Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Часть вторая.
Ответ на сии вопросы [163 и 164].
Подобный материал:
1   ...   18   19   20   21   22   23   24   25   ...   46
ЧАСТЬ ВТОРАЯ.

РАЗДЕЛ, 6.


Вопрос, 161.

К созиданию церкви православныя и к назиданию веры кафолическия достоит ли от еретик хиротонию прияти, или ни?


Ответ, 161.

Святейший Иоанн митрополит Никейский, в слове на армен, приводя во свидетельство Христа Спасителя нашего словеса, во отвержение всех еретических действ, тако пишет: "Якоже Христос глаголет: не собирают бо от терния грозды, ни от репия смокви (Матф. 22, Лук. 27). Темже проявленно, яко крещение их, и вся яже от них содеваема, не приятна и не потребна суть, аще и тщатся несмысленнии и неразумнии, и неутвержении, и лживии христиане, яко истинна и благоприятна творят делания их". И паки той же: "Аще бо вера их права и благоприятна есть: как крещение их приятно"? До зде Иоанн митрополит.

Темже по сему свидетельству Христову и Его святых учителей является: якоже от терния не собирают грозды и от репия смокви, тако и от еретик никое действо несть приятно; или аще вера их права и благоприятна будет, тако и крещение и иныя действа благоприятны обрящутся. Но понеже никогда терние не раждает грозды, ниже репие износит смоквы, тако и от еретик никогда действа кая, или хиротония, к созиданию церкве удобны обрящутся. Но якоже вера их не суть права, тако по вере убо и хиротония их к назданию кафолическия веры отнюд не согласна изъявится. Аще убо, по Иоанну митрополиту, ради веры их еретической крещение не есть приятно: коль паче хиротония еретическая, веры ради их, не точию нашей православней вере явится не созидатедьна, но и зело отметна. Аще убо их крещение не приемлется, может ли по крещении хиротония их приятися; отъиди.

Темже довлело бы тебе на отсловие сего твоего вопрошания в 44-й ответ послати, в котором коликая приведохом свидетельства, не приемлющая еретическаго крещения. Аще убо оное не приемлется: всячески по нем явленнейше еретическая хиротония к приятию не есть подлежащая, паче же (по тебе) к созиданию церкве и веры кафолическия сопротивна обрящется.

Но понеже о сем целый раздел вопросов от твоего потщания предлагается, сице и мы, елико помощию Божиею вразумихомся, толико зде вам во ответствование представити имамы, да не дастся место диаволу, да не дастся дверь волком, да не дастся вина ищущим вины, да непорочна явится восточная наша мати соборная церковь с чады своими.

Сего ради ниже о сем умолчати разсудихом; но божественными писании, аки всекрепкими стенами ограждающеся, сопротив ваших вопросов, нудящихся тму со светом совокупити, или злато с блатом сочетати, противу сих отвещаем, да не како останок июдейския злобы воистинну во зрелую пшеницу вместится, но ис корене, яко плевел, да исторжется и чиста явится церковная нива, о ней же Господь клятся неразрушимей ей быти и непозыбане от самаго ада. Того ради надежду к Нему имеем, занеже к нам реченное слово: дерзайте, Аз победих мира; и: с вами есмь до скончания века. И учителем церковным вопиющим: дерзайте, яко не уморит Господь гладом душа праведных. Откуду бо вниде глад, губя душа? Не от книжнаго ли неиспытания ? Испытайте писания, яко вы мните имети живот вечный (Златоуст, в Маргарите сл. 13). Темже и мы грубии, елико помощию Божиею от писания вразумихомся, толико зде во ответствование о еретической хиротонии представляем.

Правило святых апостол 68-е (Кормч. л. 19) о поставленных от еретик тако глаголет: "Дващи поставленый, и с поставльшим его да извержется, аще не будет токмо еретическая рука первая". Толкование (Алексия Аристина): "Аще который епископ, или презвитер, или диакон, второе поставление приимет от кого, перваго возненавидев, да извержется сам, и поставивый его, аще токмо не прилучится, яко от еретик поставлен бе первее: ибо от тех крещении не крещени, и поставлении, не причетницы". На тоежде 68-е правило толкование Матфея Властыря (гл. 24, сост. 600): "Шестьдесят и осмое святых апостол правило, еже второе от кого хиротонию приемшаго епископа или презвитера изметати повелевает, и того хиротонисавшаго, аще сведяше с ним, разве аще от еретик хиротонию приял бе: отметаем бо таковых якоже крещение, сице и хиротонию: не бо священия сия, но скверну веруем исходатайствовати". На оное же 68-е апостольское правило Никона Черногорскаго толкование (сл. 63): "Аще который епископ, или презвитер, или диакон, второе поставление приимет от некоего, да извержется и той, и поставивый его, разве аще объявлено есть, яко от еретик имать рукоположение: от таковых бо поставленым, или крещеным, ниже верным, ни причетником мощно есть быти". До зде от толкований.

Зри, вопросителю, апостольскаго правила силу: не глаголет, яко еретическая хиротония есть созидательна святей церкви и кафолической вере, но есть осквернителна и не творящая причетником; да еще и крещение еретическое за некрещение полагается и верным не содевающее приемлющаго оное. Аще убо от еретик крещеный ниже верен познавается: коль паче поставленый от еретик не может нарещися поставленным. Аще же не может: убо и поставление, или хиротония от тех всячески к созиданию церкве или веры не может приятися.

Гряди убо, изъявим ти от священных писаний, не точию от в еретическом полагаемых чине, но и от раскольник хиротонию в церковное созидание не приемлему.

Божественный Златоуст в 11 нравоучении на послание к ефесеом (Беседы Апост. л. 1693), о раздирающихся от церкви в той же вере, и на защищающих оныя, тако глаголет: "Что глаголеши: таяжде вера есть, православнии суть и они? чесо же ради не суть и они с нами? Един Господь, едина вера, едино крещение: аще яже тех добре суть, наша зле; аще же наша добре, то онех зле. Младенцы, рече, влающеся и скитающеся всяким ветром. Непщуете ли сие довлети, рецы ми, еже глаголати, яко православнии суть, а яже рукоположения исчезают и погибают" ? Ниже: "якоже бо за веру, тако и за сие ратоватися подобает".

Подобне о сих Никон Черногорский, в 63 слове на правило 1-е Василия Великаго сице глаголет: "А иже от церкве отступльшии, не ктому имеша благодать Святаго Духа в себе: оскуде бо подание, внегда пресещися последованию. (Ниже). Ниже крещати, ни руковозлагати имеша область, ктому не могуще благодать Святаго Духа инем подати, от неяже тии отпадоша".

Тако же и преподобный во иеромонасех Матфей Властырь, состава а, во главе 2-й, глаголет: "Сматряху бо сице, рекше, слагаху, аще и не о вере [раскольницы] погрешают; но понеже убо глава телеси церковнаго Христос, по Божественному апостолу, от Негоже уди вси живятся и духовный возраст приемлют: сии же от состав удов телесных отторгошася: не ктому пребывающую в них имут благодать Святаго Духа. Еже убо не имут сами, како инем преподадут"?

Виждь убо, не точию от еретик благодать рукоположения совершенно отъемлетея, но и от сущих раскольников. Како (по тебе) самая еретическая хиротония по священным правилом явится святей церкви и вере созидательна? и где таковый глас во святей церкви обретается, еже еретическая хиротония вере кафолической наздательна? — суди убо праведно, правою мыслию ума.

Но довлеет ли ти ко увещанию вышепредложенная? Всяко бы довлело, если бы мысль твоя не погрязшая была в еретическом кале неверия. Но яко в нем родился еси и корень твоего суеверия от того имееши, и тамо осквернился еси тем еретическим крещением: убо и хиротонию тех за освящение себе вопреки апостолом и святым отцем поставляеши. Аще ли вящши уверитися желаеши, вонми и прочим церковным учителем и священным правилом, еретическую хиротонию отметающим, а не по тебе в созидание церковное приемлющим. Вселенский учитель и Богослов Григорий, аполинариева поставления не приимаше, якоже от жития его сице явствуется: "Посылаше писав к Лидонию презвитеру, мужу благочестиву и угоднику присному Божию, и другим неким, яко не приимати пагубы еретическия и поставления, и отметати Аполинария, яко странны соборныя церкви". Минея Четья старописьмен. генв. в 25.

Преподобный Сава Освященный от евтихиан хиротонисанных всячески не приимаше, и приимати не повелеваше, якоже от его послания к царю Анастасию показуется сице: "Да верует (рече) твое державство, еже глаголем пред Богом и пред избранными Ангелы, яко никоим же словом, ни образом пристанем к злым онем раскольником; не отступим же законнаго правильнаго чина, ни приложения сотворим святей апостольстей вере ни по коему же образу, ни лице от еретик хиротонисаемо когда приемлем. Аще се будет нуждею на нас, грех ради наших, то крови наша усердно пролием о сей святей вере". Минея Четья старописм. декабря в 5.

Подобне же и от жития Феодосия Великаго, спостника Савы Освященнаго, писанное к царю Анастасию утверждает: "Не приемлем бо (рече) новых догмат, но предварших отец законом последствуем; а иже кроме сих иная защищати прияша, тех благочестивне отметаем, и проклятию предаем, и хиротонисуемаго от безглавных ни единаго по нужде приимем: не буди нам то, о Христе царю!" Минея Киевопечат. генваря в 11.

Преподобный Максим Исповедник о хиротонии единовольник еретик глаголет сице: "Ибо иже сами от себе прокляти суть, и от поместнаго собора бывшаго в Риме извержени, и священства отчюждени: тии кая совершают таинства? и который дух приходит на тех, иже от таковых хиротонисаются"? Минея Киево-печ. генваря 21 от жития Максима Исповедника.

Явственнейше же Феодор Валсамон, патриарх Антиохийский, сих еретик единовольник, или монофелитов, хиротонию от церкви отметаему засвидетельствуя, тако глаголет: "Вопрос 25. Монофелита иерейский имея обет, покаянием обратися в по нам православную веру, и приятся и посвятися, помале же обращься на свою блевотину ереси, яко первее быстъ, но паки, яко глаголет, по себе самому быв и грех разумев, в православную веру прибеже, и приятся, подобне обращься блудному, понеже хощет иерейства сподобитися: ищем творительному научитися. Ответ (ниже): Довлеет сице зле поползньшуся приятися по правилом объятию, иерейства бо не сподобится". Ответы Феодора Валсамона, на вопросы Марка патриахра Александрийскаго.

О подобных же сим еретиках арменах пишет Иоанн митрополит Никейский, к Захарии соборному великия Армении. Всячески оных рукоположения отчуждая, сице о них рече: "Яко ниже рукоположения имут, но чюжди суть всякаго рукопоставления. (Ниже) Тии же тьмами в ереси впадше, и от соборныя церкве отчюждившеся, и от Кесарийския церкве поставления не приемлюще, како не суть всячески не священнии и без рукопоставления, и иже от них крещаеми, отнюд язычницы не крещени"? Кормчая глава 70, лист 636 на об.

Но и от иконоборецев рукоположение тако же святыми отметаемо бе, якоже отъ жития святаго Феофилакта Исповедника явствуется сице: "По Божественному жребию, Тарасий взыде на престол Константина-града, и божественный архиерей показася, Павлу же Кипрскому волею изшедшу с престола, занеже от иконоборец архиерейство приемшу, и не достойна себе нарекшу". Пролог марта 8 дня.

Но и хотящим неким в церковь ввести от иконоборец рукоположенных от преподобнаго Иоаникия и от прочих благоревностных возбранено бысть, яко же от жития его показуется сице: "Яко по проклятии иконоборныя ереси и по утверждении благочестия, воставше нецыи от нечестивых, восхотеша ввести в церковь рукоположенных от иконоборец. И того ради быша людие в великом смущении, и разделишася в две части, и того ради и сам Мефодий патриарх был в велицей скорби. К ним же послание писал великий Иоаникий, и совокупи всех во едино". Минея Четья Макария митрополита, ноября в 4 день.

Яве же святая церковь иконоборных архиереев не освященных, исповедающи, вменяет, яко же в Месяцеслове, в 11 числе октября, о седмом вселенском соборе пиша, тако глаголет: "Яко в приидущую неделю, по памяти святаго апостола Филиппа, поется служба святаго вселенскаго собора седмаго, иже в Никии собравшагося второе на потребление и посрамление безбожных преданий, христоненавидец и христианоукоритель и иконоборец, Копронима нечестиваго, и окаянных его епископов, и не освященных его архиерей, и того безбожнаго и окаяннаго собора".

Внемли, совопросниче, предложенным, яко не точию апостольстии правилы, но и последствующе оным святии отцы, не точию от перваго чина, но и от малых еретиков хиротонию не приемлюще, всячески оную за неосвященную вменяху. Аще и крещение по смотрению от сих под миропомазание, вин ради благословных и нужных, приимаху, хиротонию же к созиданию церкве отнюд не сочетоваху.

Гряди, явленнейше ти учиним, яко по миропомазании обращающихся от еретик, аще они имеяху кия саны, второе святая церковь похиротонисоваше, а не оставляше, по твоему, тех хиротонию к созиданию своему, или к назиданию кафолическия веры. О чесом от послания собора Константина-града к Мартирию епископу Антиохийскому о том, како приимати еретики, приходящия к соборней церкви, сице извествуется: "Арианы, Македонианы и Наватианы, глаголющия себе чистыя и чистейшия, и четыредесятники, рекше средники, и аполинарианы, приемлюще, написающих свою ересь и проклинающе ю, и ину всяку ересь, не мудрствующую якоже и соборная церковь, помазуем их первое святым миром чело, ноздри, уши, перси и вся чувства, помазующе их глаголем: печать дара Святаго Духа. И потом потщаливии мирстии человецы поставляются в сан, в немже беша, или презвитери, или диакони, или ино что". Кормчая, глава 37, лист 293.

На сие же послание собора Константиноградскаго к Мартирию епископу Антиохийскому Севаст Арменополь, в книзе 4-й, по миропомазании вышеизъявленных еретик, паки хиротонисати повелевает то, что первее бе, идеже сице пишет: "Яко тщаливии людины хиротонисуются оное, еже быша у самых первее, аще же презвитери, аще диакони, аще же иподдиякони, аще же псалмочетцы". До зде Арменополь.

Сего же Константиноградскаго собора послание, повелевающее по миропомазании не приимати от еретик хиротонию, засвидетельствует и богомудрый Захария Копестинский в книзе своей, во главе 40-й, сице глаголя: "Суд патриархов о том во Арменополе, в книзе 4-й. А становят они так. И по сих яко гречны ласкове рукоположитися имеют на он степень, на котором первее у своих был, либо презвитеры, либо дияконы, или псалмочетцы. Естьли мvром святым мировати велит собор: яве наискорей, яко с новаго потреба их хиротонисовати. Где бы истинная хиротония священия была у помянутых, не бы их патриархи судили в попы и диаконы, и в четцы хиротонисовати. Где уважай же, а ни на четцу не узнавали быти рукоположения". Дозде Захария. Явственнейше же зело подтверждает всецерковный сей непременный обычай (яко же по крещении, сице и по миропомазании), еже еретическую хиротонию паки перехиротонисовати, блаженный Феодор Валсамон, во ответе 30-м к Марку, патриарху Александрийскому. Идеже по вопросу сице ответствует: "Вопрос 30. Аще еретик иерей, или диакон, сподобится божественнаго и святаго крещения, или святым миром освятится, будет ли священнодействуя с первейшею хиротониею его? или другия сподобится хиротонии, аще восхощет священнодействовати? Ответ: (Ниже) Первейшему иерейству скверне непщуему, и яко не бывшу вменяему. (Ниже) И сый некогда скверный иерей, в последнейшем своем житии не осужден возъявится, сподобится не точию иерейскаго достоинства, но и епископскаго, обычными всяко степенми на учительскую высоту возводим". Севаста Арменополя книга 5.

Довлело бы зде и перваго вселенскаго собора 8-е правило привести во свидетельство: но яко у тебе во 180 и 185 оное с мнением твоим полагается: убо и мы тамо ключимая свидетельства, отвергающая ваше мнение, предложити благоразсудихом.

Зде же, при конце сего ответа, засвидетельствуем священными писании, о вступающих неправильне в священство, и тех не точию поставление, но и поставленных от них из санов измещемых, и тако успокоим сего ответа отсловствование.

Дионисий Ареопагит о сих тако глаголет: "Разумевше же, яко безчинне и кроме уставов священных во святая вскочи. (Ниже) От тех ниже вид, ниже слышати, ниже имети веруется: аще и руками тех касается, аще и подобная творят, вне своего чина и достояния". Книга о священноначалии, часть 3.

Вселенскаго же втораго собора, в правиле 4-м, о Максиме Кинице, безчинно получившем священие, и о поставленных от него сице глаголет: "Максим глаголемый Киник, от епископов чюжд, и всяко не священ, и иже от него в причет прият бысть. Толк. Сей Максим Киник сказуется безстудный, церковь Божию раздра, и многа мятежа и молвы сию исполни, волк вместо пастыря явлься, и вся грехи прощати готов согрешающим единаго ради, еже нечествовати в повелениих, рекше преступати заповеди, якоже глаголет великий богословец Григорий, чюжд убо сей Максим от епископства да будет, и вси от него поставлении презвитери, и диакони, и прочии причетницы чужди священия". Кормч. л. 86 об.

На сие же правило толкование у Матфея Властыря в составе 600-м сицево есть: "Но и четвертое правило втораго собора Максима некоего отметает, ниже епископу тому, или будущу тому отрицает, за еже не в закон правильнаго устава поставлену быти, ниже иже от него поставленым клириком быти".

Но и Сардикийский собор неких Евтихиана и Моисея, епископов бывших, раскольников сущих, из санов изметает, якоже 20-е правило того собора сице повелевает: "Неприятен причетник не пребываяй в своей церкви, в нюже вочтен бысть. Евтихиан же и Моисей епископскаго имене не приимета, общения же с мирскими человеки равно сподобитася. Толк. Многими правилы се речено есть, и просто рещи всеми соборы, яко не приимати чюждаго причетника, и в свою церковь степень вводити того. Тому убо учит и се правило. Евтихиана же и Моисея епископа, раскольника бывша и извержена, аще покаетася, и епископскаго взыщета сана, или имене, в том да не послушана будета; аще же хощута приобщитися, яко мирстии человецы да будета прията". Кормч. л. 114 об.

Тако убо вышепредложенными засвидетельствовахом, яко святии апостоли и толкователи их правил без изъятия от всех еретик хиротонию не приятну церковию сказуют. Тако в них глаголется: еретическая хиротония не созидает церкви и веры кафолическия, но паче оскверняет приемлющих ю. Тако показахом, яко не точию в еретицех несть истинныя хиротонии, но ниже в церковных раскольницех оная обретается, но всяко исчезает. Сице изъявихом и о прочих древлебывших еретицех, яко и от тех богоносными отцами хиротония отнюд отлагашеся.

Сице святыя соборы и церковныя правилотолкователи изъясняют, яко не точию по крещении, но и по миропомазании, еретическая хиротония не приятна есть. Тако известихом, яко правилами святых отец и безчинно на священная вскочившии, не точию они, но и от них хиротонисанныя всячески из санов измещутся.

Темже доволно бы, всячески доволно на отвещание положенное в сем ответе на вси твои в сем разделе положенныя вопросы. Но да не явимся, яко не имуще на оныя свидетельств; да не принесем причины умолчания чтущим ответы сия: да не оставим стязания твоя празднующими, да не кое в том подамы, смотрящим завистными и любопрящими очесы на сие наше натрижнение, торжество; к сим же и внимающе апостолоповелительному гласу: будите, рече, готови ко всякому ответу вопрошающему вы слово о вашем уповании. Петрово 1, зач. 60.

Сему убо повелению верховнаго апостола повинующеся, гряди убо, да совершим с Богом помощником и прочий подвиг, отсловствующе на ваши вопросы. Да не како, заздавающе столп, оставим не довершен, в посмеяние зрящим, но с сосудом избранным вещающе, молим всем Дателя даров, да недокончанная Он соблаговолит исправити, и течение скончавшим при кафолической нашей вере подаст венец правды, еяже ради мы сей наш труд подъемше, многая ти приведохом свидетельства. И привести и окончати начатое, о да сподобит нас Он, Всемогущий!


Вопрос, 162.

И аще не достоит, то по коим правилом не достоит? – изъявите от святаго писания.


Ответ, 162.

В вышшем ответе явствовахом, яко не точию от еретик хиротония не приятна, но и от церковных раскольников; такожде и в грядущих ответах о сем же свидетелствовати имамы.


Вопрос, 163.

В правиле 69-м о обращающихся еретицех повествуется сице: "Аще будут поставлени своими епископы, диакони, или презвитери, приступльше же к правоверней вере и свою ересь прокленше, свою часть имети, и во своем степени пребывати прощени быша, и в причет соборныя церкви вчиняеми быти, понеже во Африкеи велми скудно есть причетник". Кормчая соб. Карфаген. 143 лист на обор.


Вопрос, 164.

Вы каковую скудость во Африкии быти сказуете причетник? – известите от святаго писания.


Ответ на сии вопросы [163 и 164].

Святаго Карфагенскаго собора сие правило 69-е составлено бысть о донатистах, обратившихся к православней церкви, аще епископи, или презвитери и прочии, ихже не второхиротонисая повелевает приимати во своя чины. От сего убо правила вину ты восприял еси на приятие и от всех еретик обращающихся хиротонии, к сим же не испытуя сего, како и от кого сии донатисты приимахуся в своих санех, в котором убо своем неразсмотрительном восприятии зело ошибаешися, якоже следующия изъявят множайшия доводы, ихже решение, вопреки твоему мнению, сице представляем.

1-е. Разсмотрити следует: сущыя ли во обществе на той час донатисты еретики были? и начало их о зловерии ли, или о иных церковных догмат изменении бысть?

Мы же от истории глаголем, яко ни о вере, ни о догматех церковных, но точию о епископских престолех с православными в них распря бысть. Вина же сея такова. Ибо во время великих идолослужителей и гонителей, царя Диоклитиана и царя Максимиана, на христиан жестокое от сих повеление указами издадеся, дабы кийждо епископ свои книги объявлял и приносил бы их на сожжение, и дабы молитвенных собраний не было, при сем и церкви христианския в день пасхи обваляти и с землею сравняти повелеша, и прочая лютая творяшеся, о чем читай Барония лета 300-го и 302-го. Егда же преста сия лютость, епископи, предающии на пожжение книги, 11 собравшеся в Крите граде и в Нумидии, разсуждающе свое злодеяние и боящеся непорочных епископов наказания, раздор сотвориша в церкви: восташа на православнаго, первейшаго во Африце, епископа Карфагенскаго Менсурия клеветами, хотяще вины своя сими закрыти, а своего бы вместо епископа неповиннаго поставити, ради своея власти. И о сем их свар долговременен бяше: я судими быша клеветы их царьми православньши и папами, но к миру не возмогоша их привести. Барония, лета 303 до 316.

И сея ради вины епископи православнии, многое попечение имуще, просяху их на мир, и епископов своих к ним посылающе, нарицающе их братиею своею, и престолы им паки свои имети обещевающе, только бы един Донат извержен и от церкви отлучен был, аки начальник всего раздора. В коем намерении и Карфагенский собор на обращение донатистов бысть, дабы как мир сотворить, прося их к миру и сего ради обещавающе им свои престолы имети, только бы престали раздор творити. [Карфагенск. соб. прав. 92, 93, 47, 57, 95. Кормчая].

Нынешния же великороссийския церкве дело до раздора ли есть касательно, вниди совестно в разсуждение; аще убо не до раздора, но до великих и множайших вин, якоже в 21 ответе показахом. Убо к принятию от еретик хиротонии не есть истовый образец донатианскаго обращения и попущения оставленным быти в тех же санех пребывати, ибо не беша донатисты тогда еретицы сущыя, но раскольницы.

2-е. Того же Карфагенскаго собора 73-го правила в толковании, от еретик крещение не точию за крещение, но за осквернение быти вменяет. Аще убо от еретик крещение ни за что полагается: коль паче от тех хиротония принятися всячески в церковное исполнение и по нужде не суть достойна.

3-е. По 99-му правилу и по толкованию Карфагенскаго собора, обратившиеся донатисты и остававшиеся в своих санех, точию епископами нарицатися дозволяются, поставления же им епископскаго чинити вместо себе отнюдь не дозволяется. Убо не бяше в своем совершенстве донатистский епископ всеполный, аще и прилучивыйся к кафолической церкви, но в рукоположении своем под властию обреташеся православнаго епископа.

4-е. Сей же Карфагенский собор донатским епископом обращьшимся паки повеле свои престолы имать, но властию епископскою (якоже указует 117 канон сего собора) имже чрез апостолов Христос церкви правити поручи и дела хиротонии (а не поповскою), кои епископи по данной им власти от Духа Святаго, приимаючи отвне епископы и попы, свои ставленныя им дают, и тем благодатныя их хиротонии содевают, коея благодати на поставлении прежнем своем не прияша, а не с тою же еретическою своею ставленою их священнодействовати оставляюще. А не тако, якоже ныне ваши бегствующия попы творят: отвращьшебося новшества и отрекшеся своих епископов, а по поставленым граматам (в нихже и пятиперстное благословение чрез хер воображено суть) священнодействуют, нимало в пример сего святаго собора.

5-е. Не везде же и всюду и от донатиан обращьшиися в своих степенех удержашася; но, якоже самое то 69-е правило засвидетельствует, во единой точию за скудость Африце оставлени быша в санех; от бывшаго же в Риме собора не прияшася. Остается, точию частно тех прияся хиротония, а не повсемественне.

Речеши ли: яко аще за скудость приятися, убо и ныне за скудость приятися хиротонии от россиян долженствует. Ответствуем: Многия вины не могут допустить к приятию ныне великороссийския церкве хиротонии.

1: Понеже, якоже выше рехом, донатиане быша раскольницы, и о расколе погрешающе, аще и еретиками нарицахуся: но за то нарицахуся, яко с церковию не обществоваху. Ересей же за ними никаких иных, точию пред причастием ересиарх их Донат кость некую целовати повелеваше, якоже 47-правило Карфагенскаго собора извествует. Российская же церковь толь великия и множайшия ереси не точию средних или малых еретиков, но и самых вящьших содержащи, в себе заключает, якоже и в 21-м ответе представися. Убо и не ключимствует ни по самой нужде приятися от нея хиротония.

2: Ныне новороссийская церковь обливательное и единопогружательное приемлет крещение, убо и не есть сообразна донатианом. Тем и ни в скудости возможно суть тех прияти хиротонию.

3: Новороссийская церковь поставление совершает чрез четвероконечный крест, а трисоставным верою не печатлеет, убо и не есть сообразна в хиротонии донатианской. Не сообразную же ниже по самой скудости не возможно прияти.

4: Оная же новороссийская церковь вместо двоперстнаго сложения, образуемаго два таинства превеликая, Троицу глаголю и вочеловечения Сына Божия, странным неким пятиперстным и зелопресомнительно толкуемым, в хиротонисании благословляющи совершает, якоже и выше рехом, и тое благословение и на ставильной у попов начертовает. И прочия предбезчисленныя ереси и хулы на древнее благочестие имеющи заключает: о чесом во ответех 21-м и 44-м, в 10-м разделе изъявихом. Темже сия хиротония донатианской хиротонии не есть сообразна, убо и прияти оную ни по самой скудости отнюд не возможно.

5: Якоже выше назнаменовахом, ныне не обретается правильнаго епископа, без негоже како безблагодатный, отвне пришедый, иерей или кто от священных может благодатнаго насытитися дара; яже кроме епископа священник не может никакоже примирити иерея. Убо и не есть тому времени сообразно настоящее время, яко не имеющее православнаго епископа. Темже и по нужде и по крайней скудости не возможно отвне пришедшаго иерея примирити, и на священная благословити, аще бы и самыя были донатисты. Прочее же, киих ради вин обнажается великороссийская церковь священства, о сем в дополнение во 185 ответе засвидетельствуем.