Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 70.
И аще речете, яко не достоит, то по коим правилом не достоит без второкрещения сих приимати?
Ответ, 70.
В вышепредложенном ответе явихом, како должно разумети о зачинающих кую любо ересь, или дерзающих превращати символ православныя веры, или како приимати от таковых летьствует: зде же да не повторим, того ради продолжения ради паки писати оставляем.
Вопрос, 71.
Скверный еретик Нават, и презельный ересиарх Македоний, православнокафолическия глаголы при погружении в крещении употребляху?
Ответ, 71.
Всюду на развращение правильнаго гласа изшел еси. Аще убо перваго вселеньскаго собора отцы в 8-м правиле, и Феофил архиепископ Александрийский в 12 правиле, и прочии вси правилописцы, сих наватиан чистыми нарицают: вскую ти вознепщевася чрез правильныя гласы прескакивати, и от себе собственный издавати глас: вместо чистых скверными нарицати, а от скверных, якоже и есть, по мудрованию их, чистым или божественным действуемое крещение нарицати; такоже и Македония, или от него происходящих, презельными в ереси именовати, сопротивно Матфею канонисту, нарицающему оных македониан полуарианами, зане о Сыне Божием здраве мудрствоваху, о Святем же Дусе зле глаголаху, о чесом состава а, во главе 2 пишет; но у вас обычай есть сицев, еже древних отягчати, новых же облегчевати еретиков, за ради вашего в таинствах к новым приобщения.
Но о сем убо сокративше, должни есмы готовому последовати, а не от себе глаголати, по гласу преподобнаго Петра Дамаскина [книга О вере, лист 5]: "Велие есть безумие то, еже оставити глаголы готовыя, и глаголати моя".
А еже о сих еретиках наватианех и прочих втораго чина (еретиков) вопросил еси: согласно ли православному крещению свое крещение действоваху; о том в 44-м ответе и в последующих по нем довольно глаголахом, зде же таяжде да не повторим.
Вопрос, 72.
И аще не православно, но инако и нечестиво: то всеусердно желаем, о сем тонкочастне испытавше, от святаго писания известите.
Ответ, 72.
Аще бы не православно, аще бы инако и нечестиво крестили Нават и Македоний, и прочии средняго чина еретицы: то не бы Матфей Иеросалимский, за ради подобия во всем, божественным нарек оных крещение: не бы Максим Грек в 68-м слове сих наватиан, ничесого о вере и о крещении погрешающих известил: не бы и прочия историографы, в 44-м ответе помяновенныя, сих наватиан и прочих, ни в чесом о вере преступающих, известили: не бы и святая кафолическая церковь сих крещение, по смотрению и вин ради благословных и нужных, прияла.
Темже о всех сих в помяновенном 44-м ответе благоволи известитися, нас же во излишних паки и паки теми же оставьте непотительных и не утруждаемых.
Вопрос, 73.
Святых апостол в правиле 7, и святаго поместнаго собора иже во Антиохии в правиле 1 написано: "Аще кто узаконенное о святей пасце предание преложити покусится, да извержется таковыи из сана". Нецыи же епископи преданное о святей пасце узаконение поколебаша: и не точию се, но и ина некая, армяном приискреняя, в них нечестия бяху. И в таковом будучи зловерии, многих крещаху во имя Отца и Сына и Святаго Духа, потом же во обращение приидоша. Вы убо о сих како разумеете: достоит ли от таковых еретик пришедших без второкрещения в правоверие прияти, или ни?
Ответ, 73.
Древлевосточная и западная церковь до перваго вселеньскаго собора, аще и ведяше 7-е правило святых апостол, запрещающее прежде времени праздновати со июдеи святый день пасхи, обаче еще тако без написания пасхалии за ради гонительствующаго времени пребываше [Слово св. Афанасия Вел. о пасхе в святцах с тропарями]. Тако точию в коемждо лете посланием о обхождении времене пасхи, по градовом согласие бе хранено [Бароний в лето Господне 325]. Того ради тогда нецыи и со июдеи, в восточней церкви обретающеся, пасху празднующе, яко же Бароний в лете Господнем 198-м повествует. Антиохийский же собор бе уже по первом вселенском соборе, якоже о нем в Кормчей, в предисловии сего собора явствуется. По оном же первем вселенском соборе, в Сирии и Киликии, сему неуставному празднованию, еже есть вместе со июдеи, некотории последующе обреташеся: чесо ради сии тессаредекатиты (си есть четыредесятницы) нарекошася, якоже вышепомянутый Бароний во 198-м лете свидетельствует. Сице убо о праздновании святыя пасхи в начальней церкви известихом. Сице и о произшествии четыренадесятников, оставшихся в некоторых прежних неуставлениях пасхи, последующих неким церквам, празднующим вместе со июдеи, первому же вселенскому собору законному по пасхалии определению не последующих, показахом. Прочее же о сих еретиках, рекомых четыренадесятниках, в 44-м ответе, в разделе 3-м и статии 9-й, како оных святая церковь в приобщение приимаше, засвидетельствовахом. Да и святейший Филарет патриарх за пременение пасхи повелевает обращающихся паки святым крещением очищати, о чесом в соборном его изложении, во главе 2-й явствуется [Потребник Бол., лист 569 на обор.].
Вопрос, 74.
И аще речете: яко не достоит, понеже о сих суд извержения положен, и яко в них сквернейшаго еретика Монтана ереси обретаются. То Господа ради известите нам: по коим правилом четыренадесятником повторе крестити повелено?
Ответ, 74.
Како не достоит за превращение праздника пасхи крестити, аще за оное превратители из сана извергаются: аще оная ересь сквернейшаго Монтана еретика? Убо в лепоту святейший Филарет патриарх, в соборном своем изложении, во главе 2-й, за сию ересь, еже есть за превращение святыя пасхи, повеле крестити, якоже и в вышнем ответе рехом. Именно же о четыренадесятниках еретицех в 44-м ответе, в разделе 3-м, в статии 9-й написахом, того ради зде паки таяжде да неповторим.
Вопрос, 75.
Презельный еретик Арий много ли ересей за собою име, и коль велики? и последующии ему коликими злохульствы обремениша, то есть отрасльми еретическими?
Ответ, 75.
Преподобный во иеромонасех Матфей, состава а, во главе 2-й, о Ариевой ереси повествуя, глаголет тако: "Ариане убо суть, иже Ариева мудрствующих. сей презвитер сый, иже во Александрии церкве, Сына Божия и Святаго Духа не ссущна Отцу, и здание всескверный предаяше". Арий же бе во время перваго вселеньскаго собора. Собор же бе в лето 325, якоже во всех летописцех пишет и в Баронии. Обаче последи перваго вселеньскаго собора, и после сего ересиарха Ария, ученицы его, нарицаемии ариане, не единогласное мудрование имеяху. Яко и вышепомянутый кроникарь Бароний, в лете Господнем 341, о арианском соборище, бывшем во Антиохии (на нем же четверогубое исповедание изложиша), повествуя, тако пишет: "На том соборищи во Антиохии написаша онии евсевиане (ариан тогда нарицаху Евсевия ради Никомидийскаго, ученика Ария) исповедание веры четверогубое. на первом глаголют, яко ариане не суть, и яко Ария кающася к себе прияша. во втором некая словеса премениша. в третием такожде. а в четвертом большее пременение сотвориша. во всех четырех исповеданиях собора Никейскаго не воспомянуша, ниже слово оное, единосущен положиша. токмо окрест ходяще, и Христа Бога исповедающе, яд свой арианский покрываху, а не истинну, но лжу различием оным и пременением своим показоваху". Ниже: той же Бароний пишет о сих арианех, в лете Господнем 347-м: "Яко в Филипполе сотвориша пятое исповедание, аки бы противу Ария, обаче в нем Никейскаго собора не воспомянуша, ниже слово единосущен положиша". И потом, якоже той же Бароний повествует [в лето Господне 357 и 359], разделишася на разныя мудрования. Овии бо тех единосущна и единоестественна Отцу. Друзии Сына Божия не единосущна и не подобна Отцу. Третие же Сына Божия подобна Отцу, а не единосущна. Тако убо о Арии еретице и о ученицех его от историков извествуется. А яко ариане крещение имеяху нам правоверным точное, и яко нецыи святии отцы вторицею оных крестиша и крестити повелеша, о том зри 44-го ответа раздел 3 и статию 12, и тем свое желание удовлетвориши.
Вопрос, 76.
Евномий, скверный еретик, чим разньствует от Ария, и кия ереси содержаше?
Ответ, 76.
О сем Евномии, злейшем еретице, в прешедшем ответе, помянутый Матфей Иеросалимский 1-го состава во второй главе тако пишет: "Евномиане же, им же начальник бе Евномие, галатянин сый, Кизику же бысть епископ, горшая зело от Ария мудрствуя, превратна бо и раба, и по всему неподобна Отцу Сына предаваше. иже убо того прелести прилагающихся, во едино погружение крещаше скверный, доле главою сих обращая. но и будущыя муки не истинны быти блядяще, страшения же ради токмо запрещенных".
Вопрос, 77.
Македоний еретик от коего сквернаго источника, таковаго мутнаго почерпну пития, еже Дух Святый единосущия Божия лишати?
Ответ, 77.
Оба сия еретика Евномий и Македоний из единаго сквернаго и мутнаго источника Ариева почерпнуста своего злохуления ересь. Обаче сия еретика в разныя источника злейшая разделистася, якоже Бароний кроникарь в лете Господне 360 повествует.
Но о Евномьевой ереси в вышшем ответе глаголахом. О Македонии же приснопоминаемый Матфей правилописец тако повествует: "Македоний исполуариане. егоже ради исполуариане нарицахуся. сего же звания инии от скверных ересий улучиша, иже убо Сына и Духа Святаго, ниже здание якоже ариане, ниже убо яко единосущна Отцу славити приимаху. странным же неким образом единосущна Отцу бояхуся якоже глаголати, да не страсть о Отце рождения ради возмнится". На поле пишет: "Македоний о Сыне здраво мудрствовал, Духа же Святаго создание глаголаше, и чуж Божества". Состава а, глава 2-я.
Вопрос, 78.
Манихей, скверный ересиарх, в богословии погрешаше, и многия ереси имяше.
Ответ, 78.
Приснопомнимый преподобный Матфей канонист о сем злейшем еретице Манихее, его же и Манентом нарицая, сице пишет: "Манихеи глаголются, почитающе манентовая. Менент же сей нарицаше утешителя себе, привидением же и мечтанием ввождаше Христа воплотитися. две начале предаваше, лукаво же и благо, сиречь, Бога же и вещь. ветхий хуляше завет, луне и звездам покланятися, яко богом, повелеваше. плотьскаго воскресения отметашеся, прехождения душам быти учаше. былия и древеса и воду одушевленна быти глаголаше".
Вопрос, 79.
Сии вышереченнии еретицы в чем между собою разнствуют? ибо они вси о Божестве погрешаху, явите от святаго писания.
Ответ, 79.
Явихом в прешедших ответех, в чем разнствующе, предложенныя в твоих ответех еретицы обретахуся.
Вопрос, 80.
Евномиане и ариане, и прочии еретицы вышеобъявленнии, крещения тайну все ли единообразно совершаху, или в чем разнствоваша?
Ответ, 80.
Явственнейше пишет Матфей Иеросалимский состава а, во главе 2-й, яко ариане и македониане, точное имея крещение нашему крещению. О евномианех же повествует, яко во едино погружение крещаху, обращающе вниз или доле главою. О манихеях же все правилописцы и все историографы умалчивают, како крещаху. Остается более верить, яко не противно кафолическому крещению, и они действоваху. Аще бы противно, не бы святая церковь своими подробнописателями умолчала. Но яко нигде о том не упомянуся, убо склоннее разумети о них, яко трипогружательное у них беяше крещение.
Но ведати суть и сие потребно, яко два бяху Ария: един от Александрии, другий же от Понта. Первый бяше презвитер священномученика Петра Александрийскаго, вторый же (якоже о нем в 91-й главе Епифаний Кипрский поведает) бе презвитер епископа Евстафия. О первом же Арии и его ученицех Матфей Иеросалимский повествоваше, яко точное правоверным имеяше крещение. О втором же Арии свидетельствует святейший Филарет патриарх в соборном изложении, во главе 4, яко во едино погружение крещаше: и прочая его тамо описа ереси. О чесом в велицем Потребнице, на листу 573-м повествуется.
Такожде и вышепомяновенный Епифаний Кипрьский во главе 91 извествует.
Вопрос, 81.
И аще в чем разнствоваше, то явите различие крещения их.
Ответ, 81.
Еретицы ариане и евномиане в чем разнствоваша, то в вышшем ответе засвидетельствовахом. Такоже и о Арии еретице, бывшем от Понта, в различие перваго, иже от Александрии, показахом: убо и довлеет ти на ответ тамо.
Вопрос, 82.
Киих ради вин от евномиан и манихеян и от прочих, подобных им, крещения святии отцы не приемлют и приимати не повелеша?
Ответ, 82.
В 76 и 78 ответех явствовахом, кия ереси евномиане и манихеяне имеяху. Оных же ради вся священныя правила от них крещения приимати не повелеша.
Вопрос, 83.
Ариане кия глаголы в крещении погружающе употребляху?
Ответ, 83.
Многажды уже о сих арианех, иже от Александрии, глаголахом прешедшими ответами. Буди теми доволен, нас же оставь не многоутруждаемых. Аще преподобный Матфей Властарь, тем же их крещающихся засвидетельствует крещением, якоже и мы правовернии: убо и не противныя употребляху в крещении своем глаголы, но тыя же, что и кафолическая церковь употребляет.
Такоже и Бароний в лете Господнем 506-м дает знати, яко нашими кафолическими словесы, по евангелию, ариане крестишася. И прочая.
Вопрос, 84.
Македониане, наватиане, несториане и средницы, и четыренадесятницы, и единовольники, и прочая подобная им, егда крестиша и крестят, приглашающе имя Отца и Сына и Святаго Духа: то во святую ли Троицу они крестиша и крестят? и в Того ли Христа веруют, в Которого святии апостоли вероваху, и проповедающе крещаху во имя Отца и Сына и Святаго Духа?
Ответ, 84.
Довольно уже в 44-м ответе о сих втораго чина еретицех рехом: убо не довлело бы паки таяжде о тех же нам глаголати. Но для ведения, како святокафолическая церковь, якоже о сих, тако и о прочих еретицех, мудрствовати повеле, во удовлетворение вашего вопрошения, и зде малейшая побеседословствовати не отречемся.
Преподобный Иосиф Волоколамский в слове 15 книги своея о сих древних еретиках пишет сице: "Наватиане и донатианы, средники, воздержники, и инии таковии: сии убо исповедуют Святую Троицу, и плотьскому смотрению Его веруют, имут же некоторыя ереси в себе".
От сего свидетельства познавается, яко сии еретицы мудрование о Святей Троице и о воплощении Сына Божия согласно святокафолической церкве имеяху, но иныя некоторыя ереси в себе заключаху, якоже о них в 44-м ответе показахом.
Такожде и о крещении с святою церковию не различахуся, якоже преподобный Матфей Иеросалимский, состава а, во главе 2, засвидетельствует тако: "Арианы бо и македонианы, и саватианы, глаголющих себе чистых, и левыя и четыренадесятники, иже и средники, и аполинарианы, понеже точно нам божественным совершаются крещением".
И премудрый Максим Грек во главе 68 о наватианех пишет сице: "Наватиане нарицаемии, ниже о крещении, ниже о таиньстве православныя веры, ниже о ином коем законе церковнем беззаконноваху: но зане точию дарованное от человеколюбия Спаса Христа, грешником покаяние отрицахуся, иже в гонении Христа отвергошася. за то едино отвержени быша от всего собора, и прокляти".
И от сих убо свидетельств явствуется, яко сии еретицы в Святую Троицу и в воплощение Сына Божия согласно церкве мудрствоваху (аще и македониане и несториане о Сыне и Святем Дусе нечто противно глаголаху), но в тайне святаго крещения вси сии точно нам правоверным действующе поступаху.
Обаче святая кафолическая церковь, за ради оных еретиков противнаго мудрования, якоже веру их, тако и крещение, относит во ино лице, еже есть во иного христа, якоже своими учители засвидетельствует.
Рцем зде первое о тех богопротивном учении, которое касается до их веры.
О чесом преподобный Максим Грек книги своея во главе 66 пиша глаголет: "Оно же (рече) буди ведый, яко всяка ересь начальника и учителя имать диавола".
Подобне сему и ученик его кир Зиновий Отни пустыни, пишет сице: "Имать бо всяк еретик в себе дух диаволь, темже и противится Святому Духу". И паки той же: "А в еретикох дух лживый сатанин живет со злейшими духи лукавыми". Соборник малый, лист 122 и 147.
Такоже и преподобный Иосиф Волоколамский о еретицех повествует сице: "Еретицы же в себе нечистый дух имеяху сатанин". Слово 12.
Вселенский же учитель Василий Великий, ко Уаленту царю арианину, тако о арианех рече: "Кому прияти власть церковную: или арианом с бесы, или нам христианом". Пролог, генваря 1 дня.
Явственне же утверждает и святейший, патриарх Александрийский, яко новины иного христа во вселенную вводят. О чесом до белорусцев пиша, тако глаголет [Кирилова, лист 482 на обор.]: "Мы проповедуем Христа, сей и вчера и днесь и во веки. а егоже новины их вводят во вселенную противная мудрствующии, оныя новины, иного некоего днесь проповедуют, паче егоже проповедаху". Послание 6.
Пишет же и Тертулиан, оный древний учитель, еще православен сый, о сих еретицех, тако глаголя: "Еретики не имут общения со учением православным, само их проклятие о том свидетельствует. [Ниже:] ибо ни того Бога имеют, Егоже мы имамы, убо и тайны не едины". Бароний в лете Господнем 217. И о сем до зде.
Давыд пророк, паче в Давыде Дух Святый, прорицая о крещении святом и благодатном, не не прорече же и о хотящем быти в еретиках безблагодатном крещении, тако песненно поя, провозгласи глаголя [псалом 96]: "Господь воцарися, да радуется земля, да веселятся острови мнози". На сие Дидим таково толкование творит: "Веселятся же острови мнози язычестии церкви: отъятия бо заблуждения сотвори им вход. но чесо ради острови наречет церкви; или отнюд, зане острови посреде вод крещения обитают. добре же многим островом веселитися, а не всем написа, показуя, яко суть иныя островы еретическия, славящеся и тии водою крещения: но не пристоит им веселится, зане нечестием еже к Божеству благодать крещения отметают". О чесом во псалме 96 Псалтыри Максима Грека да созирается.
Зри убо, аще и славятся еретицы крещения водою, но ничто се может их пользовати, зане ко оному ключимую благодать Святаго Духа отмещут своими противными святей церкви мудровании.
Зри Афанасия Великаго, пишуща на ариан, имеющих точное нам правоверным крещение. Обаче, по их мудрованию, а не по действу согласному крещения, не во Отца и Сына дающих оное (аще и во Отца и Сына даяху ариане), но в Зиждителя и здание быти сказует. О чесом в 3-м слове тако глаголет: "Сии же (рече) бедствуют прочее, и о самой полности тайны, глаголю же крещении. аще бо во имя Отца и Сына дается совершение, не глаголют же Отца истиннаго, за еже отметатися из Него подобнаго существа, отметают же ся истиннаго Сына, и иного сеьбе, от не сущих зданнаго возтворяюще, именуют. како не всеконечно тщее и неполезное от них даемое есть; притворение бо имущее, истинну же ни едину имущее к благочестию помощь. не бо во Отца и Сына дают ариане, но в Зиждителя, в тварь и Творца. [Ниже:] Многия убо и иныя ереси, глаголющыя точию имена, не мудрствующыя же право, якоже речеся. ниже веру здравствующую имущыя, неполезну имут и от них даемую воду, скудствующую благочестием. якоже и кропящемуся от них паче сквернитися в нечестии, неже избавлятися". И прочая.
Зри же и Григория Богослова, от лица тех же ариан глаголюща тако: "Не терплю не просвещен быти по просвещении приначертая, что трех во яже крестихся, и сущно впогребстися воде, не в возрождение, но во умерщвение совершаем". Книга Григория Нанзианзина, слово 24, лист 188.
Виждь и сего богословнаго языка, вещающа от лица арианскаго: Не терплю рече не просвещен просвещенным нарицатися, и глаголатися в три ипостаси крещенным. А к ним приначертая, си есть прилагая к Сыну и Духу противное Святыя Троицы единому существу мудрование, и рещи яко со Христом в воде погребся, о Христе же умствование противное имея. Не в возрождение бо сие есть крещение, сиречь не во оживление, но во умерщвение (мы ариане) совершаем. Сице убо богословный язык возфигурствова, обычаем богословским и риторским. Сице вредное тех защищение и умствование наусти. Сице тех блядословныя языки связа, явственне показуя сим, яко тех крещение, по их умствованию, не в согласие суть Святей Троицы, и не в возрождение, но во умерщвление совершается.
Зри и инаго вселенскаго учителя, архиепископа Кирила Александрийскаго, глаголюща обще о всех еретиках и от них крещающихся тако: "Люте не крещенным душам, и ко идолослужителем, и бесом связани тамо веригами различными. А по мытарствам уже не не суть не крещенныя души, понеже и жива беса имела. и то суть друзи и братия бесом, еретик крещении осквернении бяху". Слово 112.
Виждь и в Катихисисе, во главе 4 реченное: "Аще еретицы и тем же крещением крещаются, но инако и нечестиво".
Но и вышеименованный древний учитель Тертулиан зело явленнейше о сих еретицех написа, якоже они веруют не в Того Христа, тако и крещают, о чесом тако глаголет: "Ибо (еретицы) не Того Бога имеют Егоже мы, ниже Того Христа, Егоже мы имамы, убо и крещение не едино и не тожде". Бароний, в лете Господнем 217.
Но что убо многая глаголати. Аще убо еретицы и Святую Троицу и воплощение Сына Божия исповедают согласно, якоже выше известихом, но за ради иных ересей, во иного, глаголются, (по вышеписанному) верующе бога: убо по их ересям, и по их вере, и по противствованию своих (святей церкви) догматов, всячески обрящутся во иного христа крестяще.
Понеже явственне апостолу показующу удобосрасленную нераздельность в сих трех: в Бозе, вере и крещении: един (рече) Господь, едина вера, едино крещение. Темже по правей вере, яже в Бога, и от Бога и от святых Его преданней, правое явится во истиннаго Бога и крещение. По еретической же и развращенней, неправое, и во иного Бога яве показуется крещение. Верно есть слово сие, и вскаго приятия дотсойно.
Вопрос, 85.
И аще не в того уже Христа веруют, и не во Святую Троицу крестят, но ину некаку: то явите, где о том писано, яко не в того Христа и во ину Троицу веруют и крестят?