Радуйся, Богородице Одигитрие, христиан упование

Вид материала

Содержание

Радуйся, Богородице Одигитрие, христиан упование. Кондак 2
Сей кондак глаголется трижды. Таже икос 1 и кондак 1.

Подобный материал:

Акафист

Пресвятей Богородице, ради

иконы Ея, именуемыя «Смоленская»

Кондак 1

Избранней от всех родов Царице и Богородице, теплей нашей Заступнице и усердней пред Богом Молитвеннице, благодарственное воспеваем пение. Ты же, всемилостивая Мати и верная Наставнице, от всяких нас бед свободи, с верою и любовию зовущих:

Радуйся, Богородице Одигитрие, христиан упование.

Икос 1

Архангельский глас вопием Ти, Чистая: радуйся, Благодатная, Господь с Тобою. И нас исполни радости духовныя, да умиленною душею и чистым сердцем принесем Ти, рождшей миру Спасителя Христа Бога нашего, похвалы сия:

Радуйся, Бога Отца благоволением осененная;

радуйся, Бога Сына Мати Неискусобрачная.

Радуйся, Бога Духа Святаго обитель священная;

радуйся, тайны Пресвятыя Троицы проявление.

Радуйся, ангельских умов удивление;

радуйся, человеческаго рода украшение.

Радуйся, горняя с дольними совокупившая;

радуйся, врата райская земнородным отверзшая.

Радуйся, радости вечныя Ходатаице;

радуйся, благословения Источниче.

Радуйся, древния клятвы разрешение;

радуйся, прародителей избавление.
^

Радуйся, Богородице Одигитрие, христиан упование.

Кондак 2

Видевши Всесвятая Дева пречистаго лика Своего изображение, егоже евангелист Лука написа, рече: благодать Сына Моего и Моя с сею иконою да пребудут. Таковое обетование Твое ведуще, почитаем образ Твой, Владычице, зовуще Богу: Аллилуиа.

Икос 2

Уразумев благоволение Твое, Богородице, к первописанней иконе Твоей, славный апостол Лука дарова ю в благословение и освящение Церкви Антиохийстей, идеже вернии воспеша Ти сицевая:

Радуйся, огнеобразная колеснице Слова;

радуйся, преукрашéнная божественною славою.

Радуйся, Небес пространнейшая;

радуйся, яко носиши Носящаго вся.

Радуйся, лествице небесная;

радуйся; одушевленный раю.

Радуйся, Божества приятелище;

радуйся, промышления Его сокровище.

Радуйся, светильниче светозарный;

радуйся, престоле превознесенный.

Радуйся, вертограде Христов благоуханный;

радуйся, чертоже Царя великаго.

Радуйся, Богородице Одигитрие, христиан упование.

Кондак 3

Силою Божиею чудеса предивная совершахуся от иконы Твоея, Богомати Владычице, егда пренесена бысть в Царьград. Вси бо, с верою к Тебе притекающии и вспоможения просящии, исцеления и помощь получаху, в радости поюще Богу: Аллилуиа.

Икос 3

Имущи благоутробие щедрот и милосердия пучину неизчетную, явилася еси, Пречистая, двум слепцем и во Влахернскую церковь тещи повелела еси, идеже очи их отверзошася. Тии же, улучивше исцеление, в радости возопиша:

Радуйся, свеще неугасимая;

радуйся, звездо незаходимая.

Радуйся, божественною славою сияющая;

радуйся, души верных просвещающая.

Радуйся, слепых Путеводительнице;

радуйся, заблуждших Наставнице.

Радуйся, тьму неведения разрушившая;

радуйся, мрачныя бесы отгнавшая.

Радуйся, немощных укрепление;

радуйся, недугов исцеление.

Радуйся, скорое в бедах избавление;

радуйся, готовое скорбящих утешение.

Радуйся, Богородице Одигитрие, христиан упование.

Кондак 4

Бурею морскою сокрушила еси, Владычице, корабли иноплеменник, град Твой пленити восхотевших, и победы воинству христолюбивому даровала еси. Темже людие прославиша Тя, Одигитрие, яко крепость державную Царьграда, и воспеша Богу: Аллилуиа.

Икос 4

Слышание чудес Твоих, Владычице, укрепи верныя, егда нечестие иконоборцев посрамила еси и по мнозех летех икону Твою, в стене церковней сокрытую, невредиму явила еси. Мы же, дивящеся Твоему смотрению, глаголем:

Радуйся, Царьграда крепкое ограждение;

радуйся, храмов Божиих украшение.

Радуйся, иноплеменных ратей одоление;

радуйся, врагов Православия посрамление.

Радуйся, иконоборства бурю укротившая;

радуйся, правую веру утвердившая.

Радуйся, Воеводо добропобедная;

радуйся, славо православных честная.

Радуйся, царей благоверных похвало;

радуйся, святителей богомудрых проповедание.

Радуйся, прибежище верных;

радуйся, Заступнице уповающих на Тя.

Радуйся, Богородице Одигитрие, христиан упование.

Кондак 5

Яко боготечная звезда, икона Твоя, Владычице, благоволением Твоим от Царьграда в Землю Русскую пренесеся и граду Смоленску в наследие даровася; таковому промышлению о нас радующеся, вопием в Троице славимому Богу: Аллилуиа.

Икос 5

Видеша российстии людие досточудный и многоцелебный образ Девы Пречистыя и, всесвятую Одигитрию Земли Русския разумевающе, потщашася во имя Ея церкви многи воздвигнути и возопити Преблагословенней:

Радуйся, Царице горних и дольних;

радуйся, Владычице ангелов и человеков.

Радуйся, мира умирение;

радуйся, древния вражды разрушение.

Радуйся, освящение градов и весей;

радуйся, забрало Русския земли.

Радуйся, от междоусобныя брани избавляющая;

радуйся, к братолюбию наставляющая.

Радуйся, Еюже отгонится рыдание;

радуйся, Еюже приносится радование.

Радуйся, благоутишное пристанище;

радуйся, всему миру предивный покрове.

Радуйся, Богородице Одигитрие, христиан упование.

Кондак 6

Повеление Богоматере исполняя, непобедимь явися воин Меркурий, егда, ранами своими венец мученический прием, воеводу рати Батыевы порази и град Смоленск от нашествия иноплеменник избави, не ведущих пети: Аллилуиа.

Икос 6

Возсия во граде Смоленске просвещение божественных чудес Твоих, Богородице Одигитрие, и отгнася сила вражия, полцы же агарянстии, не терпяще Твоея крепости, бежаша; сих же избавльшиися вопияху Тебе таковая:

Радуйся, чудо чудесем Одигитрие;

радуйся, всех радостей радосте.

Радуйся, утешение в скорбех;

радуйся, хранилище в бедах.

Радуйся, страстотерпцев венчание;

радуйся, воинов непобедимая дерзосте.

Радуйся, варварскаго пленения свобождающая;

радуйся, безпомощным помощь подающая.

Радуйся, Еюже воздвижутся победы;

радуйся, Еюже низпадают врази.

Радуйся, земли нашея священное ограждение;

радуйся, града Смоленска крепкое защищение.

Радуйся, Богородице Одигитрие, христиан упование.

Кондак 7

Хотящи престольному граду благословение даровати, благоволила еси, Владычице, иконе Твоей от Смоленска во град Москву пренестися, идеже князие, святителие, монаси и простии познаша Тя, Всесвятую Путеводительницу, и, дивящеся чудесем Твоим, возопиша Богу: Аллилуиа.

Икос 7

Новую милость явила еси, Всепетая Одигитрие, егда, по мнозех летех во град Смоленск возвратившися, московским людем подобие честнаго образа Твоего оставила еси, да видяще его, воспевают Ти сице:

Радуйся, Света Невечерняго жилище;

радуйся, Солнца Незаходимаго Мати.

Радуйся, облаче, росу благодати источающий;

радуйся, сосуде, миро благовонное изливающий.

Радуйся, луче пресветлая;

радуйся, заре немерцающая.

Радуйся, Сиона горняго украшение;

радуйся, мира дольняго защищение.

Радуйся, землю Русскую прехождением Твоим освятившая;

радуйся, возвращением Твоим град Смоленск возвеселившая.

Радуйся, град Москву возлюбившая;

радуйся, людем его благословение даровавшая.

Радуйся, Богородице Одигитрие, христиан упование.

Кондак 8

Странное отшествие образа Твоего, Владычице, во град Смоленск видевше, московстии собори дивляхуся и плача исполняхуся, глаголюще: камо идеши Дево? Обаче, уразумевше благоволение Твое, еже покрывати православныя люди, сущия под властию иноверных, возопиша Богу: Аллилуиа.

Икос 8

Вся милости и щедрот преисполнена, Всеблагая Богородице Дево, град Смоленск Земли Русской возвратила еси, молитву великаго князя Василия услышавши. Той же во граде Москве обитель нову во имя Твое постави и лик девственных собра, да радующеся воспевают:

Радуйся, обрадованная Приснодево;

радуйся, Невесто неневестная.

Радуйся, селение Бога Слова;

радуйся, святая святых большая.

Радуйся, земле ненасеянная;

радуйся, горо несекомая.

Радуйся, крине райскаго прозябения;

радуйся, цвете божественнаго саждения.

Радуйся, чистая голубице;

радуйся, нескверная агнице.

Радуйся, девственная славо;

радуйся, преподобных похвало.

Радуйся, Богородице Одигитрие, христиан упование.

Кондак 9

Вся земля Русская о Тебе, Одигитрие, хвалится и веселится, обитель Твоя светло красуется, лицы иночестии с преподобною Еленою славят имя Твое. Темже и мы молимся Тебе, Владычице: украси души наша целомудрием и чистотою и научи неосужденно пети ангельскую песнь: Аллилуиа.

Икос 9

Витии многовещаннии не могут достойно прославити чудеса Твоя, Всесвятая Одигитрие, яже от лет древних и до днесь являеши всем, с верою и любовию к Тебе приходящим. Темже молим Тя: даждь нам слово разума, ублажающим Тя похвалы сицевыми:

Радуйся, праотцев надеждо;

радуйся, пророков исполнение.

Радуйся, ковчеже спасения;

радуйся, всего мира очищение.

Радуйся, жезле старости;

радуйся, вдов и сирот утешение.

Радуйся, алчущих Питательнице;

радуйся, обидимых Заступнице.

Радуйся, печальных отрадо;

радуйся, ненадеждных надеждо.

Радуйся, пространство благостыни;

радуйся, неисчерпаемое море щедрот.

Радуйся, Богородице Одигитрие, христиан упование.

Кондак 10

Спасти хотящи землю Русскую, Владычице, от нахождения галлов, даровала еси икону Твою Одигитрию воинству христолюбивому в щит и ограждение. Мы же, ведуще Тя, Заступницу непобедимую, прославляем милости Твоя и чудеса, воспевающе Спасителю Богу: Аллилуиа.

Икос 10

Стена нерушимая явилася еси земли нашея, Владычице, егда иноплеменницы восхотеша ю пленити и веру Православную погубити. Ты же, неистовство их укротивши, верным людем одоление на враги даровала еси и град Москву свободила еси. Темже восхваляем Тя сице:

Радуйся, земли нашея державная Хранительнице;

радуйся, града Москвы всемощная Заступнице.

Радуйся, нашествия вражия нас избавльшая;

радуйся, от пленения град наш свободившая.

Радуйся, злочестивых шатание низложившая;

радуйся, всю крепость их сокрушившая.

Радуйся, Предводительнице воинств христианских;

радуйся, едина Предстательнице верных.

Радуйся, из рова погибели возводящая;

радуйся, нечаянную радость дарующая.

Радуйся, Судии Праведнаго умоление;

радуйся, грешных с Богом примирение.

Радуйся, Богородице Одигитрие, христиан упование.

Кондак 11

Пение всеумиленное, Пресвятая Владычице, днесь приносит Ти обитель Московская. Ты бо издревле божественным Твоим покровом соблюдаше ю от разорения и огненнаго запаления, да ревнительницы девства и чистоты вкупе со всеми чтущими Тя, возсылают хвалебную песнь Богу: Аллилуиа.

Икос 11

Неопалимую купину, якоже древле Моисей, разумеем Тя, Святая Дево, Ты бо, обитель Твою от нахождения вражия и запаления невредиму сохранивши, иноверных вспять обратила еси. Темже лик девический, спасение улучив, принесе Ти похвалы сицевыя:

Радуйся, купино неопалимая;

радуйся, руно орошенное.

Радуйся, стамно Богоприимная;

радуйся, Хлеба животнаго трапезо пресвятая.

Радуйся, чаше, питие истинное подающая;

радуйся, купеле, всякую скверну очищающая.

Радуйся, столпе огненный, мрак грехов отгоняющий;

радуйся, столпе облачный, зной страстей прохлаждающий.

Радуйся, реко нетления;

радуйся, вечнаго огня свобождение.

Радуйся, добрая Младопитательнице девам;

радуйся, обители Твоей покрове и снабдение.

Радуйся, Богородице Одигитрие, христиан упование.

Кондак 12

Благодать Божественная, немощная врачующи и оскудевающия восполняющи, невредиму сохрани обитель Твою, Богомати, егда тщахуся безумнии богоборцы ю осквернити и храмы Божии поруганию предати. Ныне же в ней, Владычице, Покровом Твоим осеняеми, пастырие Христовы благодать священства улучают, лицы иночестии, яко Матерь свою Тя прославляют, вопиюще Богу: Аллилуиа.

Икос 12

Поюще Твоя чудеса, Богородице, и припадающе к чудотворней иконе Твоей, молимтися с верою и любовию: буди нам Путеводительница благая к светлому граду Иерусалиму Небесному, да узрим Тя в славе Божественней и вкупе со святыми воспоем сице:

Радуйся, Царице наша Преблагая;

радуйся, Владычице Пренепорочная.

Радуйся, едина благословенная в женах;

радуйся, Небесных радование.

Радуйся, лукавых духов отгонительнице;

радуйся, богопротивных советов разорительнице.

Радуйся, премудрых разум превосходящая;

радуйся, верных смыслы озаряющая.

Радуйся, ключу Царствия Христова;

радуйся, надеждо благ вечных.

Радуйся, милости источниче;

радуйся, мирови прибежище.

Радуйся, Богородице Одигитрие, христиан упование.

Кондак 13

О, Всепетая Мати, Царице Всемилостивая, Дево Богородице Одигитрие, нынешнее приемши приношение, от всякия избави напасти всех и к Царствию Небесному путеводствуй, вопиющих Ти: Аллилуиа.

^ Сей кондак глаголется трижды. Таже икос 1 и кондак 1.

Молитва

О, пречудная Царице Богородице, Небеснаго Царя Христа Бога нашего Мати, Пречистая Одигитрие Марие! Услыши ны, грешныя и недостойныя, в час сей молящияся, и со слезами пред пречистым образом Твоим припадающия. Изведи нас от рова страстей, Одигитрие благая, избави нас от скорби и печали, огради от злыя клеветы и навета вражия. Можеши бо, о, Благодатная Мати наша, от всякаго зла сохранити люди Твоя и всяким благодеянием снабдити и спасти. Разве Тебе иныя Предстательницы и теплыя Ходатаицы о нас, грешных, к Сыну Твоему и Богу нашему не имамы. Егоже умоли, Владычице, спасти нас и Царствия Небеснаго сподобити, да спасеннии славим Тя, яко спасения нашего Виновницу, и превозносим всесвятое и великолепое имя Отца и Сына и Святаго Духа, в Троице славимаго и покланяемаго Бога, во веки веков. Аминь.

Blog