Geum.ru

Щит веры или Ответы древняго благочестия любителей на вопросы, придержащихся новодогматствующаго иерейства

Вид материалаДокументы

Содержание


Ответ на сии вопросы [235 и 236].
Подобный материал:
1   ...   25   26   27   28   29   30   31   32   ...   46

Ответ, 232.

Мы не своим мнением, якоже ты вопиеши, злобствуя на нас (чего не даждь нам Боже и помыслить), опровергаем еретическую хиротонию; но святии апостоли и святии богоноснии отцы, отвергающе, не приемлют якоже крещения, сице и хиротонии еретической.

А еже истязуеши нас изъявити тебе от седмаго вселенскаго собора поне едино правило, еже от еретик якоже крещение, сице и хиротонию обнажаему быти.

Но, о друже! котораго ты вымышления не подложил еси во своих вопросех. Но нигде желанию своему утверждающаго не обрел еси. О, блазнителю! Еда убо по тебе седмый вселенский собор не последуяй бяше апостольским и прежде его бывших соборов правилом, еже истязуеши от него явити тебе искомое? Никако же, никако! Но веждь убо, яко еже что содеяша святии апостоли и прежнии вселенстии и поместнии собори и святии отцы, и правила изложиша, та убо вся седмый вселенский собор, утвердив, укрепи, якоже первым своим правилом тако, возглашая, глаголет: "Святая правила, облобызающе, приемлем и держим святых апостол и шестих вселенских собор, к сим же и поместных, и еще же и святых отец наших, яко единаго Святаго Духа вдохновенна: ихже прокляша, проклинаем, ихже извергоша, изметаем, и ихже отлучиша, отлучаем, имже запретиша, запрещаем". Кормчая, гл. 18, л. 208.

Но аще, по указанному тобою в вопросе, еретицы в крещении, и в хиротонии, и в прочих тайнах имеют не Духа Святаго, но духа лукаваго присутствующа: убо где крещение еретическое, или хиротония у вас и прочия тайны могли причаститися Духа Святаго пришествия? Аще в миропомазании? Но того у васъ несть. Аще иерейство от епископа? Но того отнюд у вас не обретается. О, бедниче! Камо ты себе привел еси своим доказанием? — яко нигде с своим иерейством места не имаши. Престани, престани бредить во мраце твоего прелестнаго сна и возбудися от глубочайшаго твоего затемненыя. Полно прилипать к непользующему тебе иерейству, но якоже нареклся еси от древняго предания последователем, того убо и держися, а не на обе храмли бедре. Но аще желаеши уведети разум правил святых апостол и святых отец о еретическом крещении и хиротонии, то прочти 44 и 161, а о сравнении 21, ответы, и известишися.


Вопрос, 233.

Святитель Христов Иона, митрополит Киевский и всея Росии, чесо ради приял Даниила епископа Володимирскаго, от Исидора латынника хиротонисаннаго? Убо ли ему кая нужда бяше, яко да приимет от еретика хиротонисаннаго?


Ответ, 233.

Котораго писания и которыя истории не потщался еси развратити, о дивный вопросителю, еже и историю о Данииле епископе Володимирском и Берестинском во образец вашему принятию иереев притягати насилствуеши! Но аще внидем в подробность обыскания о сем Данииле епископе, зело убо отстоятельно обрящем от вашего разума и принятия иереев.

1. Исидор митрополит Киевский, рукоположивый сего Даниила во епископы, не бе исперва латынником, но бяше от восточных стран, и от восточнаго исповедания начало свое влекий: ибо бяше родом болгарянин, якоже о сем богомудрый Захария Копестинский засвидетельствует, глаголя: "Исидор, родом болгарин, року от сотворения света 6847, а от Рождества Христова 1437, поставлен был от Цареградскаго патриарха Иосифа; той толко рок един побывал на Москве, и на собор он Флоренский поехавши, и отступил православия, и принял от папежа Евгения кардинальский титул". Книга Оборона, л. 393. От сего свидетельства познавается, что Исидор не бе изначала латынником, яко не от них крещен бе. Аще бы от них крещен был, не бы от Иосифа патриарха Цареградскаго рукоположен был; такожде и Даниил епископ бе православно крещен. Ваших же иереев изначала крестивый и рукоположивый не православен, но еретик бе: убо и сообразия никоего ваших иереев ко оному Даниилу не обретается.

2. Аще и рукоположися Даниил в епископы от Исидора отступника, но тогда Исидор еще не бяше соборне оглашен и из сана извержен. Святая же церковь, до соборнаго осуждения и проклятия, от еретик не отметает действуемых таин, за нелишение еще Святаго Духа, якоже о сем в 215-м ответе и в прочих довольне рехом: убо вам Даниилово от Исидора приятие хиротонии на подобие ваших иереев приводити отнюдь всячески неподобно и несообразно обрящется.

3. Понеже Даниил, якоже рукоположися от Исидора до соборнаго о нем определения, сице и еще по неведению: ибо не знаяше, яко Исидор бе сообщник и отступник к латынскому нечестию, якоже сам в своей грамоте покаянной к Ионе митрополиту Киевскому глаголет сице: "Се аз, смиренный Даниил епископ Владимирский и Берестинский, что дерзнух поставитися епископом на ту Владимирскую епископию от Исидора митрополита и от инех митрополитов, смудрствующих Исидору, и еже о нем собраннаго тогдашняго в Цареграде собора, а того не разумех, что тот Исидор митрополит, сходатай и споспешник был оному латыньскому, еже во Флоренцыи, осмому собору". Минея Четья макарьевская, месяц август.

Зри убо, Даниилово приятие хиротонии от Исидора в неведении бяше: яве, яко еще соборне не бысть оглашен Исидор. Убо сообразно ли ваших иереев поставление обрящется Даниилову поставлению? Аще Даниил прия поставление до соборнаго осуждения на Исидора, аще по неведению; ваши же иереи по ведению, и по толицем разглашении о Никоновых новшествах, и по толицем прешествии времене от начала оных, свое поставление прияша: убо отнюд всячески несообразно их поставление к Даниилову явствуется.

4. Но аще Даниил и тако, и в таковое время прия поставление от Исидора; обаче и тако приятое, до соборнаго осуждения на Исидора, поставление ни за что почте и яко небывшее вмени, якоже во своей покаянной грамоте пред Ионою митрополитом извествоваше, сице глаголя: "Аз, смиренный Даниил епископ Владимирский и Берестинский, то прежнее исповедание свое и Исидорово мне поставление отметаю, и отрицаюся, и во всем ничто же вменяю. (Ниже) Исповедаю же ся Богови и Пречистей его Богоматери, и повинуюся во всем своему господину преосвященному митрополиту Ионе Киевскому и всея Руссии", и проч. При конце: "подписах сие своею рукою, лета 6960, индикта 15, октября 28".

5. Святейший же Иона митрополит сего Даниила покаявшагоея не тако просто прия, но благословением и грамотою, от себе данною, того на Владимирскую епископию утверди, якоже в его грамоте прощальной сему Даниилу сице явствуется: "Понеже убо благодатию Божиею соединися церковь руская, и в первый мир приведена бысть и уставлена, и по древнему обычаю укреплена бысть, единой митрополии быти, якоже изначала пошло от святаго крещения, и един митрополит Киевский и всея Руссии, по данней ми благодати от Святаго и животворящаго Духа, и смотрению и управлению о соединении Божия церкве того великаго государя, тако же и по челобитью и по исповеданию и покаянию и благопокорению, еже к Богу, и к церкви Божии, и к нашему смирению, Даниила епископа Владимирскаго и Берестинскаго, мы простихом его и благословихом со всеми нашими детьми и сослужебники, со архиепископы и епископы русскими нашей митрополии, елицы в сие время прилучишася при нас, и велехом ему и литоргисати с нами во святей службе, таже и отпустихом его с духовною любовию в предреченную во святейшую епископию Володимирскую и на весь предел епископии. Того ради должен есть боголюбивый епископ Даниил, о Святем Дусе сын и сослужебник нашего смирения, творити в той своей епископии вся святительская церковная оправдания, якоже то издавна пошло. (Ниже) И сего ради дана бысть ему грамота сия нашего смирения, во утвержение его, на Москве". До зде от грамоты прощальной.

Речеши ли, яко просте словом точию прости Иона Даниила епископа? Ответствуем. Но кая убо нужда Даниилу самоустне отметати Исидорово поставление и ни во что же то вменяти? Кая же нужда и Ионе митрополиту соборне принимати Даниила и от себе своею грамотою онаго на Владимирской епископии утверждати? И аще кратко тамо речено бысть, яко "мы простихом с прочими, и благословихом, и велехом литоргисати", но благословение не бяше простое, точию единем словом, но якоже обычай есть на таковых кающихся епископов омофор возлагати, и тако приимати их в церковное соединение, о чесом и Бароний, в лете Господнем 869-м, повествует о патриархе Игнатии, како кающихся приимаше епископов. Зри о сем тамо. Ваши же иереи от кого прощение получиша? От кого благословишася? Кто грамоту ставильную от епископов православных им преподаде? Удивлению великому достойна есть вещь сия!

6. Святейший Иона митрополит бе зело всекрепкий восточнаго православия содержатель, и прежним святым российским пастырем усердный последователь. Древлевосточнии же пастыри еще на 54-м лете по тысящи, не точию хиротонию, но и крещение от латин не начаша приимати, о чем Бароний свидетельствует, яко грецы латин крещаху второе (печати московской л. 1219). Такожде и от последователей восточному благочестию крещение латынское отвергашеся, якоже Потребник сербский, друкованный в лето 1520 в Виницеи, латин крестити повелевает, яко полуверни суть. Книга Оборона, Захария Копестинскаго, л. 376 на об. И Номоканон друку киевопечерскаго при Арсении Жилиборстем, на л. 45, повелевает латин крестити, яко полуверни суть. И российстии пастырие, святии митрополити Фотий, Киприан, Кирилл, Макарий, обливательнаго крещения не приимаху: чти послание во Псков и Стоглав, гл. 17. И преподобнии Варлаам Хутынский и Максим Грек латин крещения не приимаху (житие преподобнаго Прокопия Устюжскаго, июля 8; Максим Грек, слово 48). И святейший Филарет патриарх соборне изложи, не точию латин, но и белорусцев, иже приступивших к папе римскому, аще и в христианскую веру крестившихся от русскаго попа, обаче за отступление и моление онаго попа за папу, крестити паки повелеваются, о чесом во обоих изложениях Филарета патриарха явствуется. И прочии, якоже древлевосточнии, тако и древлероссийстии пастыри, латин вторично крещаху. Зри во Ответех Выгорецких, в 50, в статии 36, довольно о сем. Аще убо крещения древлеправославнии пастырие не приимаху от латин, како хиротонию приимати бы восхотели? Никако же, никако!

Понеже в книзе Обороне Захария Копестинскаго повествует, яко "патриарх Иосиф Константинопольский, и все духовенство, и весь сигклит, царя греческаго Михаила Палеолога с папою согласия в трех пунктах: 1) папежа в молитвах поминать, 2) абы вольно до римскаго двора до суда отходити, 3) римскому папе во всем начальство имети: не прияша, изволиша заточения и беды подъяти" (л. 386).

Афонстии отцы, от того же Михаила Палеолога принуждаеми на согласие на объявленные пункты до папы, не прияша, и кровьми и смертьми запечатлеша (л. 387). "По Иосифе патриархе, грецы Георгия патриарха до посвящения за Михаилом рукоположенных епископов не припустиша, но чистыми от онаго Михаилова с папою согласия из Македонии Германа митрополита Ираклийскаго посвятивше, и той на патриаршество предъявленнаго Георгия посвяти, а о придатку до святаго символа веры иной измены не вчиняли латины тогда" (л. 390). Марко Ефесский митрополит, Григорий Иверский, Софроний Анкирский, и инии мнози, зазираху римлян о ересех, и согласия с римляны не прияша, и анафематьствоваша на Флоренском соборе. Читай послание святаго Марка в книзе о Флоренском соборе (л. 979) [На поле: Собор бысть 1431. Оборона лист 337]. "Пахомий патриарх Константинопольский, около року 1516, Арсения диакона, прозванием Апостолипис, погордевша своим пастырем, архиепископом Константинопольским, до Леона десятаго папежа римскаго отшедша, и от того легатом до венетов послана, и столицу митрополии Монемвасийской одержавша, против каноном соборным, посланием от архиерейскаго служения возбрани и непослушавша проклят и до островов Крита и Кафиры и до иных мест венецких, где были православныя, писа на священники, которых он хиротонисал, отлучение, и дал вольность священником и диаконом, от Арсения хиротонисанным, дабы шли до иных архиереов канонных, котории бо второе их хиротонисовали для закона, и правила указуются" (Арменопул 5, л. 376).

Преподобный же Максим Грек, зело притужнейше латинской хиротонии отвращатися повелевая, глаголет: "Римскаго убо (рече) папы, яко отпадшаго лика православных архиереов, рукоположения отвращатися и отметатися достойно и праведно есть, и нужно зело" (гл. 37).

Творец же Книги о вере о папе римском глаголет: "К сему же яко да папеж от патриархов благословение и хиротонию приимал бы, а от него вси западнии того же да сподобятся: сие в то время межи греки и Русиею и латынниками соединение и сообщение будет" (гл. 25, л. 228 на об.).

Приснопомнимый Иоанн, мних святыя горы Афона, в послании к князю острожскому, о поставленных от папежа пиша, сице глаголет: "Ибо вам о очищении церкви нашей православной речь зачалася, и далее то чинити будем: на священнический степень по правилом святых отец да восходят, а не по своих волях похоти плотьской, ради имения и богатства сан восхищают, и всякаго таковаго, иже сам наскакует, не приимуйте, и от короля даннаго без вашего избрания изжените и проклените: не в папежа бо вы крестилися и в королеву власть, да вам дает волки, злодеи, разбойники и антихристовы таинники. Лучше бо вам без владык и без попов, от диявола поставленных, до церкви ходити и православие хранити, нежели со владыками и попами, не от Бога званными, у церкви быти, и тою ругатися и православие попирати. Не попы нас спасают, или владыки, или митрополиты, но веры таинство нашей православной и сохранение заповедей Божиих, то нас спасти хощет". До зде от послания.

Виждь убо, како восточныя церкве последователи о поставленных от латин разумеваху, како поставление от оных, отметающе, не приемляху. Можаше ли, вопреки всей древлевосточней церкви, ея всеусердный последователь и зельный подражатель, святейший Иона митрополит от сущих отверженных православия латин приняти хиротонию? Никако же, никако! Аще и прия Даниила епископа, хиротонисаннаго от Исидора отступника, но еще до соборнаго осуждения, и прия не просто, но с канонным и правильным благословением, и по должности пастырской, и от себе с данною ему (Даниилу) грамотою: убо ниже Иона видится от латин хиротонисаннаго прия, ниже Даниил хиротонию, аще и не от осужденнаго еще соборне, препочте, но всячески ю за ничто положив отверже. Зри убо православную и всеопасную ревность: аще где и не зело вящшаго опасения потреба, тамо зелнейше опасахуся, да не приобщатся коею-любо причиною неправославнаго действия. Сие бо отменная пастырская показуется осторожность.


Вопрос, 234.

Аще же речете, яко аще Даниил и от еретика хиротонию приял, но потом от православнаго архиерея принят бысть, и прощение и благословение получи, но докажите, повторе ли хиротониса, или единым благословением, вся бывшая противная суеверия папежников упраздни и разреши.


Ответ, 234.

Исидор митрополит не нарицается во историях еретиком (аще и к еретиком приобщися), но отступником: понеже от благочестия восточнаго к нечестию латынскому отступи. Еретик же глаголется, иже исперва един развращенно и самомнительно начинаяй разумети о догматах, а потом уже и явленнейше со многими истину развращаяй, от православных же помале о сем обличаемый, а потом соборне извержению и клятве предается, якоже о сем много в предварших ответех известихом. Но Исидор, когда рукоположи сего Даниила в епископы, не бе еще соборне извержен и проклят, понеже сего Даниила рукоположи по возвращении от Флоренскаго собора в Царе-граде, когда в Россию с собора идяше. А егдаже в России от благовернаго князя Василия Ивановича и от всероссийских архиепископов и епископов соборне по правилом разсмотрен, и хотящься до вселенскаго патриарха послан быти, убеже, и прииде в Царьград, обаче уже в том же чину не прият бысть, якоже премудрейший Захария Копестинский пишет сице: "Который то Исидор, гды приехал за унею Флоренскою на Москву, царь Василий до вязения его осудил; потом собравшися вси епископове, архимандритове, и игуменове, и презвитерове, осудили его. (Ниже) В таковом осужденью гды утек звязенья. а в России и в Литве не был принят, удался был до Константинополя, стараючись о приверненье на престол митрополии русской. Лечь патриарха по оном Иосифе, именем Григорий, приимал его только на степень покаяния и до сполечности православных, але на столицу митрополии нужным способом не припущал и не благословлял" (Книга Оборона, л. 393. И житие святаго Ионы митрополита, марта в 30-й).

Темже посему видится, яко Даниил еще прия поставление от Исидора до осуждения православных и верховных архипастырей; но Исидор потом уже в прежнем чине от православных архипастырей не прияся: убо и великому бы сомнению дело не годствовало подпадать. Но и тако приятое поставление якоже святейший Иона не просте прия, но при благословении и грамоту Даниилу от себе даде епископская действовати. А еже как благослови, того нам аще тамо история и не показует, но от покаяния Даниилова явствуется, яко поставление его от Исидора не приято и отвержено бысть, о чем и в варившем ответе засвидетельствовахом.


Вопрос, 235.

Не можете рещи, яко не единым благословением его, Исидоровых, мерзостей и латынских суеверий очисти и разреши: убо известите, кое разнство в благословении иерейском обретаете с благословение архиерейским? Ибо святый Златоуст изъявляет сице: "чрез иерейская и архиерейская уста сам Бог разрешает и благословляет". И паки: "яко не много есть посредство между епископы и презвитеры: поставлением токмо на степени над тех они вышши суть, и сим токмо видится от презвитерей больше" (Беседы апостол.). К сим же и окружное святейшаго патриарха Тарасия послание засвидетельствует: "токмо не поставляет иерей от епископа разньствует, священство же совершенно имать" (Кормчая л. 283 об.). Но и самая истина наша Христос: "имже отпустите грехи, отпустятся им", рече. Не бо епископом сущим таковая власть апостолом дадеся. Почему святая, златословый Иоанн и Феофилакт, на иерейский чин сие восприявше, истолковаша, глаголюще сице: "иерейский чин божественен есть: Богу воеже отпущати грехи; онем же се дадеся; тако убо да чтет тыя, яко Бога, аще и недостойни суть" [На Иоанна, зач. 65]. Убо якоже архиерейское, сице и иерейское благословение и разрешение непосредственно едино. Вы же чесо ради тако развратно священное писание толкуете, глаголюще, яко Бог чрез священника не разрешает и не благословляет?


Вопрос, 236.

В неприсутствии епископа может ли православный священник в совершенство православия христианскаго приити, или не может?


Ответ на сии вопросы [235 и 236].

Несть убо, несть в нас развратности в священном писании, о вопросителю! Но в вас, и в твоих вопросех суть и обретается излишество развратнаго разума. Не точию исторический, но и нравоучительный правый разум на свое развращение искривил еси, подобяся древоделю, не обретшему на свою потребу криваго древа, и прямое понужается кривити. Удобно убо познати всяк может и в мимошедших твоих вопросех, всюду развращенная износящих; но и в настоящем не трепещеши наскакати своим развращением, терзая постав златотканный священнаго писания. Не удовлился еси в прошедших твоих, в 168-м и 173-м, и в прочих о том же, но и зде паки таяжде повторяеши. Гряди убо обратно, и виждь о власти вязания и разрешения, епископом единем принадлежащей, в 168 ответе доволно ти представленная свидетельства, не претецы же мимо и 173 ответа о разнстве благословения архиерейска.

Но если внидем в разсмотрение и зде тобою приведенных свидетельств, то явне обрящем вопреки твоего разума стоящих. Аще, по Златоусту и Тарасию патриарху, архиерей от иерея разньствует: убо архиереи над поставлением владычествут; и если что недостаточно в нем обрящется, сии оное совершают, понеже, якоже в выше показанных ответех засвидетельствовахом, сей дар Святаго Духа не иерей, но архиерей имеет, и от него все совершенство в хиротонии зависит. И аще случится или от ереси обратитися иерею, или от падения востати, то не иерей сие разсмотряет и на достоинство прежнее возводит, но архиерей, о чем в помянутых ответех изъявихом, и в грядущих изъявите имамы.

А еже толкование Феофилактово нудишися припрягати к своему разуму, еже тамо неразньственне иерейский чин наречен божественным, и сим дадеся власть отпущати грехи. Но сице толкует Феофилакт разумом общекупным: понеже обычно есть священному писанию и епископов иереями нарицати, якоже в Деянии апостольском повествуется о Павле апостоле. Егда "от Милита посла во Ефес призвати попы церковныя", зде убо попами сих назва; помале же техже и епископами наричет, иже, сим пришедшим к нему, нача к ним глаголати: "внимайте убо себе и всему стаду, в немже вас Дух Святый постави епископы, пасти церковь Господа и Бога, юже снабде кровию своею" (Деян. зач. 43). Виждь убо, кия прежде названы попами, последи тыя нарицаются епископами, имже и церковь пасти поручено есть. Но сам священный Златоуст о прежде бывшем извествует, яко епископи презвитерами и диаконами нарицахуся, о чесом в Беседах апостольских, к филипписиом, во главе 1-й, на листах 850 и 851, пространно пишет. Темже и зде, в толковании с блаженным Феофилактом такожде не разньственне епископский чин иерейским нарече. Понеже святии апостоли, в 39-м правиле своем, власть в вязании и разрешении грехов епископом имети определяют, иереи же без тех воли ничто не могут учинити. Карфагенскаго же собора отцы, в 43 правиле, ни по нужди презвитеру кающагося разрешити попущают. Блаженный же Гавриил Филадельфийский, дарование власти сея, еже вязати и решити, от Христа апостолом точно толкует на епископы, а не по вам, на попы; о чем зри книгу о седми тайнах, гл. 6.

Но и помяновеннии от тебе Златоуст с Феофилактом, в благовестии того же Иоанна на зачало 31-е толкующи, тако глаголют: "и раби они, иереови ваши, не имут власти инем отпущати грехов" (Благовест. л. 139). И паки от Луки, на зачало 95-е, еже кому что определяется, тако пишут: "Диакони очищают оглашением учения, презвитери просвещают крещением, архиереи же священныя чины поставляют, еже есть рукоположение. Видиши ли, чины к действам, ни вящьше ни мнее реку предстоящих". До зде Феофилакт. Зри же зде внятно, яко диакони учению предлежат, презвитери же крещению, еже есть точию к соединению верным, а не чинов устроению, архиереи же священныя чины устрояют, еже есть рукоположение. Темже показуется не наше развратное священнаго писания толкование, но твое и твоих согласников криворазвращенное разумение ко оному есть и познавается.