (о савелианех), евномианех и арианех, иже от Понта, такоже и о нынешних латынех, о прочих же всех умолчевают: убо и мы от себе глаголати за излишное вменяем.

А еже кия обретшеся и перваго чина еретики, а трипогружательное крещение имуще, тыя в 44-м ответе, в 3-м разделе положишася: зде же тая повторяти оставляем.


Вопрос, 68.

Великороссийская ныне церковь о непорочней бани святаго крещения право ли мудрствует? и что тремя погружении проповедает? и во что их приемлет?


Ответ, 68.

Како нынешняя великороссийская церковь о крещении мудрствует, и како самеми действии исполняет, о сем в 21-м ответе, в третией части показахом. Такожде и в первой части и в 44-м ответе, в десятом разделе во обоих сих довольно засвидетельствовахом. А какоже российская церковь о трех погружениих мудрствует, о том в книжице О поливательном крещении, от Синода изданной, показуется.

1-е: Что погружение не есть главнейший обряд крещения.

2-е: Что оное не суть важнейшее и сильнейшее.

3-е: Что за оное старатся яко за крепкий догмат не должно.

4-е: Что оное трипогружательное крещение образует троицу лиц, (а не по древнему, погребение и тридневное Христово воскресение).

5-е: А что единопогружательное, единьство Божества образует.

6-е: Что воду крестительную не во образ гроба и земли образует, но во образ крови.

О всех сих вышепомяновенная книжица О поливательном крещении, во главах 7, 12, 13 и прочих показует.

И тако, по сим умствованиям великороссийския церкве о непорочней бани святаго крещения, зело противно будет святыя церкве богословным учителем, и согласно же богомерским многим еретиком.

Аще в трех лицех образовати три погружения, то будет противно учителем церковным, образующим не троицу лиц, но тридневное погребение и воскресение. О чесом в Беседах апостольских, Златоуст, к коринфом в беседе 4, на листу 1062. В евангелии же поучительном на крещение Господне, Григорий Ниский, Григорий Богослов, Василий Великий, Иоанн Дамаскин, Феофилакт, в толковании, сии вси тако, еже есть погребение и тридневное воскресение Христово в трех погружениях, образуют.

Аще же в едином погружении российская церковь, единьство Божества триипостасныя Троицы усилуется заключити: то сие умствование во всем согласно показуется быти с Савелием еретиком, сливающим три ипостаси во едину.

И паки, аще церковь российская воду крестительную во образ крови умствует быти: то сие мудрование зело противно показуется священному Златоусту, беседословствующему в 25 своей беседе на Иоанна евангелиста о крещении, такожде и Григорию Нискому, во всем Златоусту подобствующему, и глаголющим тако: "Божественныя (рече) совершаются вси образы гроб и умерщвение, воскресение и живот. и сия вкупе бывают вся, якоже в некоем гробе, в воде погружаемым нашем главам". Такоже и другий глаголет: "К сродной со землею (рече) стихии воде пришедеше, в ней якоже Спаситель в земли сокрываемся. и трижды сие творяще, тридневную воскресения благодать образуем".

Тако убо святии учители церковнии умствуют о крещении не во образ крови, но во образ земли и гроба, и тридневнаго Христова воскресения образующе. Великороссийская же церкве мудрование, еже во образ крови крестительную воду имети, согласно во всем мудрованию люторскому обретается: якоже о сем в Разговорах с люторским попом Матфеем древлероссийских учителей ясно показуется. О чесом зри тех разговоров, нарицаемых Валдемаровых, в основании 13.

Таже и иная множайшая великороссийския нынешния церкви о святем крещении неправомудрствования, за множество писати оставляем: иная же положишася 21-м ответе, в 1-й и в 3-й частех, тамо да созерцаеши.


Вопрос, 69.

В правиле третияго вселенскаго собора написано тако: "Аще кто к символу православныя веры ино сложение приложит, да извержется". Нецыи же епископи в таковое зловерие уклонишася (иже к символу святыя веры дерзнуша иное сложение приложити): и в таковом будучи зловерии, многих крестиша в три погружения, с приглашением триех божественных ипостасей: и мнози от их прелести во обращение к православной церкви приидоша. Вы убо о сих како разсуждаете: достоит ли таковых без второкрещения приимати, понеже о них суд извержения изречен бысть?


Ответ, 69.

Несть иной толикой вредности церковным законом, якоже слияние всяким вещем творити, яково же видится, вопросителю, в ваших вопросех, или якоже в настоящем сем вопросе. И не точию слияние, но и самыя лжи на соборныя правила сплетаются. Понеже святая церковь всякой новопрозябающей ереси сицевыи имеет суд, в нем же три сия времена хранятся наблюдения.

1-е: Егда появляется от кого любо кая ересь.

2-е: Егда явившаяся ересь от благоревностных хранителей закона обличается, или излагаяй оную, увещается от тоя отстати.

3-е: Егда всеконечно возупорствуется той придержатися, тогда всецерковный суд ересиарху (или ему последующим износится): или из сана извергаются, если обрящутся имеюще оный: или отлучаются, если будут простолюдини. Если же всеконечно возупорствуют, тогда и клятва всецерковная на оных возлагается, и потому судится соборне тех заблуждение, коему всеконечному наказанию будут от таковаго сонма приходящии ко истинному православию повинни. Зри и во внешних гражданьских судах, сии трие казни обретающияся: или плетьми наказует или кнутом, и с положением некоего знамения и сосланием в сылку определяют, или конечне неким главоотсечением жизнь прекращают.

Тако и в церковных казнех три же сия уставлена суть: или под проклятие ересей малых, или под миропомазание средних, или под крещение великих еретиков подлагают.

Таковый убо предел в разсуждении являющихся ересей церковь Божия имела. Сице убо леть есть и о сем правиле 7-м 3-го вселеньскаго собора разсуждати. Понеже сей святый собор положи сей глас страшнаго запрещения на символ веры после перваго и втораго вселенских соборов, на которых оный изложен бысть ради утвержения святыя кафолическия веры. Да не кто от зловерных, или от киих любо поколеблет оное всесоборное изложение на вред и погибель человеческим душам, и за то таковым ужасным запрещением запретиша. Приложение же к символу от злославных различно может обрестися: от овых вящьше, от овых же посреднему, а от иных мнее. Яково же может быти савелианское, святую Троицу сливающе во един состав: павликианское же, или фотинианьское, не исповедающее во Христе Спасителе совершеннаго Божества, но едино точию блядословящих человечество, зело в крайнее противление сему святому символу: от которых святая кафолическая церковь отнюд не приемлет крещения. Или нынешних папежев и прочих западных еретиков, приложение к символу, еже Святому Духу исходити и от Сына. За что святая церковь, яко древлегреческая, тако и древлероссийская, от них не приемлет крещение: о чесом Бароний пишет в лете Господнем 1054, такоже и во изложении святейшаго Филарета патриарха, во главах 2-й и 5-й показуется. За сицевая и иная сим подобная зловерная сложения, прилагающих к символу святыя веры, и в том упорственне утвержающихся: не погрешит кто, по согласию древлевосточныя и древлероссийския святыя церкви, таковыя зловерныя, к святей церкви приходящия, вторично крестити.

Преподобный же Максим Грек толь опасне наблюдати символ веры повелевает, чтоб иоту едину, или едину черту не превращати, сиречь ни приложити, ни уложити, ни превратити ни едино речение, ни писмени отъяти в нем. В книзе О вере на превратителей символа трикратная анафема полагается. Лист 8.

О прочих же бесчисленных ересех отчасти в 21-м и 44-м ответе явихом, таже и о различии оных приятия тамо показахом, и чесо ради не приемлется от единех и тех же ертиков крещение. А что же в твоем вопросе речеся, еже нецыи епископи, уклонившеся в таковое зловерие, к символу святыя веры дерзнуша ино сложение зловерне приложити. А того не написал еси, кия и коих стран епископи, и в которыя времена быша, и кое зловерное сложение приложиша. Убо и мы таковое твое вопрошение за ложное и несправедливое почитаем, яко не изъявляющее лиц, не показующее стран, не засвидетельствующее времен, и не достоверствующее зловерное, кое сложение от тех приложенное. О слепче! должно бы ти должно, все сие изъяснив, и вопросом вашим нас убеждать Аще ли всего того оное лишается, убо и мы за ничто оное вменяем.