Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 52.
И аще возглаголете: како убо от сих, иже антихриста себе сотворших, прияти имамы крещение, но убо паки крестити подобает: То по коим правилом таковых подобает крестити?
Ответ, 52.
В вышшем ответе о сем изъявихом, и указами на прочил ответы засвидетельствовахом, зде же повторяти таяжде не долженствует. Но по толкованию 52-го правила, антихрист разумеется противник быти Христу. Такожде и сосуд избранный, Павел, апостол, во втором послании к солуняном, во главе 2, антихриста противником нарицает: убо посему и вси еретицы антихристами или противниками нарещися могут. Якоже и Богослов в своем послании всех еретиков антихристами нарицает. Убо поелику кий еретик в злобе своей превосходствует, по толику и к Богу противляется.
Вопрос, 53.
И аще ли паки возглаголете: яко не достоит таковых повторекрестити, понеже у них тайна крещения во имя Отца и Сына и Святаго Духа совершается. То Господа ради рцыте нам: единаго ли ради православнаго при погружении приглашения достоит таковых приимати, или прочих благочестиво догматствии ради?
Ответ, 53.
Рехом уже в 51 ответе, в какой силе 52-е правило святых апостол правило и с толкованием состоится. Обаче зело удивляемся вашему вниманию сего правила, что оное вы конечно привлачаете к еретичестей стране, в котором нимало того не помянеся. К сим же напряжение ваше устремляется к действию, яко бы еретическому, чесо ради таковых крещение приятно: или за приглашение триипостаснаго имене, или за прочия благочестивыя догматствия.
Но благоволите известитися о еретическом крещении, аще и во имя Отца и Сына и Святаго Духа, аще и в три погружения совершаемом, но неких ради важнейших вин не приемлемом, в 44-м ответе, в предложенных разделах, со известными свидетельствами: нас же оставите не многопотительных и утруждаемых, и о том же многажды от вас со истязанием вопрошаемых. Но вам, якоже видится, обычествует о едином многажды вопрошати, нами же таяжде предлагати за излишний труд и невежество есть почтительно. Но и от ученых нечто сему согласное показуется: "Разумна, рече, мужа, еже снисходити времени, искусна учителя, еже кратку быти в поучениих". Грамматика, белоруских печатей.
Вопрос, 54.
И аще сии, по сказанию святых апостол, и за антихриста быти вменяются: но обаче тайна святаго крещения во имя Отца и Сына и Святаго Духа совершаема от них бяше, ихже святии отцы, иже на соборех бывший, повторекрестити не повелеша. То чесо ради вы ныне от великороссийской церкви крещенных сущих в три погружения не примлите: еда убо горши оных ю быти вменяете?
Ответ, 54.
Иже на лжах утверждается, по премудрому, сей пасет ветры. Глаголет же и самая истинна Христос Спаситель: "Лжа от диавола". Такожде и то есть самая лжа, еже указывати на апостольское 52-е правило, яко бы оное, о еретиках изложенное, кия за антихриста сущаго на самое благочестие, или на Христа противными догматами вменяемыя: котораго тобою мнимаго разума отнюд тамо не обретается. Но вменяются ли тамо кия епископы за неприятие грешников на покаяние; и сие реченно бысть в апостольском правиле от состоящих в церкви, которых и извержением сана, а не проклятием, или которым любо иным судом (якоже церковь святая обычай имеет еретиков не просте приимати) наказует, о чем и в предних ответех изъявихом. Но и еще присовокупил еси на сие подобие и великороссийскую церковь: несличная и зело несогласная к своему немерению привлачая. Но погрешает ли великороссийская церковь противеньством ко Христу Спасителю, и к Его святей церкви; но зело вящьшим и отменным погрешением. И не наватианскою ересию, по тебе мнимыя, но овыя ереси от себе привнесе, овыя же древних великих еретиков возобнови, якоже довольно в 21-м и 44-м ответех засвидетельствовахом. И о трехпогружательном от еретик действуемом крещении достаточно представихом, убо и отсылаем слышати желающих тамо внятельно созерцати.
Вопрос, 55.
И аще тяжче оных еретиков ныне великороссийскую церковь быти сказуете: где тако обретаете? и в коих правилах о ней предписано? о сем тонкочастне, без закрытия и без всякаго сомнения извольте объявить непременно.
Ответ, 55.
Рехом ти, яко довольно уже в 21-м ответе объявихом: в которых и коликих, и киих еретиков в согласных ересях церковь великороссийская обретается. А еже в коих правилах о ней предписано вопрошаеши; но правила во всех соборех написашася, или о прешедших, или о настоящих еретиках, и от тех плевелосеятельствах. И сей разум быти сказуется догматической: по иному же, род судебной. Предписанной же разум, по премудрейшим, быти сказуется металипсический или таинственный, свойственный пророком или учителем церковным, предсказующим предбудущая. Но о предсказаниях о великороссийской церкви в 5-й части благоприлично есть нечто из святых писаний на ваши вопросы побеседовати, зде же иному место уступим.
Вопрос, 56.
Скверный еретик Нават колики ереси име? о сем тонкочастне испытаете известите.
Ответ, 56.
Аще убо скверный есть еретик Нават, якоже в вопросе своем рекл еси, убо от сквернаго и действа скверныя, а не освященныя происходят: темже и крещение тех есть сквернение, а не освящение. Но у тебе не тако суть: но в 88-м вопросе божественным, а не скверным оных наватиан крещение нарицаеши: убо сам от себе с своими глаголании несогласен показуешися. Идеже ти нужда в защищение великороссийския церкве привлачает, тамо древния сия еретики отягчаеши важностию ересей. А идеже к их приидет к действам, си есть к крещению и священству, тамо все силы употреблявши, како бы защитить тыя их таиньства. Яве ваша зде показуется неистинность и несогласие самому с собою.
Преподобный же Максим Грек писание, или кое учение, по тремя свойствам за достоверное признавать повелевает: первое, по благоверию списателя: второе, по согласию с догматами и преданием: третие, по согласию же всему самим с собою: о чесом в предисловии Грамматики, Московския печати, на листу 21 на обор, показуется.
Аще же сие ваше разумение не точию с правильным разумом, но и само с собою разликует, убо и вероятию всячески не достойно. Понеже правила святых соборов и святых отец сих еретиков чистыми нарицают, за еже грешных на покаяние не приемлют: о чесом перваго вселенскаго собора правило 8-е с толкованием показует, и Бароний кроникарь в лете Господнем 254 пишет. Убо и мы сих еретиков, по наречению от божественных правил, чистыми нарицаем, аще они по своему противному мудрованию святокафолической церкви и не суть чистии, паче же по лишению в своих действах Святаго Духа, якоже преподобный Никон Черногорец и Матфей канонист на 1-е правило Василия Великаго засвидетельствует. А еже вопрошаеши о самем еретице Навате, коликия он име ереси; обаче сим именем два еретика сходным нарицахуся: един бе Нават епископ Африканский, другий же Наватиан презвитер Римский. Сии убо еретицы едино почто мудрование имеяху: завистию же любоначалия на Корнилия папу восташа, вину нань причитающе, яко отпадших, или отрекшихся от Христа, на покаяние приимаше, того ради и раздор с церковию учиниста: о чесом Бароний в лете Господнем в 254-м и в прочих повествует. О Навате, или Новотиане (по Баронию), пишет Матфей канонист состава а, во главе 2, что он есть раскольник: что от правил ничесого погрешаше, но точию в гонении подклонившимся и пожершим отрицаше покаяние и двоеженцем не приобщашеся. Но и премудрый Максим Грек, о сем Навате и от него произшедших наватианех пиша в 68 слове своея книги, вящше сих ересей не описует. Такожде и Алексей Аристин, бывый уже по 7-м соборе, и во всем совершенстве еретичества сих еретик видяй, и сей такожде, толкуя перваго вселенскаго собора 8-е правило, более вышеписанных от Матфея канониста ересей за Наватом, или от него в произшедших, за чистыми еретиками не описует. Но и прочий описующии: Тимофей презвитер, в старописменной Кормчей, Евсевий Памфилийский, Созомен историк, Иосиф Волоколамский, вящше за сими сих ересей не находят, и исповедание веры и крещение согласное с правоверными быти у сих чистых еретиков сказуют: убо и мы вящьше сих обрести не возмогохом. Аще от вас вящшая и множайшая где обретошася, просим вас обретенное на среду нам изнести.
Вопрос, 57.
О оном скверном еретике Навате по колицех правилех суд извержения изречен?
Ответ, 57.
Преподобный во священноиноцех Матфей во главе 2, перваго состава о сем еретице Навате сице пишет: "Нават презвитер сый стараго Рима, глаголемых чистых ересь начат, расколник сый истее, а не еретик, не бо в чесом от правил предании с верными разнствоваше, но иже в гонение подклонившымся и пожершым отрицаше покаяние, двоеженцем же не приобщашеся. их же ради, аще и не о вере погрешаше, но за немилосердие его и братоненавидение, собору бывшу в Риме при Корнилии папе, Декию царствующу, извержен бысть и проклят, якоже Памфилийский Евсевий исповедует". До зде Матфей.
Зри убо, яко при котором папе Корнилии сей бяше от того убо соборне извержен, и не точию извержен, но и проклят бысть. Преподобный же и премудрый Максим Грек книги своея во главе 68 о наватианех сице глаголет: "Слыши внятно, и разумей прямо еретики, иже от Навата презвитера бывша Римскаго, наватиане нарицаемии, ниже о крещении, ниже о таинстве православныя веры, ниже о ином коем законе церковнем беззаконноваху, но зане точию дарованное от человеколюбца Спаса Христа грешником покаяние отрицаху, и не приимаху на покаяние обращающихся, иже в гонении Христа отвергошася, за то едино отриновени быша от всякаго собора православных, и проклята быша". До зде Максим Грек.
Зри убо засвидетельствующа премудраго Максима Грека о сем Навате, или от него проистекших наватианех, яко не от единаго или от многих соборов и правил суть отриновени и проклята быша, но от всякаго собора православных, сиречь на всяком соборе от православных отвержени и проклята.
Прочее же, желаяй вящьше ведети, да чтет Барония от лет 254 и до 59-го (точию с соглашением разума святоцерковных учителей: понеже и иная несвойственная приплетения Барониева суть, о чесом в 47-м овтете засвидетельствовахом), и тамо довольно о сем Навате, или Наватиане, написано обретается, и прочих многих церковных историков.
Вопрос, 58.
Приходящих к православней церкви от наватиан, како приимаху и приимати повелеша?
Ответ, 58.
О различии приятия святыя церкви от сих наватиан, приступающих к приобщению верных, доволно уже предложихом 44-го ответа в разных разделах, такоже кратко и по нем засвидетельствовахом. Убо довольствуем вас тамо предложенными свидетельствами, зде же повторяти таяжде за множество оставляем.
Вопрос, 59.
В правиле 46 святых апостол напечатано: "Аще епископ или презвитер, аще не похулит еретическому крещению, да извержется". Вы сие речение о каком крещении быти сказуете: перваго ли чина точию, или от всех чинов еретических крещаемых?
Ответ, 59.
В 44-м ответе уже рехом, яко во времена святых апостол нигде видится о трех чинах еретических писаннаго. Но сии трие чины: первый, вторый и третий последи уставлени быша, паче же на первом вселенском соборе, о чесом в 8-м правиле видети есть. Во всех же убо апостольских правилах: 46, 47 и 68-м, едино точию определение зрится, еже всех еретик без изъятия крестить повелевающее. Еже едино согласие и в завещании святых апостол взаконяется, якоже в 44-м ответе засвидетельствовахом. Но довольно бы было к разрешению того ответа предложенная, в нем же толь многими свидетельствы подкрепихом, яко святая церковь изначала непременный имеяше обычай, еже всех еретик крестити. Аще и приемляху неких еретик крещение, но смотрения ради приемляху. В настоящем же ответе, по связанию вашего вопроса, нуждное вменихом о самем точие 46 апостольском правиле побеседовати, и оное в согласие неразньственное с прочими показати.
Но яко от тебе в вопрос речи взяты не из самаго правила, но из толкования. Мы же все правило выписав, на среду представить и согласное тому разсуждение учинить вознамерихомся.
Правило 46 святых апостол'. "Крещение и жертву еретическую прием святитель, не священ". Толкование: "Епископ или презвитер, или диакон, аще не похуляет ни ругается еретическому крещению, но приемлет крещеннаго от сих, или приносимая от них на жертву, сиречь на службу приемлет, таковый да извержется от сана, кое бо сочетание Христови к диаволу; или кая часть верному с неверными".
Зри же и последующия апостольския правила, согласно едино разумение изъявляющия.
Правило 47-е: "Второе крещаяй крещеннаго истинным крещением, и не покрещеваяй оскверненнаго от зловерных, таковый святитель не освящен". Толкование: "Несть достойно дващи крестити человека, аще же который епископ или презвитер крестит кого второе совершеным крещением, да извержется от сана. Суть же нецыи иже по прилучаю прежде благоверно крещени бывше, отвергше же ся Христа волею и неволею, и осквернени бывше, и таковыя муром токмо помазуеми освящаются, и иже не крестит совершенно второе, первое крещение приемшаго от еретик, но приимет его верна, да извержется от сана".
Правило 68-е: "Дващи поставленый, и с поставльшим его, да извержется, аще не будет токмо еретическая рука первая". Толкование: "Епископ или презвитер или диакон, аще второе поставление приимет от кого, перваго возненавидев, да извержется сам, и поставивый его, аще токмо не прилучится, яко от еретик поставлен бе первие. ибо от тех крещении, не крещени: и поставлении, не причетницы".
Никон Черногорец, в 63- слове, на правило апостольское 68-е толкует: "Токмо аще объявлено есть, яко от еретик имать рукоположение, от таковех бо поставленом или крещеном, ниже верном, и причетником мощно есть быти".
Матфей Иеросалимский, в составе х, на правило апостольское 68 толкует еще: "Аще от еретик хиротонию приял бе. отметаем бо таковех, якоже крещение сице и хиротонию, не бо освящение се, но скверну веруем исходатайствовати".
Зри разум правил апостольских и святых отец, удобь согласующь, не определяющь на чины, ниже о действе глаголющь еретическом, но от еретик происходящем, се есть: аще от еретик крещеном, или поставленом, от таковых бо, глаголюще, отметаем крещение и хиротонию. Не действо, но лице поминают. Яко от еретик действуемое крещение, глаголюще, отметаем, а не действованное противне от них и не по уставу точию. Но внидем и в самое святых апостол 46-е правило и с толкованием (о нем же от тебе вопрошаемся) в разсмотрение. Понеже святии апостоли крещение и жертву еретическую нарекоша, вину приемлюще не от действа, но от действующаго крестителя, еретика сущаго. Якоже в толковании того правила сице толкуется: Епископ или презвитер, или диакон, аще не поругается еретическому крещению, но приемлет крещеннаго от сих, или приносимая от них на жертву, сиречь службу приемлет, таковый да извержется от сана. Приносимая же от них жертва аще погружении и лишаема, обаче нарицается еретическою. И от сего показуется, яко от них, сиречь от еретик, действуемое крещение или приносимая от них жертва, еретическая еста. Ибо не рече: по их крещеннаго, но от них точию. И аще тако апостоли в правиле 46 еретическое крещение, еже от еретик бываемое, еретическим нарекоша, якоже в толковании правила того показася: убо и прочий святых апостол правила, о еретическом крещении глаголющия, той же содержат разум, яко от еретик точию аще действуемое крещение, еретическим нарицают, и не крещение, но паче освернение вменяюще, крестити таковых святым крещением повелевают, якоже впреди показася.
Согласно же и святейший Филарет патриарх в соборном изложении о первом вселенском соборе свидетельствует: "Яко святии отцы в 19 правиле, вси купно тако возгласиша: яко еретическое крещение, несть крещение, но паче осквернение, и подобает таковых святым крещением крестити паки совершенно, сие бо, рече, прияша святии отцы, от самовидец словесе и премудрости божественных апостол, еже еретическое крещение не в крещение полагают. понеже снятии апостоли в 46-м и 47-м правиле своем, тако утвердиша, епископ или презвитер, или диакон, аще крещение, или жертву еретическую приимет, да извержется". До зде Филарет.
Еще в Потребнице велицем, во главе 75-й пишет сице: "А иже второе крестити кого крещеннаго прежде от правоверных, вся правила отрицают. разве аще кто от нечестивых еретик крещен бысть преже. тех бо крещение, сквернение есть паче, а не крещение. [Ниже:] Якоже о всех сих свидетельствуют божественная правила, святых апостол правило, 46, и 47. и 6-го вселенскаго собора правило 85. и собора иже в Карфагене, правило 73".
От сего показуется, яко святых апостол священная правила в едином согласии обретаются, еже от еретик действуемое крещение еретическим нарицают, и не крещение, но паче осквернение вменяюще, и крестити всех таковых святым крещением повелевают.
Зри убо правильный разум святых апостол и святых отец с толкованиями: яко за ересь крестителя, а не и за существо точию, по вам, крещение нарицается еретическим. Не противно же разуму будет и действо крещения (аще у них суть единопогружательное, или обливательное) еретическим нарещи, яко не в правоверных взаконяемо суть, но в неких еретицех, противниках святыя церкви.
Обаче в книзе О вере, на листу 287-м, не истинным крещением нарицает не в три погружения крещение. В толковании же 8-го правила 2-го вселенскаго собора, не крещением не в три погружения крещение наречеся, идеже сице пишет: "Крещение не в три погружения, не крещение". Аще убо в правилах нарицается не истинным и не крещением не в три погружения крещение, убо и мы, последуя готовому, тако о нем разумеем: еретическим же нарицаем, по согласию правил, и по самому существу знаменования (о чесом в 68-м ответе изъяснение учиним) тое крещение, которое от рук еретических действуемое. Понеже многия действа таковыя обретаеми суть, яже лишаются погружении, а еретическими именуются, якоже: учение, священство, причащение, благословение, брак и прочия тайны: еже от них не освящением, но паче осквернением суть. Преподобномученик же Стефан Новый и брашно, от царя еретика присланное, еретическим нарече: не по естеству, но по произволению приславшаго брашно еретика суща, того ради еретическим от него и наречеся: о чесом ноября в 28, в житии святаго преподобномученика Стефана повествуется. Тако же и пророк елей грешнаго нарицает не за существо, но за лице. Сице убо и от еретик действуемое крещение еретическим всячески может нарещися, и не освящением, но паче осквернением. И яко подобно есть всех еретик совершенно крестити святым крещением паки совершенно, якоже выше от правил засвидетельствовахом. Верно есть слово, и всякаго приятия достойно.
Вопрос, 60.
И аще речете: яко от всех еретик крещаемых сие речено, аще перваго, аще втораго, или третияго чина: то убо ли святии отцы, по оному речению, единообразно над приходящими от еретик действоваху? явите и сия без закрытия.
Ответ, 60.
Удовлися вышеписанным ответом и 44-м, в котором вся подробность приятия и неприятия от еретик, и чесо ради, пространно описана со свидетельствами священных правил: зде же паки таяжде возобновляти за лишний труд вменихом, убо и писати оставляем.
Вопрос, 61.
И аще единообразие действоваху, то явите, в коих правилех тако предаша святии отцы, еже бы всех еретиков единем судом облагати?
Ответ, 61.
Удивляемся твоему плетению и несогласию с самим собою. Ибо в 49-м и 62 вопросех о правиле и о временах апостольских вопросил еси, в средине же, си есть в 60-м и 61, о действах, чинимых над еретиками святыми отцы, вопрошаеши. Оле твоея слепоты, вопросителю чудный! Во всех убо твоих вопросех не к правде, но ко лжи и к кривоглаголанию скланяется твое непщевание. И на едино точию устремился еси, еже чем нибудь уловить нашу грубость. Но потребляли лукавнующия Господь, не даст в вашей злоковарной сети рабом своим уловитися. Кая убо польза о едином во мнозех местех многая глаголати; если о правиле святых апостол и о их действии над еретиками хощеши уведети предел, зри 59-й ответ: если святых и богоносных отец творение, созерцай 44. И тамо пространно узриши показанных еретиков, во время соборов и по соборах, приятие и неприятие, и чего ради приимаху от неких и для чего не приимаху: и тем апостольское неприятие от сих подкрепиши, и святых отец разумение увеси. Мы же вящьше того, и паки таяжде писати, за неудобность полагаем.
Вопрос, 62.
Во дни апостольския кия еретики бяху? и кия в них бяше ересь? в самого ли Бога веры погрешаху, или во обычаех церковных?
Ответ, 62.
Кия еретики быша во дни святых апостол, и которыя в них бяху ереси, о том вам писати подробну за продолжение почитаем. Если волишь, прочти Барония в первом сто лет, такоже Епифания Кипрьскаго главы и прочих историописателей, и тако о том известишися. Но что ти о сем возмнеся; или тяготу излишнюю тамо ересей противу нынешних обрел еси? Аще же обрел, то яви нам великость оных в превосходство нынешния великороссийския церкве, точию не по пристрастию ваших умствований, древнее отягчая, нынешнее же облегчая. Мы же, по возможности нашей искавше, колико вящьшая, колико многая обретше, о чесом в 21-м ответех, как о новопреданиих, так и о новодействуемом крещении, засвидетельствовахом.
Вопрос, 63.
И аще в самого Бога о вере погрешаху: то како они в крещении превысочайшия глаголы (еже есть имя Отца и Сына и Святаго Духа) употребляху? известите и сия с достоверным свидетельством.
Ответ, 63.
Рехом ти в вышшем ответе, чтоб ты потщался прочести церковныя и прочия историографы, и от тех погрешение еретиков, бывших в апостольския времена, уведал, и тако свое любопытство утвердил. А еже, како оныя еретики во апостольския времена в крещении богословския глаголы употребляху, от тебе вопрошаемся; но о сем мы нигде от церковных историографов видети подробнаго известия не улучихом, ниже в Баронии указуется, убо и вам свидетельствовать от себе за излишество причитаем. Но аще бы кия еретики во оная времена в материи или форме крещения погрешили, не бы умолчали правила апостольския, не бы и историографы кроме известия оставили: а в чесом погрешили, о том явственне засвидетельствоваша.
Убо остается, яко святии апостоли не на едино точию в крещении погрешение взираху, и крестити еретиков повелевающе, но и на важность вин еретических, яко противляющихся закону Христову и присещению Святаго Духа.