Әтнә татар әдәбиятына, мәдәниятына, фәненә, мәгърифәтенә бик күп мәшһүр шәхесләрне биргән як
| Вид материала | Документы |
- Доклад. Алдан үткән конференцияләр дә шулай ук "Татмедиа" Агентлыгында үткән иде. Һәм, 15.66kb.
- Арча җиденче номерлы урта мәктәбенең югары категорияле татар теле һәм әдәбият укытучысы, 792.47kb.
- Дәрес темасы: Татар милли әдәби теленең формалашуы Дәреснең м аксатлары, 133.41kb.
- Җәлилова Гөлназ Илсур кызы, Iкатегорияле татар теле һәм әдәбияты укытучысы, 368.45kb.
- Человек и окружающая среда. Экология. Охрана природы. Кеше һәм тирә-юньдәге мохит., 2943.63kb.
- Мировая и зарубежная художественная литература, 83.93kb.
- Татар-информ 160 тысяч юных татарстанцев занимаются в спортивных секциях, 1876.15kb.
- Хәзерге татар теле татар халкының милли теле, халыкның рухи һәм мәдәни хәзинәсенең, 6578.54kb.
- «Мәшһүр-Жүсіп шығармаларындағы заттық мәдениет лексикасы» : Монография. 1 том. Павлодар, 17645.06kb.
- В филиал «атб» (оао) в г. Хабаровск, бик 040813899, корр, 22.23kb.
“Әтнә таңы” газетасы
Олы җанлы якташым
Әтнә - татар әдәбиятына, мәдәниятына, фәненә, мәгърифәтенә бик күп мәшһүр шәхесләрне биргән як. Алар арасында Татарстан Фәннәр Академиясе Тарих институтының Милли мәгариф тарихы һәм теориясе үзәгенең өлкән фәнни хезмәткәре, тарих фәннәре кандидаты, районыбызның Яңа Шимбер авылында туып - үскән Тәэминә Биктимерова да бар.
Тәэминә Биктимерова – халкыбызның тирән ихтирамын һәм хөрмәтен яулаган шәхес. Шушы дәрәҗәгә ирешү өчен аңа озын һәм катлаулы тормыш юлын узарга туры килә. Язмыш йомгагын сүтә башласаң, аның очы Яңа Шимбер авылында узган, сугыштан соңгы еллардагы балачак. “Ул вакытлар искә төшсә, тәннәр чымырдап куя”, ди Тәэминә апа. Ачлык-ялангачлык газаплары мәңге онытылмаслык булып, нәни йөрәкнең түренә үк кереп урнашкандыр, күрәсең.
Барлык авырлыкларны җиңеп, белем алырга омтылырга аңа әнисе Шәрифә апаның тырышлыгы, авылдашларның теләктәшлеге канат бирә, рухын үстерә. Тәэминә үзе дә үҗәт, тырыш була. Җәйге каникул вакытында колхоз кырларында эшләп, Түбән Көек җидееллык, аннан Күлле Киме урта мәктәбендә белем ала. “Аякка дисәң аякка, өскә дисәң өскә кияргә кием юк иде. Шулай да укыйсы килү теләге сүрелмәде”, дип искә ала Тәэминә апа. Аннан соңгы юллар аны Казанга илтә. Төрле эшләр башкарырга туры килә: йөк ташучы, штукатурчы, буяучы. Кечкенәдән эшләп үскәнгә, Тәэминә өчен болар берни булмый. Шулай да нидер җитми, күңел гел нәрсәгәдер омтыла. Һәм ул Казан дәүләт педагогия институтына юл ала. Теләге – укытучы булу. “Тырышкан табар – ташка кадак кагар”, дигән халкыбызның әйтеме, нәкъ менә Тәэминә Әхмәт кызына бик тә туры килә.
1966 елда аның кулында югары белемле татар теле, әдәбияты һәм тарих укытучысы дигән белгечлек буенча диплом була һәм Тәэминәнең педагогик эшчәнлеге Казан авиация институтында башланып китә. Бөтен барлыгы белән, студентларга белем бирү белән бергә, ул фән эшенә дә кереп китә. Китапханәләрдә, архивларда эшләү, йокысыз төннәр... Һәм бу эшләрнең нәтиҗәсе – “Идел буе республикалары партия оешмаларының хатын-кызларны социалистик төзелешкә тарту буенча эшчәнлекләре” дигән темага кандидатлык диссертациясе яклана. Тәэминә апа һәркемгә игътибарлы. Һәр кешегә шәхес итеп карый. Шуңадыр ул белем биргән студентлар, инде үзләре күптән югары белемле белгечләр, бүген дә үзләренең остазларының хәлен белеп яшиләр. Моннан да зур хөрмәт юк укытучы өчен.
Язмыш йомгагын сүтеп, 90нчы елларга күз салсак... Бөтендөнья татар конгрессы башкарма комитетында референт, бүлек мөдире, “Ак калфак” исемле Бөтендөнья татар хатын-кызлары оешмасының рәис урынбасары, “Мәгариф” оешмасы әгъзасы, ТР Фәннәр академиясенең Тарих институтында өлкән фәнни хезмәткәр.
Ә инде Татарстан дәүләт радиосын тыңлаучылар Тәэминә Биктимерованың “Дөнья” студиясенең даими авторы буларак та яхшы беләләр. Аның һәр чыгышын тыңлаучы көтеп ала. Телефоннан шалтыратып, хатлар язып, рәхмәт әйтәләр үзенә. Тәэминә апаның чыгышларында, сугыш елларында авылда тормыш тоткасы булган хатын-кызларыбызның иген игүдә күргән авырлыклары, ерак җирләрдә урман кискәндә, торф чыгарганда күрсәткән батырлыклары, туган җирләренә булган мәхәббәт хисләре сөйләнә. Аларның күбесендә райондашларыбызның язмышы чагыла.
Тәэминә апаның үзенә дә язмыш авырлыкларны бик еш әзерли. Ләкин ул сынмый, сыгылмый. Барлык кайгыларны эчкә йотып, алга баруын дәвам итә. Моның өчен аңа шәкертләре, дуслары ярдәм итә. Һәм әлбәттә фәнгә булган омтылышы. Өч дистә елдан артык фәнни һәм педагогик эшчәнлеген алып барган Тәэминә Биктимерованың газета, журнал битләрендә тирән эчтәлекле мәкаләләре еш дөнья күрә. “Минем шәҗәрәм” дип аталган китабы бик күп мәктәп укучыларының кыйммәтле ярдәмлегенә әверелде.
Киләчәк хыяллары ачык, өметле галимәнең. Тарих институтында эшли башлагач, дирекция Тәэминә Әхмәт кызына фәнни-тикшеренүләр алып бару өчен “XIX гасыр ахыры XX гасыр башында татар хатын-кызларының белем алу өчен көрәше һәм иҗади эшчәнлеге” дигән тема тәкъдим итә. Бүгенге көндә ул, әлеге тема өстендә җитди эш алып бара. Иҗат уңышлары юлдаш булсын аңа.