Щит веры или Ответы древняго благочестия любителей на вопросы, придержащихся новодогматствующаго иерейства
| Вид материала | Документы |
- На камени веры. Вопросы и ответы, 2457.25kb.
- Крайон. Действовать или ждать? Вопросы и ответы, 13038.17kb.
- Психология потери веры, 346.79kb.
- Ответы на вопросы, 90.99kb.
- Дополнение к Приложению к Сказке. Ответы на вопросы, 274.58kb.
- Краснопеев Дмитрий Валерьевич. Гражданская война в России 1993 ? аннотация: книга, 1492.5kb.
- Мартин Бубер. Два образа веры, 2036.01kb.
- Масюченко Светлана Дмитриевна Ответы на вопросы Интернет конкурс, 43.06kb.
- Щит управления паровым котлом щу-пк назначение, 126.96kb.
- 3. Вы можете добавить свои вопросы и свои ответы, конечно, 2736.16kb.
Вопрос, 174.
Епископи от презвитер чим разньствуют? явите от святаго писания.
Ответ, 174.
В вышшем ответе и в прочих довольно явствовахом разньствие иереев от епископов, убо зде таяжде повторити оставляем.
Вопрос, 175.
Кия тайны повторяются, и кия не повторяются? явите от святаго писания.
Ответ, 175.
В 20-м ответе довольно изъявихом, яко святая церковь своими учители все тайны от еретик неправыми и неприятными засвидетельствует, тем же и буди тамо предложенными удовольствуяся.
Вопрос, 176.
Матфей Иеросалимский, и Иоанн Китрошский, и Севаст Арменопул от еретик хиротонисанных и обращающихся и кающихся, сице написа: "но и сих хиротония к нам прилагаемых, иже от них хиротонисанным, не отлагаются". Вы сие повеление правильное святых отец приемлите ли?
Ответ, 176.
О сколь есть вредительно благочестию неразсмотрение, якоже и древле неции, не на разсмотрительном полагающеся, болезненне пострадаша! Бяху бо нецыи противницы, подлагающе ложная евангелия и апостольская деяния и послания, очесом и дееписец Бароний, в лето Господне 44, поведает. Еще же латини на Флоренстем соборе лжуще бяху и на седьмый вселенский собор, яко бы на нем исхождение Духу Святому и от Сына повелеся глаголати, во свидетельство же приносяще некую ветхую книгу; обаче ревнителями благочестия отнюд не прияся, якоже о сем святый Нил Солунский во гл. 13, 14 и 21 книги своея сказует.
Сице убо и ваше неразсмотрительное положение на сие, под именем Иоанна Китрошскаго лежащее, правило показуется, егоже за неоспоримое себе свидетельство приемлюще, везде и всюду проповедаете, что еретическая хиротония и от латынь в нем приемлется. И аще оное и в нем написанное принимати будем без всякаго разсмотрения, колицей церковней противности причастни обрящемся, якоже ниже следуемыя засвидетельствуют доводы, егоже и ты в настоящем сем вопросе яко за непреоборимое поставити возусердствовал еси? Темже мы за нужное вознепщевахом, о сем подметном правиле Китрошскаго доводственно зде вопреки оному гласящая свидетельства предложити.
Первое. В священней книзе Кормчей, во гл. 89, на листу 598 на об., священнейшаго Иоанна Китрошскаго осмь глав напечаташася; сего же, в Матфеевой книзе 12 правила, не напечатано, и от сего явствуется, аще бы сие правило не имело ни коего подозрительства, всяко бы и оное, яко не противное святыя церкви уставом, выпечатано было; а яко сопротивно: убо и в печатание оное не произведеся, якоже ниже в преложении явится.
Второе. Во оном правиле опресноцы латинстии за освященныя полагаются; но сицевое во оном правиле защищение опресноком которой ереси и которому проклятию причастно обрящется, о том да уверят вас церковная свидетельства. Очесом в епистолии седмаго собора на римляны, о опресноцех гл. 81, тако пишет: "Да уведят таковии, еретическая и опресноки ядуще, яко пси мертву плоть ядуще, а не живу, и в ересь впадают проклятаго Аполинария; иже бездушный опреснок в тела место Господня приемлют, подобни суть Аполинарию: он бо безумный бездушно опреснок прият, не имеет бо ни души, ни ума, ни кваса бо, ни соли не имеет, яже суть в хлебе, яко душа и ум; и прокляти суть с древними еретики, со Уалентом, и Манентом и Аполинарием Лаодикийским". Потребник болшей, лист 579 на об.
Премудрый же Богослов, преподобный Максим грек, в книзе своей, во гл. 68, на римляны, о опресноцех сице пишет: "Их же и перво и величайше прегрешение есть, еже опресноки приносити во святую службу, согласно мудрствующе проклятому Аполинарию, отгнавшу просфиры и квас и соль, аки овому убо образующу душу, овем же сказующе ум, ихже лишаше треклятый Господа нашего Исуса Христа, глаголя его оболкшася в плоть едину бездушну и безумну. Сея же хулы что может быти хульнее, еяже и вы причастники есте, приносяще и вы подобие оному проклятому опресноки, и той же оному анафеме подлежите и вы, аки тоже ему, и не хотяще, и вы проповедасте опресночным приношением вашим". До зде Максим Грек.
В Потребнице же, в чине принятия от ересей приходящих, опресноки проклинаются сице: "Проклинаю же и всякое их злочестие, и тайное развращенное их учение, и яже держаху многия ереси и жидовския обычаи, иже вместо хлеба опресноки служат, и суботствуют жидовствующе, оклеветающе же святаго апостола Петра, и святыя отцы, яко от них имуще таковое предание". Потребник великий, лист 593 на об.
И по сим предложенным церковным свидетельствам, како будут опресноци священи, аще они причащаются Аполинариевой мерзской ереси? како будут священни, аще от церкве проклятию предаются? — вы судите. Аще всяко священию не причастни обретаются: убо и правилу оному верити не удобно, и зело церковным уставом сопротивно суть.
Третие. Во оном же правиле и сей обычай, еже римстии епископи перстни носят, оправдается. В чине же от ересей приходящих, сие ношение перстней священным, и оправдание оному ношению, клятве предается, идеже сице возглашается: "Проклинаю латыньских попов, глаголющих, яко жену обручену взимати церковь, и носящих женскую утварь, и литоргисающих в рукавицах, и серги во уши вкладающих, и на шею ожерелия, и венец на главу, и на руце перстни". Потребник великий, лист 595 на об.
Четвертое. Во оном же правиле под именами Иоанна Китрошскаго, тако же и в книзе Севаста Арменополя в 5-й, в ответех Димитрия Хоматена, латинская хиротония приемлется, которое принятие, яко же древле-восточной, тако и древле-российской церкви учителем весма сопротивно обретается. Понеже, яко же Бароний повествует о древле-православных греках, яко от латин не точию хиротонию не приимаху, но ниже крещения. О чесом в лете Господнем 1054 пишет. Тако же и в Потребнице сербскаго друкования, в лето 1520, латин крестити повелевает же. Что же в велицей Руссии, якоже святейший Филарет патриарх засвидетельствует? От лет князя Владимира всегда латин вторицею крестиша, о чесом в Потребнице велицем, на листу 564 и 565 извествует. Изволяяй же вящше о сем ведати, да чтет в книзе Ответов выгорецких, ответа 50 статию 36. Тако же и хиротонию приимати восточнии и российстии учители, не точию приимати, но и весма бегати повелеша, яко же Максим Грек, в книзе своей, во гл, 37, пиша глаголет: "Римскаго убо (рече) папы, яко отпадшаго лика православных архиереов, рукоположения отвращатися и отметатися достойно и праведно есть, и нужно зело". Засвидетельствует же и Захария Копестинский в книзе своей Обороне, на л. 390 и 376, яко восточнии латинскую хиротонию отметаху.Такожде и О вере списатель, во главе 25, на листу 228 об., подтверждает, чтоб папеж римский для соединения от восточных патриархов хиротонию приимал. О чесом пространнее о сем во ответе 233 засвидетельствуется.
Темже древле-греко-российская церковь от латин, якоже крещения не приимаше, тако и хиротонии: убо правило под именем Иоанна Китрошскаго, яко не согласное святыя церкве пределу, приимати опасно есть.
Пятое. В предисловии Номоконона афонстии отцы Матфееву книгу похваляют; обаче и блюстися, за некия вшедшия в ню переводы, не не повелевают же, которыя за неизвестныя тамо приемлются, зане странное писание вниде, аки бы от Константина сотворенное. В книзе же Севаста Арменопула, на которую ты в вопросе сослался, в ней же и суть в книзе 5, в знамени 2, под именем Константина архиепископа Кавасила вопросы, под именем же Димитрия Хоматина Булгарийскаго ответи, от нихже именно афонстии отцы блюстися повелевают, и за неизвестныя их полагают.
Шестое. Явственно же сего писания, под именем Иоанна Китрошскаго и Димитрия Хоматина, в книзе О вере, белорусской печати, опасатися повелевает, и сие издание не греческое, но латинское быти извествует, сице глаголя:
Книга О вере, белорусской печати, часть 4, о опресноку, раздел 9, лист 277. Пересторога.
"Лечь к престорозе правоверным потреба ведати, иже суть некоторыи меновите Димитрий Хоматен булкгарский, Иоанн Китрийский епископове, которыи латынником в своих писмах нечто недорожают, лечь и то в поверховных речах теды то розумети: або яко суседе будучи угожали оным. Або тыж и не до конца верити всему, кгдыж грецких писм рукою писных не засяглих мы еще, любо тыж неверное выданное з друков немецких, до чого чинить нам мнемание то, же в тыхж писмах в многих пуктах остро натирают на латынников, а в некоторых ослабеле, и обоятное мешание. А мели быти статечными во своих предся взятьях. Але ты православныи кгрунтуйся, и полегай беспечней на вышше предреченных отцех грецких, яко вышших степенем, и патриаршею учтеных достойностью. А до того тыж при болшой личбе, изгажаючимися з церковию и з соборами преставити по божнейшая суть; тыж еще писма грецкии, юж открите противныи церкви всходней, ба и нешто подзорных словенских примешав, до благочестивых книг теды и о тых разумети, же такии ж были, которыи за посягнением Констянтинополя през Балдувина и французы, для до часного меня отщепилися были от церкви всходней, и нешто противного Богу и вере православней писали; а з гола за исидорянов, и за теперешних оным подобных апостатов разумены быти мают, и з писмы своими".
На российскую речь преведено:
"Ибо ко опасению правоверным, потреба ведати, иже суть некотории от первейших, Димитрий Хоматен болгарскии и Иоанн Китрийский епископове, котории латинником во своих книгах нечто не досаждают, ибо и то в видимых делах, тогда то разумети или яко соседи будучи, угождали оным, или такожде и не до конца верити всему, егда же греческих книг рукописных не получили есмы еще; любо такожде неверное издание з друков немецких, откуду чинит нам сомнение. Такожде в тех же книгах во многих главизнах остро обличают латинников, а в некототорых ослабели, и обоятное мешание; а явилися яко бы постоянными в своих предся взятиях, сиречь духовных правлениях. И ты, православныи, утвержайся и пребывай без сомнения на вышше предреченных отцех греческих, яко вышших степению и патриаршею почетных достойностию; а к тому такожде при величайшем числе и соединяющимися с церковию и с соборами содержати усерднейшая. Суть тыяже еще книги греческия, иже явне противна суть церкви восточной; та и нечто подозренных славенских примешении до благочестивых книг: тогда и о тех разумети, яко таковыя же бяху, которыя за присягою Константинополя, чрез Балдувина и французы, для временнаго сана отщепилися были от церкве восточныя, и нечто противно Богу, и вере православней писали, и паче за исидорянов и за нынешних оным подобных врагов разумены быть имеют и с книгами своими".
Виждь убо, виждь, о вопросителю! колико на ненадежном и весма несогласном ваше утверждение фундаменствуется. Что же сему вина? — яве яко ваше неразсмотрение, которое происходит от зелнаго вашего пристрастия к новодействуемым тайнам, паче же любовь горячая к новотворному священству, которым замазав свои очеса, отнюд не созерцаете согласия к кафолической святей церкви, но точию бы, где аще и не по силе, аще и несогласное писание привлещи устремляетеся в вашей воли.
Вопрос, 177.
Аще же не приемлете, то чесо ради не приемлете? — изъявите от святаго писания.
Ответ, 177.
Чесо ради не приемлем сего под именем Иоанна Китрошскаго, или Димитрия Хоматена писания, о том в варившем ответе рехом, убо паки повторяти оставляем.
Вопрос, 178.
В правиле 68 святых апостол напечатано сице: дважды не поставляти в причет, аще токмо не прилучится, яко от еретик поставлен бе первее, ибо от тех крещени не крещени и поставлени не причетницы. Вы сие святых апостол правило о коих еретиков (еретиках) быти сказуете, — перваго ли чина, или о всяком чине еретик? — Явите от святаго писания.
Ответ, 178.
В 59-м ответе, и во инех засвидетельствовахом о составленных правилах на еретики от святых апостол, яко еще тогда не видится, чтоб на три чины еретически были разделяемы: убо святии апостоли без изъятия о всех еретиках, еже от них не приимати яко крещения, сице и хиротонии, в правилах написаша.
Вопрос, 179.
Аще ли о всех чинех (аще перваго, аще втораго, или третьяго чина) еретиков, то убо ли святии отцы приходящих от еретик единым судом облагаху, и якоже хиротонии, сице и крещения обнажаху? – явите от святаго писания.
Ответ, 179.
Апостольских правил 46, 47 и 68-го толкователи, Алексей архидиакон, преподобный Никон Черногорец, Матфей Властырь и Севаст Арменополь единственно излагающи засвидетельствуют: якоже крещение еретическое, сице и хиротония неприятна еста, о чесом да прочтеши в Кормчей 46, 47 и 68-е правила с толкованиями, такожде и преподобнаго Никона Черногорца в слове 63-м, и в Матфеи состава 500 во главе 14, в Севасте же Арменополе в книге 1-й надпись 3.
А еже о последи происшедшем обычае церковном разделяти еретиков на три чины, сие указует перваго вселенскаго собора 8-е правило. Обаче же, аще и приимаху средних и малых еретиков под мvро и под проклятие ересей, но приимаху смотрительне и вин ради благословных и нужных, и киих приимаху, тех же и крестити инде повелеваху, якоже о сем в 44-м ответе в разделах изъявихом.
Хиротонию же никакоже приимаху от тех еретик, коих миропомазующе бяху: о чесом во 161 ответе изъявихом, и в грядущем 180 изъявити потщимся.
Вопрос, 180.
В правиле 8-м перваго вселенскаго собора изъявляет о обращающихся еретицех втораго чина, сице: "егда убо обратятся и ереси своя прокленут и иныя вся, и токмо святым мvром помажутся; аще же нецыи от них и епископи суть, паки во своем чину да пребывают". Вы сие, тако же и прочия правила святых отец, приемлете ли?
Ответ, 180.
Не сицев есть разум отцев перваго вселенскаго собора в правиле сем, якоже вы мните, еже им повелети, дабы от новатиан еретиков ставленных с тою же хиротониею по помазании мvра православным в священнодейство прият епископов (ибо сего и от ваших разсудительнии не умствуют); но по помазании поставляти православным епископом от новатиан наречемых епископов в сан, в нем же быша, рекше, в той же сан рукополагати, в кой прежде рукоположени чистыми были. О чесом сие подтверждает 12 правило Феофила архиепископа Александрийскаго, сице глаголющее: "иже от ереси глаголемых чистых обратившеся восхотят приступити к соборней церкви, да поставляеши от них диакони, презвитеры и епископы, по повелению Никейскаго собора, аще житие право будет, и не имый ничтоже противна". До зде правило [Кормчая, л. 272].
Речеши ли сие, яко сие правило простых, а не чиновных людей, от чистых поставляти повеле? Но вопреки обрящешися разумевая перваго вселенскаго собора 8-му правилу: понеже тамо не о простых, еже их устроити негде епископами, повелевается, но бывших в новатианской ереси епископов. Убо сие правило явленнейше утверждает, яко от чистых еретиков обращающихся первый собор не в том же рукоположении повеле прияти, но поставляти от них в той же сан, в немже быша, а не с тем поставлением оставляти. В подтверждение же приводит сего перваго вселенскаго собора 8-е правило богомудрый Захария Копестинский, архимандрит Киевопечерский, в книзе своей, во главе 40, яко не с тою же хиротониею от новатиан отцы того собора приимаху, но посвящаху паки, идеже сице пишет: "Перваго Никейскаго собора канон осьмый повелевает новатиан, которых кафолики чистыми именуют, где до кафолической апостольской церкви приступают, прежде всего на письме вырезати пристоит, иже держати последовати будут кафолической церкви догмата и предания уважати". (Ниже). "А по исповеди и по мировании и подании писма, посвятити их, если годны будут, на той степень, на котором в ересех пребывающи были". До зде Захария.
Зри убо, не просто оставляти того собора отцы повелеша чистых в той же хиротонии, но освящати их (если житие достойно покажется) на той же степень, на котором в ересех были.
Но аще разсмотрим и вся правила о новатианех, глаголемых чистых, убо всячески не повелевают от них хиротонию по миропомазании приимати, но паки рукополагати в той сан, в немже в ереси быша О чесом читай в Кормчей печатной послание Константина-града соборное к Мартирию архиепископу Антиохийскому, на листе 293, и еще то же послание в книзе 4 Константина Арменопула, да к сим же в 5-й книзе его ответ 30-й Феодора Валсамона патриарха Антиохийскаго, в немже по миропомазании уже не оставляет в той же хиротонии, еже в ереси полученной, пребыти, но паки хиротонисатися от православных повелевает. О чесом в 161-м ответе довольно о сем засвидетельствовахом.
Но аще внидем и в самое правило с толкованием, убо и сие не не укажет неключимство новатианской хиротонии. Ибо оваго правила в толковании велит епископу православну новатианскаго епископа и попом учинить. Но Халкидонскаго четвертаго вселенскаго собора 29-е правило православно хиротонисаннаго епископа сводити в пресвитерский сан отнюд не повелевает, сие бо за святотатство вменяющи быти почитаем. На сие же правило и Матфей Канонист, состава е, в 28-й главе, подобне сице пишет: "двадесяте же и девятое четвертаго собора правило епископа во пресвитерский сводити степень не вменяет быти подобно: священнотатство бо, рече, се убо". До зде Матфей.
Темже 8-е правило вселенскаго 1-го собора, сводящее новатианскаго епископа в степень презвитерства, будет ли разглашаться с сим 29-м четвертаго собора правилом? Никако же. Понеже тамо о еретической хиротонии глаголется, зде же о правоверней. Яве от сего явствуется, яко виною негодственныя еретическия хиротонии сии новатианстии епископи сводятся, яко помазуемых второе рукополагати подобает. Ибо и вы, опасающеся второхиротонисания своих попов, сице творите, еже оных опасающе миропомазания, да не по миропомазании, совлекшеся хиротонии, простыми обрящутся; простых же помазуете к великому церковных правил разгласию: почему и обретаетеся церковных уставов зелнии преступницы.
Вонми же паки опасно и самаго правила сего 8-го повелению: "Аще (рече) хощет православный епископ, да устроит от чистых епископа негде в селе". Зде двоя сия показуются во отвержение и безсилие новатианской хиротонии.
Первое: да устроит его. Устроение же епископско — благословением и грамотою подаяние благодати и силы совершительныя Святаго Духа, да мощен будет совершати святая: сие же бывает чрез руковозложение епископское. Подтверждает же сие и вышеименованный Захария Копестинский в 40 главе о сем 8-м каноне вселенскаго собора сице: "Синод Никейский повелевает посвятивше (новатиан) чрез рук вкладания". До зде Захария. Но сея власти и силы Духа Святаго во иереех несть, не постави бо их Дух Святый воздавати силы хиротониям, но токмо крестити, литоргисати и молитвити. Темже напрасно и приводити вам правило сие о чистых.
Второе. Аще правило негде в селе епископа новатианскаго устроити велит; но и сельстии епископи такожде власти над рукоположением не имут, якоже новокесарийскаго собора 14 правило тако, повелевая, глаголет: "сельстии епископи суть яко по образу седмидесяти апостол, якоже служебницы суще, потщания ради, еже убогим, почитаеми, да служат в градстей церкви". От толкования: "По образу убо седмидесяте апостол суще епископи, того ради ни презвитера, ни диакона не поставляют, якоже благодати Святаго Духа инем подати не могуще". До зде от правила Новокесарийскаго собора.
Темже от вышепредложенных явствуется, яко осмое правило перваго вселенскаго собора мнению вашему не согласует: понеже прочия правила, на него указующе, паки повторяти новатианскую хиротонию повелевают, понеже и последи того собора бывш Константиноградский поставление новатиан и прочих подобных по миропомазании не приемлет; понеже и особственно древлевосточнии учители по миропомазании от еретик хиротонию яко не бывшу вменяют; понеже и в самом правиле разум от приятия новатианской хиротонии зело отличествует. Убо туне и всуе ты сие правило к себе в помощь привлекати на развращение понудился еси.
Вопрос, 181.
Аще не приемлете, то явите, чесо ради не приемлете.
Ответ, 181.
Приемлем правило 1-го вселенскаго собора 8-е, якоже и прочия вси; но мнение ваше, тому сопротивствующее, отвергаем, якоже в вышшем ответе явихом.
Вопрос, 182.
В правиле 52 святых апостол напечатано: "епископ или презвитер, аще обращающагося от греха не приемлет, таковый антихриста себе сотвори, да извержется". И в 51-м тех же святых апостол правиле епископ или презвитер, вина, или мяса, или брака гнушаяся, да извержен будет и до конца отриновен от церкви. И в 62-м паки святых апостол: "Причетник, аще страха ради жидовска, или еллинска, или еретическа отвержется имене Христова, весма от церкве да изринется. Аще не Христова, но имене причетническаго отвержется, причетник сый, сиречь, убоявся епископ, речет: несть был, ни хощу быти епископ, да извержется от сана". И 68-е тех же святых апостол: "Дващи поставленный и с поставльшим его да извержется". И 47-е святых же апостол: "Епископ или презвитер аще крестит кого второе совершенным крещением, да извержется от сана". Нецыи же от еретик о всем сим выше объявленным правилом достойни суть извержения. Аще же от сих обратятся в правоверие, достоит ли сих с тою же хиротониею приимати?
Вопрос, 183.
Аще не достоит, но повторне хиротонисати подобает, то явите, в коих правилех предписано, еже бы от новатиан обращающихся повторне хиротонисати.
Ответ, 183.
Явихом ти уже довольно в 180-м ответе, яко от новатиан хиротония по всем правилам есть не приятна. Засвидетельствовахом в 44-м, яко некими правилы от наватиан и крещение отметается. Убо может ли хиротония по крещении от святыя церкве приятна быти. Показахом в 161 и во 180-м ответех, яко по миропомазании всеми правилы от еретик хиротония отметается. Убо вышепредписанных ответов довольни будуще, нас оставите во излишном непотительных.
Вопрос, 184.
Скверный еретик Новат, по проклятии от святых отец и по отвержении святительскаго имени, как и от кого сан епископский восприя? — известите от святаго писания.
Ответ, 184.
Новат еретик нигде в правилах и во историях не видится, чтобы когда святокафолическою церковию прият бы был: понеже без приобщения церковнаго кому, яко псом, не пометают священная; но тако, якоже начат свою ересь, сице и погибе в ней. Хиротония же новатианская отнюд нигде правилы не приемлется, якоже в варивших ответех засвидетельствовахом.