Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 45.
И аще достоит, то по коим правилом достоит? явите и сия с показанием от святых писаний.
Ответ, 45.
Довольно уже весма по нам довольно в прешедшем ответе, по нашему худосилию, от еретиков действуемом трехпогружательном крещении глаголахом, зде же повторяти таяжде долгости ради оставляем.
Вопрос, 46.
Кия правила подобает содержати, и кия оставляти? изъявите и сие без закрытия.
Ответ, 46.
Преподобный Никон Черногорец, написавый свою книгу заповедей Господних по повелению Пресвятыя Богородицы, и по благословению патриархии Антиохийския, якоже сам в своей повествует книге. Сей убо богоносный муж во изглашении божественных правил заповедует, святых апостол, и святых вселенских и поместных соборов, и особь писанныя от святых отец правила, непременно православным христианом даже до кончины века хранити, а не оставляти, якоже в вопросе вашем вопрошаемся, и глаголет: "яко во всех тех соборех един Дух Святый действова". И паки приглаголет: "Яко аще кто некая от божественных правил истощевати, или возбраняти начнет, повинен есть по таковому правилу и запрещение приимати". Зри пространнее в книзе его в слове 63-м, и в Кормчей главу 71, на листу 637 и прочих.
А яко убо оставляти вся сия правила не долженствует, но хранити со всяцем опасением: действовати же по них должно суть не всякому во всякое время, но точию во свое время и в ключимом чине. Ибо кия правила благо приличествуют к освященным, паче же к пресвященым, убо тыя тако и приимати леть есть. А еже не освященым по нужде реченная, тая по нужде и приимати. Якоже тойже преподобный Никон Черногорец тако глаголет [Кормчая, глава 71, лист 637; Никон Черног., от слова 63]: "Божественная (рече) правила от святых соборов, и инии глаголи святых отец, и от тех самех градских закон, яко да кождо от хотящих потребное в ключимем чине, и своим временем приплодит пользу". Слово 63.
Темже внятельно к правилам приступати подобает. Не якоже в них яже глаголется, тая во всякое время, и всякому чину творити: но разсуждати время и вину, и различие вещей, и глаголанная аще смотрительне, аще обдержне, или ключимая к высочайшим чинам. Якоже той же Никон Черногорский, взем от Исака Сирина свидетельство, сице глаголет: "Аще убо, рече, не разсуждаем время и вину, и различие вещем, но яже по смотрению глаголанная, или бывшая, объятно на всяко время приемлем, главою имамы снити, и горьняя долу будут". Книги 1-й, слово 2. И паки той же: "Яко не подобает, яже по нужди бывающая, или по смотрению некоему временну, всегда тая в свидетельство приводити, но егда паки таковое найдет время". Слово 52.
Сице убо лепо есть разумети о положенном в правилах: аще где гласящая суть к высочайшим и преосвященным чинам, тая в присутьствии тех и разумети: аще же по нужде, и в нужная времена, за необходимость христианскую простым долженствуемая, тая убо тако и приимати. Или паки: аще смотрительне, ради милости кафолическия церкви, где в которых правилах прияся от еретик крещение, тамо за временное и смотрительное, и приимати суть должно, якоже в 44 ответе явихом. Аще же всегда обдержно и законно тая устремительно приимати начнем, убо вся горняя долу, дольняя же горе превратятся.
И сия вся бывают от крайняго неразу суждения нашего, яко божественнии отцы рекоша. От них же первый есть Иосиф Волоколамский, глаголяй тако: "Яко доброе не во свое время приемлемо, на злое происходит, не от естества своего, но от неразсуждения приемлющих его". Слово 5.
Согласная же сему отцу преподобный Никон Черногорский, взем свидетельство от небошественнаго Лествичника, тако подтверждая глаголет: "Есть убо егда иному лечьба, иному же смертоносие бывает, и есть и тожде томужде, во свое время приносимо, лечьба спасительная бывает, не во время же паки смертоносие бывает". Книги 1-й, слово 2.
Сице убо, разсматривающе о лежимом в правилах, и не тако приемлем к действию, якоже в них написана суть: но соглашающе писанная с виною и со временем, по апостольскому заповеданию, глаголющему тако: "В неже время достигохом, рече, то же мудрствуем, и тем же правилом жительствуем". К филиписеом, глава 3, стих 16.
Вопрос, 47.
Священномученика Киприана составленное правило где удержася?
Ответ, 47.
Сие убо священномученика Киприана со освященным собором составленное правило, еже всякаго еретика и раскольника паки крещати, не яко оставленное, или не яко презренное последующий святии отцы быти вмениша: но точию в том месте, си есть во Африкии, попреданному обычаю удержавшееся, быти объявиша. О чесом нижеследующая свидетельства указати имут.
Преподобный Никон Черногорский в предисловии шестаго вселенскаго собора сице изъявляет [Кормчая, глава 71]: "И паки Той же Святый и покланяемый Дух вдохну и научи святым шестым собором, изо уст святых в предисловии божественных правил сочетав всех собор, в коемждо колико правил изложил есть. [Ниже:] еще же и от Киприяна бывшаго архиепископа Африкийския страны и мученика, и иже с ним собора изложенное правило, еже в предреченных наместник местех точию по преданием обычаю удержа". До зде Никон.
Такожде и священноинок Матфей, в составе к, во главе 5, сице глаголет: "А иже убо от архиепископа Африкийския страны священномученика Киприана, и иже с ним собора, издавшееся правило, в тых месте токмо удержася". Той же во объятии всех вин сице глаголет: "Тем же и шестый вселенский собор, издавшееся рече отцы сими правило в местех их токмо удержася, по преданному обычаю". До зде Матфей.
А понеже святии отцы святаго шестаго вселенскаго собора, за благо разсудивше и определивше, киприановым собором составленному правилу во оных местех, си есть идеже собором его составлено правило бысть, чрез оных наместников по преданному их обычаю действовати, еже всякаго еретика и раскольника паки крещати. Обаче аще и в той точию стране сему действию быти указано, но и в той же апостольстей церкви повеленное святыми отцы творяшеся: убо не суть ересь или противность, не суть второхристораспинательство, по мнению вашему.
Аще бы была кая противность в сем от собора Киприанова уставленном правиле, не бы святии отцы оный собор засвидетельствовали: не бы сие неприятие от еретик и раскольник крещения вселеньскими богомудрыми учители в похваление положено было. О чесом той же вышеименованный Матфей Иеросалимский, во объятии всех вин, засвидетельствует о сем Киприанове соборе, тако глаголя: "Всех убо вселенских и поместных иже в Халкидоне собор первейший написуется, начальника же имущи великаго Киприана, епископ же множашеся осмьдесять к четырем, иже убо едино токмо изнесоша, яко во образе правила отречение: иже весма от всякаго еретика же и раскольника крестившихся, к соборней приходящих церкви, паки крещати. Раскольники же сущих о наваганайствуют, тогда бо яже сего ересь привниде в церковь, сие изречение воспоминает Василий, в похваление убо положи, строения же ради праздность на ня изрек". И паки той же Матфей Иеросалимский, на правило 1 Василия Великаго глаголя, сице засвидетельствует: "Годе бысть сущим о Киприане и Фирмилиане нашем волися покрещеватися. В Кархидоне бо емуже епископ великий Киприан собор отец древнейших всех собрася, иже угодно бысть общим судом всем еретиком и раскольником покрещеватися. щетаху бо сице рекше слагаху, аще и не о вере расколницы погрешают, но понеже убо глава телесе церковнаго Христос, по Божественному апостолу, от Него же вси уди, живятся и духовный возраст приемлют, сии же от состава удов телесных отторгшеся, не ктому пребывающую в них имут благодать Святаго Духа, еже убо не имут сами, како иным преподадут, но обаче рече Великий сей отец, понеже неким сущим во Асии годе бысть строя ради чистых крещение приимати, да будет приятно". Состав а, глава 2.
Такожде и преподобный Никон Черногорец, на тое же правило 1-е Василия Великаго глаголя, засвидетельствует о Киприанове соборе тако: "Чистии и тии от раздорных суть. обаче но изволися древним же, иже о Киприане глаголю и Фирмилиане нашем, единем судом облагати чистыя и воздержники, и воде предстателя, за неже убо начало разделению раздором бысть. а иже от церкве отступлыпеи, не ктому имеша благодать Святаго Духа в себе, оскуде бо подание, внегда пресещися последованию. [Ниже:] Ктому не могуще благодать Святаго Духа инем подати, от нея же тии отпадоша. тем яко от простых людии, иже от них крещаемых, повелеша приходящим к церкви истинным крещением церковным очищатися. ельма же изволися неким всяко, иже во Асии, смотрения ради многих прияти их крещение, да будет приятно". Слово 63.
И Тимофей, презвитер Великия церкве, Киприаном уставленное соборне правило поминает, глаголя: "А иже с Киприаном повелевает всякаго еретика крещати. и хотящим от ереси обратитися, десять дней, или пять надесять поститися". Кормчая, лист 636.
Поминает же сей собор Киприанов и творец книги О вере, и с прочими святыми соборы сочетовает, о чем во главе 17, на листу 158 на обор, явствуется.
В описании же книги Соборника [лист 877], сего великаго и изящнаго воина Христова Киприана ревность, сщетает равне со всеми вселеньскими учители, подвизавшимися в защищение святыя церкве от еретик.
Темже сицевыми и толикими учители сей собор Киприанов и того издавшееся правило засвидетельствуемо. Како убо от вашея страны последователи нецыи не стыдятся Барония привлачити к гаждению сего от священнаго собора, аки бы церковь сие в заблуждение и ересь постави; но свидетельства явственнаго привести не може, о чем в лете 258-м пишет. И аще бы Киприанов собор был бы церкви противен, якоже Бароний противоречит, не бы правилом апостольским: 46, 47 и 68-му, всех еретик крестити повелевающим, соглашался. Аще бы сей собор о себе точию состоял, не бы прежде его бывшему собору Агрипинову последовал: не бы в тоже время и на востоке собираемым собором во Иконии и во Фригии соглашался. Аще бы сей собор Киприанов заблуждал, не бы великий светильник церковный Василий его похвалил: не бы и сего вселенскаго учителя правил толкователи Никон Черногорский и Матфей канонист засвидетельствовали: не бы и Тимофей презвитер сего собора определение поминал. Аще бы сей собор был в заблуждении и в противности церкве, не бы шестый вселенский собор с прочими соборы сочетал, и единым и тем же Святым Духом озаренным быти известил: не бы и творец книги О вере сей собор упомянул и с прочими соборы сочетал. И аще бы сего собора первоседатель священномученик Киприан был противен, и его уставление святей церкви противно и заблуждению склонно: не бы святая церковь, во описании Соборника, с прочими великими отцы, защитниками святокафолическаго благочестия, в едином полце положила.
Остается точию един Бароний, жало своего хуления воздвизаяй на сей собор, в знак своего гнева на древлегреческую церковь. Понеже она западную и папежа римскаго с действами его ни во что поставляше, темже и крещеныя ими паки покрещеваше: о чем той же Бароний в лете Господнем 1054-м пишет.
Но Бароний великий защитник римския церкве и ревнитель бысть, темже нужно бысть ему оных дело (си есть Агрипиново и Киприаново) о крещении повторном похулити, и тако обесчестити. коим гаждением тех поносну творит восточную церковь, яко в том же деле повтор наго крещения явися, а западный костел непорочен выставляет.
И сия убо о Киприанове соборе вкратце засвидетельствовавше святыми отцы, просим от вас самех, вопросителю, яснейшаго разсуждения и соглашения с священными правилы. Мы же вящьше сих свидетельств иначе разумети недоумеем, да не явимся возносящеся над святыми. Понеже елико их жития святость от нас отстоит, толико и наше разсуждение от тех непорочнаго и праведнаго суждения на противников святыя церкви может благоревнейше и спасительнейше быти. По гласу сосуда избранна, глаголющаго сице: "Смеет ли кто от вас, вещь имея ко иному судитися от неправедных, а не от святых; не весте ли яко святии мирови хотят судити". К Коринфом 1, глава 6, зач. 134.
Вопрос, 48.
И оное правило кому повелевает от ереси приходящих крестити: освященному ли чину, или миряном?
Ответ, 48.
Кая убо нужда тогда сему собору Киприанову повелевати миряном от ереси приходящих крестити, когда велий достаток бяше освященных верных; когда не точию иереи благочестивии обретахуся, но и целый пять вселенстии патриархии со всеми подлежащими епископиями, епископии с парохиями, имущими множество священников (кроме неких еретических); в сие ли полномощное время, о чудно, освященному сему собору, на нем же осмьдесят к четырем приближашеся епископов, законополагати, еже како миряном от ереси приходящих приимати; воистину никакоже.
Понеже миряном святии отцы повелевают крестити при крайней необходимей нужде, идеже несть православнаго иерея, якоже в 10-м и прочих ответех довольно изъявихом: такоже и от ересей приходящих како простолюдину крестити никоего препятьствия в священном писании не обретается, в 32-м и в прочих ответех засвидетельствовахом. Обаче преподобный Никон Черногорец, во изглашении божественных правил приводя во свидетельство шестаго вселенскаго собора предисловие, сей собор священномученика Киприана счетовает с прочими вселенскими и поместными соборами, и единым Святым Духом озаренным быти свидетельствует, якоже и в вышшем ответе изъявихом. И паки той же Никон Черногорский о содержании и ползе всех священных правил, не единых освященных чинов причастников быти законополагает, но и всякому чину. О чесом тако глаголя извествует: "Божественная (рече) правила от святых соборов, и инии глаголи святых отец, и от тех самех градских закон, яко да кождо от хотящих потребное в ключимем чине, и своим временем приплодит пользу". Кормчая, глава 71, лист 637.
По сему изглашению преподобнаго Никона, может и Киприаново правило, в кождом чине и времени подобном, последствующих оному, приплодити пользу. А понеже и есть ныне ключимое время, яко не имеющее правильнаго и правовернаго священства, не имеющее от онаго проистекающаго освященнаго мура, им же по смотрению таковых еретиков, во время собора Киприанова бывших, к православному соединяти лику: к пользе нынешняго времени и лицам, по реченному от сосуда избраннаго: "В неже (рече) время достигохом, то же мудрствуем, и тем же правилом жительствуем". К филипписиом, глава 3, зач. 245.
Вопрос, 49.
И аще освященным, а не миряном, то чесо ради вы несличное своему дерзновению свидетельство приводите?
Ответ, 49.
Несть наше дерзновение, касающееся к несличности времени, паче же привождение сего правила (якоже и в вышшем ответе засвидетельствовахом). Но и по оному правилу, наше неприятие от нынешния великороссийския церкве новодействуемаго крещения зело благоприлично есть. Аще тогда сей собор всех еретиков и раскольников не прия крещения, кольми паче от настоящаго новодогматствования оныя, новодогматствуемое крещение к неприятию зело нужнейше и законнейше показуется. Якоже о ней (новороссийской церкви) и от нея творимем крещении, в 21-м и 44-м ответех коль многочисленными подкрепихом доводы, еже не приимати отнюд онаго есть свойственнейше.
Темже несть нашего дерзновения, ведущаго к несогласию сего освященнаго собора: но паче вашего неопаснаго и зело вреднаго приятия сего крещения дерзновение, к презрению не точию сего собора правилу, но и ко всем божественным правилом и повелением склонное, обрестися всячески может.
Вопрос, 50.
И аще кто ныне, по правилу священномученика Киприана, начнет от всякаго еретика и раскольника приходящих крестити, то не противен ли будет оный креститель правилом святых отец перваго и втораго, и шестаго собора?
Ответ, 50.
Аще убо Киприаново правило и не точное имеет в приятии тогда еретик (си есть наватиан: понеже сии в то время быша, о них же и Киприаново паче правило изложено) с первым, вторым и шестым соборами содержание: обаче сие неприятие Киприаново от всех еретик и расколник от сих соборов не почтено в противность. Якоже самое засвидетельствует предисловие шестаго вселенскаго собора, о нем же преподобный Никон во изглашении правил поминает, что сказуется от шестаго собора, сей Киприанов с прочими соборы, и единым и тем же Духом Святым озаренным быти. Убо аще бы сей собор был противен прочим святым собором, не бы был с прочими соборы сочетоваем: не бы тем же Святым Духом озарен. А яко есть сочетан с соборами, и Духом Святым озарен, убо и не противен есть. Аще же не противен есть соборам, убо по оному правилу последовати коему никоея обрящется противности.
Зри убо и в прочих правилах не единственное еретиков приятие, якоже в 44-м ответе, в 5-м разделе изъявихом. Иногда убо единех и тех же, показанныя тобою соборы, и правила прочих святых, приемлют под проклятие ересей, овогда же и под миропомазание, а иногда тех же и совершенно крестить повелевают. И сия убо святии отцы не яко не соглашающеся творяху, но яко разсуждающе время и вин различие, к приобретению еретик оных творяху. Приимаху ли тех крещение; приимаху не яко законно и обдержно, но по смотрению и вин ради благословных и нужных, о чем в вышепоказанном же 44-м ответе, в 6-м и 7-м разделах показахом.
Темже Киприаново правило не яко есть сим собором противное, но согласное, и по обдержности законов есть устроенное, еже на не имущее Духа Святаго еретическое и раскольническое крещение таковое изглашено есть повеление, еже оное без повторнаго святокафолическаго не приимати крещения. Аще и Бароний спешит оное соборное опорочить уставление: но пусть кто соглашается с Баронием, с римским защитником. Мы же соглашаемся с похвалением вселенскаго светильника, глаголем, Василия Великаго, в похваление положившаго сего собора правило, якоже Матфей канонист в объятии всех вин засвидетельствова. Аще и праздность на не изрек, яко тогдашнему времени поспешаеми, а противности на не не положи. И паки сей же церковный светильник Василий Великий, в первом своем правиле сих наватиан еретиков, о них же наиболее Киприанов собор бяше, прият крещение, повеле токмо святым муром помазовати: в 47-м же, исправляя, повеле крестити, якоже на оное правило толкователь Алексей Аристин изъясняет. Но и севаст Арменополь тех же наватиан воскрещевать повелевает, о чесом в первой книзе его показуется. Убо не един Киприан сих наватиан, именуемых раскольников, крестить законопологаше: но и прочий учители церковнии аще и приявше, обаче разсмотривше тех ересь согласну быти Маркионовой ереси, того ради, разсудивше в последующих правилах по времени и винам, крестить повелеша. И сии, по тебе, еда противнии соборам явятся, или по сим правилам таковых крещающии; ни, не тако суть: но и зело согласнии законообдержному обычаю.
Но мы не по единому сему правилу священномученика Киприана не приемлем новодействуемаго нынешняго крещения, якоже от вас мнится: и яко ныне не тыя обретаются еретики, киих в раскольники древния правилописцы (си есть новатиан и прочих) полагаху, на них же Киприаново изложено бысть правило: но якоже многими доводы подтвердихом в 21-м ответе, нынешняя великороссийская церковь с вящьшими древними еретики, и с латины, и прочими согласие в своих новопреданиях имеет. Темже и кроме сего правила, и прочих вселенских и поместных соборов, и святых отец правил, в 44-м ответе показанных, повелевающих за наивящьшия ереси, и трехпогруженцов еретиков крестити, доволно имеем. Убо и не есть нам крайняя неизбежность, на едином священномученика Киприана со освященным собором изложенном утверждатися правиле: аще время нынешнее не есть Киприаново: аще лиц священных есть лишаемо: аще мура на совершение тех крещения не обретаемое: аще еретики иныя, и не с теми согласующия: аще ереси не тех еретиков, но величайшия и вящьшия.
Темже якоже вам едино Киприаново правило на нас навлецати, тако и нам единем тем утверждатися, оставив прочая благоприличная и множайшая, не есть вещь к свойству подлежащая. Сице и судити древнюю богомудрых отец ревность зело есть опасно, да некогда Хамову безстудию подражатели будем.
Вопрос, 51.
В правиле святых апостол 52 напечатано сице: "Святитель, рекше епископ или презвитер, аще обращающагося от греха не приемлет, таковый противная творит Христу Богу нашему, противная же творя и противяся заповедем Его, несть Его ученик и несть достоин служити Ему, яко антихриста сотворив, да извержется". И аще от сих, извержению подлежащих, будут крещени в три погружения, потом же аще обратятся в правоверие, то достоит ли таковых без второкрещения приимати, или ни?
Ответ, 51.
Святии апостоли правило 52 написаша не еретиком, еже грешников на покаяние не приемлющим (тогда бо еще не бяше сих): но во опасение православным пастырем и правителем церковнаго кормила, дабы они милостивии к человеческим недостаткам были, и подражатели началопастырю Христу, рекшему: "радость бывает на небесех о единем грешнице кающемся", якоже в самем правиле написуется. Еретицы же, противницы Христу Спасителю и апостольскому сему заповеданию, последи произшедше, тако мудрствовати начаша. Начальницы же сему мудрованию сии быша: Тертулиан, Фелициссим, и Нават презвитер стараго Рима. О них же историписатели повествуют: Бароний в лете Господнем 216 и 254, и прочий: Матфей канонист, состава а, во главе 2: Максим Грек в книзе своей, во главе 78: и Тимофей презвитер в книзе Кормчей старописменной, и Епифаний Кипрьский, и инии мнози.
А еже от тебе восприятое не из самаго правила, но от толкователя Алексия Аристина, который уже бяше, гораздо спустя, последи сих еретиков.
А понеже не приемлющий епископи грешников на покаяние, по толкованию апостольскаго правила, антихристами сотворяются, яко противницы хотению Христову: но антихристом может человек сотворитися не по единому неприятию грешников на покаяние, но и осуждения ради братняго греха, и гонения на тех, иже за истинну крепце стоят. Како убо пострада Иоанн Саваитский за осуждение некоего брата, еже услыша от самого Спасителя, глаголющаго ему: "изрите ми его вон, яко антихрист ми есть". Что же и Карп оный, ярящийся на грешники, от Него же услыша: "готов есмь множицею распятися о человецех спасаемых". И прочия многая тому сообразности в книгах отеческих обрящеши. Тако убо правовернии творящий, или по ожесточению, или по злобе, врагу наущающу, причитаются евтропологически антихристу, си есть по внутреннему разуму греховным недостатком, например рещи: Якоже правовернии епископи завистодержне восташа гонением на священнаго Златоуста, или на Феодора Студита, за обличение беззаконнаго брака царя Константина, сына царицы Ирины. Приобщившийся же сей неправде священнии, извержение сана суд достойне наследоваша. Сице, и по апостольскому сему 52-му правилу, достойне суд извержения наследуют сии епископи, кия грешных на покаяние не приемлющий, в противность Христу.
Обаче сие извержение чинится точию правоверным, кия в покорность грядут святокафолическия церкве суду. Еретицы же, сущий противницы, аллегорическии (си есть духовне) погрешающе, воююще на святую церковь вражебне, и Духу Святому противствующии, упорственне держаще сие мудрование (еже грешных на покаяние не приимати), якоже наватиане и прочий, не точию извергаются от санов, но и проклятию предаются. О тайне же крещения тех, яко истинне лишенной того Святаго Духа, в 21-м и 44-м ответех, в разных разделах, довольно изъявивше, засвидетельствовахом: зде же тая возобновляти зело пространнаго дела вещь показуется, того ради и оставляем.